أَذْلِيسْ إِقدّْسنْ ڒخْذَايمْ ن رُّوسُولْ ١٣

١٣

ڒِيخْضَارثْ ن بَارْنَابَا ذ بُولُوسْ إِ ثْسخَّارْثْ نْسنْ

١ ثُوغَا ذِينْ ذِي أَنْثِييُوخِييَا ذِي ثْمسْمُونْثْ إِنَابِييّنْ ذ إِمْسڒْمَاذنْ: بَارْ-نَابَا، ذ شِيمْعُونْ ونِّي إِتّْكنَّانْ نِيجرْ، ذ لُوكِييُوسْ زِي ثنْذِينْثْ ن قَايْرَاوَانْ، ذ مَانَاعِينْ ونِّي ذ مِّيسْ ن ونِّي يَاربَّانْ هِيرُوذُوسْ، ڒْْحَاكمْ خْ إِجّْ ن أَرْبَاعْ ن ثمُّورْثْ، ذ شَاوُولْ. ◘ ٢ أَمْ ثُوغَا تّْژُومَّانْ، تّْزَاوْڭنْ أَربِّي، إِنَّا أَسنْ أَرُّوحْ إِقدّْسنْ: ”فَارْزمْ أَيِي-د بَارْ-نَابَا ذ شَاوُولْ إِ ڒْْخذْمثْ ثنِّي ؤُمِي ذ أَسنْ د-ڒَْاغِيغْ.“ ◘ ٣ أَوَارْنِي ڒَْامِي ژُومّنْ، ژُّودْجنْ، سَّارْسنْ خَاسنْ إِفَاسّنْ، سكّنْ ثنْ. ◘

أَسَافَارْ أَمزْوَارُو ن بُولُوسْ غَارْ قُوبْرُوسْ

٤ ڒَْامِي ثُوغَا د-تّْوَاسّكّنْ زِي أَرُّوحْ إِقدّْسنْ، هْوَانْ-د غَارْ سَالُوكِييَا ؤُشَا سّنِّي رُوحنْ ذِي ڒبْحَارْ غَارْ قُوبْرُوسْ. ٥ ؤُمِي إِوْضنْ غَارْ سَالَامِيسْ، بَارّْحنْ س وَاوَاڒْ ن سِيذِيثْنغْ ذِي ثمْزِيذَاوِينْ ن وُوذَاينْ. ثُوغَا يُوحَانَّا إِتّْسخَّارْ إِ-ثنْ. ◘

٦ أَوَارْنِي ڒَْامِي ژْوَانْ مَارَّا ثَاڭْزِيرْثْ، إِوْضنْ-د غَارْ بَافُوسْ. نِيثْنِي ؤُفِينْ ذِينْ إِجّْ ن ورْيَازْ ذ ؤُذَايْ، ثُوغَا وَانِيثَا ذ أَسحَّارْ، ذ أَنَابِي إِسّْخَارِّيقنْ، قَّارنْ أَسْ بَارْ-شُومَا. ◼ ◘ ٧ نتَّا غَارسْ إِشْثْ ن ثسْغُونْثْ إِمْثنْ أَكْ-ذ إِجّْ ن بْنَاذمْ ذ أَمِيغِيسْ، لْعَامِيلْ ؤُمِي قَّارنْ سَارْجِييُوسْ بُولُوسْ. إِڒَاغَا-د لْعَامِيلْ إِ بَارْ-نَابَا ذ شَاوُولْ، ثُوغَا إِمّژْرِي أَذْ إِسڒْ أَوَاڒْ ن أَربِّي. ٨ مَاشَا أَسحَّارْ بَارْ-شُومَا، إِسمْ وَانِيثَا إِتّْوَاثَارْجمْ س ’إِلِيمَاسْ‘، ثُوغَا إِتّْعكَّاسْ إِ-ثنْ، يَارْزُو أَذْ إِسّْبعّذْ لْوَالِي خْ لْ-إِيمَانْ. ◘ ٩ مَاشَا شَاوُولْ ؤُمِي قَّارنْ عَاوذْ بُولُوسْ، إِتّْوَاشُّورْ س أَرُّوحْ إِقدّْسنْ، إِجْعَارْ ذَايسْ مْلِيحْ، إِنَّا: ١٠ ”أَ شكْ، أَقَا ثشُّورذْ س كُوڒْ ڒْْغشّْ ذ كُوڒْ ثحْرَايْمشْثْ، أَ شكْ مِّيسْ ن إِبْڒِيسْ ذ ڒعْذُو ن مَارَّا ثَاسڭْذَا. مَا أَقَا شكْ وَارْ ثْبدّذْ عمَّارْصْ أَذْ ثسّْخَارْوْضذْ إِبْرِيذنْ إِسڭّْذنْ ن سِيذِي؟ ١١ ڒخُّو، خْزَارْ، أَقَا ذَا أَفُوسْ ن سِيذِي ضِيدّْ نّشْ، أَذْ ثْذوْڒذْ ذ أَذَارْغَاڒْ، وَارْ ثتّْوِيڒِيذْ ثَافُوشْثْ عَاذْ إِ يِيجّْ ن ڒْْمِيجَاڒْ.“ ڒخْذنِّي ثوْضَا-د خَاسْ ثَايُّوثْ ذ ثَادْجسْثْ ؤُشَا إِبْذَا إِدُّورَا إِتّْفَافَا، يَارزُّو وِي ث غَا إِڭوّْذنْ زڭْ ؤُفُوسْ. ١٢ ڒَْامِي إِژْرَا لْعَامِيلْ مِينْ إِمْسَارنْ، إِثبْهثْ ؤُشَا يُومنْ ذِي ثْغُورِي ن سِيذِي.

پُولُوسْ ذ بَارْنَابَا غَارْ أَنْثِييُوخِييَا ذِي بِيسِيذِييَا

١٣ بُولُوسْ ذ بَارْ-نَابَا كِّينْ خْ ڒبْحَارْ زِي ثنْذِينْثْ ن بَافُوسْ ؤُشَا إِوْضنْ غَارْ ثنْذِينْثْ ن بِيرْخَا ذِي بَامْفِيلِييَا. سّنِّي يُويُورْ خَاسنْ يُوحَانَّا، إِعْقبْ غَارْ ؤُرْشَالِيمْ. ◘

١٤ مَاشَا نِيثْنِي رُوحنْ زِي بِيرْخَا، كِّينْ خْ ثمُّورْثْ، ؤُشَا إِوْضنْ غَارْ أَنْثِييُوخِييَا، إِشْثْ ن ثنْذِينْثْ ذِي جّْوَايهْ ن بِيسِيذِييَا. ؤُذْفنْ نِيثْنِي غَارْ ثمْزِيذَا ذڭْ وَاسّْ ن سّبْثْ ؤُشَا قِّيمنْ ذِينِّي. ١٥ أَوَارْنِي ثِيغْرِي ن شَّارِيعَا ذ إِنَابِييّنْ، سّكّنْ غَارْسنْ إِمْغَارنْ ن ثمْزِيذَا، نَّانْ: ”أَ إِرْيَازنْ ثَاوْمَاثْ، مَاڒَا ثُوغَا غَارْومْ إِجّْ ن وَاوَاڒْ ن ؤُشجّعْ إِ إِوْذَانْ، بَارّْحمْ زَّايسْ إِ ڒْڭنْسْ!“ ١٦ خنِّي إِكَّارْ بُولُوسْ إِشيَّارْ س ؤُفُوسْ نّسْ، إِنَّا:

”أَ كنِّيوْ، إِرْيَازنْ ن إِسْرَائِيل ؤُ كنِّيوْ إِنِّي إِتّڭّْوذنْ أَربِّي، سْڒمْ! ◘ ١٧ أَربِّي ن ڒْْڭنْسْ-أَ ثُوغَا إِفَارْزْ ڒجْذُوذْ نّغْ ؤُشَا إِسّْڭعّذْ إِ-ثنْ ؤُ إِمَّارْنِي ذَايْسنْ أَطَّاسْ ڒَْامِي ثنْ ثُوغَا ذ إِمعْزَابْ ذِي ثمُّورْثْ ن مِيصْرَا ؤُشَا إِسُّوفّغْ إِ-ثنْ س ؤُفُوسْ نّسْ يُوعْڒَانْ، ◘ ١٨ إِسّشَّا إِ-ثنْ ڒْْمِيجَاڒْ ن أَربْعِينْ ن إِسڭّْوُوسَا ذِي ڒخْڒَا. ◘ ١٩ إِثحَّا سبْعَا ن ڒڭْنُوسْ ذِي ثمُّورْثْ ن كنْعَانْ، ؤُشَا إِوْشَا أَسنْ ثمُّورْثْ نْسنْ ذ ڒْْوَارْثْ إِ نِيثْنِي. ◘ ٢٠ نتَّا إِوْشَا أَسنْ ڒْْقُوضَاثْ إِ يِيجّْ ن ڒْْمِيجَاڒْ ن أَربْعَا-مْيَا ؤُ-خمْسِينْ ن إِسڭّْوُوسَا، أَڒْ ڒْْوقْثْ ن ؤُنَابِي شَامْوِيلْ. ◘

٢١ خنِّي تَّارنْ إِجّْ ن ؤُجدْجِيذْ إِ يِيخفْ نْسنْ ؤُشَا أَربِّي إِوْشَا أَسنْ شَاوُولْ، مِّيسْ ن كِيسْ، إِجّْ ن ورْيَازْ زِي ثقْبِيتْشْ ن بِينْيَامِينْ، ڒْْمِيجَاڒْ ن أَربْعِينْ ن إِسڭّْوُوسَا. ◘ ٢٢ خنِّي إِكّسْ إِ-ث، إِسّْڭعّذْ أَسنْ ذَاوُوذْ ذ أَجدْجِيذْ، ونِّي ؤُمِي خْ إِشْهذْ أَربِّي عَاوذْ أَمُّو: ’ؤُفِيغْ ذَاوُوذْ مِّيسْ ن يَاسَّا، أَقَا-ث ذ إِجّْ ن ورْيَازْ يُوسَا-د خْ ڒْْخَاضَارْ إِنُو، ونِّي إِ غَا إِڭِّنْ مَارَّا مِينْ خْسغْ نشّْ.‘ ◘

٢٣ زِي زَّارِيعثْ نّسْ إِڭَّا أَربِّي إِ إِسْرَائِيل يَاسُوع أَمْسنْجمْ أَمْ مَامّشْ ثُوغَا زَّايسْ إِوَاعْذْ. ٢٤ إِسّكّْ يُوحَانَّا حِيمَا أَذْ إِبَارّحْ س ؤُصغْضَاصْ ن تُّوبثْ قْبڒْ ثْوَاسِيثْ نّسْ إِ مَارَّا ڒْْڭنْسْ ن إِسْرَائِيل. ◘ ٢٥ ؤُمِي د-يِيوضْ يُوحَانَّا إِكمّڒْ ثَاسخَّارْثْ نّسْ، إِنَّا: ’مِينْ ذ أَومْ إِتّْغِيڒْ أَقَا ذ نشّْ؟ وَارْ دْجِيغْ ذ لْمَاسِيحْ، مَاشَا، خْزَارْ، نتَّا أَذْ د-يَاسْ أَوَارْنِي أَيِي، ونِّي ؤُمِي نشّْ وَارْ سْذِيهدْجغْ أَذْ أَسْ فسْيغْ إِفِيڒَانْ ن سَانْذَالِييَاثْ نّسْ!‘ ◘

٢٦ أَ إِرْيَازنْ ثَاوْمَاثْ، ثَارْوَا ن جِّيڒْ ن إِبْرَاهِيمْ ذ يِينِّي أَكِيذْومْ إِتّڭّْوذنْ أَربِّي: إِ كنِّيوْ ؤُمِي د-إِتّْوَاسّكّْ نتَّا، ونِّي ذ أَوَاڒْ إِدَّارنْ. ◘ ٢٧ مِينْزِي إِمزْذَاغْ ن ؤُرْشَالِيمْ ذ إِمقّْرَاننْ نْسنْ وَارْ ذ أَسْ فْهِيمنْ ؤُڒَا ذ إِذْلِيسنْ ن إِنَابِييّنْ إِ إِقَّارنْ كُوڒْ سّبْثْ، مَاشَا نِيثْنِي حكْمنْ خَاسْ ؤُ أَمُّو كمّْڒنْ نِيثْنِي مِينْ يُورَانْ. ◘ ٢٨ وَاخَّا وَارْ ؤُفِينْ ؤُڒَا ذ إِجّْ ن ڒسْبَابْ حِيمَا أَذْ خَاسْ حكْمنْ س ڒْْموْثْ، تَّارنْ زِي بِيلَاطُوسْ تّسْڒِيحْ حِيمَا أَذْ ث نْغنْ. ◘ ٢٩ ؤُمِي كمّْڒنْ مَارَّا مِينْ خَاسْ يُورَانْ، سّهْوَانْ ث-إِ-د زِي ثحْنَاشْثْ ؤُشَا سَّارْسنْ ث ذڭْ ونْضڒْ. ٣٠ مَاشَا أَربِّي إِسّْنكَّارْ إِ-ث-إِ-د زِي ثَادَّارْثْ ن إِمتِّيننْ. ◘ ٣١ إِضْهَارْ أَسنْ-د أَطَّاسْ ن وُوسَّانْ إِ يِينِّي أَكِيسْ إِڭعّْذنْ زِي لْجَالِيلْ غَارْ ؤُرْشَالِيمْ ؤُشَا ڒخُّو أَقَا أَثنْ ذ ڒشْهُوذْ نّسْ زَّاثْ إِ ڒْْڭنْسْ. ◘ ٣٢ خْزَارْ، ؤُڒَا ذ نشِّينْ نتّْبَارّحْ إِ كنِّيوْ س وَاوَاڒْ ن لْوَاعْذْ إِ إِتّْوَانَّانْ إِ ڒجْذُوذْ نّغْ. ◘ ٣٣ خْزَارْ، أَربِّي إِكمّڒْ لْوَاعْذْ إِ نشِّينْ، إِنِّي إِدْجَانْ ذ ثَارْوَا نْسنْ، ؤُمِي د-إِسّْنكَّارْ يَاسُوع زِي ڒْْموْثْ. أَمْ مَامّشْ ثُورَا ذڭْ ؤُزهِّيذْ وِيسّْ ثْنَاينْ:

’شكْ ذ مِّي، أَسّْ-أَ جِّيغْ-د شكْ!‘ ◘

٣٤ س ؤُيَا إِسّْنكَّارْ إِ-ث-إِ-د أَربِّي زِي ثَادَّارْثْ ن إِمتِّيننْ أَڒَامِي وَارْ د-إِذِّيكّْوِيڒْعمَّارْصْ أَڒَامِي غَا إِكِيشُّو، أَمْ ث إِنَّا:

’نشّْ أَذْ أَومْ وْشغْ

ثِيمڭَّا ن أَرْضَا ن ذَاوُوذْ

إِ ذَايْسنْثْ ڒَْامَانْ.‘ ◘

٣٥ س ؤُينِّي إِقَّارْ عَاوذْ ذڭْ إِجّْ ن ومْشَانْ نّغْنِي:

’شكْ وَارْ ثتّجِّيذْ أَمْسِيزْذڭْ نّشْ

أَذْ إِكِيشُّو.‘ ◘

٣٦ مِينْزِي ذَاوُوذْ إِسخَّارْ جَارْ جِّيڒْ نّسْ عْلَاحْسَابْ مِينْ إِخْسْ أَربِّي، ؤُشَا إِمُّوثْ، إِتّْوَاسّْمُونْ غَارْ ڒجْذُوذْ نّسْ، خنِّي إِكِيشُّو. ◘ ٣٧ مَاشَا وَانِيثَا، ونِّي د-إِسّْنكَّارْ أَربِّي، وَارْ إِتّْكِيشِّي.

٣٨ س ؤُيَا، أَ ثَاوْمَاثْ، سْنمْ أَقَا س وَا إِتّْوَابَارّحْ س وغْفَارْ ن دّْنُوبْ إِ كنِّيوْ، ◘ ٣٩ ؤُ سْنمْ أَقَا زِي مَارَّا مِينْ زِي وَارْ ثْزمَّارمْ أَذْ ثتّْوَاسڭّْذمْ س شَّارِيعَا ن مُوسَا، أَقَا أَذْ تّْوَاسڭّْذنْ مَارَّا إِنِّي يُومْننْ زَّايسْ نتَّا. ◘ ٤٠ حْضَامْ خنِّي حِيمَا وَارْ خَاومْ د-إِوطِّي شَا ن مِينْ يُورَانْ ذڭْ إِذْلِيسنْ ن إِنَابِييّنْ:

٤١ ’خْزَارمْ، أَ كنِّيوْ إِنِّي إِتّْبُوصَارنْ،

ثْعجْبمْ ؤُ ثْودَّارمْ،

مِينْزِي نشّْ أَذْ ڭّغْ إِشْثْ ن ڒْْخذْمثْ

ذڭْ وُوسَّانْ نْومْ

إِ وَارْ ثتِّيقِّيمْ

وَاخَّا إِعَاوذْ أَومْ ت شَا ن إِجّنْ.‘ “ ◘

٤٢ ڒَْامِي زَّايْسنْ د-فّْغنْ، تَّارنْ زَّايْسنْ حِيمَا أَذْ كِيسنْ سِّيوْڒنْ س وَاوَاڒنْ ذ إِجّنْ ذڭْ إِجّْ ن سّبْثْ نّغْنِي. ٤٣ ڒَْامِي إِمّْسبْضَا ؤُمُونِي ن ثمْزِيذَا، أَطَّاسْ ن وُوذَاينْ ذ وَاطَّاسْ ن إِمْعَاشَارنْ ن وُوذَاينْ إِنِّي إِتّڭّْوذنْ أَربِّي ضْفَارنْ بُولُوسْ ذ بَارْ-نَابَا. نِيثْنِي ثُوغَا كِيسنْ سَّاوَاڒنْ،عڒْمنْ أَسنْ حِيمَا أَذْ قِّيمنْ تّطّْفنْ ذڭْ أَرْضَا ن أَربِّي. ◘

٤٤ ذِي سّبْثْ إِ د-يُوسِينْ ثُوسَا-د ثنْذِينْثْ مَارَّا حِيمَا أَذْ ثْسڒْ إِ وَاوَاڒْ ن أَربِّي. ٤٥ أَڒَامِي ژْرِينْ وُوذَاينْ ڒْْغَاشِي ذ أَمقّْرَانْ، ذوْڒنْعمَّارنْ س ڒحْسذْ،عكْسنْ مِينْ خفْ إِسِّيوڒْ بُولُوسْ، قَاشْحنْ ؤُ شقّْفنْ ذَايسْ. ٤٦ مَاشَا بُولُوسْ ذ بَارْ-نَابَا نَّانْ س ثرْيَاسْثْ: ”ثُوغَا إِتّْڒِيقْ أَذْ أَومْ نسِّيوڒْ ذ أَمزْوَارُو أَوَاڒْ ن أَربِّي، مَاشَا ؤُمِي ث ثُوڭِيمْ، ؤُ ثكّْسمْ أَوَاڒْ ضِيدّْ إِ يِيخفْ نْومْ بلِّي وَارْ ثسْذِيهدْجمْ ثُوذَارْثْ إِتّْذُومَانْ، خْزَارْ، أَقَا ڒخُّو نشِّينْ أَذْ نْوجّهْ ڒڭْنُوسْ. ◘ ٤٧ مِينْزِي أَمُّو ذ أَنغْ إِوصَّا سِيذِيثْنغْ، إِقَّارْ:

’نشّْ أَرِّيغْ شكْ ذ ثَافَاوْثْ إِ ڒڭْنُوسْ،

حِيمَا أَذْ ثِيڒِيذْ إِ ثُوذَارْثْ أَڒْ طّْرُوفَا ن دُّونشْثْ.‘ “ ◘

٤٨ ؤُمِي سْڒِينْ ڒڭْنُوسْ مَانْ أَيَا، فَارْحنْ سّمْغَارنْ أَوَاڒْ ن سِيذِي ؤُشَا ؤُمْننْ مَارَّا إِنِّي ثُوغَا إِتّْوَافَارْزنْ إِ ثُوذَارْثْ إِتّْذُومَانْ. ٤٩ ؤُشَا إِفّغْ أَوَاڒْ ن سِيذِي غَارْ جِّيهثْ نِّي مَارَّا.

٥٠ مَاشَا ؤُذَاينْ سّْحَارّْشنْ إِمْشنّْعنْ ن ثنْذِينْثْ ذ ثمْغَارِينْ ثِينِّي غَارْسنْثْ شَّانْ ؤُعبّْذنْثْ إِ أَربِّي أَكِيذْسنْ. أَمُّو سّكَّارنْ نِيثْنِي إِشْثْ ن ؤُمَارّثْ خْ بُولُوسْ ذ بَارْ-نَابَا ؤُشَا سُّوفّْغنْ ثنْ بَارَّا إِ ثمُّورْثْ نْسنْ. ◘ ٥١ مَاشَا نِيثْنِي زّرْزنْ ثَاعجَّاجْثْ زڭْ إِضَارنْ نْسنْ خَاسنْ ؤُشَا إِوْضنْ غَارْ ثنْذِينْثْ ن إِكُونِييَا.◘ ٥٢ إِمحْضَارنْ ذوْڒنْ شُّورنْ س ڒفْرَاحثْ ن أَرُّوحْ إِقدّْسنْ. ◘

◘١٣:١ 13:‏1 ڒخ. 14‏:‏26.

◘١٣:٢ 13:‏2 مت. 9‏:‏38؛ ڒخ. 9‏:‏15؛ 22‏:‏21؛ رُوم. 1‏:‏1؛ 10‏:‏15؛ ڭال. 1‏:‏15؛ 2‏:‏8؛ أَفا. 3‏:‏8؛ 1 تِيم. 2‏:‏7؛ 2 تِيم. 1‏:‏11؛ عبر. 5‏:‏4.

◘١٣:٣ 13:‏3 ڒخ. 6‏:‏6؛ 8‏:‏15؛ 19‏:‏6.

◘١٣:٥ 13:‏5 ڒخ. 12‏:‏25.

◼١٣:٦ 13:‏6 ’بَارْ-شُومَا‘ - إِسمْ-أَ وَانِيثَا إِخْسْ أَذْ يِينِي: ’مِّيسْ ن يِيسمْ‘. س ڒْْخطّْ أَڭْڒِينْزِي قَّارنْ أَسْ ’بَارْ-يَاسُوع‘، إِخْسْ أَذْ يِينِي ’مِّيسْ ن يَاسُوع‘. مَاشَا حِيمَا وَارْ ذِينْ إِتِّيڒِي ؤُسكّْوِي جَارْ لْمَاسِيحْ ذ بْنَاذمْ وَانِيثَا، نڭّْ أَسْ ’بَارْ-شُومَا‘.

◘١٣:٦ 13:‏6 ڒخ. 8‏:‏9؛ 19‏:‏13.

◘١٣:٨ 13:‏8 ؤُف. 7‏:‏11؛ 2 تِيم. 3‏:‏8

◘١٣:١٣ 13:‏13 ڒخ. 15‏:‏38.

◘١٣:١٦ 13:‏16 ڒخ. 12‏:‏17؛ 19‏:‏33؛ 21‏:‏40.

◘١٣:١٧ 13:‏17 ؤُف. 1‏:‏1.

◘١٣:١٨ 13:‏18 ؤُف. 16‏:‏35؛ ڒخْڒ. 14‏:‏34؛ إِزهد. 95‏:‏10.

◘١٣:١٩ 13:‏19 أَعَوذ. 7‏:‏1؛ ياش. 14‏:‏2.

◘١٣:٢٠ 13:‏20 ڒقض. 2‏:‏16؛ 3‏:‏9.

◘١٣:٢١ 13:‏21 1 صم. 8‏:‏5؛ 9‏:‏15؛ 10‏:‏15؛ حُوش. 13‏:‏11.

◘١٣:٢٢ 13:‏22 1 صم. 13‏:‏14؛ 16‏:‏12؛ إِزهد. 89‏:‏21؛ ڒخ. 7‏:‏45.

◘١٣:٢٤ 13:‏24 مت. 3‏:‏1؛ مك. 1‏:‏2؛ لك. 3‏:‏2؛ يُوح. 3‏:‏23.

◘١٣:٢٥ 13:‏25 مت. 3‏:‏11؛ يُوح. 1‏:‏20.

◘١٣:٢٦ 13:‏26 مت. 10‏:‏6؛ ڒخ. 3‏:‏26؛ 13‏:‏46.

◘١٣:٢٧ 13:‏27 يُوح. 16‏:‏3؛ ڒخ. 3‏:‏17؛ 1 كُور. 2‏:‏8؛ 1 تِيم. 1‏:‏13.

◘١٣:٢٨ 13:‏28 مت. 27‏:‏20؛ مك. 15‏:‏11؛ لك. 23‏:‏18؛ يُوح. 19‏:‏6.

◘١٣:٣٠ 13:‏30 مت. 28‏:‏6؛ مك. 16‏:‏6؛ لك. 24‏:‏6.

◘١٣:٣١ 13:‏31 مك. 16‏:‏14؛ يُوح. 20‏:‏19؛ 21‏:‏1؛ ڒخ. 1‏:‏3؛ 1 كُور. 15‏:‏5.

◘١٣:٣٢ 13:‏32 أَمز. 3‏:‏15؛ 22‏:‏18؛ 26‏:‏4؛ 49‏:‏10؛ أَعَوذ. 18‏:‏15؛ 2 صم. 7‏:‏12؛ إِزهد. 132‏:‏11؛ إِشا. 4‏:‏2؛ 7‏:‏14؛ 9‏:‏5؛ 40‏:‏10؛ إِرْم. 23‏:‏5؛ 33‏:‏14؛ حِز. 34‏:‏23؛ 37‏:‏24؛ دَان. 9‏:‏24، 25.

◘١٣:٣٣ 13:‏33 إِزهد. 2‏:‏7.

◘١٣:٣٤ 13:‏34 إِشا. 55‏:‏3.

◘١٣:٣٥ 13:‏35 إِزهد. 16‏:‏10؛ إِزهد. 49‏:‏10؛ ڒخ. 2‏:‏27.

◘١٣:٣٦ 13:‏36 1 إِج. 2‏:‏10؛ ڒخ. 2‏:‏29.

◘١٣:٣٨ 13:‏38 لك. 24‏:‏47؛ 1 يُوح. 2‏:‏12

◘١٣:٣٩ 13:‏39 رُوم. 3‏:‏28؛ 8‏:‏3؛ 10‏:‏4؛ ڭال. 2‏:‏16؛ عبر. 7‏:‏19.

◘١٣:٤١ 13:‏41 إِشا. 28‏:‏14؛ حَاب. 1‏:‏5.

◘١٣:٤٣ 13:‏43 ڒخ. 11‏:‏23؛ 14‏:‏22.

◘١٣:٤٦ 13:‏46 ؤُف. 32‏:‏10؛ إِشا. 55‏:‏5؛ مت. 8‏:‏12؛ 10‏:‏6؛ 21‏:‏43؛ ڒخ. 3‏:‏26؛ 13‏:‏26؛ رُوم. 10‏:‏19.

◘١٣:٤٧ 13:‏47 إِشا. 42‏:‏6؛ 49‏:‏6؛ لك. 2‏:‏32.

◘١٣:٥٠ 13:‏50 2 تِيم. 3‏:‏11.

◘١٣:٥١ 13:‏51 مت. 10‏:‏14؛ مك. 6‏:‏11؛ لك. 9‏:‏5؛ 10‏:‏11

◘١٣:٥٢ 13:‏52 ڒخ. 13‏:‏52؛ ڭال. 5‏:‏22؛ 1 Th. 1‏:‏6