١ ژْوَانْ خْ أَمْفِيپُولِيسْ ذ أَپُولُّونِييَا، إِوْضنْ غَارْ ثِيسَّالُونِيكَا مَانِي ثُوغَا إِشْثْ ن ثمْزِيذَا ن وُوذَاينْ. ٢ بُولُوسْ يُوذفْ-د ذِينْ غَارْسنْ، أَمْ ثُوغَا ذ لْقَاعِيذَا نّسْ. ذِي ثْڒَاثَا ن وُوسَّانْ ن سّبْثْ إِسِّيوڒْ أَكِيذْسنْ زِي ثِيرَا إِقدّْسنْ. ٣ إِفّسَّارْ ؤُ إِسّْبيّنْ أَسنْ أَمُّو: ”ثُوغَا إِتّْخصَّا إِ لْمَاسِيحْ أَذْ إِتّْوَاودّبْ ؤُ أَذْ د-إِكَّارْ زِي ثَادَّارْثْ ن إِمتِّيننْ. أَقَا نتَّا ذ يَاسُوع، لْمَاسِيحْ مِينْ خفْ ذ أَومْ بَارّْحغْ.“ ◘17:‏3 إِزهد. 22‏:‏7؛ مت. 16‏:‏21؛ لك. 24‏:‏46. ٤ شَا زَّايْسنْ ؤُمْننْ، مُوننْ أَكْ-ذ بُولُوسْ ذ سِيلَا، ؤُڒَا ذ أَطَّاسْ ن إِيُونَانِييّنْ إِنِّي إِتّڭّْوذنْ أَربِّي، ؤُڒَا ذ ثِيمْغَارِينْ إِشنّْعنْ، وَارْ إِدْجِي ذْرُوسْثْ زَّايْسنْثْ، ◘17:‏4 ڒخ. 28‏:‏24.

٥ مَاشَا ؤُذَاينْ ذوْڒنْ تَّاسْمنْ، نذْهنْ شَا ن يرْيَازنْ إِعفَّاننْ زڭْ إِبْرِيذنْ ن ثنْذِينْثْ، سّْڭعّْذنْ إِجّْ ن ڒْْغَاشِي ذ أَمقّْرَانْ غَارْسنْ، سّْهَاجَانْ ثَانْذِينْثْ ؤُشَا سّكَّارَانْ ثنْ ضِيدّْ ن ثَادَّارْثْ ن يَاسُونْ، أَرْزُونْ أَذْ ثنْ سلّْمنْ إِ ڒْْغَاشِي. ٦ ؤُمِي وَارْ ثنْ ؤُفِينْ ذِينْ، جَارّنْ يَاسُونْ ذ وَاوْمَاثنْ إِ ذِينْ إِدْجَانْ غَارْ إِزدْجِيفنْ ن ثنْذِينْثْ، سْغُويُّونْ: ”خْزَارْ، إِنَا، إِنِّي إِسّْغوّْغنْ ثَامُّورْثْ مَارَّا، أَقَا ؤُسِينْ-د عَاوذْ ذَا! ◘17:‏6 ڒخ. 16‏:‏20. ٧ يَاسُونْ إِسِّيذفْ إِ-ثنْ غَارسْ ذ إِنوْجِيونْ، وَاخَّا نِيثْنِي مَارَّا تّْعكّْسنْ ثِيوْصيَّاثْ ن قَايْصَارْ، قَّارنْ أَقَا ذَا أَجدْجِيذْ نّغْنِي، أَقَا-ث ذ يَاسُوع.“ ◘17:‏7 لك. 23‏:‏2؛ يُوح. 19‏:‏12. ٨ سَّارجْفنْ إِزدْجِيفنْ ن ثنْذِينْثْ ذ ڒْْڭنْسْ ؤُمِي سْڒِينْ أَيَا. ٩ مَاشَا أَوَارْنِي ڒَْامِي طّْفنْ ڒْْعَارْبُونَاثْ زِي يَاسُونْ ذ يِينّغْنِي، أَرْخُونْ أَسنْ.

١٠ ڒخْذنِّي سّكّنْ ثَاوْمَاثْ بُولُوسْ ذ سِيلَا غَارْ بِيرِييَا س دْجِيڒثْ. ؤُمِي ذِينْ إِوْضنْ، رُوحنْ غَارْ ثمْزِيذَا ن وُوذَاينْ، ◘17:‏10 ڒخ. 9‏:‏25. ١١ مِينْزِي ؤُذَاينْ ذِينِّي ثُوغَا أَثنْ خَارْ زڭْ إِنِّي إِ يدْجَانْ ذِي ثِيسَّالُونِيكَا، مِينْزِي ثُوغَا خْسنْ أَذْ سْڒنْ إِ وَاوَاڒْ كُوڒْ أَسّْ، أَرزُّونْ أَذْ سّْننْ زِي ثِيرَا إِقدّْسنْ، مَا ثِيمسْڒَايِينْ-أَ أَقَا ثنْثْ أَمنِّي. ◘17:‏11 إِشا. 34‏:‏16؛ لك. 16‏:‏29؛ يُوح. 5‏:‏39. ١٢ أَطَّاسْ زَّايْسنْ ؤُمْننْ، ؤُڒَا ذ أَطَّاسْ ن ثمْغَارِينْ ذ يرْيَازنْ زڭْ إِيُونَانِييّنْ.

١٣ مَاشَا، ؤُمِي ؤُذَاينْ ن ثِيسَّالُونِيكَا سّْننْ بلِّي بُولُوسْ ثُوغَا إِتّْبَارّحْ أَوَاڒْ ن أَربِّي ذِي بِيرِييَا، ؤُسِينْ-د نِيثْنِي عَاوذْ ذِينْ، وَارْ سّْبدّنْ زڭْ ؤُسْغوّغْ ؤُ زڭْ ؤُسْخَارْوضْ جَارْ إِمزْذَاغْ ن ثنْذِينْثْ. ◘17:‏13 1 تس. 2‏:‏14. ١٤ خَاسْ ؤُشَا جِّينْ وَاوْمَاثنْ أَذْ إِهْوَا بُولُوسْ ڒخْذنِّي غَارْ ڒبْحَارْ، مَاشَا سِيلَا ذ ثِيمُوثِييُو قِّيمنْ ذِينْ. ١٥ إِنِّي إِسّْقبْضنْ بُولُوسْ، إِوْينْ ث غَارْ ثنْذِينْثْ ن أَثِينَا. خنِّي، ؤُمِي ث جِّينْ، طّْفنْ زَّايسْ إِشْثْ ن ثبْرَاثْ إِ سِيلَا ذ ثِيمُوثِييُو مَاحنْذْ نِيثْنِي أَذْ غَارسْ د-أَسنْ ذغْيَا. ◘17:‏15 ڒخ. 18‏:‏5.

١٦ أَمْ ثنْ ثُوغَا إِتّْرَاجَا بُولُوسْ ذِي أَثِينَا، ثُوغَا أَرُّوحْ نّسْ إِخيّقْ ؤُمِي إِژْرَا ثَانْذِينْثْ ثشُّورْ س ڒخْيَاڒَاثْ ن لْ-أَصْنَامْ. ١٧ س ؤُينِّي ثُوغَا إِسَّاوَاڒْ ذِي ثمْزِيذَا أَكْ-ذ وُوذَاينْ ؤُ أَكْ-ذ يِينِّي إِتّڭّْوذنْ أَربِّي، ؤُ ذِي سُّوقْ ؤُڒَا أَكْ-ذ إِنِّي إِ ثُوغَا إِتّْمُوننْ ذِينِّي كُوڒْ أَسّْ. ١٨ عَاذْ شَا ن إِفَايْلَاسُوفنْ زِي ثمْزِيذَا ن إِبِيكُورُوسْ ؤُ شَا نّغْنِي، قَّارنْ أَسْ إِسْثُووَاكِييّنْ، مْنَاقَاشنْ أَكِيذسْ. شَا زَّايْسنْ نَّانْ: ”مِينْ إِخْسْ أَذْ يِينِي وَانِيثَا س ڒْْهَارْذْ-أَ قَاعْ؟“ مَاشَا إِنّغْنِي نَّانْ: ”إِضْهَارْ-د أَقَا-ث ذ أَمْبَارّحْ ن إِربِّيثنْ إِغْرِيبنْ، مِينْزِي ثُوغَا إِتّْبَارّحْ أَسنْ س يَاسُوع ذ ثْنُوكْرَا نّسْ زڭْ إِمتِّيننْ. ١٩ ؤُشَا إِوْينْ ث، نذْهنْ ث غَارْ ڒبْنِي ن ثَادَّارْثْ ن شّْرعْ ؤُمِي قَّارنْ أَرِييُوبَاڭُوسْ، نَّانْ أَسْ: ”مَا إِعدّڒْ أَذْ نسّنْ مَانْ ثَاغُورِي ن جْذِيذْ إِ ثتّْبَارّْحذْ؟“، ٢٠ مِينْزِي شكْ ثِيوْيذْ شَا ن ثْمسْڒَايِينْ ثِيغْرِيبِينْ إِ إِمزُّوغنْ نّغْ، ؤُ نشِّينْ نخْسْ أَذْ نسّنْ مِينْ إِخْسْ أَذْ يِينِي مَانْ أَيَا.“ ٢١ مَارَّا إِنِّي زِي أَثِينَا ذ مَارَّا إِبَارَّانِييّنْ إِنِّي ذِينْ إِقِّيمنْ، سّعْذُونْ ڒْْوقْثْ مْغِيرْ حِيمَا أَذْ خبَّارنْ ؤُ حِيمَا أَذْ سْڒنْ إِشْثْ ن ڒْْحَاجّثْ ن جْذِيذْ.

٢٢ إِكَّارْ-د بُولُوسْ، إِبدّْ ذِي ثَادَّارْثْ ن شّْرعْ قَّارنْ أَسْ ’أَرِييُوبَاڭُوسْ‘، إِنَّا: ”أَ إِرْيَازنْ ن أَثِينَا، ؤُفِيغْ بلِّي كنِّيوْ ثتّْعمَّارمْ سنّجْ إِ طَّارْفْ س ثِيڭّْوُوذِي ن شّْوَاطنْ زِي كُوڒْ أَغزْذِيسْ. ٢٣ مِينْزِي ؤُمِي نّْضغْ ذِي ثنْذِينْثْ نْومْ، ژْرِيغْ ثِيمْزِيذَاوِينْ نْومْ، ؤُفِيغْ عَاوذْ إِجّْ ن ؤُعَالْطَارْ زمّنْ خَاسْ: ’إِ أَربِّي إِ وَارْ إِتّْوَاسّْننْ‘. س ؤُينِّي ونِّي ثْعبّْذمْ كنِّيوْ، أَمْ وَارْ ث ثسِّينمْ، ذ وَا إِ زِي ذ أَومْ تّْبشَّارغْ. ٢٤ مِينْزِي أَربِّي ونِّي د-يجِّينْ دُّونشْثْ ذ مَارَّا مِينْ ذَايسْ، ونِّي إِدْجَانْ ذ سِيذِي ن ؤُجنَّا ذ ثمُّورْثْ، وَارْ إِزدّغْ شَا ذِي ثْزَاوِييِّينْ إِ إِتّْوَاڭّنْ س إِفَاسّنْ ن إِوْذَانْ، ◘17:‏24 أَمز. 1‏:‏1؛ 2 إِم. 6‏:‏30؛ إِزهد. 33‏:‏6؛ 124‏:‏8؛ 146‏:‏6؛ إِشا. 66‏:‏1؛ ڒخ. 7‏:‏48؛ 14‏:‏15؛ أَسَا. 14‏:‏7. ٢٥ ؤُڒَا وَارْ خَاسْ إِتّْوَاسخَّارْ س إِفَاسّنْ ن إِوْذَانْ أَخْمِي نتَّا إِحْوَاجْ شَا، مِينْزِي نتَّا سِيمَانْثْ نّسْ إِوْشَا إِ مْكُوڒْ بْنَاذمْ ثُوذَارْثْ ذ ثْوَارِّيثْ ن نّفْسْ. ◘17:‏25 أَمز. 2‏:‏7. ٢٦ زڭْ إِذَامّنْ ن يِيجّنْ إِڭَّا مَارَّا ڒڭْنُوسْ ن بْنَاذمْ حِيمَا أَذْ زذْغنْ خْ وُوذمْ ن ثمُّورْثْ مَارَّا، ؤُ س ڒُْومُورْ نّسْ إِفَارْزْ أَسنْ ڒْْمِيجَاڒَاثْ ن ڒْْوقْثْ ؤُشَا إِڭَّا إِيْمِيرنْ ن ثْزذِّيغْثْ ن إِوْذَانْ، ◘17:‏26 أَعَوذ. 32‏:‏8‏:‏ كُول. 1‏:‏15، 16 ٢٧ حِيمَا أَذْ أَرْزُونْ خْ أَربِّي ؤُ أَذْ زَّايسْ تَّارنْ، أَذْ ثَاغْ أَذْ ث أَفنْ س مَارَّا مِينْ زَّايسْ إِتّْوَاڭّنْ، مَاغَارْ نتَّا وَارْ إِڭّْوِيجْ شَا أَطَّاسْ خْ كُوڒْ إِجّنْ زَّايْنغْ. ٢٨ مِينْزِي نشِّينْ ذَايسْ إِ ندَّارْ ؤُ ذَايسْ إِ نتّنْهزَّا ؤُ ذَايسْ إِ ندْجْ، أَمْ مَامّشْ نَّانْ شَا ن إِمِيغِيسنْ نْومْ: ’أَقَا نقَّارْصْ زَّايسْ نتَّا!‘ ٢٩ س ؤُينِّي، أَمْ د-إِقَّارْصْ بْنَاذمْ زِي أَربِّي، إِتّْخصَّا وَارْ نْحسّبْ شَا بلِّي ؤُرغْ نِيغْ نُّوقَارْثْ نِيغْ أَژْرُو إِ إِتّْوَاڭّنْ س لْفنّْ ؤُ س ثْزمَّارْ ن بْنَاذمْ، أَقَا أَثنْ أَمْ أَربِّي إِ دْجَانْ. ◘17:‏29 إِشا. 40‏:‏18. ٣٠ أَربِّي إِجَّا أَذْ عْذُونْثْ زّْمَانَاثْ ن ؤُودَّارْ، مَاشَا ڒخُّو، ذِي زّْمَانْ-أَ إِتَّامَارْ إِ مَارَّا إِوْذَانْ، أَقَا إِتّْخصَّا إِ كُوڒْ بْنَاذمْ ذِي كُوڒْ أَمْشَانْ أَذْ د-إِذْوڒْ غَارْ أَربِّي! ◘17:‏30 لك. 24‏:‏47. ٣١ مِينْزِي نتَّا إِڭَّا إِجّْ ن وَاسّْ إِ ذِي إِ غَا إِحْكمْ خْ مَارَّا ثَامُّورْثْ س ڒْْحقّْ س إِجّْ ن بْنَاذمْ إِ إِفَارْزْ. نتَّا إِڭَّا كُوڒْ  إِجّنْ إِتّْخصَّا أَسْ مَاحنْذْ أَذْ زَّايسْ يَامنْ، ڒَْامِي ث-إِ-د-إِسّْنكَّارْ زِي ثَادَّارْثْ ن إِمتِّيننْ.“

٣٢ ؤُمِي سْڒِينْ خْ ثْنُوكْرَا زِي ثَادَّارْثْ ن إِمتِّيننْ، بْذَانْ سْثْهزَّانْ س مَانْ أَيَا، مَاشَا إِنّغْنِي نَّانْ: ”إِشْثْ ن ثْوَاڒَا نّغْنِي نخْسْ أَذْ زَّايكْ نْسڒْ كْثَارْ خْ مَانْ أَيَا.“ ٣٣ أَمُّو إِفّغْ بُولُوسْ زِي ڒْْوسْطْ نْسنْ. ٣٤ شَا زَّايْسنْ ضْفَارنْ ث، ؤُمْننْ. ثُوغَا ذِييُونِيسِييُوسْ ذ إِجّنْ زَّايْسنْ، أَقَا-ث جَارْ ڒْْقُوضَاثْ ن أَرِييُوبَاڭُوسْ، ؤُڒَا ذ إِشْثْ ن ثمْغَارْثْ قَّارنْ أَسْ ذَامَارِيسْ ؤُ إِنّغْنِي أَكِيذْسنْ. *