١ ”سْڒمْ أَوَاڒْ-أَ إِ كِيذْومْ إِسَّاوَاڒْ سِيذِي، أَ أَيْثْ ن إِسْرَائِيل، أَكْ-ذ كُوڒْ ڒَْادْجْ نِّي سّْڭعّْذغْ نشّْ زِي ثمُّورْثْ ن مِيصْرَا، أَمْ قَّارغْ: ٢ ’زِي مَارَّا ڒَْادْجَاثْ ن دُّونشْثْ سّْنغْ مْغِيرْ كنِّيوْ. خْ ؤُيَا أَذْ كنِّيوْ عَاقْبغْ خْ مَارَّا ڒْْمُوعْصِييَّاثْ نْومْ! ٣ مَا أَذْ ؤُيُورنْ ثْنَاينْ أَكْ-ذ وَايَاوْيَا، بْڒَا مَا تَّافْقنْ؟ ٤ مَا أَذْ إِزهَّارْ وَايْرَاذْ ذڭْ وزْغَارْ ڒَْامِي وَارْ غَارسْ بُو زَّارْذثْ؟ مَا أَيْرَاذْ ذ أَمژْيَانْ أَذْ يجّْ ثْمِيجَّا نّسْ أَذْ ثتّْوَاسڒْ زڭْ يفْرِي، أَمْ وَارْ إِمْنِيعْ وَالُو؟ ◼3:‏4 ’أَزْغَارْ‘ - نِيغْ ’ڒْغَابثْ‘ نِيغْ ’ثَازْڭَانْثْ‘. ٥ مَا أَذْ إِنْضَارْ وجْضِيضْ ذِي ڒْْفخْ خْ وُوذمْ ن ثمُّورْثْ، مَاڒَا وَارْ ذِينْ ذَايسْ مَاشَّا إِ نتَّا؟ مَا أَذْ إِنُّورْفعْ ڒْْفخْ زِي ثمُّورْثْ مَاڒَا ثخْوَا؟ ٦ مَاڒَا حذْ إِسُوضْ ذڭْ ؤُيِيشّْ ن إِشَارِّي ذِي ثنْذِينْثْ، مَا وَارْ إِتَّارْجِيجِي ڒْْڭنْسْ؟ مَاڒَا إِمْسَارْ إِجّْ ن ؤُشڒْوَاوْ ذِي ثنْذِينْثْ، مَا وَارْ ت إِڭِّي سِيذِي؟◘3:‏6 إِشا. 45‏:‏7؛ إِڭجذ. 3‏:‏37، 38 ٧ مَاغَارْ سِيذِي إِنُو، سِيذِي، وَارْ إِتّڭّْ ؤُڒَا ذ إِشْثْ نْ ڒْحَاجثْ بْڒَا مَا أَذْ إِسَّارْڭبْ شّْوَارْ نّسْ إِنُّوفَّارنْ إِ إِمْسخَّارنْ نّسْ، إِنَابِييّنْ. ٨ أَيْرَاذْ إِزهَّارْ، مَانْ ونْ وَارْ إِتّڭّْوْذنْ؟ سِيذِي إِنُو، سِيذِي، أَقَا إِسِّيوڒْ، مَانْ ونْ وَارْ إِتّْنبَّا؟‘ “

٩ ”جّمْ أَذْ إِتّْوَاسڒْ أَيَا ذِي ڒقْصُورْ ذِي أَشْذُوذْ ؤُ ذِي ڒقْصُورْ ن ثمُّورْثْ ن مِيصْرَا، إِنِي: ’مُونمْ خْ إِذُورَارْ ن سَامَارْيَا ؤُ خْزَارمْ أَنهْوڒْ أَمقّْرَانْ ذِي ڒْْوسْطْ نّسْ ؤُ إِنِّي ذَايسْ إِتّْوَاحْصَارنْ!‘ ١٠ نِيثْنِي وَارْ سِّيننْ مَامّشْ غَا ڭّنْ مِينْ إِسڭّْذنْ، إِقَّارْ سِيذِي، نِيثْنِي إِنِّي إِيَارّْونْ لْعُونْفْ ذ ثْكشَّاضْثْ ذِي ڒقْصُورْ نْسنْ.‘ ١١ س ؤُيَا، أَمُّو إِ إِقَّارْ سِيذِي إِنُو، سِيذِي: ’إِجّْ ن ڒعْذُو! نتَّا إِتّنّضْ إِ ثمُّورْثْ مَارَّا! أَذْ إِسّهْوَا جّهْذْ نّمْ زَّايمْ ؤُ ڒقْصُورْ نّمْ أَذْ تّْوَاكشّْضنْ.‘ ◘3:‏11 إِشا. 28‏:‏1‏-‏3 ١٢ أَمُّو إِ إِقَّارْ سِيذِي: ’أَمْ إِفكّْ إِجّْ ن ؤُمكْسَاوْ ثْنَاينْ ن إِضَارنْ نِيغْ إِجّْ ن يِيخفْ ن ؤُمزُّوغْ زڭْ ؤُقمُّومْ ن وَايْرَاذْ، أَمُّو إِ غَا تّْوَاسّْنجْمنْ أَيْثْ ن إِسْرَائِيل، إِنِّي إِ ذِينْ إِتّْغِيمَانْ ذِي سَامَارْيَا خْ ثْمَا ن قَامَا ؤُ خْ يِيشْثْ ن ثْزرْبِييّثْ زِي ذِيمَاشْقْ ڭِّينْ ت خْ يِيشْثْ ن ڒمْطَارْبثْ.‘ “

١٣ ”سْڒمْ ؤُ شهْذمْ ذِي ثَادَّارْثْ ن يَاعْقُوبْ، أَمُّو إِ إِقَّارْ سِيذِي إِنُو سِيذِي، أَربِّي ن ڒْْعسْكَارَاثْ. ١٤ مِينْزِي ذڭْ وَاسّْ نِّي ذِي غَا خڒْفغْ إِخطَّانْ ن إِسْرَائِيل، أَذْ سِّيوْضغْ عَاوذْ أَخدْجصْ خْ إِعَالْطَارنْ ن بَايْثْ-إِلْ، مَاغَارْ أَذْ تّْوَاقضْعنْ وَاشَّاونْ ن ؤُعَالْطَارْ، أَذْ وْضَانْ غَارْ ثمُّورْثْ. ١٥ نشّْ أَذْ هذْمغْ ثَازذِّيغْثْ ن ثْڭَارْسْثْ ذ ثْزذِّيغْثْ ن ؤُنبْذُو ؤُ ثُوذْرِينْ ن ڒْْعَاجْ أَذْ تّْوَاقْضَانْثْ، ؤُ أَطَّاسْ ن ثُوذْرِينْ أَذْ تّْوَارذْدْجنْثْ!‘، أَمُّو إِ إِقَّارْ سِيذِي.“ ◼3:‏15 ’ڒْعَاجْ‘ - نِيغْ ’لْعَاجْ‘.