١ ”سْڒمْ أَوَاڒْ-أَ إِ خَاومْ سّكَّارغْ، إِجّْ ن يزْڒِي ن ؤُڭجْذُورْ، أَ ثَادَّارْثْ ن إِسْرَائِيل.

٢ ”أَقَا ثوْضَا ثعْزَارشْثْ إِسْرَائِيل،

وَارْ ثتّكَّارْ عَاذْ.

نتَّاثْ ثمّنْضَارْ غَارْ ثمُّورْثْ نّسْ،

وَارْ ذِينْ ؤُڒَا ذ إِجّْ إِ ت غَا إِسّْبدّنْ.“

٣ ”مَاغَارْ أَمُّو إِ إِقَّارْ سِيذِي إِنُو، سِيذِي: ثَانْذِينْثْ نِّي إِ غَا إِفّْغنْ س وَاڒفْ ن يرْيَازنْ، أَذْ أَسْ ثْشطّْ مْيَا، ؤُ ثنِّي إِ غَا إِفّْغنْ س مْيَا، أَذْ أَسْ ثْشطّْعشْرَا إِ ثَادَّارْثْ ن إِسْرَائِيل. ٤ مَاغَارْ أَمُّو إِ إِقَّارْ سِيذِي غَارْ ثَادَّارْثْ ن إِسْرَائِيل: أَرْزُومْ خَافِي، خنِّي أَذْ ثدَّارمْ!“ ٥ وَارْ ثَارزّْفمْ بَايْثْ-إِلْ، وَارْ د-ثتِّيسمْ غَارْ جِيلْجَالْ ؤُ وَارْعدُّومْ خْ بِئرْ-سبْعَا، مِينْزِي س ثِيذتّْ جِيلْجَالْ أَذْ إِتّْوَانْذهْ غَارْ لْمنْفَا ؤُ بَايْثْ-إِلْ أَذْ ثتّْوَابطّڒْ. ◘5:‏5 عَام. 4‏:‏4 ٦ أَرْزُومْ خْ سِيذِي، خنِّي أَذْ ثدَّارمْ، حِيمَا نتَّا وَارْ إِتِّيذِيفْ غَارْ ثَادَّارْثْ ن يُوسُوفْ أَمْ يِيشْثْ ن ثْمسِّي إِتّتّنْ ؤُ وَارْ ذِينْ إِتِّيڒِي ؤُڒَا ذ إِجّْ مَاحنْذْ أَذْ ت إِسّخْسِي ذِي طّْوعْ ن بَايْثْ-إِلْ.“

٧ ”أَخيّبْ إِ يِينِّي إِتَّارَّانْ ڒْْحقّْ غَارْ شِّيحْ ؤُ إِنِّي إِسّْهكّْوَانْ ثَاسڭْذَا غَارْ ثمُّورْثْ. ٨ نتَّا ذ ونِّي إِڭِّينْ إِبْلِييَاذنْ ذ ؤُرِييُونْ ذ ونِّي إِتَّارَّانْ ثِيڒِي ن ڒْْموْثْ ذ ثُوفُّوثْ ن ڒْْحَاڒْ، ذ ونِّي إِتَّارَّانْ أَسّْ ذ دْجِيڒثْ، ونِّي إِتّْڒَاغَانْ إِ وَامَانْ ن ڒبْحَارْ ؤُ إِفَارّغْ إِ-ثنْ ثِيوَا إِ وُوذمْ ن ثمُّورْثْ، أَقَا سِيذِي ذ إِسمْ نّسْ!، ◘5:‏8 أَيُوبْ 9‏:‏9؛ 38‏:‏31؛ عَام. 9‏:‏6 ٩ أَقَا نتَّا إِڭَّا أَذْ د-يَاسْ وَاردّدْجْ أَمْ وَاسَّامْ خْ ونِّي إِجهْذنْ ؤُ أَقَا يَارَّا أَردّدْجْ أَذْ د-يَاسْ خْ لْقلْعَا. ١٠ مَاشَا نِيثْنِي شَارّْهنْ ونِّي إِدَّافَاعنْ خْ ڒْْحقّْ ذِي ثوَّارْثْ ن ثنْذِينْثْ ؤُ نِيثْنِي تّْعِيفَّانْ ونِّي إِسَّاوَاڒنْ نِيشَانْ. ١١ س ؤُيَا، مِينْزِي كنِّيوْ ثْعفّْسمْ خْ ؤُمُوقْڒِيڒْ ؤُ ثتّْكسّمْ زَّايسْ ڒعْشُورْ ن إِمنْذِي: وَاخَّا ثبْنَامْ ثُوذْرِينْ نْومْ س وژْرُو يُويْذَانْ، وَارْ ذَايْسنْثْ ثْزدّْغمْ، وَاخَّا ثژُّومْ ثِيزَايَارِينْ شْنَانْثْ ذڭْ إِمَارْجَاعنْ، وَارْ زَّايْسنْثْ ثْسسّمْ بِينُو. ◘5:‏11 صَاف. 1‏:‏13 ١٢ مَاغَارْ نشّْ سّْنغْ أَطَّاسْ ن إِعذِّيينْ نْومْ ؤُ أَقَا دّْنُوبْ نْومْ سّڭّْوَاذنْ: نِيثْنِي حصَّارنْ أَمْسڭّذْ، تّطّْفنْ ثْمنْيَاثْ ن ڒْْغشّْ ؤُ عَارّْننْ إِمزْڒَاضْ غَارْ بَارَّا ذِي ثوَّارْثْ ن ثنْذِينْثْ. ١٣ س ؤُيَا أَذْ إِسّغْذْ ؤُمِيغِيسْ ذِي ڒْْوقْثْ نِّي، مَاغَارْ أَذْ ثِيڒِي ذ إِشْثْ ن ڒْْوقْثْ ذ ثَاعفَّانْثْ.“

١٤ ”أَرْزُومْ مِينْ إِصبْحنْ، وَارْ إِدْجِي مِينْ إِعفّْننْ، خنِّي أَذْ كِيذْومْ يِيڒِي سِيذِي، أَربِّي ن ڒْْعسْكَارَاثْ، أَمْ مَامّشْ ث ثقَّارمْ كنِّيوْ. ١٥ شَارْهمْ مِينْ إِعفّْننْ، ثخْسمْ مِينْ إِصبْحنْ ؤُ سْمثْنمْ ڒْْحقّْ ذِي ثوَّارْثْ ن ثنْذِينْثْ. أَذْ ثَاغْ أَذْ إِحِينّْ سِيذِي، أَربِّي ن ڒْْعسْكَارَاثْ خْ مِينْ إِقِّيمنْ ن يُوسُوفْ.“ ◘5:‏15 إِزهد. 34‏:‏15؛ 97‏:‏10؛ رُوم. 12‏:‏9 ١٦ س ؤُيَا، أَمُّو إِ إِقَّارْ سِيذِي، أَربِّي ن ڒْْعسْكَارَاثْ، سِيذِي إِنُو: ذِي مَارَّا أَزَّاينْ أَذْ ثِيڒِي ثْغُويِّيثْ ن وشْضَانْ ؤُ ذِي مَارَّا زّْنَاقِي أَذْ إِنِينْ: ’أَيَّاوْ! أَيَّاوْ!‘، ؤُ نِيثْنِي أَذْ ڒَْاغَانْ خْ ؤُفدْجَاحْ، مَاحنْذْ أَذْ إِشْضنْ، ؤُ خْ يِينِّي إِسّْننْ إِزْڒَانْ ن وشْضَانْ مَاحنْذْ أَذْ سْغُوينْ س وشْضَانْ. ١٧ ذِي مَارَّا إِمَارْجَاعنْ ن ؤُضِيڒْ أَذْ ذِينْ ثِيڒِي ثْغُويِّيثْ ن وشْضَانْ، مَاغَارْ نشّْ أَذْ شُوقغْ ذِي ڒْوسْثْ نّشْ، إِقَّارْ سِيذِي.“

١٨ ”أَيَّاوْ إِ يِينِّي إِتّْمژْرنْ ذڭْ وَاسّْ ن سِيذِي! مِينْ غَارْومْ إِ غَا يِيڒِي وَاسّْ ن سِيذِي؟ أَذْ يِيڒِي ذ ثَادْجسْثْ، وَارْ إِتِّيڒِي ذ ثَافَاوْثْ. ◘5:‏18 إِرْم. 30‏:‏7؛ يُووِ. 2‏:‏2؛ صَاف. 1‏:‏15 ١٩ أَذْ يِيڒِي أَمْ شَا ن إِجّْ إِ يَاروْڒنْ زڭْ وَايْرَاذْ، خنِّي يُوسَا-د غَارسْ دُّوبْ، نِيغْ أَمْ شَا ن إِجّْ إِ يُوذْفنْ غَارْ ثَادَّارْثْ، إِعمّذْ س ؤُفُوسْ نّسْ خْ ڒْْحِيضْ، خنِّي إِزْعفْ إِ-ث إِجّْ ن ؤُفِيغَارْ. ٢٠ مَا وَارْ إِتِّيڒِي أَسّْ ن سِيذِي ذ ثَادْجسْثْ ؤُ وَارْ إِتِّيڒِي ذ ثْفَاوْثْ؟ ذ طّْڒَامْ ؤُ وَارْ ثدْجِي ؤُڒَا ذ إِشْثْ ن جُّورّثْ ن ثْفَاوْثْ!“

٢١ ”نشّْ شَارّْهغْ، عِيفّغْ ؤُرَارنْ نْومْ ؤُ وَارْ تّخْسغْ أَذْ شمّغْ إِمُونِيثنْ نْومْ إِفَارْزنْ. ◘5:‏21 إِشا. 1‏:‏11؛ إِرْم. 6‏:‏20 ٢٢ مَاغَارْ وَاخَّا كنِّيوْ ثِيوْيمْ أَيِي-ذ ثِيغَارْصَا نْومْ ن وشْمَاضْ ذ ثوْهِيبِينْ نْومْ ن ڒْْغِيدْجثْ، نشّْ وَارْ خَاسنْثْ أَرطِّيغْ شَا ؤُ نشّْ وَارْ خزَّارغْ وَالُو غَارْ ثوْهِيبْثْ ن ڒهْنَا ن ڒْْمَاڒْ إِصحّنْ. ٢٣ سِيڭّْوجْ خَافِي دّْرِيزْ ن إِزْڒَانْ نّشْ، وَارْ خْسغْ أَذْ سْڒغْ ڒْْحسّْ ن لهَارْپَاثْ نّشْ. ٢٤ أجّْ ڒْْحُوكْمْ أَذْ يَازّڒْ أَمْ وَامَانْ إِتَّازّْڒنْ ؤُ ثَاسڭْذَا أَمْ يِيجّْ ن إِغْزَارْ إِتَّازّْڒنْ ڒبْذَا.“

٢٥ ”مَا ثِيوْيمْ أَيِي-د ثِيغَارْصَا ذ ثوْهِيبْثْ ن ڒْْغِيدْجثْ ذِي ڒخْڒَا أَربْعِينْ ن إِسڭّْوُوسَا، أَ ثَادَّارْثْ ن إِسْرَائِيل؟ ◘5:‏25 ڒخ. 7‏:‏42 ٢٦ كنِّيوْ ثَارْبُومْ إِقِيضَانْ ن ؤُجدْجِيذْ نْومْ ذ ؤُضَارْ إِ خفْ ثُوغَا تّْبدَّانْ ڒخْيَاڒَاثْ نْومْ إِ يثْرِي ن إِربِّيثنْ نْومْ، إِنِّي ثڭِّيمْ إِ يِيخفْ نْومْ. ٢٧ نشّْ أَذْ كنِّيوْ نذْهغْ غَارْ لْمنْفَا، أَغِيرِينْ إِ ذِيمَاشْقْ، أَمُّو إِ إِقَّارْ سِيذِي، أَربِّي ن ڒْْعسْكَارَاثْ، أَقَا ذ وَا ذ إِسمْ نّسْ.“