أَذْلِيسْ إِقدّْسنْ إِكُولُوسِييّنْ 3

ثُوذَارْثْ نّغْ ثْنُوفَّارْ أَكْ-ذ لْمَاسِيحْ ذِي أَربِّي

1 مَاڒَا ثتّْوَاسّْنكَّارمْ-د أَكْ-ذ لْمَاسِيحْ، خنِّي أَرْزُومْ مِينْ إِدْجَانْ سنّجْ، مَانِي إِقِّيمْ لْمَاسِيحْ خْ ؤُفُوسِي ن أَربِّي. ◘ 2 عقْڒمْ مِينْ إِدْجَانْ سنّجْ، وَارْ إِدْجِي مِينْ إِدْجَانْ ذِي ثمُّورْثْ، 3 مِينْزِي كنِّيوْ أَقَا ثمُّوثمْ ؤُشَا ثُوذَارْثْ نْومْ ثنُّوفَّارْ أَكْ-ذ لْمَاسِيحْ ذِي أَربِّي. ◘ 4 خْمِي د غَا إِضْهَارْ لْمَاسِيحْ، ونِّي إِدْجَانْ ذ ثُوذَارْثْ نّغْ، ڒخْذنِّي ؤُڒَا ذ كنِّيوْ أَذْ كِيذسْ د-ثضْهَارمْ ذڭْ ؤُعُودْجِي. ◘

5 س ؤُينِّي نْغمْ إِغزْذِيسنْ ن أَرِّيمثْ نْومْ إِنِّي خْ ثمُّورْثْ: فَارْقْ-شّْغڒْ، ڒخْمجْ، أَشَاهِي، نّشْوَاثْ ثِيعفَّانِينْ ذ طّْمعْ، ونِّي ذ أَعْبَاذْ إِ لْ-أَصْنَامْ، ◘ 6 س مِينْزِي أَذْ د-يَاسْ وغْضَابْ ن أَربِّي خْ أَيْثْ ن ڒْمُوعْصِييّثْ. ◘ 7 ؤُڒَا ذ كنِّيوْ ثُوغَا ثڭُّورمْ أَمُّو زِيشْ، ؤُمِي كنِّيوْ ثُوغَا ثدَّارمْ عَاذْ ذِي ثْمسْڒَايِينْ نِّي. ◘ 8 مَاشَا ڒخُّو، سَارْسمْ مَانْ أَيَا مَارَّا خْ ؤُغزْذِيسْ: أَغْضَابْ ذ ثفْقحْثْ ذ ثُوعفّْنَا ذ ؤُشقّفْ ذ ڒْهَارْذْ إِخْمجْ. ◘ 9 وَارْ سْخَارِّيقمْ شَا خْ وَايَاوْيَا، مَاشَا سَارْسمْ غَارْ ؤُغزْذِيسْ بْنَاذمْ أَقْذِيمْ أَكْ-ذ مَارَّا إِبْرِيذنْ نّسْ، ◘ 10 ؤُ ثْيَارّْضمْ بْنَاذمْ ن جْذِيذْ، ونِّي إِدّكّْوَاڒنْ جْذِيذْ س ثُوسّْنَا زَّايسْ نتَّا، غَارْ صِّيفثْ ن ونِّي إِ-ث-إِ-د-إِخڒْقنْ. ◘ 11 ذَايسْ وَارْ إِدْجِي وُوذَايْ ڒَا ذ أَرَامِي، ڒَا ذ أَخْثَانْ، ڒَا بْڒَا أَخْثَانْ، ڒَا ذ أَيُونَانِييْ، ڒَا ڒْبَارَّانِي، ڒَا ذ إِسْمغْ ؤُڒَا ذ حُورّْ، مَاشَا لْمَاسِيحْ ذ كُوڒْشِي ؤُ ذِي كُوڒْ إِجّنْ. ◘

12 خْ ؤُينِّي، كنِّيوْ، أَ إِمْقدَّاسنْ ذ إِمْعِيزّنْ إِنِّي إِتّْوَافَارْزنْ زِي أَربِّي، أَرْضمْ س أَرّحْمثْ ذ ڒحْنُونشْثْ ذ ڒضْرَافثْ ذ ؤُوَاضعْ ن أَرُّوحْ ذ ثمْهِينْثْ ذ تَّاسِيعْ ن ڒْخَاضَارْ. ◘ 13 قبْڒمْ ؤُ سَامْحمْ إِ وَايَاوْيَا. مَاڒَا شَا ن يِيجّنْ غَارسْ أَشثْشِي خْ ونِّي ذ أَسْ يُوذْسنْ، غْفَارمْ كنِّيوْ إِجّْ إِ ونّغْنِي، أَمْ مَامّشْ إِ ذ أَومْ إِغْفَارْ لْمَاسِيحْ. ◘ 14 ؤُشَا أَكْ-ذ مَارَّا أَيَا، أَرْنِيمْ ثَايْرِي ثنِّي ذ ثَاخَاذنْثْ ن ڒكْمَاڒثْ. ◘

15 خنِّي أَذْ إِحْكمْ ڒهْنَا ن لْمَاسِيحْ ذڭْ وُوڒَاونْ نْومْ، ڒهْنَا نِّي غَارْ ثتّْوَاڒَاغَامْ ذڭْ إِشْثْ ن أَرِّيمثْ، ؤُشَا قَاذَامْ إِ لْمَاسِيحْ. 16 جّمْ أَوَاڒْ نّسْ أَذْ ذَايْومْ إِزْذغْ س مَارَّا ثِيغِيثْ. سْڒمْذمْ، سجّْعمْ إِجّْ ونّغْنِي س ؤُغنّجْ نْ إِزهِّيذنْ ذ ثسْبِيحْ ذ إِزْڒَانْ ن أَرُّوحْ، ؤُغنّْجمْ إِ أَربِّي س وُوڒَاونْ نْومْ شُّورنْ س أَرْضَا. 17 مَارَّا مِينْ ثتّڭّمْ س وَاوَاڒْ نِيغْ س ثْمڭَّا، ڭّمْ ث س يِيسمْ ن سِيذِيثْنغْ يَاسُوع لْمَاسِيحْ ؤُ شكَّارمْ زَّايسْ أَربِّي، بَابَاثْنغْ. ◘

18 أَ ثِيمْغَارِينْ، ذوْڒنْثْ سَاذُو إِرْيَازنْ نْكنْثْ أَمْ مَامّشْ د-إِتَّاسْ أَكْ-ذ لْمَاسِيحْ. ◘

19 أَ إِرْيَازنْ، خْسمْ ثِيمْغَارِينْ نْومْ، وَارْ تّْقسْحمْ ذَايْسنْثْ س ثَارْزُوڭِي. ◘

20 أَ إِحنْجِيرنْ، طَاعمْ إِ لْوَالِيذِينْ نْومْ ذِي مَارَّا، مِينْزِي مَانْ أَيَا يَارطَّا إِ سِيذِيثْنغْ. ◘

21 أَ لْوَالِيذِينْ، وَارْ ذَارَّاشمْ شَا إِحنْجِيرنْ نْومْ، حِيمَا وَارْ ذ أَسنْ ثتّْرَاحْ ثرْيَاسْثْ.

22 أَ إِمْسخَّارنْ، طَاعمْ إِ يِينِّي إِدْجَانْ ذ أَيْثْبَابْ نْومْ ذِي ثمُّورْثْ ذِي مَارَّا، وَارْ تّْسخَّارمْ شَا إِ ثِيطَّاوِينْ ن إِوْذَانْ أَمْ يِينِّي إِخْسنْ أَذْ أَرْضَانْ إِوْذَانْ وَاهَا، مَاشَا سخَّارمْ س ڒصْفَايثْ ن وُوڒْ ؤُ زِي ثِيڭّْوُوذِي ن سِيذِي. ◘ 23 قَاعْ مِينْ غَا ثڭّمْ، ڭّمْ ث س مَارَّا ڒعْمَارْ نْومْ، ڭّمْ ث أَخْمِي إِ سِيذِيثْنغْ، وَارْ إِدْجِي إِ إِوْذَانْ. 24 سْنمْ أَقَا أَذْ ثكْسِيمْ ڒخْڒَاصْ زِي سِيذِيثْنغْ ذِي ڒْوَارْثْ، مَاغَارْ ثتّْسخَّارمْ إِ سِيذِي، لْمَاسِيحْ. 25 مِينْزِي ونِّي إِتّڭّنْ ڒْغشّْ، أَذْ إِتّْوَاخْڒفْ عْلَاحْسَابْ ڒْغشّْ إِ يڭَّا، مِينْزِي وَارْ ذِينْ إِدْجِي ڒْفَارْزْ ن بْنَاذمْ.

◘3:1 3:‏1 أَفا. 1‏:‏20.

◘3:3 3:‏3 رُوم. 6‏:‏2؛ 8‏:‏24؛ 2 كُور. 5‏:‏7.

◘3:4 3:‏4 فِيل. 3‏:‏21؛ 1 يُوح. 3‏:‏2.

◘3:5 3:‏5 رُوم. 7‏:‏5، 23؛ أَفا. 4‏:‏22؛ 5‏:‏3، 5؛ 1 تس. 4‏:‏5.

◘3:6 3:‏6 1 كُور. 6‏:‏10؛ ڭال. 5‏:‏19؛ أَفا. 5‏:‏5؛ أَسَا. 22‏:‏15.

◘3:7 3:‏7 1 كُور. 6‏:‏11؛ أَفا. 2‏:‏1؛ ثِيث. 3‏:‏3.

◘3:8 3:‏8 أَفا. 4‏:‏22؛ عبر. 12‏:‏1؛ يَاع. 1‏:‏21؛ 1 بُط. 2‏:‏1.

◘3:9 3:‏9 أَفا. 4‏:‏25.

◘3:10 3:‏10 أَمز. 1‏:‏26؛ 5‏:‏1؛ 9‏:‏6؛ رُوم. 6‏:‏4؛ 1 كُور. 11‏:‏7.

◘3:11 3:‏11 1 كُور. 7‏:‏21، 22؛ 12‏:‏13؛ ڭال. 3‏:‏28؛ 5‏:‏6؛ 6‏:‏15.

◘3:12 3:‏12 أَفا. 4‏:‏32؛ 6‏:‏11؛ 1 تس. 1‏:‏4.

◘3:13 3:‏13 مت. 6‏:‏14؛ مك. 11‏:‏25؛ أَفا. 4‏:‏32.

◘3:14 3:‏14 يُوح. 13‏:‏34؛ 15‏:‏12؛ أَفا. 4‏:‏3؛ 5‏:‏2؛ كُول. 2‏:‏2؛ 1 تس. 4‏:‏9؛ 1 يُوح. 3‏:‏23؛ 4‏:‏21؛ 2 يُوح. 1‏:‏6.

◘3:17 3:‏17 أَفا. 5‏:‏20؛ 1 تس. 5‏:‏18.

◘3:18 3:‏18 أَمز. 3‏:‏16؛ 1 كُور. 14‏:‏34؛ أَفا. 5‏:‏22؛ ثِيث. 2‏:‏5؛ 1 بُط. 3‏:‏1.

◘3:19 3:‏19 أَفا. 5‏:‏25.

◘3:20 3:‏20 أَفا. 6‏:‏1.

◘3:22 3:‏22 أَفا. 6‏:‏5؛ 1 تِيم. 6‏:‏1؛ ثِيث. 2‏:‏9؛ 1 بُط. 2‏:‏18.