١ ”خنِّي ڒخُّو، أَ إِسْرَائِيل، سڒْ غَارْ ثْوصَّا ذ لْفَارَايِيضْ نِّي ذ أَومْ سّڒْمَاذغْ، مَاحنْذْ أَذْ ثنْثْ ثڭّمْ حِيمَا أَذْ ثدَّارمْ ؤُشَا أَذْ ثَاذْفمْ غَارْ ثمُّورْثْ نِّي إِ ذ أَومْ غَا إِوْشْ سِيذِي، أَربِّي ن ڒجْذُوذْ نْومْ، ؤُشَا أَذْ ت ثْوَارْثمْ. ◘4:‏1 لَاوِي 19‏:‏37؛ 20‏:‏8؛ 22‏:‏31 ٢ وَارْ أَرنّْيمْ غَارْ وَاوَاڒْ إِ ذ أَومْ غَا ؤُمُورغْ ؤُ وَارْ زَّايسْ تّكّْسمْ، حِيمَا أَذْ ثِيڒِيمْ ثتّطّْفمْ ذِي ثْوصَّا ن سِيذِي، أَربِّي نْومْ، ثِينِّي زِي ذ أَومْ تُّومُورغْ. ◘4:‏2 أَعَوذ. 13‏:‏1؛ أَوڒن. 30‏:‏6؛ أَسَا. 22‏:‏18 ٣ ثِيطَّاوِينْ نْومْ ژْرِينْثْ مِينْ إِڭَّا سِيذِي أَكْ-ذ بَاعْلْ-فَاغُورْ، مِينْزِي مَارَّا أَرْيَازْ نِّي إِضفَّارنْ بَاعْلْ-فَاغُورْ، أَقَا إِثحَّا إِ-ث سِيذِي، أَربِّي نْومْ، زِي ڒْْوسْطْ نْومْ. ◘4:‏3 ڒخْڒ. 25‏:‏4؛ ياش. 22‏:‏17 ٤ مَاشَا كنِّيوْ، إِنِّي إِڒسّْقنْ غَارْ سِيذِي، أَربِّي نْومْ، أَقَا كنِّيوْ مَارَّا ثدَّارمْ عَاذْ أَسّْ-أَ. ٥ خْزَارمْ، نشّْ سّْڒمْذغْ أَومْ ثِيوصَّا ذ لْفَارَايِيضْ أَمْ مَامّشْ ذ أَيِي يُومُورْ سِيذِي، أَربِّي إِنُو، حِيمَا أَذْ زَّايْسنْثْ ثڭّمْ ذِي ثمُّورْثْ إِ غَارْ غَا ثَاذْفمْ مَاحنْذْ أَذْ ت ثْوَارْثمْ. ٦ طّْفمْ ذَايْسنْثْ ؤُ ڭّمْ ثنْثْ، مِينْزِي ثَا أَذْ ثِيڒِي ثِيغِيثْ نْومْ ذ ڒعْقڒْ نْومْ زَّاثْ إِ ثِيطَّاوِينْ ن ڒڭْنُوسْ نِّي إِ غَا إِسْڒنْ مَارَّا ثِيوصَّا-يَا. خنِّي أَذْ إِنِينْ نِيثْنِي: ’ڒْْڭنْسْ-أَ أَمقّْرَانْ وَانِيثَا ذ ثِيذتّْ ذ إِجّْ ن ڒْْڭنْسْ ذ أَمِيغِيسْ ؤُ س ڒعْقڒْ!‘ ◼4:‏6 ’طّْفمْ ... ڭّمْ‘ - س ثْعِيبْرَانِيثْ ’طّفْ ... أڭّْ‘، أَمشْنَاوْ إِسَّاوَاڒْ نتَّا إِ يِيجّْ ورْيَازْ. ٧ مِينْزِي مَانْ ڒْْڭنْسْ إِمْغَارنْ إِ ذَا إِدْجَانْ، أَقَا غَارسْ أَربِّي يُوذْسنْ أَمْ سِيذِي، أَربِّي نّغْ، ڒبْذَا خْمِي خَاسْ نتّْڒَاغَا؟ ◘4:‏7 أَعَوذ. 26‏:‏19 ٨ ؤُ مَانْ ڒْْڭنْسْ ذَا إِدْجَانْ إِمْغَارْ، أَقَا غَارسْ ثِيوصَّا ذ لْفَارَايِيضْ إِسڭّْمنْ أَمْ مَارَّا شَّارِيعَا-يَا نِّي ذ أَومْ غَا وْشغْ أَسّْ-أَ؟

٩ مَاشَا حْضَا خْ يِيخفْ نّشْ ؤُشَا طّفْ نِيشَانْ أَشْبَارْ خْ ڒعْمُورْ نّشْ حِيمَا وَارْ ثتُّوذْ مِينْ ژْرِينْثْ ثِيطَّاوِينْ نّشْ ؤُ حِيمَا ثِيمسْڒَايِينْ-أَ وَارْ د-تّفِّيغنْثْ شَا زڭْ وُوڒَاونْ نّشْ. إِتّْخصَّا أَذْ ثنْثْ ثسَّارْڭْبذْ إِ إِحنْجِيرنْ نّشْ ؤُ إِ إِحنْجِيرنْ ن إِحنْجِيرنْ نّشْ. ◘4:‏9 أَعَوذ. 6‏:‏7؛ 11‏:‏19

١٠ أَسّْ مِينْ ذِي ثُوغَا ثْبدّذْ غَارْ وذْرَارْ ن حُورِيبْ زَّاثْ إِ وُوذمْ ن سِيذِي، أَربِّي نّشْ، ڒَْامِي ذ أَيِي إِنَّا سِيذِي: ’سْمُونْ غَارِي ڒْْڭنْسْ-أَ، خنِّي نشّْ أَذْ ثنْ أَرّغْ أَذْ سْڒنْ أَوَاڒنْ إِنُو مَاحنْذْ أَذْ ثنْ سّْڒمْذنْ حِيمَا أَذْ زَّايِي ڭّْوذنْ مَارَّا ؤُسَّانْ نِّي إِدَّارنْ ذِي ثمُّورْثْ ؤُشَا حِيمَا أَذْ ثنْ سّْڒمْذنْ إِ إِحنْجِيرنْ نْسنْ.‘ ١١ خنِّي ثْقَارّْبمْ-د كنِّيوْ ؤُشَا ثْبدّمْ غَارْ إِضَارنْ ن وذْرَارْ ؤُشَا أَذْرَارْ يَارْغَا أَڒَامِي ثِيمسِّي نّسْ ثِيوضْ غَارْ ڒْْوسْطْ ن ؤُجنَّا، ؤُشَا أَقَا ذِينْ ثَادْجسْثْ ذ إِسيْنُوثنْ ذ يِيجّْ ن ؤُسيْنُو إِبُّومْبسْ. ◼4:‏11 ’غَارْ إِضَارنْ‘ - س ثْعِيبْرَانِيثْ ’سَاذُو‘. ’غَارْ ڒْْوسْثْ‘ - س ثْعِيبْرَانِيثْ ’غَارْ وُوڒْ‘.  ◘4:‏11 ؤُف. 19‏:‏18

١٢ خنِّي إِسِّيوڒْ أَكِيذْومْ سِيذِي زِي ڒْْوسْطْ ن ثْمسِّي. كنِّيوْ ثسْڒِيمْ إِ ڒْْحسّْ ن وَاوَاڒنْ، مَاشَا وَارْ ثژْرِيمْ شَا أَدُّوذْ نّسْ، مْغِيرْ إِشْثْ ن ثْمِيجَّا ؤُمِي ثسْڒِيمْ وَاهَا. ١٣ نتَّا إِسَّارْڭبْ كنِّيوْ خْ ڒْْعَاهْذْ نّسْ، ونِّي يُومُورْ أَذْ ث ثڭّمْ،عشْرَا ن وَاوَاڒنْ. يُورَا ثنْ ذِي ثْنَاينْ ن ثڒْوِيحِينْ ن وژْرُو. ١٤ إِ نشّْ عَاوذْ يُومُورْ سِيذِي ذِي ڒْْوقْثْ نِّي مَاحنْذْ أَذْ كنِّيوْ سّْڒمْذغْ ثِيوصَّا ذ لْفَارَايِيضْ مَاحنْذْ أَذْ زَّايْسنْثْ ثڭّمْ ذِي ثمُّورْثْ إِ غَارْ غَا ثژْوَامْ حِيمَا أَذْ ت ثْوَارْثمْ.“

١٥ ”حْضَامْ نِيشَانْ خْ ڒعْمُورْ نْومْ، مِينْزِي كنِّيوْ وَارْ ثژْرِيمْ ؤُڒَا ذ إِجّْ ن وَادُّوذْ ذڭْ وَاسّْ ؤُمِي أَكِيذْومْ إِسِّيوڒْ سِيذِي خْ وذْرَارْ ن حُورِيبْ زِي ڒْْوسْطْ ن ثْمسِّي! ١٦ وَارْ تّسّفْسَاذمْ إِخفْ نْومْ ؤُمِي غَا ثڭّمْ إِ يِيخفْ نْومْ إِجّْ ن ڒخْيَاڒْ إِنقْشنْ، أَدُّوذْ ن شَا ن إِجّْ ن صَّانَامْ، أَدُّوذْ ن شَا ن إِجّْ ن ووْثمْ نِيغْ ن إِشْثْ ن ثوْثمْثْ، ١٧ إِجّْ ن ڒخْيَاڒْ ن شَا ن إِجّْ ن ؤُمُودَّارْ نِّي إِدْجَانْ خْ ثمُّورْثْ، نِيغْ إِجّْ ن ڒخْيَاڒْ ن شَا ن إِجّْ ن وجْضِيضْ س وفْرِيونْ إِ إِطَّاونْ ذڭْ ؤُجنَّا، ١٨ نِيغْ إِجّْ ن ڒخْيَاڒْ ن شَا ن إِجّْ ن ؤُمُودَّارْ نِّي إِتّْبُوعنْ خْ ثمُّورْثْ، نِيغْ إِجّْ ن ڒخْيَاڒْ ن شَا ن إِجّْ ن وسْڒمْ نِّي إِدْجَانْ ذڭْ وَامَانْ سَاذُو ثمُّورْثْ. ١٩ غَاركْ أَذْ ثسّْڭعّْذذْ ثَامُوغْڒِي نّشْ غَارْ ؤُجنَّا ؤُشَا خنِّي أَذْ ثْژَارذْ ثَافُوشْثْ ذ ؤُيُورْ ذ إِثْرَانْ، مَارَّا ڒْْعسْكَارْ ن ؤُجنَّا، ؤُشَا خنِّي أَذْ تّْوَاعَارّْنذْ أَذْ أَسنْ ثْبنْذْقذْ ؤُشَا أَذْ أَسنْ ثْعبْذذْ إِ نِيثْنِي، إِنِّي إِبْضَا سِيذِي، أَربِّي نّشْ، إِ مَارَّا ڒڭْنُوسْ سَاذُو مَارَّا أَجنَّا. ٢٠ سِيذِي أَقَا إِقْبڒْ إِ كنِّيوْ ؤُشَا إِسُّوفّغْ إِ كنِّيوْ-د زڭْ ؤُفَارَّانْ ن وُوزَّاڒْ، زِي مِيصْرَا، حِيمَا أَذْ أَسْ ثِيڒِيمْ ذ ڒْْڭنْسْ نّسْ إِ إِوَارْثْ، أَمْ ثدْجَا أَسّْ-أَ. ◘4:‏20 ؤُف. 19‏:‏5 ٢١ عَاوذْ إِسْعَارْ خَافِي سِيذِي ذِي سِّيبّثْ ن وَاوَاڒنْ نْومْ ؤُشَا إِجِّيدْجْ بلِّي وَارْ ژكّْوِّيغْ شَا لْ-ؤُرْذُونْ ؤُ وَارْ تِّيذْفغْ غَارْ ثمُّورْثْ إِصبْحنْ نِّي إِ ذ أَشْ غَا إِوْشْ سِيذِي، أَربِّي نّشْ، ذ ڒْْوَارْثْ، ◘4:‏21 أَعَوذ. 1‏:‏37؛ 3‏:‏26؛ 31‏:‏2؛ 34‏:‏4 ٢٢ مِينْزِي نشّْ أَذْ مّْثغْ ذِي ثمُّورْثْ-أَ، وَارْ ژكّْوِيغْ شَا لْ-ؤُرْذُونْ. كنِّيوْ أَذْ ثژْوَامْ ؤُشَا أَذْ ثطّْفمْ ثَامُّورْثْ-أَ إِشْنَانْ. ٢٣ حْضَامْ وَارْ ثتُّومْ ڒْْعَاهْذْ ن سِيذِي، أَربِّي نْومْ، ونِّي إِڭَّا أَكِيذْومْ ؤُشَا حْضَامْ وَارْ تّڭّمْ إِ يِيخفْ نْومْ إِجّْ ن ڒخْيَاڒْ إِنقْشنْ زِي شَا ن ن ڒْْحَاجّثْ إِ ذ أَشْ إِحَارّمْ سِيذِي، أَربِّي نّشْ. ٢٤ مِينْزِي سِيذِي، أَربِّي نّشْ، أَقَا-ث ذ إِشْثْ ن ثْمسِّي إِتّتّنْ، ذ إِجّْ ن أَربِّي إِتَّاسْمنْ. ◘4:‏24 ؤُف. 20‏:‏5؛ 34‏:‏14؛ أَعَوذ. 5‏:‏9؛ 6‏:‏15؛ 9‏:‏3؛ عبر.12‏:‏29

٢٥ خْمِي غَا ثَارْومْ أَرَّاوْ ذ أَيَّاونْ ؤُشَا أَذْ ثوْسَارمْ ذِي ثمُّورْثْ ؤُشَا خنِّي أَذْ ثْذدْجْممْ إِخفْ نْومْ، أَذْ ثڭّمْ إِجّْ ن ڒخْيَاڒْ إِنقْشنْ، صِّيفّثْ ن شَا ن ڒْْحَاجّثْ ؤُشَا أَذْ ثڭّمْ ڒْْغَارْ ذِي ثِيطَّاوِينْ ن سِيذِي، أَربِّي نْومْ ؤُمِي ث غَا ثسْعَارمْ أَمُّو، ٢٦ خنِّي نشّْ أَسّْ-أَ أَذْ ڒَْاغِيغْ خْ ؤُجنَّا ذ ثمُّورْثْ ذ ڒشْهُوذْ خَاومْ، أَقَا كنِّيوْ أَذْ ثتّْوَاهلّْكمْ ذغْيَا س ثِيذتّْ ذِي ثمُّورْثْ إِ غَارْ غَا ثژْوَامْ خْ لْ-ؤُرْذُونْ مَاحنْذْ أَذْ ت ثكْسِيمْ ذ ڒْْوَارْثْ. وَارْ ذَايسْ ثتّْغِيمِيمْ كنِّيوْ شَا ن وُوسَّانْ كْثَارْ عَاذْ، مِينْزِي أَذْ ثتّْوَاثحَّامْ قَاعْ. ٢٧ سِيذِي أَذْ كنِّيوْ إِبزّعْ جَارْ ڒڭْنُوسْ ؤُشَا أَذْ زَّايْومْ إِقِّيمْ إِجّْ ن وُورُو ن يرْيَازنْ وَاهَا جَارْ ڒڭْنُوسْ مَانِي كنِّيوْ غَا إِنْذهْ سِيذِي. ◘4:‏27 أَعَوذ. 28‏:‏62، 64 ٢٨ ذِينْ أَذْ ثْسخَّارمْ إِربِّيثنْ نِّي إِتّْوَاڭّنْ س إِفَاسّنْ ن بْنَاذمْ س ؤُكشُّوضْ ذ وژْرُو، إِنِّي وَارْ إِتّْوَاڒِينْ، وَارْ إِتّسْڒِينْ، وَارْ إِتّتّنْ ؤُ وَارْ إِتّْشمَّانْ.“◘4:‏28 إِزهد. 115‏:‏4؛ 135‏:‏15

٢٩ ”أَذْ ثَارْزُومْ سّنِّي سِيذِي، أَربِّي نّشْ، ؤُ شكْ أَذْ ث ثَافذْ، مَاڒَا ثَارزُّوذْ خَاسْ س مَارَّا ؤُڒْ نّشْ ذ مَارَّا ڒعْمَارْ نّشْ. ◼4:‏29 ’سّنِّي‘ - نِيغْ ’زِي سنِّي‘. ٣٠ مَاڒَا شكْ ذِي ڒحْصَارثْ ؤُشَا أَذْ غَاركْ د-أَسنْ مَارَّا أَوَاڒنْ-أَ ذڭْ ؤُنڭَّارْ ن وُوسَّانْ، خنِّي أَذْ د-ثْذوْڒذْ غَارْ سِيذِي، أَربِّي نّشْ، ؤُ أَذْ ثسْڒذْ إِ ثْمِيجَّا نّسْ، ٣١ مِينْزِي سِيذِي، أَربِّي نّشْ، ذ إِجّْ ن أَربِّي يَارحّْمنْ، وَارْ شكْ إِتّجِّي ؤُ وَارْ شكْ إِتَّاردّدْجْ. وَارْ إِتّتُّو ڒْْعَاهْذْ ن ڒجْذُوذْ نّشْ، ونِّي ذ أَسنْ إِجِّيدْجْ. ٣٢ سقْسَا خنِّي خْ وُوسَّانْ إِعْذُونْ، إِنِّي إِدْجَانْ قْبڒْ إِ شكْ، زڭْ وَاسّْ مِينْ ذِي إِڭَّا أَربِّي بْنَاذمْ خْ ثمُّورْثْ، سقْسَا زِي طَّارْفْ ن ؤُجنَّا غَارْ طَّارْفْ نّغْنِي ن ؤُجنَّا، مَا عمَّارْصْ ثمْسَارْ شَا ن ڒْْحَاجّثْ ثمْغَارْ أَنشْثْ ن ثَانِيثَا نِيغْ إِتّْوَاسڒْ شَا أَمْ مَانْ أَيَا؟ ٣٣ مَا عمَّارْصْ إِسْڒَا شَا ن ڒْْڭنْسْ ثْمِيجَّا ن أَربِّي ثسِّيوڒْ زِي ڒْوسْطْ ن ثْمسِّي أَمْ مَامّشْ ت تّسْڒِيذْ شكْ ؤُشَا خنِّي إِقِّيمْ إِدَّارْ؟ ٣٤ نِيغْ مَا إِقدْجبْ عمَّارْصْ إِجّْ ن أَربِّي أَذْ د-يَاسْ مَاحنْذْ أَذْ إِكْسِي إِ يِيخفْ نّسْ إِجّْ ن ڒْْڭنْسْ زِي ڒْْوسْطْ ن إِجّْ ن ڒْْڭنْسْ نّغْنِي س ثْجَارِّيبِينْ، س ڒعْڒَامَاثْ، س لْمُوعْجِيزَاثْ، س ؤُمنْغِي، س ؤُفُوسْ إِجهْذنْ، س ؤُغِيڒْ إِسّْوِيژّْضنْ ؤُ س ثْمڭَّا سِّيڭّْوِيذنْثْ مْغَارنْثْ، أَمْ مَارَّا مِينْ إِڭَّا سِيذِي، أَربِّي نْومْ، زَّاثْ إِ ثِيطَّاوِينْ نْومْ ذِي مِيصْرَا؟ ٣٥ أَقَا إِ شكْ ؤُمِي د-إِتّْوَاسّْبَانْ أَيَا، حِيمَا أَذْ ثسّْنذْ بلِّي سِيذِي ذ أَربِّي إِ إِدْجَا. وَارْ ذِينْ شَا نّغْنِي مْغِيرْ نتَّا.◘4:‏35 أَعَوذ. 32‏:‏39؛ إِشا. 45‏:‏5، 18، 22؛ مك.12‏:‏29، 32 ٣٦ زڭْ ؤُجنَّا إِڭَّا أَذْ ثسْڒذْ إِ ثْمِيجَّا نّسْ حِيمَا أَذْ شكْ إِنبّهْ ؤُ خْ ثمُّورْثْ أَقَا إِسّْشنْ أَشْ ثِيمسِّي نّسْ إِمْغَارنْ ؤُ أَقَا ثسْڒِيذْ أَوَاڒنْ نّسْ زِي ڒْْوسْطْ ن ثْمسِّي. ٣٧ مِينْزِي نتَّا ثُوغَا إِخْسْ ڒجْذُوذْ نّشْ، ؤُ إِفَارْزْ زَّارِيعثْ نّسْ أَوَارْنِي أَسْ، أَقَا إِسُّوفّغْ إِ شكْ-د س يِيخفْ نّسْ زِي مِيصْرَا س جّهْذْ نّسْ إِمْغَارنْ ◘4:‏37 ؤُف. 13‏:‏3، 9، 14 ٣٨ حِيمَا أَذْ يَاژّڒْ زَّاثْ إِ وُوذمْ نّشْ خْ ڒڭْنُوسْ إِمْغَارنْ ذ يِينِّي خَاكْ إِجهْذنْ زِي ثصْغَارْثْ نْسنْ، ؤُ حِيمَا أَذْ ذَايسْ إِسِّيذفْ شكْ ؤُ أَذْ أَشْ إِوْشْ ثَامُّورْثْ نْسنْ ذ ڒْْوَارْثْ، أَمْ مَامّشْ إِ ثدْجَا أَسّْ-أَ. ٣٩ خنِّي سّنْ أَسّْ-أَ ؤُشَا خَارّصْ خْ مَانْ أَيَا ذڭْ وُوڒْ نّشْ بلِّي سِيذِي ذ أَربِّي إِ يدْجَا، سنّجْ ذڭْ ؤُجنَّا ؤُ سْوَادَّايْ ذِي ثمُّورْثْ، وَارْ ذِينْ حذْ نّغْنِي! ٤٠ طّفْ ذِي ثْوصَّا نّسْ ؤُ ذِي ڒُْومُورَاثْ نّسْ، ثِينِّي ذ أَشْ ؤُمُورغْ أَسّْ-أَ حِيمَا أَذْ إِفّغْ ؤُمدُّورْ مْلِيحْ إِ شكْ ؤُ إِ إِحنْجِيرنْ نّشْ أَوَارْنِي أَشْ ؤُشَا أَذْ زُّوڭَارْثنْ ؤُسَّانْ ذِي ثمُّورْثْ إِ ذ أَشْ غَا إِوْشْ سِيذِي، أَربِّي نّشْ، إِ ڒبْذَا.“

٤١ خنِّي إِفَارْزْ مُوسَا ثْڒَاثَا ن ثْندَّامْ ن ثَاروْڒَا خْ ؤُجمَّاضْ ن لْ-ؤُرْذُونْ مَانِيسْ د-ثْنقَّارْ ثْفُوشْثْ، ◘4:‏41 ڒخْڒ. 35‏:‏6، 14 ٤٢ حِيمَا أَذْ ذِينْ يَاڒْورْ ؤُقتَّاڒْ نِّي إِنْغِينْ، بْڒَا مَا أَذْ أَسْ إِڭّْ ڒحْسَابْ، جَّارْ نّسْ، ونِّي ؤُمِي وَارْ إِشَارّْهنْعمَّارْصْ إِضنَّاضْ ؤُڒَا ذ فَارِيضنَّاضْ. وَانِيثَا إِزمَّارْ أَذْ يَارْوڒْ غَارْ إِشْثْ زِي ثْندَّامْ-أَ أَڒَامِي إِقِّيمْ إِدَّارْ نتَّا. ٤٣ بَاصِيرْ ذِي ڒخْڒَا، ذِي ڒْْوَاطَا يُوعْڒَانْ، إِ رُوبِينِييّنْ، ؤُ رَامُوثْ ذِي جِيلْعَاذْ إِ إِجَاذِييّنْ ؤُ جُولَانْ ذ بَاشَانْ إِ إِمَانَاسِّييّنْ. ◘4:‏43 ياش. 20‏:‏8

٤٤ ثَا ذ شَّارِيعَا نِّي إِڭَّا مُوسَا زَّاثْ إِ أَيْثْ ن إِسْرَائِيل. ٤٥ إِنَا ذ شّْهَاذَاثْ ذ ثِيوصَّا ذ لْفَارَايِيضْ نِّي إِسِّيوڒْ مُوسَا غَارْ أَيْثْ ن إِسْرَائِيل ؤُمِي د-فّْغنْ زِي مِيصْرَا. ٤٦ أَيَا ثُوغَا خْ ؤُجمَّاضْ ن لْ-ؤُرْذُونْ، ذِي ثغْزُورْثْ أَرنْذَاذْ ن بَايْثْ-فَاغُورْ، ذِي ثمُّورْثْ ن سِيحُونْ، أَجدْجِيذْ ن إِمُورِييّنْ، ونِّي ثُوغَا إِزدّْغنْ ذِي حَاشْبُونْ، ونِّي خْ إِغْڒبْ مُوسَا أَكْ-ذ أَيْثْ ن إِسْرَائِيل ؤُمِي د-فّْغنْ زِي مِيصْرَا. ◘4:‏46 ڒخْڒ. 21‏:‏24؛ أَعَوذ. 1‏:‏4 ٤٧ أَقَا كْسِينْ ثَامُّورْثْ نّسْ أَمْ ڒْْوَارْثْ ؤُڒَا ذ ثَامُّورْثْ ن عُوجْ، أَجدْجِيذْ ن بَاشَانْ، ثِيمُّورَا ن ثْنَاينْ ن إِجدْجِيذنْ ن إِمُورِييّنْ نِّي ثُوغَا زدّْغنْ خْ ؤُجمَّاضْ ن لْ-ؤُرْذُونْ مَانِيسْ د-ثْنقَّارْ ثْفُوشْثْ، ◘4:‏47 ڒخْڒ. 21‏:‏33؛ أَعَوذ. 3‏:‏3 ٤٨ زِي عَارُوعِيرْ نِّي إِدْجَانْ غَارْ ثْمَا ن ثغْزَارْثْ ن أَرْنُونْ أَڒْ وذْرَارْ ن سِييُونْ نِّي إِدْجَانْ ذ وذْرَارْ ن حِيرْمُونْ، ٤٩ ذ مَارَّا ڒوْضَا خْ ؤُجمَّاضْ ن لْ-ؤُرْذُونْ، غَارْ شَّارْقْ، أَڒْ ڒبْحَارْ ن ڒوْضَا نِّي إِدْجَانْ وَادَّايْ ن ثيْسَارِينْ ن وذْرَارْ ن فِيسْجَا.