١ ”خْمِي سِيذِي، أَربِّي نّشْ، أَذْ شكْ إِسِّيذفْ ذِي ثمُّورْثْ مَانِي غَا ثْرَاحذْ مَاحنْذْ أَذْ ت ثكْسِيذْ ذ ڒْْوَارْثْ، ؤُشَا نتَّا أَذْ يَاژّڒْ زِي زَّاثكْ أَطَّاسْ ن ڒڭْنُوسْ: إِحِيتِّييّنْ ذ إِجِيرْجَاشِييّنْ ذ إِمُورِييّنْ ذ أَيْثْ ن كنْعَانْ ذ إِفِيرِيزِييّنْ ذ إِحِيوِييّنْ ذ إِيابُوسِييّنْ، سبْعَا ن ڒڭْنُوسْ مْغَارنْ ؤُ جهْذنْ خَاكْ أَطَّاسْ، ◘7:‏1 أَعَوذ. 31‏:‏3 ٢ ؤُشَا سِيذِي، أَربِّي نّشْ، أَذْ ثنْ إِسلّمْ زَّاثْ إِ وُوذمْ نّشْ ؤُ شكْ أَذْ ثنْ ثْغڒْبذْ، خنِّي إِتّْخصَّا أَذْ ثنْ ثْحَارّْمذْ قَاعْ إِ ؤُثحِّي. وَارْ كِيسنْ تّڭّْ ڒْْعَاهْذْ ؤُ وَارْ ذ أَسنْ سّْشنْ ڒحْنُونشْثْ نّشْ. ◘7:‏2 ؤُف. 23‏:‏32؛ 34‏:‏15؛ ڒخْڒ. 33‏:‏52؛ ياش. 11‏:‏11 ٣ وَارْ ثذِّيكّْوِيڒمْ ذ إِضڭّْوَاڒنْ عَاوذْ أَكِيذْسنْ. وَارْ تِّيشْ يدْجِيشْ إِ مِّيسْ ؤُ وَارْ د-تَّاوِي يدْجِيسْ إِ مِّيشْ، ◘7:‏3 ؤُف. 34‏:‏16؛ 1 إِج. 11‏:‏2؛ عِز. 9‏:‏12 ٤ مِينْزِي أَيَا أَذْ يَارّْ مِّيشْ أَذْ د-إِذْوڒْ زِي ضفَّارْ إِنُو ؤُشَا أَذْ إِسخَّارْ إِ إِربِّيثنْ نّغْنِي ؤُشَا أَمُّو أَذْ خَاومْ يَارغْ وغْضَابْ ن سِيذِي ؤُشَا أَذْ كنِّيوْ إِثحَّا ذغْيَا. ٥ أَمُّو مَاشَا إِ إِتّْخصَّا أَذْ كِيسنْ ثڭّمْ: أَذْ ثْهذْممْ إِعَالْطَارنْ نْسنْ، أَذْ ثَارْژَامْ إِمَايْضُوثنْ نْسنْ إِقدّْسنْ ؤُ أَذْ ثْهذْمنْ ثِيربِّينْ نْسنْ ن شْوَارْثِي ؤُشَا أَذْ ثسّْشمْضمْ ڒخْيَاڒَاثْ نْسنْ إِنقْشنْ ن ؤُكشُّوضْ س ثْمسِّي. ◘7:‏5 ؤُف. 23‏:‏24؛ 34‏:‏13؛ أَعَوذ. 12‏:‏2، 3 ٦ مِينْزِي شكْ ذ إِجّْ ن ڒْْڭنْسْ إِقدّسْ إِ سِيذِي، أَربِّي نّشْ. سِيذِي، أَربِّي نّشْ، ونِّي شكْ إِفَارْزنْ حِيمَا أَذْ أَسْ ثِيڒِيذْ ذ إِجّْ ن ڒْْڭنْسْ إِغْڒَانْ خْ مَارَّا ڒڭْنُوسْ نِّي يدْجَانْ خْ وُوذمْ ن ثمُّورْثْ. ◘7:‏6 ؤُف. 19‏:‏5؛ أَعَوذ. 4‏:‏20؛ 14‏:‏21؛ 26‏:‏18؛ 28‏:‏9؛ 1 بُط. 2‏:‏9 ٧ سِيذِي وَارْ غَارْومْ إِقّنْ ؤُ وَارْ كنِّيوْ إِخْضَارْ ؤُمِي ثُوغَا كنِّيوْ ذ أَطَّاسْ زِي مَارَّا ڒڭْنُوسْ، مِينْزِي ثُوغَا كنِّيوْ ثسْوَامْ قلّْ جَارْ مَارَّا ڒڭْنُوسْ، ٨ مَاشَا ثَايْرِي ن سِيذِي إِ كنِّيوْ ذ ؤُحطُّو نّسْ خْ ثْجَادْجِيثْ نِّي إِجِّيدْجْ إِ ڒجْذُوذْ نْومْ، ثَاجَادْجِيثْ إِ زِي كنِّيوْ د-إِسُّوفّغْ سِيذِي س ؤُفُوسْ إِجهْذنْ ذ إِ زِي شكْ إِسّنْجمْ زِي ثَادَّارْثْ ن ثسْمُوغِي، زڭْ ؤُفُوسْ ن فِيرْعُونْ، أَجدْجِيذْ ن مِيصْرَا. ◘7:‏8 أَعَوذ. 10‏:‏15 ٩ سّنْ خنِّي، بلِّي سِيذِي، أَربِّي نّشْ، ذ أَربِّي، أَقَا نتَّا ذ أَربِّي أَمْثِيقِّي، ونِّي إِحطَّانْ ڒْْعَاهْذْ ذ ثْمخْسِيوْثْ إِشوَّارنْ زِي جِّيهثْ ن يِينِّي ث إِتّخْسنْ ؤُشَا حطَّانْ ڒُْومُورَاثْ نّسْ، أَڒْ جِّيڒْ وِيسّْ أَڒفْ، ◘7:‏9 ؤُف. 20‏:‏5؛ أَعَوذ. 5‏:‏9 ١٠ مَاشَا مَارَّا وِي ث إِشَارّْهنْ ذڭْ ؤُغمْبُوبْ نّسْ، أَقَا نتَّا أَذْ زَّايْسنْ ت إِخْڒفْ أَمْ ثنْ إِ غَا يَاردّدْجْ. وَارْ إِتّْرِيجِي، مَاحنْذْ أَذْ إِخدْجصْ ونِّي ث إِشَارّْهنْ ذڭْ ؤُغمْبُوبْ نّسْ. ◘7:‏10 نَحُم. 1‏:‏2

١١ حْضَا خنِّي ڒُْومُورَاثْ ذ ثْوصَّا ذ لْفَارَايِيضْ نِّي ذ أَشْ ؤُمُورغْ نشّْ أَسّْ-أَ مَاحنْذْ أَذْ زَّايْسنْثْ ثڭّذْ.“

١٢ ”أَذْ إِمْسَارْ، ؤُمِي ثسْڒِيمْ إِ لْفَارَايِيضْ-أَ ؤُ كنِّيوْ أَذْ ثنْثْ ثحْضَامْ ؤُ أَذْ زَّايْسنْثْ ثڭّمْ، أَقَا سِيذِي، أَربِّي نّشْ، أَذْ أَشْ إِبدّْ خْ ڒْْعَاهْذْ ذ ثَامخْسِيوْثْ إِشوَّارنْ إِ ثُوغَا إِجِّيدْجْ إِ ڒجْذُوذْ نّشْ. ◘7:‏12 لَاوِي 26‏:‏3؛ أَعَوذ. 28‏:‏1 ١٣ نتَّا أَذْ شكْ إِخْسْ، أَذْ شكْ إِبَاركْ ؤُ أَذْ شكْ يَارّْ ذڭْ وَاطَّاسْ. أَذْ إِبَاركْ ڒْْغِيدْجثْ ن ؤُعذِّيسْ نّشْ ذ ڒْْغِيدْجثْ ن ثمُّورْثْ نّشْ، إِرْذنْ نّشْ، بِينُو نّشْ ن جْذِيذْ، زّشْثْ نّشْ ن طّْرِي، ثَارَّاوْثْ ن ثْفُونَاسِينْ نّشْ ذ إِمژْيَاننْ إِعِيزّنْ ن وُودْجِي نّشْ، ذِي ثمُّورْثْ نِّي ثُوغَا إِجِّيدْجْ إِ ڒجْذُوذْ نّكْ أَذْ أَشْ ت-إِ-د-إِوْشْ. ١٤ أَقَا شكْ ثتّْوَابَارْكذْ جَارْ ڒڭْنُوسْ! وَارْ ذَايكْ إِتّْغِيمِي عَاذْ حذْ إِ وَارْ د-إِتّجِّينْ ؤُڒَا ذ ثنِّي وَارْ إِتِّيرِيونْ، ؤُشَا أَمُّو ؤُڒَا ذِي ڒبْهَايمْ نّشْ. ◘7:‏14 ؤُف. 23‏:‏26 ١٥ أَذْ زَّايكْ إِكّسْ سِيذِي مَارَّا ڒهْڒَاشْ ؤُ وَارْ شكْ إِڒقّفْ ؤُڒَا س شَا ن ڒهْڒَاشَاثْ ثِيعفَّانِينْثْ إِ غَاركْ إِتّْوَاسّْننْ زِي مِيصْرَا، مَاشَا نتَّا أَذْ ثنْثْ إِسِّيوضْ خْ مَارَّا إِنِّي إِ شكْ إِشَارّْهنْ. ١٦ أَذْ ثشّذْ مَارَّا ڒڭْنُوسْ نِّي ذ أَشْ غَا إِوْشْ سِيذِي، أَربِّي نّشْ. ثِيطّْ نّشْ وَارْ خَاسنْ ثتّْحِينِّي ؤُ إِربِّيثنْ نْسنْ وَارْ ثنْ ثْسخَّارذْ، مِينْزِي أَيَا أَذْ يِيڒِي ذ ڒْْفخْ إِ شكْ. ١٧ مَاڒَا ثنِّيذْ ذڭْ وُوڒْ نّشْ: ڒڭْنُوسْ-أَ مْغَارنْ خَافِي، مَامّشْ غَا زمَّارغْ أَذْ زَّايْسنْ كّْسغْ عمَّارْصْ ڒْْوَارْثْ نْسنْ؟ ١٨ خنِّي وَارْ زَّايْسنْ تّڭّْوذْ. خَارّصْ مْلِيحْ ذِي مِينْ إِڭَّا سِيذِي، أَربِّي نّشْ، أَكْ-ذ فِيرْعُونْ ؤُ أَكْ-ذ مَارَّا إِمِيصْرِييّنْ، ١٩ خَارّصْ ذِي ثْقدْجَابِينْ إِمْغَارنْ، ثِينِّي ثژْرِيذْ س ثِيطَّاوِينْ نّشْ ؤُ ذِي ڒعْڒَامَاثْ ذ لْمُوعْجِيزَاثْ ذ ؤُفُوسْ إِجهْذنْ ذ ؤُغِيڒْ إِسّْوِيژّْضنْ أَكْ-ذ وِي شكْ د-إِسُّوفّغْ سِيذِي، أَربِّي نّشْ. أَمُّو إِ غَا يڭّْ سِيذِي، أَربِّي نّشْ، س مَارَّا ڒڭْنُوسْ إِ زِي تّڭّْوذذْ. ◘7:‏19 أَعَوذ. 4‏:‏34؛ 29‏:‏3 ٢٠ سِيذِي، أَربِّي نّشْ، أَذْ إِسّكّْ إِرزَّانْ إِضَارْغَاڒنْ جَارْ أَسنْ، أَڒْ غَا تّْوَاهلّْكنْ إِنِّي إِقِّيمنْ، إِنِّي إِتّْوَاسّْنُوفَّارنْ زَّاثكْ. ◘7:‏20 ؤُف. 23‏:‏28؛ ياش. 24‏:‏12 ٢١ وَارْ تّڭّْوذْ زَّاثْ إِ وُوذمْ نْسنْ، مِينْزِي سِيذِي، أَربِّي نّشْ، أَقَا-ث ذِي ڒْْوسْطْ نّشْ، أَقَا-ث ذ أَربِّي إِمْغَارنْ ؤُ إِسَّاڭّْوَاذنْ. ٢٢ سِيذِي، أَربِّي نّشْ، أَذْ إِسُّوفّغْ ڒڭْنُوسْ-أَ زَّاثكْ شْوَايْثْ شْوَايْثْ. وَارْ إِزمَّارْ أَذْ خَاسنْ ثقْضِيذْ ذغْيَا، مَاڒَا لَّا أَذْ مَّارنْينْ ڒوْحُوشْ ذڭْ إِيَّارْ أَطَّاسْ خَاكْ. ٢٣ سِيذِي، أَربِّي نّشْ، أَذْ ثنْ إِسلّمْ زَّاثْ إِ وُوذمْ نّشْ ؤُ أَذْ ثنْ إِسّْخَارْوضْ س يِيجّْ ن ؤُخَارْوضْ إِمْغَارْ أَڒْ غَا تّْوَاثحَّانْ. ٢٤ أَذْ إِسلّمْ إِجدْجِيذنْ نْسنْ ذڭْ ؤُفُوسْ نّشْ ؤُشَا أَذْ ثمْحِيذْ إِسمْ نْسنْ زِي سَاذُو ؤُجنَّا. ؤُڒَا ذ إِجّْ ن ورْيَازْ وَارْ إِزمَّارْ أَذْ إِبدّْ زَّاثْ إِ وُوذمْ نّشْ أَڒْ ثنْ غَا ثثحِّيذْ. ٢٥ ڒخْيَاڒَاثْ إِنقْشنْ أَذْ ثنْثْ ثسّْشمْضذْ س ثْمسِّي. نُّوقَارْثْ ذ وُورغْ إِ خَاسنْثْ إِدْجَانْ وَارْ ذَايسْعشّقْ ؤُ وَارْ ث كسِّي إِ يِيخفْ نّشْ، حِيمَا وَارْ زَّايسْ ثتّْخَارْوِيضذْ، مِينْزِي أَيَا ذ إِشْثْ ن جّْعِيفشْثْ إِ سِيذِي، أَربِّي نّشْ. ٢٦ وَارْ تِّيوِي إِشْثْ ن جّْعِيفشْثْ أَمْ ثَا غَارْ ثَادَّارْثْ نّشْ، مَاڒَا لَّا أَذْ ثتّْوَاحَارّْمذْ إِ ؤُثحِّي أَمْ نتَّا. أَذْ زَّايسْ ثْعِيفّذْ أَطَّاسْ ؤُ أَذْ أَشْ ثِيڒِي ذ ثَامنّْعِيثْ، مِينْزِي أَقَا-ت ذ إِشْثْ ن ڒْْقشْعثْ ن ڒحْرَامْ.“