١ مَارَّا غَارسْ ڒْْمِيجَاڒْ نّسْ ؤُ أَقَا ذِينْ عَاوذْ ثَاسَاعّثْ إِتّْوَاڭّنْ إِ كُوڒْ أَنْوَايْ سَاذُو أَجنَّا.

٢ أَقَا ذِينْ إِشْثْ ن ثْسَاعّثْ ن ثَارْوَا

ذ إِشْثْ ن ثْسَاعّثْ ن ڒْْموْثْ،

إِشْثْ ن ثْسَاعّثْ ن ثَاژُّوثْ

ذ إِشْثْ ن ثْسَاعّثْ ن وقْڒَاعْ ن مِينْ إِثْوَاژُّونْ،

٣ إِشْثْ ن ثْسَاعّثْ ن ثْمنْغِيوْثْ

ذ إِشْثْ ن ثْسَاعّثْ ن ؤُسْڭنْفِي،

إِشْثْ ن ثْسَاعّثْ ن وهْذَامْ

ذ إِشْثْ ن ثْسَاعّثْ ن ڒبْنِي،

٤ إِشْثْ ن ثْسَاعّثْ ن إِمطَّاونْ

ذ إِشْثْ ن ثْسَاعّثْ ن ثْضحَّاشْثْ،

إِشْثْ ن ثْسَاعّثْ ن وشْضَانْ

ذ إِشْثْ ن ثْسَاعّثْ ن شّْضِيحْ،

٥ إِشْثْ ن ثْسَاعّثْ ن ؤُحجَّارْ ن وژْرُو

ذ إِشْثْ ن ثْسَاعّثْ ن وجْرَاوْ ن وژْرُو،

إِشْثْ ن ثْسَاعّثْ ن ؤُذَارّعْ

ذ إِشْثْ ن ثْسَاعّثْ ن ڒَْاڭّْوَاجْ خْ ؤُذَارّعْ، ◘3:‏5 1 كُور. 7‏:‏5

٦ إِشْثْ ن ثْسَاعّثْ ن ثَارزُّوثْ

ذ إِشْثْ ن ثْسَاعّثْ ن ؤُودَّارْ،

إِشْثْ ن ثْسَاعّثْ ن ؤُخمّرْ

ذ إِشْثْ ن ثْسَاعّثْ ن ونْضَارْ،

٧ إِشْثْ ن ثْسَاعّثْ ن ؤُشَارّڭْ

ذ إِشْثْ ن ثْسَاعّثْ ن ؤُخيّضْ،

إِشْثْ ن ثْسَاعّثْ ن ؤُسغْذِي

ذ إِشْثْ ن ثْسَاعّثْ ن ڒْْهَارْذْ،

٨ إِشْثْ ن ثْسَاعّثْ ن ثَايْرِي

ذ إِشْثْ ن ثْسَاعّثْ ن وشْرَاهْ،

إِشْثْ ن ثْسَاعّثْ ن ڭَارَّا

ذ إِشْثْ ن ثْسَاعّثْ ن ڒهْنَا.

٩ مَانْ ثِيزِي غَارْ ونِّي إِخدّْمنْ خْ مِينْ خفْ يَاربّرْ؟ ◘3:‏9 أَمب. 1‏:‏3 ١٠ نشّْ ژْرِيغْ شّْغڒْ نِّي إِوْشَا أَربِّي إِ ثَارْوَا ن بْنَاذمْ مَاحنْذْ أَذْ زَّايسْ سِّيحْڒنْ إِخفْ نْسنْ. ١١ نتَّا إِڭَّا مَارَّا ذ أَصبْحَانْ ذِي ڒْْوقْثْ نّسْ. إِڭَّا ؤُڒَا ذ ڒْْوقْثْ ن ڒبْذَا ذڭْ وُوڒْ نْسنْ، بْڒَا مَا إِزمَّارْ بْنَاذمْ أَذْ إِحَاكَا ذِي ثْمڭَّا نِّي إِڭَّا أَربِّي زڭْ ؤُمزْوَارُو أَڒْ أَنڭَّارُو. ١٢ نشّْ ؤُفِيغْ وَارْ غَارْسنْ إِدْجِي مِينْ إِحْڒَانْ خْ مِينِّي فَارّْحنْ إِوْذَانْ نِيغْ أَذْ أَرّنْ مژْرِي مڒْمِي نِيثْنِي عَاذْ ذِي ثُوذَارْثْ نْسنْ، ١٣ ؤُ عَاوذْ أَقَا كُوڒْ بْنَاذمْ أَذْ إِشّْ، أَذْ إِسُو ؤُشَا أَذْ يَارّْ مژْرِي ذِي مِينْ إِصبْحنْ ذِي مَارَّا أَمَارّثْ نّسْ. أَيَا ذ إِشْثْ ن ثَارْزفْثْ ن أَربِّي.

١٤ نشّْ سّْنغْ أَقَا مَارَّا مِينْ إِتّڭّْ أَربِّي، أَذْ يِيڒِي إِ ڒبْذَا. وَارْ إِزمَّارْ أَذْ غَارسْ إِتّْمَارْنِي وَالُو ؤُ وَارْ زَّايسْ إِتّْوَاسّنْقِيسْ وَالُو. أَربِّي إِڭَّا إِ-ث مَاحنْذْ أَذْ ڭّْوذنْ زَّاثْ إِ وُوذمْ نّسْ. ١٥ مِينْ إِدْجَانْ، ثُوغَا إِدْجَا قْبڒْ ؤُشَا مِينْ إِ غَا يِيڒِينْ، ثُوغَا إِدْجَا قْبڒْ. أَربِّي يَارزُّو خْ مِينْ إِعْذُونْ عَاذْ.

١٦ أَقَا ژْرِيغْ سَاذُو ثْفُوشْثْ عَاوذْ أَمْشَانْ ن ڒْْحقّْ: أَقَا إِسلّطْ ذِينْ ڒْْغشّْ، ؤُشَا ژْرِيغْ ؤُڒَا ذ أَمْشَانْ ن ثْسڭْذَا: أَقَا إِسلّطْ ذِينْ ڒْْغَارْ. ١٧ نشّْ نِّيغْ ذڭْ وُوڒْ إِنُو: ”أَربِّي أَذْ إِحْكمْ أَمْسڭّذْ ذ ؤُعفَّانْ، مَاغَارْ ذِينِّي إِشْثْ ن ثْسَاعّثْ إِ كُوڒْ أَنْوَايْ ؤُ إِ قَاعْ ڒْْخذْمثْ.“ ١٨ نشّْ نِّيغْ ذڭْ وُوڒْ إِنُو: ”أَقَا ذِي طّْوعْ ن ثَارْوَا ن بْنَاذمْ، أَقَا أَربِّي أَذْ ثنْ إِسِّيففْ ؤُ نِيثْنِي أَذْ ثْوَاڒَانْ أَقَا نِيثْنِي أَمْ ڒْْمَاڒْ، نِيثْنِي س يِيخفْ نْسنْ.“ ١٩ مَاغَارْ خْ ثِيرَا ن ثَارْوَا ن بْنَاذمْ ؤُ خْ ثِيرَا ن ڒْْمَاڒْ: نِيثْنِي غَارْسنْ ثِيرَا ذ إِشْثْ. أَمْ مَامّشْ إِمُّوثْ وَا، إِمُّوثْ ؤُڒَا ذ ونّغْنِي، مَارَّا إِذْسنْ غَارْسنْ ذ ثْوَارِّيثْ ن نّفْسْ ذ إِجّْ. وَارْ ذِينْ إِدْجِي ڒفْضڒْ إِ بْنَاذمْ خْ ڒْْمَاڒْ، مَاغَارْ مَارَّا أَقَا-ث ذِي ڒْْبَاطڒْ. ٢٠ مَارَّا إِذْسنْ ڭُّورنْ غَارْ إِجّْ ن ومْشَانْ، مَارَّا نِيثْنِي زڭْ ؤُشَاڒْ ؤُشَا أَذْ د-ذوْڒنْ غَارْ ؤُشَاڒْ. ◘3:‏20 أَمز. 3‏:‏19 ٢١ وِي إِسّْننْ، مَا بُوحْبڒْ ن ثَارْوَا ن بْنَاذمْ أَذْ إِڭعّذْ غَارْ سنّجْ ؤُ بُوحْبڒْ ن ڒْْمَاڒْ أَذْ د-إِهْوَا غَارْ ثمُّورْثْ؟ ٢٢ أَمُّو إِ تّْوَاڒِيغْ، وَارْ إِدْجِي مِينْ إِحْڒَانْ خْ مِينِّي إِفَارّحْ بْنَاذمْ ذِي ثْمڭَّا نّسْ، مَاغَارْ مَانْ أَيَا ذ ثَاسْغَارْثْ نّسْ، مِينْزِي مَانْ ونْ إِزمَّارنْ أَذْ ث يَارّْ أَڒْ غَا إِژَارْ مِينْ غَا يِيڒِينْ أَوَارْنِي أَسْ؟