١ إِمْسَارْ ذڭْ وُوسَّانْ ن أَحَاشْوِيرُوشْ - نتَّا ذ أَحَاشْوِيرُوشْ ونِّي ثُوغَا إِحكّْمنْ زِي ثمُّورْثْ ن ڒْْهنْذْ أَڒْ ثَامُّورْثْ ن كُوشْ خْ مْيَا ؤُ-سبْعَا ؤُ-عِيشْرِينْ ن لْعَامَالَاثْ - ٢ وَاهْ، ذڭْ وُوسَّانْ نِّي، ؤُمِي إِقِّيمْ ؤُجدْجِيذْ أَحَاشْوِيرُوشْ خْ ڒْْعَارْشْ ن ثْڭلْذِيثْ نّسْ ذِي ڒقْصَارْ ن شُوشَانْ، ٣ ذڭْ ؤُسڭّْوَاسْ وِيسّْ ثْڒَاثَا ن ڒحْكَامْ نّسْ، أَقَا إِڭَّا إِشْثْ ن زَّارْذثْ إِ مَارَّا ڒْْحُوكَّامْ ذ إِمْسخَّارنْ نّسْ. ثُوغَا إِكُومَانْذَارنْ ن ڒْْعسْكَارْ ن ثمُّورْثْ ن لْفُورْسْ ذ مَاذَايْ ؤُڒَا ذ ثَارْوَا ن ثَاصِيڒثْ ذ ڒْْحُوكَّامْ ن لْعَامَالَاثْ تّْمُونَانْ زَّاثْ إِ وُوذمْ نّسْ، ٤ ؤُمِي إِسّْشنْ أَڭْڒَا ن ؤُعُودْجِي ن ثْڭلْذِيثْ نّسْ ذ شَّانْ ذ ڒمْڒَاحثْ ن لْعَاضَامَا نّسْ ذڭْ وَاطَّاسْ ن وُوسَّانْ، أَقَا ذِي مْيَا ؤُ-ثْمَانْيِينْ ن وُوسَّانْ. ٥ ؤُمِي عْذُونْ وُوسَّانْ نِّي، خنِّي ثُوغَا إِسّوْجَاذْ ؤُجدْجِيذْ إِشْثْ ن زَّارْذثْ إِ مَارَّا ڒْْڭنْسْ نِّي ثُوغَا ذِينْ ذِي لْقلْعَا ن شُوشَانْ، زڭْ ؤُمقّْرَانْ أَڒْ أَمژْيَانْ، سبْعَا ن وُوسَّانْ، ذڭْ وَازَّايْ ن وحْوِيشْ ن ڒقْصَارْ ن ؤُجدْجِيذْ. ٦ أَقَا ذِينْ أَرْوَاقَاثْ ذ إِشمْڒَاڒنْ ذ إِزِيزَاونْ ذ إِذهْمَاننْ مُّوذنْ س إِفِيڒَانْ ن ڒقْطنْ أَزْذَاذْ ذ ؤُفِيڒُو أَرْجُووَانِي ڭِّينْ ثنْثْ غَارْ إِقضْبَانْ ن نُّوقَارْثْ ؤُ غَارْ إِپِيلَارنْ ن ڒْْمَارْمُورْ. ڒمْطَارْبَاثْ ن وُورغْ ذ نُّوقَارْثْ مَّارْسنْثْ خْ ثِيسِي ن زّلِّيجْ ذَايسْ أَژْرُو أَزِيزَا أَمْ سْمَارَاخْثْ ذ وژْرُو ذ أَشمْڒَاڒْ ذ وژْرُو أَمْ ثْيَاقُوثْ ذ وژْرُو ذ أَبَارْشَانْ. ٧ ثمّوْشْ ثْسسِّي ذِي ڒقْشُوعْ ن وُورغْ ؤُ ثُوغَا مَارَّا ڒقْشُوعْ مّْسبْضَانْ، ثَا وَارْ ثَارْوِيسْ ثَا، ؤُ ثُوغَا ذِينْ بِينُو إِڭلّْذنْ س وَاطَّاسْ، أَنشْثْ إِ ثُوغَا إِزمَّارْ ؤُفُوسْ ن ؤُجدْجِيذْ أَذْ ث إِوْشْ. ◼1:‏7 ’ڒقْشُوعْ‘ - إِفنْجَاڒنْ ذ إِغَارَّافنْ. ٨ ثُوغَا سْوِينْ عْلَاحْسَابْ ڒُْومُورْ، وَارْ إِدْجِي س ؤُغِيڒْ، مِينْزِي أَمُّو إِ إِوصَّا ؤُجدْجِيذْ إِ مَارَّا إِمقّْرَاننْ ن ثَادَّارْثْ نّسْ، مَاحنْذْ أَذْ ڭّنْ ڒْْخَاضَارْ إِ مَارَّا. ٩ ثڭَّا ثْجدْجِيذْثْ وَاشْثِي ؤُڒَا ذ إِشْثْ ن زَّارْذثْ إِ ثمْغَارِينْ ذِي ثَادَّارْثْ إِڭلّْذنْ ن ؤُجدْجِيذْ أَحَاشْوِيرُوشْ.

١٠ ذڭْ وَاسّْ وِيسّْ سبْعَا، ؤُمِي إِذْوڒْ وُوڒْ ن ؤُجدْجِيذْ إِفَارْحْ س بِينُو، إِنَّا إِ مَاهُومَانْ، بِيزْثَا، حَارْپُونَا، بِيغْثَا ذ أَبَاغْثَا، زِيثَارْ ذ كَارْكَاسْ، أَقَا نِيثْنِي ذ سبْعَا ن إِمْسخَّارنْ إِشنّْعنْ إِ ثُوغَا إِسخَّارنْ زَّاثْ إِ وُوذمْ ن ؤُجدْجِيذْ أَحَاشْوِيرُوشْ، ١١ حِيمَا أَذْ أَوْينْ ثَاجدْجِيذْثْ وَاشْثِي زَّاثْ إِ وُوذمْ ن ؤُجدْجِيذْ س تَّاجْ إِڭلّْذنْ، مَاحنْذْ أَذْ إِسّْشنْ أَژْرِي نّسْ إِ ڒڭْنُوسْ ؤُ إِ ڒْْحُوكَّامْ، مِينْزِي نتَّاثْ ثُوغَا ذَايسْ أَژْرِي. ١٢ مَاشَا ثَاجدْجِيذْثْ وَاشْثِي ثُوڭِي أَذْ د-ثَاسْ عْلَاحْسَابْ أَوَاڒْ ن ؤُجدْجِيذْ نِّي ذ أَسْ د-يُوسَا س ؤُفُوسْ ن إِمْسخَّارنْ إِشنّْعنْ. إِفُّوڭمْ ؤُجدْجِيذْ أَطَّاسْ ؤُشَا إِكَّارْ ذَايسْ وسْعَارْ نّسْ. ١٣ خنِّي إِنَّا ؤُجدْجِيذْ إِ إِمِيغِيسنْ إِنِّي إِفهّْمنْ ڒْْمِيجَاڒَاثْ ن ڒْْوقْثْ - مِينْزِي أَمُّو إِ ثُوغَا ثتّْوَاڭّْ ثْمسْڒَاشْثْ ن ؤُجدْجِيذْ زَّاثْ إِ يِينِّي إِسّْننْ أَزرْفْ ؤُ ڒحْكَامْ - ١٤ إِ كَارْشَانَا، شِيثَارْ، أَذْمَاثَا، ثَارْشِيشْ، مَارَاسْ، مَارْسَانَا ذ مَامُوكَانْ، سبْعَا ن ڒْْحُوكَّامْ ن لْفُورْسْ ذ مَاذَايْ، إِنِّي ذ أَسنْ إِعدّڒْ مَاحنْذْ أَذْ ژَترنْ ؤُذمْ ن ؤُجدْجِيذْ ؤُ كْسِينْ إِمُوشَانْ إِمزْوُورَا ذِي ثْڭلْذِيثْ: ١٥ ”مِينْ ذ أَنغْ إِتّْخصَّا أَذْ نڭّْ أَكْ-ذ ثْجدْجِيذْثْ وَاشْثِي عْلَاحْسَابْ ڒْْقَانُونْ، مِينْزِي نتَّاثْ وَارْ ثڭِّي أَوَاڒْ ن ؤُجدْجِيذْ أَحَاشْوِيرُوشْ إِ د-إِسّكّْ س ؤُفُوسْ ن إِمْسخَّارنْ نّسْ إِشنّْعنْ؟“ ١٦ خنِّي إِنَّا مَامُوكَانْ زَّاثْ إِ وُوذمْ ن ؤُجدْجِيذْ ذ ڒْْحُوكَّامْ: ”ثَاجدْجِيذْثْ وَاشْثِي وَارْ ثڭِّي شَا ڒْْعِيبْ ذڭْ ؤُجدْجِيذْ ذ ڒْْحُوكَّامْ وَاهَا، مَاشَا ؤُڒَا ذِي مَارَّا ڒْْحُوكَّامْ ذ مَارَّا ڒڭْنُوسْ ذِي مَارَّا لْعَامَالَاثْ ن ؤُجدْجِيذْ أَحَاشْوِيرُوشْ. ١٧ مِينْزِي مِينْ ثڭَّا ثْجدْجِيذْثْ أَذْ إِفّغْ غَارْ مَارَّا ثمْغَارِينْ ؤُشَا أَذْ يَارّْ إِرْيَازنْ نْسنْثْ أَذْ تّْوَاسّحْقَارنْ جَارْ ثِيطَّاوِينْ نْسنْثْ خْمِي قَّارنْثْ: ’أَجدْجِيذْ أَحَاشْوِيرُوشْ إِنَّا أَذْ سّكّنْ غَارْ ثْجدْجِيذْثْ وَاشْثِي مَاحنْذْ أَذْ د-ثَاسْ زَّاثْ إِ وُوذمْ نّسْ، مَاشَا نتَّاثْ وَارْ د-ثُوسِي شَا.‘ ١٨ ؤُڒَا ذ ثِيمْغَارِينْ ن ڒْْحُوكَّامْ ن لْفُورْسْ ذ مَاذَايْ، ثِينِّي إِسْڒَانْ إِ ثمْوَارِّيثْ ن ثْجدْجِيذْثْ، أَذْ إِنِينْثْ أَيَا أَسّْ-أَ إِ مَارَّا ڒْْحُوكَّامْ ن ؤُجدْجِيذْ ؤُشَا أَمُّو إِ ذِينْ غَا يِيڒِي ؤُسحْقَارْ ذ ؤُذُوقّزْ ن وغْضَابْ أَطَّاسْ. ١٩ مَاڒَا إِعْجبْ أَسْ ڒْْحَاڒْ إِ ؤُجدْجِيذْ، أجّْ إِ-ث خنِّي أَذْ إِسُّوفّغْ إِجّْ ن ڒُْومُورْ، أَذْ ث إِزمّمْ ذِي ڒْْقَاوَانِينْ ن أَيْثْ ن لْفُورْسْ ذ مَاذَايْ، مَاحنْذْ وَارْ ث تّْعدَّانْ، ؤُ وَارْ إِتّجِّي أَذْ د-ثَاسْ ثَاجدْجِيذْثْ وَاشْثِي عَاذْ زَّاثْ إِ وُوذمْ ن ؤُجدْجِيذْ أَحَاشْوِيرُوشْ ؤُشَا أجّْ أَجدْجِيذْ أَذْ إِوْشْ ثَاڭلْذَا نّسْ إِ حذْ نّغْنِي، أَذْ ثِيڒِي حْسنْ زَّايسْ. ٢٠ خْمِي إِ غَا إِتّْوَاسڒْ ڒُْومُورْ ن ؤُجدْجِيذْ نِّي إِ غَا يڭّْ ذِي مَارَّا ثَاڭلْذِيثْ نّسْ، ثنِّي ذ ثَامقّْرَانْثْ، خنِّي أَذْ ذوْڒنْثْ مَارَّا ثِيمْغَارِينْ أَذْ وقَّارنْثْ إِرْيَازنْ نْسنْثْ، زڭْ ؤُمژْيَانْ أَڒْ أَمقّْرَانْ.“ ٢١ ثُوغَا أَوَاڒْ-أَ ذ لمْلِيحْ ذِي ثِيطَّاوِينْ ن ؤُجدْجِيذْ ذ ڒْْحُوكَّامْ ؤُشَا إِڭَّا ؤُجدْجِيذْ عْلَاحْسَابْ أَوَاڒْ ن مَامُوكَانْ. ٢٢ إِسّكّْ ثِيبْرَاثِينْ غَارْ مَارَّا لْعَامَالَاثْ ن ؤُجدْجِيذْ - إِ كُوڒْ لْعَامَالَا س ثِيرَا نّسْ ؤُ إِ كُوڒْ ڒْْڭنْسْ س يِيڒسْ نّسْ - حِيمَا كُوڒْ أَرْيَازْ أَذْ يِيڒِي ذ ڒْْحَاكمْ خْ ثَادَّارْثْ نّسْ ؤُشَا أَذْ إِسِّيوڒْ س يِيڒسْ ن ڒْْڭنْسْ نّسْ.