١ ڒخْذنِّي إِزهّذْ مُوسَا جْمِيعْ أَكْ-ذ أَيْثْ ن إِسْرَائِيل زْهِيذْ-أَ إِ سِيذِي، نَّانْ:

”أَذْ زهّْذغْ إِ سِيذِي،

مِينْزِي نتَّا يُوعْڒَا ذِي ڒُْوعْڒَا!

أَيِيسْ ذ ونِّي خَاسْ ينْيِينْ

إِنْضَارْ إِ-ثنْ ذِي ڒبْحَارْ. ◘15:‏1 إِزهد. 106‏:‏12؛ أَسَا. 15‏:‏3

٢ سِيذِي ذ جّهْذْ إِنُو ذ أَزهّذْ إِنُو.

نتَّا إِذْوڒْ ذ أَسنْجمْ إِنُو.

وَا ذ أَربِّي إِنُو،

نشّْ أَذْ ث سّمْغَارغْ.

نتَّا ذ أَربِّي ن بَابَا،

نشّْ أَذْ ث سّْعُودْجغْ! ◘15:‏2 إِزهد. 18‏:‏2؛ إِزهد. 118‏:‏14؛ إِشا. 12‏:‏2

٣ سِيذِي ذ أَرْيَازْ ن ؤُمنْغِي،

سِيذِي ذ إِسمْ نّسْ!

٤ إِكَارُّوثنْ ن فِيرْعُونْ ذ ڒْْعسْكَارْ نّسْ

إِنْضَارْ إِ-ثنْ ذِي ڒبْحَارْ

ؤُ أَشوَّارْ ن إِنغْرَافنْ نّسْ ن ڒْْعسْكَارْ

غَارْقنْ ذِي ڒبْحَارْ ن ثلْڭَا.

٥ أَمَانْ إِهوْڒنْ ذْڒِينْ إِ-ثنْ.

أَمشْنَاوْ أَژْرُو، هْوَانْ غَارْ ڒَْادْجَاغْ. ◘15:‏5 نَاح. 9‏:‏11

٦ أَ سِيذِي، أَفُوسْ أَفُوسِي نّشْ

إِتّْوَاعزّْ س جّهْذْ،

أَفُوسْ أَفُوسِي نّشْ،

أَ سِيذِي، أَقَا إِڒْبزْ ڒعْذُو. ◘15:‏6 إِزهد. 118‏:‏15، 16

٧ س ڒمْغَارثْ ن ؤُعُودْجِي نّشْ ثثحِّيذْ

إِنِّي كِيكْ إِتّمْعَاڒَانْ.

مَاڒَا ثسّكّذْ ڒْْحَاذُوقْ ن وغْضَابْ نّشْ،

أَذْ ثنْ يشّْ وَانِيثَا أَمشْنَاوْ إِغدْجْ.

٨ س ؤُسُوضِي ن ونْزَارنْ نّشْ

عُورّْشنْ وَامَانْ،

تّْوَاسّْبدّنْ ثْسدْجْيَا أَمْ وغْبَارْ،

أَمَانْ إِهوْڒنْ جمْذنْ

ذِي ڒْْوسْطْ ن ڒبْحَارْ. ◘15:‏8 إِشا. 63‏:‏12، 13؛ حَاب. 3‏:‏10

٩ إِنَّا ڒعْذُو: ’أَذْ ثنْ أَرذْفغْ،

أَذْ ثنْ عْذُوغْ،

أَذْ بْضِيغْ ڒْْمُورْ،

ڒعْمَارْ إِنُو أَذْ زَّايْسنْ إِجِّيونْ،

أَذْ د-جبْذغْ سِّيفْ إِنُو،

أَفُوسْ إِنُو أَذْ زَّايْسنْ إِكّسْ ڒْْوَارْثْ نْسنْ.‘

١٠ ثْسُوضذْ س نّفْسْ نّشْ

ؤُشَا إِذڒْ إِ-ثنْ ڒبْحَارْ.

نِيثْنِي هْوَانْ-د أَمْ ڒخْفِيفْ

ذڭْ وَامَانْ إِمْغَارنْ. ◘15:‏10 إِزهد. 74‏:‏13؛ 106‏:‏11

١١ أَ سِيذِي، مَانْ ونْ إِ إِدْجَانْ

أَمْ شكْ جَارْ إِربِّيثنْ؟

وِي إِدْجَانْ أَمْ شكْ،

ذ ونِّي إِتّْوَاسّْعُودْجنْ ذِي ثْقدَّاسْثْ،

أَمْوقَّارْ ذڭْ إِزْڒَانْ ن ؤُصبّحْ،

مَانْ ونْ إِتّڭّنْ ڒعْجَايبْ أَمْ شكْ؟

١٢ ثسّْوِيژّْضذْ أَفُوسْ أَفُوسِي نّشْ،

ثْسَارْضْ إِ-ثنْ ثمُّورْثْ.

١٣ شكْ ثْڭوّْذذْ ڒْْڭنْسْ-أَ

س ثْمخْسِيوْثْ نّشْ إِشُووَّارنْ،

أَقَا ثفْذِيذْ ث،

س جّهْذْ نّشْ ثْنذْهذْ ثنْ

غَارْ ثْزذِّيغْثْ إِقدّْسنْ نّشْ.

١٤ ڒڭْنُوسْ سْڒِينْ خْ ؤُيَا ؤُشَا أَرْجِيجنْ.

ثطّفْ ثڭّْوُوذِي ذڭْ إِمزْذَاغْ ن فِيلِيشِيثْ.

١٥ ڒخْذنِّي إِمقّْرَاننْ ن ثْقبَّاڒْ

ن إِذُومْ تّْبهْثنْ،

إِنِّي غَارْ ثدْجَا صُّولْطَا ذِي مُوآبَ

تَّارْجِيجنْ،

ؤُ مَارَّا إِمزْذَاغْ ن كنْعَانْ أَقَا فسْينْ! ◘15:‏15 أَعَوذ. 2‏:‏4

١٦ ثوْضَا خَاسنْ ڒْْعُورّثْ ذ ثِيڭّْوُوذِي.

س ڒمْغَارثْ ن ؤُغِيڒْ نّشْ

سغْذنْ أَمْ وژْرُو،

أَڒَامِي إِژْوَا ڒْْڭنْسْ نّشْ، أَ سِيذِي،

أَڒَامِي إِژْوَا ڒْْڭنْسْ-أَ

إِ ثْكسْبذْ إِ يِيخفْ نّشْ.◘15:‏16 أَعَوذ. 2‏:‏25؛ 11‏:‏25؛ ياش. 2‏:‏9

١٧ شكْ أَذْ ثنْ ثْنذْهذْ

ؤُشَا أَذْ ثنْ ثژُّوذْ

خْ وذْرَارْ ن ڒْْوَارْثْ نّشْ،

أَمْشَانْ إِ ثڭِّيذْ ذ ثَازذِّيغْثْ نّشْ،

أَ سِيذِي، زَّاوشْثْ إِقدّْسنْ

إِ إِڭِّينْ إِفَاسّنْ نّشْ، أَ سِيذِي إِنُو.

١٨ سِيذِي أَذْ إِحْكمْ إِ ڒبْذَا قَاعْ!

١٩ مِينْزِي أَيِيسْ ن فِيرْعُونْ يُوذفْ غَارْ ڒبْحَارْ

س إِكَارُّوثنْ نّسْ ذ إِمْنَاينْ نّسْ

ؤُشَا إِقْڒبْ خَاسنْ سِيذِي عَاوذْ

أَمَانْ ن ڒبْحَارْ.

مَاشَا أَيْثْ ن إِسْرَائِيل ژْوَانْ خْ ڒَْاژَاغْ

ذِي ڒْْوسْطْ ن ڒبْحَارْ.“

٢٠ ؤُ مَارْيَامْ، ثَانَابِيثْ، ؤُتْشْمَاسْ ن هَارُونْ، ثكْسِي أَدْجُونْ ذڭْ ؤُفُوسْ نّسْ ؤُ مَارَّا ثِيمطَّا فّْغنْثْ أَوَارْنِي أَسْ س إِبنْذِيرنْ ذ شّْضِيحْ س نُّوبْثَاثْ. ◘15:‏20 1 صم. 18‏:‏6 ٢١ خنِّي ثَارَّا-د خَاسنْ مَارْيَامْ سْنُّوبثْ نّسْ: ”غنّْجمْ إِ سِيذِي، مِينْزِي أَقَا نتَّا يُوعْڒَانْ أَطَّاسْ! إِنْضَارْ أَيِيسْ أَكْ-ذ ونِّي خَاسْ ينْيِينْ ذِي ڒبْحَارْ.“

٢٢ خنِّي إِجَّا مُوسَا ڒْْڭنْسْ ن إِسْرَائِيل أَذْ إِفْسِي إِقِيضَانْ نْسنْ، إِنِّي إِدْجَانْ خْ ثْمَا ن ڒبْحَارْ ن ثلْڭَا، ؤُشَا رُوحنْ ذِي ڒخْڒَا ن شُورْ، ؤُيُورنْ ثْڒَاثَا ن وُوسَّانْ ذِي ڒخْڒَا بْڒَا أَذْ أَفنْ أَمَانْ. ٢٣ ؤُشَا إِوْضنْ غَارْ مَارَا، مَاشَا وَارْ زمَّارنْ أَذْ سْونْ أَمَانْ ن مَارَا، مِينْزِي ثُوغَا أَثنْ ذ إِمرْزَاڭنْ. خْ ؤُيَا ڭِّينْ أَسْ إِ ومْشَانْ نِّي ’مَارَا‘. ◘15:‏23 ڒخْڒ. 33‏:‏8 ٢٤ إِنّذْقمْ ڒْْڭنْسْ خْ مُوسَا، إِنَّا: ”مِينْ غَا نْسُو؟“ ◼15:‏24 ’إِنّذْقمْ‘ - نِيغْ ’إِعكّسْ‘. ٢٥ نتَّا إِڒَاغَا إِ سِيذِي ؤُشَا سِيذِي إِمّڒْ أَسْ إِجّْ ن ؤُكشُّوضْ ؤُشَا إِنْضَارْ إِ-ث ذَاخڒْ ذڭْ وَامَانْ ؤُشَا ذوْڒنْ وَامَانْ ذ إِمِيژِيذنْ. ذِينْ إِ ذ أَسْ إِڭَّا إِ ڒْْڭنْسْ إِشْثْ ن ثوْصيّثْ ذ إِشْثْ ن لْفَارِيضَا ؤُ ذِينِّي إِ-ثنْ إِقدْجبْ. ٢٦ إِنَّا: ”مَاڒَا ثسْڒِيذْ مْلِيحْ إِ وَاوَاڒْ ن سِيذِي، أَربِّي نّشْ، ثڭِّيذْ مِينْ إِدْجَانْ نِيشَانْ ذِي ثِيطَّاوِينْ نّسْ، أَذْ ثسْڒذْ إِ ڒُْومَارَاثْ نّسْ، أَذْ ثحْضِيذْ مَارَّا ثِيوصَّا نّسْ، خنِّي نشّْ وَارْ ذ أَومْ-د سّكِّيغْ ڒهْڒَاشْ إِ د-سّكّغْ خْ مِيصْرَا، مِينْزِي نشّْ ذ سِيذِي، أَمسْڭنْفِي نّشْ!“ ٢٧ ڒخْذنِّي إِوْضنْ غَارْ إِلِيمْ، مَانِي ثُوغَا ثنْعَاشْ ن ڒْْعُونْصَارَاثْ ن وَامَانْ، ذ سبْعِينْ ن ثْشجِّيرَا ن ثِينِي ؤُشَا وْثِينْ إِقِيضَانْ نْسنْ ذِينِّي زَّاثْ إِ وَامَانْ.