١ ؤُمِي سْڒنْ إِغْرِيمنْ ن يَاهُوذَا ذ بِينْيَامِينْ، أَقَا أَيْثْ ن لْمنْفَا ثُوغَا بنَّانْ زَّاوشْثْ ثَامقّْرَانْثْ إِ سِيذِي، أَربِّي ن إِسْرَائِيل، ٢ ؤُسِينْ-د نِيثْنِي غَارْ زَارُوبَّابِيلْ ذ إِزدْجِيفنْ خْ إِبَابَاثنْ ن ڒَْادْجَاثْ ؤُشَا نَّانْ أَسنْ: ”أجّْ أَنغْ أَذْ نبْنَا جْمِيعْ أَكِيذْومْ، مِينْزِي ؤُڒَا ذ نشِّينْ نَارزُّو أَربِّي، أَمْ كنِّيوْ، مَاغَارْ نشِّينْ ثُوغَا نْقدّمْ ثِيغَارْصِي زڭْ وُوسَّانْ ن أَسَارْحَادُّونْ، أَجدْجِيذْ ن أَشُّورْ، ونِّي ذ أَنغْ ذَا إِسّْڭعّْذنْ.“ ◘4:‏2 2 إِج. 17‏:‏29‏-‏41 ٣ مَاشَا زَارُوبَّابِيلْ ذ يَاهُوشَاعْ ذ إِزدْجِيفنْ إِقِّيمنْ جَارْ إِبَابَاثنْ ن إِسْرَائِيل، نَّانْ أَسنْ: ”وَارْ إِدْجِي إِ كنِّيوْ ذ نشِّينْ مَاحنْذْ أَذْ نبْنَا جْمِيعْ إِشْثْ ن ثَادَّارْثْ إِ أَربِّي نّغْ. نشِّينْ وحّْذْنغْ أَذْ ت نبْنَا إِ سِيذِي، أَربِّي ن إِسْرَائِيل، أَمْ مَامّشْ إِ ذ أَنغْ يُومُورْ ؤُجدْجِيذْ كُورَاشْ، أَجدْجِيذْ ن لْفُورْسْ.“ ◘4:‏3 عِز. 1‏:‏1، 2، 3

٤ ؤُشَا إِمْسَارْ، أَقَا ڒْْڭنْسْ ن ثمُّورْثْ سَّارْخُونْ إِفَاسّنْ ن ڒْْڭنْسْ ن يَاهُوذَا ؤُشَا سِّيڭّْوِيذنْ ثنْ خْ ڒبْنِي. ٥ شْرَانْ إِمْشَاوَارنْ ضِيدّْ نْسنْ، مَاحنْذْ أَذْ سّْبطّْڒنْ أَنْوَايْ نْسنْ، ؤُ أَيَا إِكَّا مَارَّا ؤُسَّانْ ن كُورَاشْ، أَجدْجِيذْ ن لْفُورْسْ، أَڒْ ثَاڭلْذَا ن ذَارِييُوسْ، أَجدْجِيذْ ن لْفُورْسْ. ٦ ؤُمِي ثُوغَا أَحَاشْوِيرُوشْ ذ أَجدْجِيذْ، غَارْ بدُّو ن ثْڭلْذَا نّسْ، ؤُرَانْ نِيثْنِي إِجّْ ن ؤُشثْشِي ضِيدّْ إِ إِمزْذَاغْ ن يَاهُوذَا ذ ؤُرْشَالِيمْ.

٧ ذڭْ وُوسَّانْ ن أَرْثَاحْشَاسْثَا يُورَا بِيشْلَامْ أَكْ-ذ مِيثْرَاذَاثْ ذ طَابَايِيلْ ذ إِعْشِيرنْ نّسْ إِنّغْنِي، إِ ؤُجدْجِيذْ أَرْثَاحْشَاسْثَا، أَجدْجِيذْ ن لْفُورْسْ. ثُوغَا ثَابْرَاثْ ثُورَا س ثِيرَا ن إِڒسْ ن ثْرَامِيثْ ؤُ ثُوغَا ثَارْجْمنْ ت عَاوذْ غَارْ ثْرَامِيثْ.

٨ رَاحُومْ، أَمْسُوفّغْ ن ڒحْكَامَاثْ، ذ ؤُمَارِيرْ شِيمْشَايْ ؤُرِينْ إِشْثْ ن ثبْرَاثْ إِ ؤُجدْجِيذْ أَرْثَاحْشَاسْثَا ضِيدّْ إِ ؤُرْشَالِيمْ، ثنِّي ذَايسْ يُورَا أَمُّو:

٩ ”رَاحُومْ، أَمْسُوفّغْ ن ڒحْكَامَاثْ، ذ ؤُمَارِيرْ شِيمْشَايْ ذ إِنِّي إِقِّيمنْ زڭْ إِقْرِيننْ نْسنْ ذِي ڒْْخذْمثْ، ڒْْقُوضَاثْ، إِمْخَازْنِييّنْ، أَيْثْ ن شّنْعثْ ذ أَيْثْ ن لْفُورْسْ ذ أَيْثْ ن إِرِيخْ ذ بَابِيلُونْ ذ شُوشَانْ، أَقَا أَثنْ ذ إِعِيلَامِييّنْ، ١٠ ذ شُّوعُوبْ نّغْنِي، إِنِّي إِوْيِي ثنْ أَسْنَافَّارْ أَمقّْرَانْ أَمْشنّعْ غَارْ لْمنْفَا ؤُ إِسّزْذغْ إِ-ثنْ ذِي ثنْذِينْثْ ن سَامَارْيَا ؤُ ذِي جِّيهثْ إِقِّيمنْ خْ ؤُجمَّاضْ ن إِغْزَارْ ن لْفُورَاطْ ... ؤُشَا عَاذْ.“

١١ ثَا ذ ثِيڒمْثْ ن ثبْرَاثْ إِ د-سّكّنْ نِيثْنِي إِ ؤُجدْجِيذْ أَرْثَاحْشَاسْثَا:

”إِمْسخَّارنْ نّشْ، إِرْيَازنْ نِّي إِدْجَانْ خْ ؤُجمَّاضْ ن إِغْزَارْ ن لْفُورَاطْ ... ؤُشَا عَاذْ.“

١٢ ”إِڒِي أَذْ إِسّنْ ؤُجدْجِيذْ أَقَا ؤُذَاينْ إِ د-إِڭعّْذنْ زِي غَاركْ، أَقَا إِوْضنْ-د غَارْنغْ غَارْ ؤُرْشَالِيمْ ؤُشَا نِيثْنِي أَقَا بنَّانْ ثَانْذِينْثْ نِّي إِغوّْغنْ ثَاعفَّانْثْ، أَقَا تّْكمَّاڒنْ ڒحْيُوضْ ؤُعدّْڒنْ ذْسُوسَا. ١٣ خنِّي ڒخُّو، إِتّْخصَّا أَذْ إِسّنْ ؤُجدْجِيذْ، مَاڒَا ثَانْذِينْثْ نِّي أَذْ ثتّْوَاسّْبدّْ ثْوَاڒَا نّغْنِي ؤُ ڒحْيُوضْ أَذْ تّْوَاكمّْڒنْ، أَقَا نتَّاثْ وَارْ ثتِّيشْ لْجِيزْيَا ڒَْا ذ ڒعْشُورْ ؤُڒَا ذ ضَّارِيبَا ن وبْرِيذْ ؤُشَا أَمُّو إِ غَا إِسّخْسَارْ أَرْبحْ ن إِجدْجِيذنْ. ١٤ خنِّي ڒخُّو، ؤُمِي نشِّينْ نتّْمدْجَاحْ مَاشَّا نّغْ س ثْمدْجَاحْثْ ن ڒقْصَارْ ؤُ وَارْ ذ أَنغْ د-ثُوسِي مَاڒَا نشِّينْ نْخزَّارْ ؤُمِي إِتّْوَاسّْبهْذڒْ ؤُجدْجِيذْ، خْ ؤُينِّي نسّكّْ-د ثَابْرَاثْ-أَ ؤُشَا نسَّارْڭبْ أَيَا إِ ؤُجدْجِيذْ، ١٥ حِيمَا أَذْ أَرْزُونْ ذڭْ وذْلِيسْ ن إِمزْرُوينْ ن ڒجْذُوذْ نْومْ ؤُشَا أَذْ ثَافذْ ذڭْ وذْلِيسْ ن إِمزْرُوينْ ؤُشَا أَذْ زَّايسْ ثسّْنذْ أَقَا ثَانْذِينْثْ-أَ ذ إِشْثْ ن ثنْذِينْثْ إِغوّْغنْ، ثِيوِي-د أَرّْژِييّثْ إِ إِجدْجِيذنْ ؤُ إِ لْعَامَالَاثْ ؤُ زڭْ وشْحَاڒْ ؤُيَا سّكَّارَانْ ذَايسْ أَغوّغْ. س ؤُينِّي ثتّْوَاهْذمْ ثنْذِينْثْ-أَ. ١٦ نشِّينْ نسَّارْڭبْ أَجدْجِيذْ، أَقَا، مَاڒَا أَذْ ثتّْوَابْنَا ثنْذِينْثْ-أَ عَاوذْ ؤُشَا أَذْ تّْوَاكمّْڒنْ ڒحْيُوضْ نّسْ، خنِّي وَارْ غَاركْ تّتِّيڒِي شَا ثصْغَارْثْ عَاذْ خْ ؤُجمَّاضْ ن إِغْزَارْ ن لْفُورَاطْ.“

١٧ إِسّكّْ ؤُجدْجِيذْ ثَامْوَارِّيثْ إِ رَاحُومْ، أَمْسُوفّغْ ن ڒحْكَامَاثْ، ؤُ إِ ؤُمَارِيرْ شِيمْشَايْ ذ إِنِّي إِقِّيمنْ زڭْ إِقْرِيننْ نْسنْ ذِي ڒْْخذْمثْ إِنِّي إِزدّْغنْ ذِي سَامَارْيَا، ؤُ ؤُڒَا إِ يِينِّي إِقِّيمنْ زدّْغنْ خْ ؤُجمَّاضْ ن إِغْزَارْ ن لْفُورَاطْ:

”ڒهْنَا! ... ؤُشَا عَاذْ.“

١٨ ”ثَابْرَاثْ إِ ذ أَنغْ د-ثسّكّمْ، أَقَا ثتّْوَاغَارْ خَافِي نِيشَانْ. ١٩ ؤُشَا أَوَارْنِي ڒَْامِي ؤُمُورغْ أَيَا، ثتّْوَاڭّْ إِشْثْ ن ثَارزُّوثْ ؤُشَا ؤُفِينْ أَقَا ثَانْذِينْثْ-أَ ثْغوّغْ خْ إِجدْجِيذنْ زڭْ وشْحَاڒْ ؤُيَا ؤُشَا سّكَّارنْ ذَايسْ ڒبْذَا أَغوّغْ ذ ڒحْوڒْ. ٢٠ عَاوذْ ثُوغَا ذِينْ إِجدْجِيذنْ إِمقّْرَاننْ خْ ؤُرْشَالِيمْ، إِنِّي ثُوغَا إِحكّْمنْ ذِي مَارَّا جّْوَايهْ خْ ؤُجمَّاضْ ن إِغْزَارْ ن لْفُورَاطْ أَڒَامِي ثتّْوَاخدْجصْ أَسنْ لْجِيزْيَا ذ ڒعْشُورْ ذ ضَّارِيبَا ن وبْرِيذْ. ٢١ إِوَا، ڒخُّو ؤُمُورمْ أَذْ سّْبدّمْ إِرْيَازنْ-أَ. ثَانْذِينْثْ وَارْ ثْبنِّي ثْوَاڒَا نّغْنِيثْ أَڒْ غَا إِتّْوَاسُّوفّغْ زَّايِي ڒُْومُورْ إِ ؤُيَا. ٢٢ غَارْومْ أَقَا أَذْ ثَارْخُومْ زِي ثْمسْڒَاشْثْ-أَ. مَايمِّي غَا ثمْغَارْ ذْرُوشْثْ عَاذْ إِ ثْخسَّارْثْ ن إِجدْجِيذنْ؟“

٢٣ ڒَْامِي ثتّْوَاغَارْ ثبْرَاثْ ن ؤُجدْجِيذْ أَرْثَاحْشَاسْثَا إِ رَاحُومْ ذ شِيمْشَايْ، أَمَارِيرْ، ذ إِقْرِيننْ نْسنْ ذِي ڒْْخذْمثْ، ؤُيُورنْ إِنَا س ثَازْڒَا غَارْ ؤُرْشَالِيمْ، غَارْ وُوذَاينْ ؤُشَا سّْبدّنْ ثنْ زِي ڒْْخذْمثْ نْسنْ س ؤُغِيڒْ ؤُ س ڒْْخُونْشثْ. ٢٤ خنِّي ثْبدّْ ڒْْخذْمثْ إِ ثَادَّارْثْ ن أَربِّي ونِّي إِزدّْغنْ ذِي ؤُرْشَالِيمْ ؤُشَا إِقِّيمْ إِبدّْ أَڒْ أَسڭّْوَاسْ وِيسّْ ثْنَاينْ ن ثْڭلْذَا ن ذَارِييُوسْ، أَجدْجِيذْ ن لْفُورْسْ.