١ مِينْزِي كُوڒْ أَرَّايْسْ ن إِكهَّاننْ إِتّْوَاكّسْ-د زڭْ إِوْذَانْ، إِتّْوَاسّْڭعّذْ ذِي طّْوعْ ن إِوْذَانْ خْ مِينْ إِدْجَانْ ن أَربِّي، مَاحنْذْ أَذْ إِقدّمْ ثِيوْهِيبِينْ ذ ثْغَارْصِينْ خْ دّْنُوبْ. ٢ إِزمَّارْ أَذْ إِمَّارْسْ إِخفْ نّسْ، أَذْ إِحِينّْ خْ إِقُوبَّانِييّنْ ذ إِمْودَّارنْ، مِينْزِي ؤُڒَا ذ نتَّا سِيمَانْثْ نّسْ يَارْضْ ثُوضْعفْثْ. ٣ مَاغَارْ س مَانْ أَيَا ذ إِشْثنْ إِتّْخصَّا أَسْ أَذْ إِسّْڭعّذْ ثِيغَارْصِينْ خْ دّْنُوبْ ن ڒْْڭنْسْ ؤُشَا عَاوذْ خْ دّْنُوبْ ن يِيخفْ نّسْ. ◘5:‏3 لَاوِي 9‏:‏7؛ 16‏:‏6؛ عبر. 7‏:‏26. ٤ ؤُڒَا ذ إِجّنْ أَذْ إِكْسِي إِ يِيخفْ نّسْ شَّانْ-أَ، مْغِيرْ ونِّي إِتّْوَاڒَاغَانْ زِي أَربِّي أَمْ مَامّشْ إِتّْوَاڒَاغَا هَارُونْ. ◘5:‏4 ؤُف. 28‏:‏1؛ 1 إِم. 23‏:‏13؛ 2 إِم. 26‏:‏16. ٥ أَمُّو عَاوذْ لْمَاسِيحْ وَارْ إِسّْعُودْجِي شَا إِخفْ نّسْ ؤُمِي إِذْوڒْ ذ أَرَّايْسْ ن إِكهَّاننْ، مَاشَا إِسّْعُودْجْ ونِّي د غَارسْ إِسِّيوْڒنْ:

”شكْ ذ مِّي،

نشّْ جِّيغْ-د شكْ أَسّْ-أَ!“ ◘5:‏5 إِزهد. 2‏:‏7؛ ڒخ. 13‏:‏33؛ عبر. 1‏:‏5.

٦ أَمْ مَامّشْ إِنَّا عَاوذْ ذِي مَانِي نّغْنِي:

”شكْ ذ أَكهَّانْ إِ ڒبْذَا،

ذڭْ وَارْوَاسْ ن مَالْكِيصَاذِيقْ.“ ◘5:‏6 إِزهد. 110‏:‏4؛ عبر. 7‏:‏17.

٧ ڒَْامِي ثُوغَا يَارّضْ أَرِّيمثْ ن ويْسُومْ نّسْ، إِقدّمْ ثِيژَادْجِيثِينْ ذ ثُوثْرَا س إِغُويَّانْ أَطَّاسْ ؤُ س إِمطَّاونْ إِ ونِّي ثُوغَا إِزمَّارنْ أَذْ ث-إِ-د-إِسّْنكَّارْ زِي ڒْْموْثْ إِ ثُوذَارْثْ، ؤُشَا نتَّا إِسْڒَا أَسْ. ◘5:‏7 مت. 26‏:‏39؛ 27‏:‏46، 50؛ يُوح. 17‏:‏1. ٨ نتَّا، وَاخَّا ثُوغَا-ث ذ مِّيسْ، أَقَا إِڒْمذْ طَّاعثْ س ثِيڭّْوُوذِي ؤُ زڭْ ؤُودّبْ إِ إِكْسِي. ◘5:‏8 فِيل. 2‏:‏6. ٩ أَمُّو إِ إِذْوڒْ نتَّا إِكمّڒْ، إِذْوڒْ ذ سِّيبّثْ ن ثُوذَارْثْ إِتّْذُومَانْ إِ مَارَّا إِنِّي ذ أَسْ إِ غَا إِطَّاعنْ، ١٠ ؤُشَا إِڭَّا إِ-ث أَربِّي ذ أَرَّايْسْ ن إِكهَّاننْ ذڭْ وَارْوَاسْ ن مَالْكِيصَاذِيقْ. ◘5:‏10 إِزهد. 110‏:‏4

١١ أَقَا غَارْنغْ أَطَّاسْ مِينْ غَا نِينِي خْ مَالْكِيصَاذِيقْ وَانِيثَا، مَاشَا إِوْعَارْ أَذْ ث نْفسَّارْ، مِينْزِي ثْذوْڒمْ ثوْعَارمْ أَذْ ثسْڒمْ. ١٢ مَاغَارْ ثُوغَا إِتّْخصَّا أَذْ ثِيڒِيمْ ذ إِمسْغَارنْ زِي جِّيهثْ ن ڒْْمِيجَاڒْ ن ڒْْوقْثْ إِ ثْضفَّارمْ ثْغُورِي-يَا. مَاشَا ڒخُّو إِتّْخصَّا أَومْ عَاذْ أَذْ ثْڒمْذمْ لْحُورُوفْ إِمزْوُورَا ن بدُّو ن وَاوَاڒنْ ن أَربِّي، كنِّيوْ ثحْذَاجمْ عَاذْ أَغِي ذڭْ ومْشَانْ ن مَاشَّا إِجهْذنْ. ◘5:‏12 1 كُور. 3‏:‏1، 2، 3. ١٣ مِينْزِي كُوڒْ إِجّنْ ونِّي إِشَارْشنْ ذڭْ ؤُغِي، وَارْ إِقدّْ خْ وَاوَاڒْ ن ثْسڭْذَا، مِينْزِي نتَّا ذ أَسيْمِي عَاذْ. ١٤ مَاشَا مَاشَّا إِجهْذنْ إِفّغْ-د إِ يِينِّي إِمْغَارنْ، إِنِّي أَقَا نُّومنْ أَذْ ذَارّْبنْ ثَاشِيثْ نْسنْ حِيمَا أَذْ فَارْزنْ ڒْْخَارْ خْ ڒْْغَارْ.