١ ڒْْحُوكْمْ إِسَّاڭّْوَاذنْ خْ ثغْزُورْثْ ن ڒوْحِييْ.

”مِينْ شمْ يُوغِينْ أَڒَامِي ثْڭعّْذذْ شمْ أَكْ-ذ مَارَّا إِوْذَانْ خْ ثْزغْوِينْ؟ ٢ أَ شمْ، ثنِّي إِشُّورنْ س دّْرِيزْ، أَ شمْ ثَانْذِينْثْ إِزْرُودّْحنْ، ثَانْذِينْثْ إِنڭّْزنْ س ڒفْرَاحثْ: إِنِّي ذَايمْ إِتّْوَانْغنْ، وَارْ تّْوَانْغنْ س سِّيفْ ؤُ وَارْ مّْثنْ ذڭْ ؤُمنْغِي. ٣ مَارَّا إِمْڭوَّاذنْ نّمْ مُوننْ أَروْڒنْ، مَاشَا تّْوَاحبّْسنْ نْهْڒَا ؤُڒَا ذ إِشْثْ ن ثشْثِي ن ڒْْقوْسْ، مَارَّا إِنِّي ذَايمْ ؤُفِينْ، تّْوَاشَارْفنْ، وَاخَّا أَروْڒنْ غَارْ ڒَْاڭّْوَاجْ.“

٤ ”خْ ؤُيَا قَّارغْ: ’سَاڭّْوجمْ خَافِي ڒْْخزْرَاثْ، أجّْ أَيِي أَذْ رُوغْ س إِمطَّاونْ إِمرْزَاڭنْ. وَارْ ذ أَيِي حصَّارمْ حِيمَا أَذْ أَيِي ثْعزَّامْ خْ وَاردّدْجْ ن يدْجِيسْ ن ڒْْڭنْسْ إِنُو!‘ ◘22:‏4 إِرْم. 8‏:‏23 ٥ مَاغَارْ ذ إِجّْ ن وَاسّْ ن وزْرُودّحْ ذ ؤُعْفَاسْ ذ ؤُخَارْوضْ إِ د-إِسّكّْ سِيذِي إِنُو، سِيذِي ن ڒْْعسْكَارَاثْ، ذِي ثغْزُورْثْ ن ڒوْحِييْ، إِجّْ ن وَاسّْ ن وغْذَاڒْ نْ ڒْحِيضْ ؤُ ن إِغُويَّانْ إِ خْ د-تَّارَّانْ إِذُورَارْ. ٦ مَاغَارْ عِيلَامْ إِطّفْ أَقْرَابْ نّسْ س فْڒِيثْشَاثْ، جْمِيعْ أَكْ-ذ ؤُكَارُّو ن ؤُمنْغِي ؤُ أَكْ-ذ أَرْيَازْ نِّي ث إِندّْهنْ ذ يِينِّي إِنْيِينْ خْ ييْسَانْ، ؤُ قِيرْ إِعَارَّا ثَاسدَّارْثْ ن ؤُعسْكَارِي. ◼22:‏6 ’إِنِّي إِنّْيِينْ خْ إِيْسَانْ‘ - نِيغْ ’إِمْنَاينْ‘. ٧ أَذْ إِمْسَارْ أَقَا ڒمْخيّرْ ن ثيْسَارِينْ نّشْ أَذْ تّْوَاشُّورنْ س إِكَارُّوثنْ ن ؤُمنْغِي ؤُ إِمْنَاينْ أَذْ سدّنْ إِخفْ نْسنْ إِ ؤُمنْغِي أَرنْذَاذْ ن ثوَّارْثْ ن ثنْذِينْثْ. ◼22:‏7 ’إِمْنَاينْ‘ - نِيغْ ’إِنِّي إِنْيِينْ خْ ييْسَانْ‘. ٨ أَذْ إِكّسْ نتَّا أَرُّوضْ خْ يَاهُوذَا. ذڭْ وَاسّْ نِّي أَذْ ثخْزَارذْ غَارْ ڒسْنَاحْ إِ إِدْجَانْ ذِي ثَادَّارْثْ ن وزْغَارْ. ◼22:‏8 ’أَزْغَارْ‘ - نِيغْ ’ڒْغَابثْ‘ نِيغْ ’ثَازْڭَانْثْ‘. ٩ أَذْ ثْژَارمْ ثِيزّيِّينْ ذِي ثنْذِينْثْ ن ذَاوُوذْ، مِينْزِي أَقَا أَثنْثْ ذڭْ وَاطَّاسْ. أَذْ ثسّْمُونمْ أَمَانْ ن ؤُيڒْمَامْ ن وَادَّايْ. ١٠ أَذْ ثْحسْبمْ ثُوذْرِينْ ن ؤُرْشَالِيمْ ؤُشَا أَذْ ثْهذْممْ ثُوذْرِينْ حِيمَا أَذْ ثسّْجهْذمْ ڒْْحِيضْ. ١١ أَذْ ثڭّمْ إِجّْ ن ؤُيڒْمَامْ جَارْ ڒحْيُوضْ، حِيمَا أَذْ ثسّْمُونمْ أَمَانْ ن ؤُيڒْمَانْ أَقْذِيمْ، مَاشَا وَارْ ثْخزَّارمْ غَارْ ونِّي ث إِڭِّينْ، ؤُ وَارْ ثْحطِّيمْ ونِّي ث إِصنّْعنْ زڭْ وشْحَاڒْ ؤُيَا.“

١٢ ”ذڭْ وَاسّْ نِّي أَذْ إِڒَاغَا سِيذِي إِنُو، سِيذِي نْ ڒْعسْكَارَاثْ، مَاحنْذْ أَذْ ثْرُومْ، أَذْ ثسْغُويمْ، أَذْ ثْحفّمْ أَزدْجِيفْ ؤُ مَاحنْذْ أَذْ ثْيَارْضمْ ثَاخَانْشثْ ن وشْضَانْ. ١٣ مَاشَا خْزَارْ، ڒخُّو أَقَا ذِينْ أَرْشَاقْ ذ ڒفْرَاحثْ، نقّنْ إِفُونَاسنْ، غَارْصنْ إِ وُودْجِي، تّتّنْ أَيْسُومْ ؤُ سسّنْ بِينُو، أَمْ قَّارنْ: ’أجّْ أَنغْ أَذْ نشّْ، أَذْ نْسُو، مَاغَارْ ثِيوشَّا أَذْ نمّثْ!‘ ◘22:‏13 إِشا. 56‏:‏12؛ 1 كُور. 15‏:‏32 ١٤ مَاشَا سِيذِي ن ڒْْعسْكَارَاثْ إِسَّارْڭبْ أَيِي خْ ؤُيَا ذڭْ إِمزُّوغنْ إِنُو، إِنَّا: ’ڒْْمُوعْصِييّثْ-أَ وَارْ إِتّْوَاسّصْڒحْ إِ كنِّيوْ أَڒْ غَا ثمّْثمْ!‘، أَمُّو إِ إِقَّارْ سِيذِي إِنُو، سِيذِي ن ڒْْعسْكَارَاثْ.“

١٥ ”أَمُّو إِ إِقَّارْ سِيذِي إِنُو، سِيذِي ن ڒْْعسْكَارَاثْ: ’ؤُيُورْ، أَذفْ غَارْ ووْكِيڒْ نِّي، غَارْ شِيبْنَا، ڒمْقدّمْ ن ثْزذِّيغْثْ ن ؤُجدْجِيذْ، ؤُشَا إِنِي: ١٦ مِينْ غَاركْ إِدْجَانْ ذَانِيثَا، نِيغْ مَانْ ونْ غَاركْ إِدْجَانْ ذَانِيثَا، أَقَا شكْ ثْنقْشذْ ذَا إِجّْ ن ونْضڒْ إِ يِيخفْ نّشْ؟ إِوَا إِنقّشْ أَنْضڒْ نّسْ سنّجْ، إِنقّشْ إِ يِيخفْ نّسْ إِشْثْ ن ثْزذِّيغْثْ ذِي جَّارْفْ! ١٧ خْزَارْ، سِيذِي أَذْ زَّايكْ إِحجَّارْ س إِجّْ ن ؤُحجَّارْ إِمْغَارْ، نتَّا أَذْ شكْ إِطّفْ س إِجّْ ن وُوضُوفْ إِقْسحْ. ١٨ نتَّا أَذْ شكْ إِسّحْنُونّضْ قَاعْ أَڒَامِي ثْذوْڒذْ ذ ثَاقُورَارْثْ، إِشْثْ ن ثْشَامَّا نِّي ت إِ غَا نْضَارنْ غَارْ إِشْثْ ن ثمُّورْثْ ثمْغَارْ. ذِينِّي إِ غَا ثمّْثذْ ؤُ ذِينِّي إِ غَا إِڒِينْ خنِّي إِكَارُّوثنْ نّشْ إِشُووَّارنْ، أَ شكْ ڒفْضِيحثْ ن ثَادَّارْثْ ن بَابْ نّشْ! ١٩ نشّْ أَذْ شكْ د-سُّوفّْغغْ زِي ڒْفُوسِينَا نّشْ، وَاهْ، نتَّا أَذْ شكْ د-إِقْڒعْ زڭْ ومْشَانْ نّشْ.‘ “

٢٠ ”ذڭْ وَاسّْ نِّي أَذْ ڒَْاغِيغْ إِ ؤُمْسخَّارْ إِنُو أَلْيَاقِيمْ، مِّيسْ ن حِيلْقِييَا. ◘22:‏20 2 إِج. 18‏:‏18، 26، 37 ٢١ نشّْ أَذْ أَسْ سّْيَارْضغْ أَرُّوضْ نّشْ ؤُ نشّْ أَذْ أَسْ بيْسغْ أَبْيَاسْ نّشْ ؤُ أَذْ وْشغْ ثِيزمَّارْ نّشْ ذڭْ ؤُفُوسْ نّسْ. نتَّا أَذْ يِيڒِي ذ بَابَاثْسنْ إِ إِمزْذَاغْ ن ؤُرْشَالِيمْ ذ ثَادَّارْثْ ن يَاهُوذَا. ٢٢ نشّْ أَذْ أَسْ سَّارْسغْ ڒْْمفْثَاحْ ن ثَادَّارْثْ ن ذَاوُوذْ خْ ثغْرُوضْثْ نّسْ. مَاڒَا نتَّا أَذْ يَارْزمْ، وَارْ إِزمَّارْ ؤُڒَا ذ إِجّْ أَذْ إِبلّعْ، مَاڒَا نتَّا إِبلّعْ، وَارْ إِزمَّارْ ؤُڒَا ذ إِجّْ أَذْ يَارْزمْ. ◘22:‏22 أَسَا. 3‏:‏7 ٢٣ نشّْ أَذْ ث وْثغْ أَمْ ڒوْثذْ ذڭْ إِجّْ ن ومْشَانْ إِمْثنْ ؤُ نتَّا أَذْ يِيڒِي ذ ڒْْعَارْشْ ن ؤُعُودْجِي إِ ثَادَّارْثْ ن بَابَاسْ. ٢٤ أَذْ خَاسْ أَيْڒنْ مَارَّا أَعُودْجِي ن ثَادَّارْثْ ن بَابَاسْ، إِغدُّوينْ إِمژْيَانِينْ ذ ثْغدُّوثِينْ، زِي مَارَّا ثِيقْشُوعِينْ ثِيمژْيَانِينْ، زِي طّْبَاصِي أَڒْ مَارَّا ثِيقْنُوشِينْ. ٢٥ ذڭْ وَاسّْ نِّي أَذْ إِتّْوَاكّسْ ڒوْثذْ إِ إِتّْوَاوْثنْ ذڭْ ومْشَانْ إِمثْننْ، إِقَّارْ سِيذِي ن ڒْْعسْكَارَاثْ. أَذْ إِتّْوَاقْضعْ ؤُ خنِّي أَذْ إِوْضَا ؤُشَا دّْقڒْ إِ ثُوغَا غَارسْ يُويْڒنْ، أَذْ إِتّْوَاقسّْ، مَاغَارْ أَمُّو إِ إِنَّا سِيذِي.“