1 ”ؤُشْثْ خْ يِينِّي د-إِهْوَانْ غَارْ مِيصْرَا حِيمَا أَذْ أَفنْ ثْوِيزَا، إِنِّي إِتّشْڒنْ خْ ييْسَانْ ؤُ تّڭّنْ ڒَامَانْ ذڭْ إِكَارُّوثنْ، مِينْزِي نِيثْنِي ذڭْ وَاطَّاسْ، ؤُڒَا خْ يِينِّي إِنْيِينْ خْ ييْسَانْ، مِينْزِي نِيثْنِي جّهْذنْ، أَخْمِي وَارْ خزَّارنْ غَارْ ؤُمْقدَّاسْ ن إِسْرَائِيل ؤُ وَارْ أَرزُّونْ سِيذِي.“ ◘31:‏1 إِزهد. 20‏:‏8؛ إِرْم. 17‏:‏5

2 ”مَاشَا ؤُڒَا ذ نتَّا ذ أَمِيغِيسْ، نتَّا ڭُّورْ أَذْ يجّْ ڒْغَارْ أَذْ د-يَاسْ. وَارْ إِتّْذِيكّْوِيڒْ ذڭْ وَاوَاڒْ نّسْ، أَذْ إِكَّارْ ضِيدّْ إِ ثَادَّارْثْ ن إِعفَّاننْ ؤُ ضِيدّْ إِ ثْوِيزَا ن يِينِّي إِتّڭّنْ ڒْمُوعْصِييّثْ. 3 مَاغَارْ إِمِيصْرِييّنْ ذ إِوْذَانْ، وَارْ دْجِينْ ذ أَربِّي، ؤُشَا إِيْسَانْ نْسنْ ذ أَيْسُومْ، وَارْ إِدْجِي ذ أَرُّوحْ. أَذْ إِسَارّحْ سِيذِي أَفُوسْ نّسْ أَڒْ إِ غَا إِنْقَارْضْ ونِّي إِوْشِينْ أَفُوسْ، ؤُشَا خنِّي أَذْ إِوْضَا ؤُڒَا ذ ونِّي ذَايسْ إِوْشِينْ أَفُوسْ. أَمُّو إِ غَا قْضَانْ نِيثْنِي مَارَّا إِذْسنْ.“

4 ”مَاغَارْ أَمُّو إِ ذ أَيِي إِنَّا سِيذِي: ’أَمْ مَامّشْ إِتَّارُّوجْذُوذْ وَايْرَاذْ نِيغْ وَايْرَاذْ أَمژْيَانْ خْ زَّارْذثْ نّسْ خْمِي خَاسْ د-تّْڒَاغَانْ إِجّْ ن ؤُبَارُّو ن إِمكْسَاونْ، بْڒَا مَا أَذْ إِنّخْڒعْ زِي ثْمِيجَّا نْسنْ ؤُ وَارْ إِخنّسْ زڭْ ؤُبَارُّو نْسنْ، أَمُّو إِ غَا إِهْوَا ؤُڒَا ذ سِيذِي ن ڒْعسْكَارَاثْ حِيمَا أَذْ إِمّْنغْ خْ وذْرَارْ ن صِيهْيُونْ ؤُ خْ ثوْرِيرْثْ نّسْ. ◼31:‏4 ’إِمكْسَاونْ‘ - نِيغْ ’إِنِيتْشَانْ‘. 5 أَمْ يِيجْضَاضْ إِتّْفَارْفِيرنْ سنّجْ إِ ڒْعُوشّْ نْسنْ، أَمُّو إِ غَا إِسّڒْقَا سِيذِي ن ڒْعسْكَارَاثْ خْ ؤُرْشَالِيمْ. أَذْ ت إِسَّارْ، أَذْ ت إِسّنْجمْ، أَذْ خَاسْ يكّْ ؤُشَا أَذْ ت إِسّنْجمْ.“ ◘31:‏5 أَعَوذ. 32‏:‏11

6 ”ذوْڒمْ-د غَارْ ونِّي خْ حيّْذنْ أَيْثْ ن إِسْرَائِيل س وَاطَّاسْ. 7 مَاغَارْ ذڭْ وَاسّْ نِّي أَذْ إِمّنْضَارْ كُوڒْ إِجّْ لْ-أَصْنَامْ نّسْ ن نُّوقَارْثْ ذ لْ-أَصْنَامْ نّسْ ن وُورغْ، إِنِّي يڭِّينْ إِفَاسّنْ نْومْ إِ يِيخفْ نْومْ، إِ دّنْبْ. ◘31:‏7 إِشا. 2‏:‏20 8 أَشُّورْ أَذْ إِوْضَا س سِّيفْ، وَارْ إِدْجِي سِّيفْ ن إِجّْ ن ورْيَازْ. أَذْ ث يشّْ سِّيفْ، وَارْ إِدْجِي ن إِجّْ ن بْنَاذمْ. أَذْ يَارْوڒْ أَشُّورْ زَّاثْ إِ سِّيفْ ؤُشَا إِحُوذْرِييّنْ نّسْ أَذْ ذوْڒنْ غَارْ ثسْمُوغِي. 9 ثَاصْضَارْثْ نّسْ أَذْ ثڭّْوجْ س ثِيڭّْوُوذِي ؤُشَا ڒْحُوكَّامْ نّسْ أَذْ أَروْڒنْ زِي ثْعدْجَانْثْ!‘، أَمُّو إِ إِقَّارْ سِيذِي، ونِّي غَارْ ثدْجَا ثْمسِّي ذِي صِيهْيُونْ ؤُڒَا ذ ثَافْقُونْثْ ذِي ؤُرْشَالِيمْ.“ ◘31:‏9 2 إِج. 19‏:‏36، 37