١ ذڭْ وُوسَّانْ نِّي إِحْڒشْ حِيزْقِييَا س إِجّْ ن ڒحْڒَاشْ إِنقّنْ. يُوسَا-د غَارسْ ؤُنَابِي إِشَاعْيَا، مِّيسْ ن أَمُوصْ، إِنَّا أَسْ: ”أَمُّو إِ إِقَّارْ سِيذِي: ’أوْشْ ڒُْومُورَاثْ إِ ثَادَّارْثْ نّشْ، مَاغَارْ أَذْ ثمّْثذْ، وَارْ ثتّْغِيمِيذْ ثدَّارذْ عَاذْ كْثَارْ.‘ “ ٢ خنِّي إِنّقْڒبْ حِيزْقِييَا س ؤُغمْبُوبْ نّسْ غَارْ ڒْْحِيضْ ؤُشَا إِژُّودْجْ غَارْ سِيذِي، ٣ إِنَّا: ”أَ، سِيذِي، عْقڒْ أَقَا نشّْ ؤُيُورغْ زَّاثْ إِ وُوذمْ نّشْ س ڒَْامَانْ ؤُ س يِيجّْ ن وُوڒْ إِكمّْڒنْ ؤُ ڭِّيغْ مِينْ إِدْجَانْ نِيشَانْ ذِي ثِيطَّاوِينْ نّشْ.“ ؤُشَا إِبْذَا حِيزْقِييَا إِتّْرُو س جّْهذْ.

٤ يُوسَا-د وَاوَاڒْ ن سِيذِي غَارْ إِشَاعْيَا، إِنَّا: ٥ ”ؤُيُورْ، إِنِي إِ حِيزْقِييَا: ’أَمُّو إِ إِقَّارْ سِيذِي، أَربِّي ن بَابَاشْ ذَاوُوذْ: نشّْ سْڒِيغْ إِ ثْژَادْجِيثْ نّشْ ؤُ ژْرِيغْ إِمطَّاونْ نّشْ. خْزَارْ، نشّْ أَذْ أَرْنِيغْ خمّسْطَاشْ ن إِسڭّْوُوسَا إِ وُوسَّانْ ن ثُوذَارْثْ نّشْ. ٦ نشّْ أَذْ شكْ سّْنجْمغْ زڭْ ؤُفُوسْ ن ؤُجدْجِيذْ ن أَشُّورْ، ؤُڒَا ذ ثَانْذِينْثْ. نشّْ أَذْ سّڒْقِيغْ خْ ثنْذِينْثْ-أَ. ٧ أَيَا أَذْ يِيڒِي ذ ڒعْڒَامثْ ن سِيذِي إِ شكْ، أَقَا سِيذِي أَذْ إِڭّْ أَوَاڒْ-أَ نِّي إِنَّا. ٨ خْزَارْ، أَذْ سّْعقْبغْ ثِيڒِي خْ ثْرفِّيذِينْ ن أَحَازْ نِّي د-إِهْوَانْ خْ ثْرفِّيذِينْ ن دّْرُوجْ ن ثْفُوشْثْ،عشْرَا ن ثْرفِّيذِينْ.‘ “ خنِّي ثعْقبْ-د ثْفُوشْثْعشْرَا ن ثْرفِّيذِينْ خْ ثْرفِّيذِينْ نِّي زِي د-ثهْوَا. ◘38:‏8 2 إِج. 20‏:‏7‏-‏9

٩ ثِيرَا ن حِيزْقِييَا، أَجدْجِيذْ ن يَاهُوذَا، ڒَْامِي ثُوغَا إِحْڒشْ ؤُشَا إِڭّنْفَا زِي ڒهْڒَاشْ نّسْ.

١٠ ”نشّْ نِّيغْ: ’ڒخُّو ذڭْ وزْينْ ن وُوسَّانْ ن ثُوذَارْثْ إِنُو إِتّْخصَّا أَذْ ؤُيُورغْ خْ ثوُّورَا ن ڒَْاخَارْثْ. مِينْ إِقِّيمنْ ن إِسڭّْوُوسَا إِنُو تّْوَاكّْسنْ زَّايِي.‘ ١١ نشّْ نِّيغْ: ’وَارْ ژَترّغْ عَاذْ سِيذِي، سِيذِي، ذِي ثمُّورْثْ ن يِينِّي إِدَّارنْ، وَارْ تّْوِيڒِيغْ عَاذْ إِوْذَانْ أَكْ-ذ إِمزْذَاغْ ن ڒَْاخَارْثْ.‘ ١٢ ثِيشْڒِي ن ثُوذَارْثْ إِنُو أَذْ ت خَافِي أَرْژنْ، أَذْ زَّايِي ت كّْسنْ أَمْ كّْسنْ أَقِيضُونْ ن ؤُمكْسَاوْ. أَمْ بُو-ؤُزطَّا ضفْسغْ ثُوذَارْثْ إِنُو. أَذْ أَيِي إِقسّْ زِي دّبُّوزْ ن ثْخيَّاضْثْ: أَذْ ثقْضِيذْ ثُوذَارْثْ إِنُو جَارْ وَاسّْ ذ دْجِيڒثْ! ◼38:‏12 ’أَمكْسَاوْ‘ - نِيغْ ’أَنِيتْشيِ‘. ١٣ رَاجِيغْ س صّْبَارْ أَڒْ أَثفُّو. نتَّا أَذْ يَارْژْ مَارَّا إِغْسَانْ إِنُو أَمْ وَايْرَاذْ: أَذْ ثقْضِيذْ ثُوذَارْثْ إِنُو جَارْ ؤُثفُّو ذ دْجِيڒثْ! ١٤ تّْجِيوْجِيوغْ أَمْ ثْفَاڒْدْجسْثْ إِتّنّْضنْ أَمْ ثطَّاوْ، تّْڭرْڭُورغْ أَمْ ثذْبِيرْثْ. سّْڭعّْذغْ ثِيطَّاوِينْ إِنُو: ’أَ سِيذِي إِنُو، نشّْ تّْوَاحْصَارغْ، إِڒِي ذ أَضْمَانْ إِ نشّْ!‘ ◘38:‏14 إِشا. 59‏:‏11

١٥ مِينْ غَا إِنِيغْ؟ مِينْ ذ أَيِي إِنَّا، أَقَا إِڭَّا إِ-ث. مَارَّا إِسڭّْوُوسَا ن ثُوذَارْثْ إِنُو أَذْ كّغْ خْ ثَارْزُوڭِي ن ڒعْمَارْ إِنُو. ١٦ ’أَ سِيذِي إِنُو، خْ مَانْ أَيَا إِزمَّارْ بْنَاذمْ أَذْ إِدَّارْ ؤُشَا سنّجْ إِ مَارَّا أَيَا أَقَا ذَايسْ ثُوذَارْثْ ن بُوحْبڒْ إِنُو، مَاغَارْ شكْ أَذْ أَيِي ثڭّنْفِيذْ ؤُ شكْ أَذْ أَيِي ثَارِّيذْ أَذْ ذوْڒغْ غَارْ ثُوذَارْثْ!

١٧ خْزَارْ، ثَارْزُوڭِي ثُوغَا ثَارْزڭْ أَيِي إِ ڒهْنَا. شكْ ثْڒسْقذْ غَارْ ڒعْمَارْ إِنُو أَطَّاسْ أَڒَامِي ذ أَيِي ثحْضِيذْ زڭْ وحْفُورْ ن ثُورْصُوضِي، مَاغَارْ ثنْضَارذْ مَارَّا دّْنُوبْ إِنُو أَوَارْنِي إِ وعْرُورْ نّشْ. ١٨ مَاغَارْ ڒَْاخَارْثْ وَارْ شكْ ثْقَاذَا شَا، ڒْْموْثْ وَارْ شكْ إِسّمْغَارْ. وِي غَا إِهْوَانْ ذڭْ وحْفُورْ، وَارْ تّْرِيجِينْ ڒَْامَانْ نّشْ. ١٩ ونِّي إِدَّارنْ، أَ ونِّي إِدَّارنْ، أَقَا نتَّا أَذْ شكْ إِقَاذَا. بَابَاثْسنْ أَذْ إِسّْشنْ ڒَْامَانْ نّشْ إِ إِحنْجِيرنْ نّسْ.‘ “

٢٠ ”سِيذِي يُوسَا-د حِيمَا أَذْ أَيِي إِسّنْجمْ. أَذْ نُورَارْ س ؤُزنْزُونْ خْ إِفِيڒَانْ إِنُو مَارَّا ؤُسَّانْ ن ثُوذَارْثْ نّغْ ذِي ثَادَّارْثْ ن سِيذِي.“

٢١ أَقَا إِنَّا إِشَاعْيَا: ”أجّْ إِ-ثنْ أَذْ أَوْينْ إِجّْ ن وغْرُومْ ن ثَازَارْثْ ؤُشَا أَذْ ث ڒثْفنْ خْ ثْحبُّوشْثْ، خنِّي أَذْ إِڭّنْفَا.“ ◘38:‏21 2 إِج. 20‏:‏7

٢٢ حِيزْقِييَا أَقَا إِنَّا: ”مَانْ إِ غَا ثِيڒِي ڒعْڒَامثْ أَقَا نشّْ أَذْ سّْڭعّْذغْ عَاوذْ غَارْ ثَادَّارْثْ ن سِيذِي؟“