١ ”مَاشَا ڒخُّو، أَمُّو إِ إِقَّارْ سِيذِي، ونِّي شكْ د-إِخڒْقنْ، أَ يَاعْقُوبْ، ذ ونِّي ذ أَمْكوَّانْ نّشْ، أَ إِسْرَائِيل، وَارْ تّڭّْوذْ شَا، مَاغَارْ نشّْ فكّغْ شكْ، ڒَْاغِيغْ أَشْ س يِيسمْ نّشْ، شكْ إِنُو. ٢ مَاڒَا ثْشُوقذْ ذڭْ وَامَانْ، أَذْ إِڒِيغْ أَكِيذكْ، مَاڒَا ذڭْ إِغزْرَانْ، وَارْ شكْ تِّيوْينْ. مَاڒَا ثژْوِيذْ خْ ثْمسِّي، وَارْ ثْشمّْضذْ، ؤُشَا أَشعَّاڒْ وَارْ شكْ إِسّْرُوغَا. ◘43:‏2 إِزهد. 66‏:‏12 ٣ مَاغَارْ نشّْ ذ سِيذِي، أَربِّي نّشْ، أَمْقدَّاسْ ن إِسْرَائِيل، أَمْسنْجمْ نّشْ. نشّْ وْشِيغْ مِيصْرَا ذ دّيّثْ إِ شكْ، كُوشْ ذ سبَا ذڭْ ومْشَانْ نّشْ. ٤ مِينْزِي ثْسكّْوِيذْ أَطَّاسْ ذِي ثِيطَّاوِينْ إِنُو، أَقَا ثتّْوَاسّْعُودْجذْ ؤُ نشّْ تّخْسغْ شكْ. وْشِيغْ إِوْذَانْ ذڭْ ومْشَانْ نّشْ ذ شُّوعُوبْ ذڭْ ومْشَانْ ن ڒعْمَارْ نّشْ. ٥ وَارْ تّڭّْوذْ شَا، مَاغَارْ نشّْ أَكِيذكْ. أَذْ أَوْيغْ إِحنْجِيرنْ نّشْ زِي مَانِي د-ثْنقَّارْ ثْفُوشْثْ، أَذْ شكْ سّْمُونغْ زِي مَانِي د-ثْغدْجِي ثْفُوشْثْ. ◘43:‏5 إِشا. 44‏:‏2؛ إِرْم. 30‏:‏10؛ 46‏:‏27 ٦ نشّْ أَذْ إِنِيغْ إِ شَّامَالْ: ’أوْشْ!‘ ؤُ إِ لْجَانُوبْ: ’وَارْ تّطّفْ!‘، أَركّْوحْ إِحنْجِيرنْ إِنُو زِي ڒَْاڭّْوَاجْ، يسِّي زِي ثْمَا ن ثمُّورْثْ، ٧ كُوڒْ  إِجّنْ ونِّي ؤُمِي تّْڒَاغَانْ س يِيسمْ إِنُو، ونِّي د-خڒْقغْ إِ شَّانْ إِنُو، ونِّي كوّْنغْ ذ ونِّي ڭِّيغْ عَاوذْ.“

٨ ”أجّْ أَذْ إِفّغْ ڒْْڭنْسْ أَذَارْغَاڒْ، وَاخَّا غَارْسنْ ثِيطَّاوِينْ، ؤُڒَا ذ إِذُوهْشَارنْ، وَاخَّا غَارْسنْ إِمزُّوغنْ. ٩ أجّْ أَذْ تّْوَاسّْمُوننْ مَارَّا ڒڭْنُوسْ ؤُشَا أجّْ شُّوعُوبْ أَذْ نّْجَارْونْ! مَانْ ونْ زَّايْسنْ إِزمَّارْ أَذْ إِبَارّحْ ثَا، ذ مَانْ ونْ إِزمَّارْ أَذْ أَنغْ يِينِي مِينْ ثُوغَا إِدْجَانْ زِيشْ؟ أجّْ إِ-ثنْ أَذْ أَوْينْ ڒشْهُوذْ نْسنْ مَاحنْذْ أَذْ تّْوَاسڭّْذنْ، ؤُشَا أجّْ ڒشْهُوذْ أَذْ سْڒنْ، أَذْ إِنِينْ: ’ذ ثِيذتّْ!‘ ١٠ كنِّيوْ ذ ڒشْهُوذْ إِنُو ؤُڒَا ذ أَمْسخَّارْ إِنُو نِّي فَارْزغْ، حِيمَا أَذْ ثسّْنمْ، أَذْ ذَايِي ثَامْنمْ، أَذْ ثْفهْممْ أَقَا نشّْ نشّْ. قْبڒْ نشّْ وَارْ إِتّْوَاڭّْ ؤُڒَا ذ إِجّْ ن أَربِّي ؤُشَا أَوَارْنِي أَيِي وَارْ إِتِّيڒِي ؤُڒَا ذ إِجّنْ!، إِقَّارْ سِيذِي. ◘43:‏10 إِشا. 41‏:‏4؛ 44‏:‏8؛ 45‏:‏21؛ حُوش. 13‏:‏4 ١١ نشّْ، نشّْ ذ سِيذِي، ؤُ وَارْ إِدْجِي ؤُمْسنْجمْ مْغِيرْ نشّْ. ١٢ نشّْ بَارّْحغْ ؤُ سّْنجْمغْ ؤُ نشّْ إِوْيغْ أَومْ ث-إِ-د غَارْ ؤُمجِّينْ. ؤُڒَا ذ إِجّْ ن أَربِّي ڒْْبَارَّانِي وَارْ ثُوغِي جَارْ أَومْ. كنِّيوْ ذ ڒشْهُوذْ أَقَا نشّْ ذ أَربِّي، أَمُّو إِ إِقَّارْ سِيذِي. ١٣ ؤُڒَا زڭْ وَاسّْ-أَ، أَقَا نشّْ نشّْ ؤُشَا ؤُڒَا ذ إِجّْ وَارْ إِزمَّارْ أَذْ إِسّْفكّْ زڭْ ؤُفُوسْ إِنُو! مَاڒَا نشّْ خذْمغْ، مَانْ ونْ إِزمَّارنْ أَذْ ث إِنّقْڒبْ؟“ ◘43:‏13 إِشا. 14‏:‏27

١٤ ”أَمُّو إِ إِقَّارْ سِيذِي، أَمفْذِي نْومْ، أَمْقدَّاسْ ن إِسْرَائِيل: ’ذِي طّْوعْ نْومْ سّكّغْ إِجّنْ غَارْ بَابِيلْ ؤُشَا أَذْ ثنْ أَرّغْ أَذْ أَروْڒنْ، ؤُشَا أَذْ هْوَانْ مَارَّا إِكَالْذَانِييّنْ ذڭْ إِغُورَّابَا نِّي زِي ثُوغَا فَارّْحنْ أَمُّو قْبڒْ. ١٥ نشّْ ذ سِيذِي، أَمْقدَّاسْ نْومْ، ونِّي د-إِخڒْقنْ إِسْرَائِيل، أَجدْجِيذْ نْومْ.‘ “

١٦ ”أَمُّو إِ إِقَّارْ سِيذِي نِّي إِڭِّينْ أَبْرِيذْ ذِي ڒبْحَارْ ذ ثبْرِيذْثْ ذڭْ وَامَانْ إِجهْذنْ، ١٧ ونِّي إِجِّينْ إِكَارُّوثنْ ذ ييْسَانْ، ڒْْعسْكَارْ ذ جّهْذْ أَذْ فّْغنْ - أَقَا ذَا، زّْڒنْ مُوننْ، وَارْ تّْنكَّارنْعمَّارْصْ، خسْينْ، قْضَانْ أَمْ ثفْثِيتْشْ ن ثِيفّسْثْ! - ١٨ أَمُّو إِ إِقَّارْ سِيذِي: ’وَارْ تّْعقِيڒمْ عَاذْ خْ مِينْ ثُوغَا إِدْجَانْ زِيشْ، وَارْ تِّيذَارمْ عَاذْ مِينْ إِعْذُونْ. ١٩ خْزَارْ، أَذْ ڭّغْ مِينْ إِدْجَانْ ن جْذِيذْ، ڒخُّو أَذْ د-إِفّغْ. مَا وَارْ ذ أَسْ ثْحكَّارمْ شَا؟ وَاهْ، نشّْ أَذْ سَّارْسغْ أَبْرِيذْ ذِي ڒخْڒَا، إِغْزَارنْ ذِي ثْنزْرُوفْثْ. ◘43:‏19 أَسَا. 21‏:‏5 ٢٠ ڒْْمَاڒْ ن ڒخْڒَا أَذْ أَيِي سّْعُودْجَانْ، ؤُشَّاننْ ن ڒخْڒَا ذ يسِّيسْ ن نّْعَامثْ، مَاغَارْ نشّْ أَذْ ڭّغْ أَمَانْ أَذْ أَزّْڒنْ ذِي ڒخْڒَا ؤُڒَا ذ إِغزْرَانْ ذِي ثْنزْرُوفْثْ، حِيمَا أَذْ سّسْوغْ ڒْْڭنْسْ إِنُو، إِنِّي فَارْزغْ. ٢١ ڒْْڭنْسْ-أَ ڭِّيغْ ث إِ نشّْ، نِيثْنِي أَذْ بَارّْحنْ شَّانْ إِنُو.‘ “ ◘43:‏21 لك. 1‏:‏74، 75

٢٢ ”مَاشَا شكْ وَارْ ذ أَيِي د-ثْڒَاغِيذْ، أَ يَاعْقُوبْ، وَارْ ثسِّيحْڒذْ إِخفْ نّشْ أَكِيذِي، أَ إِسْرَائِيل! ٢٣ شكْ وَارْ ذ أَيِي د-ثِيوْيذْ إِجّنْ زڭْ وُودْجِي ن ثْغَارْصَا نّشْ ن وشْمَاضْ، ؤُشَا س ثْغَارْصِي نّشْ وَارْ ذ أَيِي ثْشنّْعذْ.عمَّارْصْ وَارْ شكْ حْصَارغْ غَارْ ثوْهِيبْثْ ن ڒْْغِيدْجثْ ؤُ وَارْ شكْ سِّيحْڒغْعمَّارْصْ س جَّاوِي. ٢٤ شكْ وَارْ ذ أَيِي ثسْغِيذْ أَغَانِيمْ ن ؤُحمُّومْ إِتّْفُوحنْ س ثْمنْيَاثْ ن نُّوقَارْثْ ؤُشَا وَارْ ذ أَيِي ثسّْجِيوْنذْ س ثَاذُونْثْ ن ثْغَارْصَا نّشْ، مَاشَا س دّْنُوبْ نّشْ ثَارْنِيذْ أَيِي-د ڒْْخذْمثْ، س ڒْْمُوعْصِييَّاثْ نّشْ ثسِّيحْڒذْ أَيِي.“

٢٥ ”نشّْ، ذ نشّْ، ونِّي إِ غَا إِمسْحنْ إِعذِّيينْ نّشْ ذِي طّْوعْ إِنُو، نشّْ وَارْ تِّيذَارغْ عَاذْ دّْنُوبْ نّشْ.“ ◘43:‏25 حِز. 36‏:‏22‏-‏38

٢٦ ”أَرّْ إِ-ثنْ غَارْ ڒْْبَاڒْ إِنُو، أجّْ أَنغْ أَذْ نمْشَارّعْ، وّثْ خْ يِيخفْ نّشْ مَاحنْذْ أَذْ د-ثَاوْيذْ ثَاسْغَارْثْ نّشْ. ◘43:‏26 إِشا. 1‏:‏18 ٢٧ بَابَاشْ أَمزْوَارُو إِخْضَا ؤُ ؤُڒَا ذ إِمْسصْڒَاحنْ نّشْ عْذُونْ خَافِي. ◼43:‏27 ’إِمْسصْڒَاحنْ‘ - إِخْسْ أَذْ يِينِي ’إِكهَّاننْ ذ إِنَابِييّنْ نّكْ‘ إِنِّي ثُوغَا إِبدّنْ جَارْ أَربِّي ذ ڒْڭنْسْ نّسْ. ٢٨ خنِّي سّْعِيدْجْثغْ إِمقّْرَاننْ ن زَّاوشْثْ إِقدّْسنْ، ؤُ أَرِّيغْ يَاعْقُوبْ مَاحنْذْ أَذْ إِتّْوَاحَارّمْ إِ ؤُثحِّي ؤُشَا جِّيغْ إِسْرَائِيل مَاحنْذْ أَذْ ثعيّْبنْ.“