١ ”فَاقْ، فَاقْ، أَرْضْ س جّهْذْ أَ، صِيهْيُونْ، أَرْضْ س ورُّوضْ نّمْ إِشُّووَّارنْ، أَ ؤُرْشَالِيمْ، ثَانْذِينْثْ ثَامْقدَّاسْثْ! زِي سَّا ثْسَاونْثْ وَارْ غَارمْ ث-إِ-د-إِتِّيذِيفْ عَاذْ ونِّي وَارْ إِتّْوَاخثْننْ ذ ؤُمخْمُوجْ. ٢ زرْزْ خَامْ ثَاعجَّاشْثْ، كَّارْ، قِّيمْ شمْ، أَ ؤُرْشَالِيمْ! أَرْخُو سّْنَاسڒْ زڭْ يِيرِي نّمْ، أَ ثَامحْبُوسْثْ، أَ يدْجِيسْ ن صِيهْيُونْ! ٣ مَاغَارْ أَمُّو إِ إِقَّارْ سِيذِي: ’ثمّنْزمْ س بَاطڒْ، أَذْ ثتّْوَاسّْفكّمْ عَاوذْ بْڒَا ثْمنْيَاثْ!‘ ٤ مَاغَارْ أَمُّو إِ إِقَّارْ سِيذِي إِنُو، سِيذِي: ’زِيشْ إِهْوَا ڒْْڭنْسْ إِنُو غَارْ مِيصْرَا مَاحنْذْ أَذْ ذِينِّي إِقِّيمْ أَمْ ڒْْبَارَّانِي، ؤُشَا أَشُّورْ إِحْصَارْ إِ-ث خْ وَالُو!‘ “ ◘52:‏4 أَمز. 46‏:‏6

٥ ”ؤُشَا ڒخُّو، مِينْ غَارِي عَاذْ خَافِي أَذْ ت ڭّغْ ذَانِيثَا، إِقَّارْ سِيذِي، مَاغَارْ أَوْينْ ڒْْڭنْسْ إِنُو بْڒَا سِّيبّثْ ؤُشَا إِنِّي خَاسْ إِتّْصلّْطنْ سّْغُويُّونْ، إِقَّارْ سِيذِي، أَسّْ مَارَّا تّْعيّْبنْ ذڭْ يِيسمْ إِنُو. ◘52:‏5 حِز. 36‏:‏20، 23؛ رُوم. 2‏:‏24 ٦ س ؤُيَا أَذْ إِسّنْ ڒْْڭنْسْ إِنُو إِسمْ إِنُو، س ؤُيَا، أَقَا نشّْ نشّْ، ونِّي إِقَّارنْ ذڭْ وَاسّْ نِّي: نشّْ أَقَا أَيِي ذَا!“

٧ ”مشْحَاڒْ شْنَانْ خْ إِذُورَارْ إِصُورَافْ ن ؤُمْبشَّارْ نِّي إِتّْبَارّْحنْ س ڒهْنَا، ن ؤُمْبشَّارْ ن ڒخْبَارْ أَصبْحَانْ نِّي إِتّْبَارّْحنْ س ؤُسنْجمْ، ونِّي إِقَّارنْ إِ صِيهْيُونْ: ’أَربِّي نّمْ ذ أَجدْجِيذْ!‘ ◘52:‏7 نَحُم. 2‏:‏1؛ رُوم. 10‏:‏15 ٨ سْڒمْ إِ ثْمِيجَّا ن إِعسَّاسنْ نّمْ! نِيثْنِي تّْسْڭعَّاذنْ ثْمِيجَّا نْسنْ، تّسْڒِيوْڒِيونْ مُوننْ، مَاغَارْ ؤُذمْ ذڭْ ؤُذمْ أَكِيذسْ أَذْ ثْوَاڒَانْ مَامّشْ إِ د غَا إِسّعْقبْ سِيذِي صِيهْيُونْ. ٩ سْغُويّنْثْ س ڒفْرَاحثْ، سْڒِيوْڒونْثْ ثْمُوننْثْ، أَ ڒْْخِيرْبَاثْ ن ؤُرْشَالِيمْ، مَاغَارْ سِيذِي إِسّْفوّجْ ڒْْڭنْسْ نّسْ، إِفكّْ ؤُرْشَالِيمْ. ١٠ إِعَارَّا سِيذِي أَغِيڒْ نّسْ أَمْقدّسْ زَّاثْ إِ ثِيطَّاوِينْ ن مَارَّا ڒڭْنُوسْ ؤُ مَارَّا ثِيمَاوِّينْ ن ثمُّورْثْ أَذْ ژَترنْثْ أَسنْجمْ ن أَربِّي نّغْ.“ ◘52:‏10 إِزهد. 98‏:‏2؛ لك. 3‏:‏6

١١ ”رُوحمْ، رُوحمْ، فّْغمْ-د سّنِّي، وَارْ تّْحَاذَامْ وَالُو ن مِينْ إِخمْجنْ، فّْغمْ سّنِّي زِي ڒْْوسْطْ نّسْ، سِيزذْڭمْ إِخفْ نْومْ، أَ كنِّيوْ إِنِّي يَاربُّونْ ڒقْشُوعْ ن سِيذِي! ◘52:‏11 2 كُور. 6‏:‏17؛ أَسَا. 18‏:‏4 ١٢ مَاغَارْ كنِّيوْ وَارْ ثتّفّْغمْ س ثزْڒَا، وَارْ ثَاركّْوَاڒمْ، مَاغَارْ سِيذِي أَذْ يُويُورْ زَّاثْ نْومْ ؤُ أَربِّي ن إِسْرَائِيل أَذْ يِيڒِي ذ أَغزْذِيسْ نْومْ أَنڭَّارْ.“