١ ”ذِي ڒْْوقْثْ نِّي، أَمُّو إِ إِقَّارْ سِيذِي، أَذْ سُّوفّْغنْ إِغْسَانْ ن إِجدْجِيذنْ ن يَاهُوذَا، إِغْسَانْ ن ڒْْحُوكَّامْ نْسنْ، إِغْسَانْ ن إِكهَّاننْ نْسنْ، إِغْسَانْ ن إِنَابِييّنْ نْسنْ ذ يغْسَانْ ن إِمزْذَاغْ ن ؤُرْشَالِيمْ زڭْ إِمضْڒَانْ نْسنْ. ٢ أَذْ بزّْعنْ إِخْسَانْ إِ ثْفُوشْثْ ذ ثْزِيرِي ؤُ إِ مَارَّا إِثْرَانْ ن ؤُجنَّا، إِنِّي ثُوغَا تّخْسنْ، إِنِّي ؤُمِي ثُوغَاعبّْذنْ، إِنِّي ثُوغَا ضفَّارَانْ ذ يِينِّي ثُوغَا زَّايْسنْ أَرزُّونْ شّْوَارْ ذ يِينِّي ؤُمِي ثُوغَا سجَّاذنْ. وَارْ ثنْ د-يَارّْونْ، وَارْ ثنْ نطّْڒنْ، مَاشَا أَذْ إِڒِينْ ذ ڒغْبَارْ خْ وُوذمْ ن ثمُّورْثْ. ◘8:‏2 إِرْم. 7‏:‏18؛ 19‏:‏13 ٣ نِيثْنِي أَذْ خْسنْ ڒْْموْثْ خْ ثُوذَارْثْ جَارْ مَارَّا إِنِّي إِقِّيمنْ زڭْ يِينِّي إِقِّيمنْ ن ثقْبِيتْشْ ن ڒْْڭنْسْ-أَ ثَاعفَّانْثْ، ذِي مَارَّا إِمُوشَانْ مَانِي دْجَانْ إِنِّي عَاذْ إِقِّيمنْ، مَانِي خَاسنْ ؤُژّْڒغْ، أَمُّو إِ إِقَّارْ سِيذِي نْ ڒْعسْكَارَاثْ.“

٤ ”إِنِي أَسنْ: ’أَمُّو إِ إِقَّارْ سِيذِي: مَا أَذْ وْضَانْ أَڒْ غَا قِّيمنْ وَارْ تّكَّارَانْ عَاذْ؟ مَا أَذْ خَافِي حيّْذنْ ؤُ وَارْ د-تّْعِيقِّيبنْ؟ ٥ مَايمِّي إِحيّذْ ڒْْڭنْسْ-أَ، ؤُرْشَالِيمْ ثَانِيثَا، ڒبْذَا زَّايِي؟ نِيثْنِي شبَّارنْ ذڭْ وشْمَاثْ، ؤُڭِينْ أَذْ غَارِي د-ذوْڒنْ. ٦ نشّْ سّْحسّغْ، سْڒِيغْ: مِينْ سَّاوَاڒنْ، وَارْ ث تّڭّنْ، ؤُڒَا ذ إِجّنْ وَارْ إِنْذِيمْ خْ ڒْْغَارْ نّسْ، أَذْ يِينِي: مِينْ ڭِّيغْ؟ كُوڒْ إِجّْ إِقِّيمْ إِتَّازّڒْ أَمْ ؤُيِيسْ إِتَّازّْڒنْ غَارْ ؤُمنْغِي. ٧ ؤُڒَا ذ أَبلَّارْجْ ذڭْ ؤُجنَّا إِسّنْ ڒوْقَاثْ إِتّْوَاڭّنْ نّسْ. ثَاجْلِيلّحْثْ ذ ثْفَاڒْدْجسْثْ نِّي إِطَّاونْ ذڭْ ونّضْ، حْضَانْثْ ڒْْوقْثْ ن وُوفُّوغْ نْسنْثْ، ڒْْڭنْسْ إِنُو مَاشَا وَارْ إِسِّينْ ڒْْحقّْ ن سِيذِي. ◘8:‏7 إِرْم. 5‏:‏4، 5 ٨ مَامّشْ ثقَّارمْ: نشِّينْ ذ إِمِيغِيسنْ ذ شَّارِيعَا ن سِيذِي أَقَا-ت أَكِيذْنغْ! س ثِيذتّْ، خْزَارْ، ڒقْڒمْ ن إِخَارِّيقنْ ن إِمَارِيرنْ إِڭَّا شَّارِيعَا ذ أَخَارِّيقْ. ٩ إِمِيغِيسنْ تّْسضْحَانْ، تّڭّْوذنْ ؤُشَا تّْوَاحبّْسنْ. خْزَارْ، نْضَارنْ أَوَاڒْ ن سِيذِي، خنِّي مَامّشْ إِ ثدْجَا ثِيغِيثْ إِ غَارْسنْ؟“

١٠ ”س ؤُيَا أَذْ وْشغْ ثِيمْغَارِينْ نْسنْ إِ إِنّغْنِي، إِيَّارنْ نْسنْ إِ يِينِّي إِ غَا إِحوّْسنْ ثَامُّورْثْ، مَاغَارْ زڭْ ؤُمژْيَانْ أَڒْ أَمقّْرَانْ أَرزُّونْ مَارَّا نِيثْنِي ثِيزِي نْسنْ، زڭْ ؤُنَابِي أَڒْ أَكهَّانْ مَارَّا ثْشمّثْ. ◘8:‏10 إِشا. 56‏:‏11؛ إِرْم. 6‏:‏12، 13، 14، 15 ١١ ثَارژِّيثْ ن ڒْْڭنْسْ إِنُو خْسنْ أَذْ ت سّْڭنْفَانْ س ڒهْونْ أَمْ قَّارنْ: ’ڒهْنَا، ڒهْنَا!‘، مَاشَا وَارْ ذِينْ إِدْجِي ڒهْنَا. ١٢ مَا أَذْ سضْحَانْ نِيثْنِي، مِينْزِي تّڭّنْ جّْعِيفشْثْ؟ نِيثْنِي وَارْ تّْسضْحِينْ شَا، ڒحْيَا وَارْ ث سِّيننْ. س ؤُيَا أَذْ وْضَانْ جَارْ إِنِّي إِوطَّانْ. ذِي ڒْْوقْثْ مڒْمِي زَّايْسنْ إِ غَا خڒْفغْ أَذْ نّْقَارْضنْ، أَمُّو إِ إِقَّارْ سِيذِي.“ ١٣ ”نشّْ أَذْ ثنْ ڒقْضغْ قَاعْ، أَمُّو إِ إِقَّارْ سِيذِي. وَارْ إِقِّيمْ عَاذْ ؤُضِيڒْ غَارْ ثْزَايَارْثْ ؤُ وَارْ ثقِّيمْ عَاذْ ثَازَارْثْ غَارْ ثْشجَّارْثْ ن وَارْثُو، عَاذْ ثِيفْرَايْ وْضَانْثْ. نشّْ أَذْ غَارْسنْ أَوْيغْ إِنِّي خَاسنْ إِ غَا إِعفْسنْ.“ ◘8:‏13 إِشا. 5‏:‏1‏-‏7؛ مت. 21‏:‏19؛ لك. 13‏:‏6‏-‏9

١٤ ”مَايمِّي ذَا نَارْنِي ذڭْ ؤُغِيمِي؟ إِتّْخصَّا أَنغْ أَذْ نْمُونْ، أَذْ نَاذفْ غَارْ ثْندَّامْ إِفَارْينْ، ؤُشَا أَذْ ذِينْ نسْقَارْ. أَقَا سِيذِي، أَربِّي نّغْ، يَارَّا أَنغْ أَذْ نسْقَارْ ؤُشَا إِوْشَا أَنغْ أَمَانْ إِسْمُومنْ، مَاغَارْ نخْضَا خْ سِيذِي. ◘8:‏14 إِرْم. 4‏:‏5؛ 9‏:‏15؛ 23‏:‏15 ١٥ نسِّيتِّيمْ ذِي ڒهْنَا، مَاشَا وَارْ ذِينْ مِينْ إِصبْحنْ، ذِي ڒْْوقْثْ ن ؤُسْڭنْفِي، مَاشَا خْزَارْ، مْغِيرْ أَسْنخْڒِيعْ. ◘8:‏15 إِرْم. 14‏:‏19 ١٦ زِي ذَانْ إِتّْوَاسڒْ ؤُسَاحَارْثْ ن ييْسَانْ نّسْ، زڭْ وسْنحْنحْ ن ييْسَانْ إِجهْذنْ نّسْ ثنْهزَّا مَارَّا ثَامُّورْثْ. نِيثْنِي أَذْ د-أَسنْ أَذْ شّنْ ثَامُّورْثْ ذ ڒْْغِيدْجثْ نّسْ، ثَانْذِينْثْ أَكْ-ذ إِمزْذَاغْ نّسْ. ◘8:‏16 إِرْم. 4‏:‏15 ١٧ مَاغَارْ خْزَارْ، نشّْ أَذْ سّكّغْ جَارْ أَومْ إِفِيغْرَانْ، إِفِيغْرَانْ ن أَرّْهَاجْ، أَكِيذْسنْ وَارْ إِنفّعْ ؤُعزّمْ. إِنَا أَذْ كنِّيوْ زعْفنْ، أَمُّو إِ إِقَّارْ سِيذِي.“ ◘8:‏17 إِزهد. 58‏:‏5، 6

١٨ ”أَمْحَاذْ إِنُو أَقَا إِذْوڒْ ذ أَشْضَانْ، ؤُڒْ إِنُو يُوحڒْ أَطَّاسْ ذڭْ إِخفْ إِنُو. ١٩ خْزَارْ، ڒْْحسّْ ن إِغُويَّانْ ن يدْجِيسْ ن ڒْْڭنْسْ إِنُو زِي ثمُّورْثْ ثِيڭّْوجْ: ’مَا سِيذِي وَارْ إِدْجِي ذِي صِيهْيُونْ، مَا وَارْ ذَايسْ إِدْجِي ؤُجدْجِيذْ نّسْ؟‘ “

”مَايمِّي ذ أَيِي سْعَارنْ س ڒخْيَاڒَاثْ نْسنْ إِنقْشنْ، س لْ-أَصْنَامْ إِبطّْڒنْ ن إِبَارَّانِييّنْ؟“

٢٠ ”ثعْذُو ثْميْرَا، إِفّغْ ؤُنبْذُو، ؤُ نشِّينْ عَاذْ وَارْ ننْجِيمْ. ٢١ نشّْ تّْوَارْژِيغْ زِي سِّيبّثْ ن ثَارژِّيثْ ن يسِّيسْ ن ڒْْڭنْسْ إِنُو. نشّْ أَرْضغْ أَرُّوضْ ذ أَبَارْشَانْ، إِشبَّارْ ذَايِي ؤُنخْڒِيعْ. ◼8:‏21 ’ثَارژِّيثْ‘ - إِخْسْ أَذْ يِينِي ’أَيزِّيمْ يَارزْمنْ‘ ونِّي د-يُوسِينْ أَكْ-ذ دّْنُوبْ ن ڒْڭنْسْ ن إِسْرَائِيل ذ يَاهُوذَا ذ إِمزْذَاغْ ن ؤُرْشَالِيمْ مِينْزِي وَارْ خْسنْ أَذْ ذوْڒنْ غَارْ أَربِّي. خْزَارْ عَاوذْ إِشا. 1. س وَاوَاڒْ ’ثَارژِّيثْ‘ إِشيَّارْ ؤُنَابِي إِرْمِييَا عَاوذْ غَارْ ؤُوطُّو إِ د-يُوسِينْ غَارْ ؤُرْشَالِيمْ س ؤُفُوسْ ن ؤُجدْجِيذْ ن بَابِيلْ إِ خْ إِسَّاوَاڒْ إِرْمِييَا ذڭْ وُوذمْ-أَ ن ڒشْثَابْ ن إِرْمِييَا. ٢٢ مَا وَارْ ذِينْ إِدْجِي بَالْسَامْ ذِي جِيلْعَاذْ؟ مَا وَارْ ذِينِّي إِدْجِي ؤُمسْڭنْفُو؟ مَايمِّي وَارْ إِنِّيضْ ؤُيزِّيمْ ن يدْجِيسْ ن ڒْْڭنْسْ إِنُو؟ ◘8:‏22 أَمز. 37‏:‏24؛ إِرْم. 46‏:‏11؛ 51‏:‏8 ٢٣ أَخْ، مْڒِي أَزدْجِيفْ إِنُو ذ أَمَانْ، ثِيطّْ إِنُو ذ ڒْْعُونْصَارْ ن إِمطَّاونْ، خنِّي أَزِيڒْ ذ دْجِيڒثْ إِڒِي رُوغْ خْ يِينِّي إِتّْوَانْغنْ ن يدْجِيسْ ن ڒْْڭنْسْ إِنُو.“ ◘8:‏23 إِشا. 22‏:‏4؛ إِرْم. 4‏:‏19