١ ”ؤُشْثْ خْ إِمكْسَاونْ إِ إِنقّنْ ؤُ زُوزَّارَانْ ؤُدْجِي ن دّْمَانِي إِنُو ن ثَاروْسَا، أَمُّو إِ إِقَّارْ سِيذِي. ◼23:‏1 ’إِمكْسَاونْ‘ - نِيغْ ’إِنِيتْشَانْ‘.  ◘23:‏1 حِز. 34‏:‏2 ٢ س ؤُيَا أَمُّو إِ إِقَّارْ سِيذِي، أَربِّي ن إِسْرَائِيل، خْ إِمكْسَاونْ نِّي يَاركّْوْسنْ ڒْْڭنْسْ إِنُو: ’كنِّيوْ ثْزُوزَّارمْ ؤُدْجِي إِنُو ؤُشَا ثُوژّْڒمْ خَاسنْ. كنِّيوْ وَارْ ثنْ ثحْضِيمْ. خْزَارْ، نشّْ أَذْ خڒْفغْ زِي ثُوعفّْنَا ذ ثْمڭَّا نْومْ، أَمُّو إِ إِقَّارْ سِيذِي. ٣ نشّْ أَذْ سّْمُونغْ مِينْ إِقِّيمنْ ن وُودْجِي إِنُو زِي مَارَّا ثِيمُّورَا مَانِي خَاسنْثْ ؤُژّْڒغْ. نشّْ أَذْ ثنْثْ أَرّغْ غَارْ ڒْْكُورِيثْ نْسنْثْ، أَذْ أَرْونْثْ، أَذْ مَّارْنِينْثْ. ٤ نشّْ أَذْ أَسنْثْ ڭّغْ إِمكْسَاونْ نِّي ثنْثْ إِ غَا يَاروْسنْ. نِيثْنِي وَارْ تّڭّْوْذنْثْ عَاذْ ؤُ وَارْ تّْنخْڒِيعنْثْ ؤُ وَارْ تّْوذِّيرِينْثْ!‘، أَمُّو إِ إِقَّارْ سِيذِي.“ ◘23:‏4 حِز. 34‏:‏11، 12

٥ ”خْزَارْ، أَذْ د-أَسنْ وُوسَّانْ، أَمُّو إِ إِقَّارْ سِيذِي، أَقَا نشّْ أَذْ سّكَّارغْ إِ ذَاوُوذْ أَغدُّو ن ثْسڭْذَا. نتَّا أَذْ إِحْكمْ أَمْ ؤُجدْجِيذْ، أَذْ إِفْڒحْ ؤُشَا أَذْ إِڭّْ ڒْْحقّْ ذ ثْسڭْذَا ذِي ثمُّورْثْ. ◘23:‏5 إِشا. 4‏:‏2؛ 40‏:‏11؛ إِرْم. 33‏:‏14، 15؛ دَان. 9‏:‏24؛ لك. 1‏:‏32، 33 ٦ ذڭْ وُوسَّانْ نّسْ أَذْ إِتّْوَاسّنْجمْ يَاهُوذَا ؤُشَا إِسْرَائِيل أَذْ إِزْذغْ ذِي ڒَْامَانْ. وَا أَذْ يِيڒِي ذ إِسمْ إِ زِي ذ أَسْ إِ غَا ڒَْاغَانْ: سِيذِي، ثَاسڭْذَا نّغْ.“ ◘23:‏6 أَعَوذ. 33‏:‏28

٧ ”س ؤُيَا، خْزَارْ، أَذْ د-أَسنْ وُوسَّانْ، أَمُّو إِ إِقَّارْ سِيذِي، وَارْ قَّارنْ عَاذْ: ’س ثِيذتّْ أَمْ إِدَّارْ سِيذِي نِّي د-إِسُّوفّْغنْ أَيْثْ ن إِسْرَائِيل زِي مِيصْرَا!‘، ◘23:‏7 إِرْم. 16‏:‏14، 15 ٨ مَاشَا: ’س ثِيذتّْ أَمْ إِدَّارْ سِيذِي نِّي د-إِسْڭعّْذنْ زَّارِيعثْ ن ثَادَّارْثْ ن إِسْرَائِيل، ونِّي ثنْ د-يَارِّينْ زِي ثمُّورْثْ ن شَّامَالْ ؤُ زِي مَارَّا ثِيمُّورَا مَانِيسْ خَاسنْ ؤُژّْڒغْ. نِيثْنِي أَذْ زذْغنْ ذِي ثمُّورْثْ نْسنْ.‘ “

٩ خْ إِنَابِييّنْ.

”ؤُڒْ إِنُو إِتّْوَارْژْ ذِي ذَاخڒْ إِنُو، مَارَّا إِغْسَانْ إِنُو تَّارْجِيجِينْ. نشّْ ذوْڒغْ أَمْ يِيجّْ ن ؤُمسْشُورْ، أَمْ ورْيَازْ نِّي يَارْنِي بِينُو، زِي سِّيبّثْ ن سِيذِي ؤُ زِي سِّيبّثْ ن وَاوَاڒنْ نّسْ إِقدّْسنْ. ١٠ مَاغَارْ ثَامُّورْثْ ثشُّورْ س يِينِّي إِزنَّانْ، مَاغَارْ ثَامُّورْثْ ثشْضنْ زِي سِّيبّثْ ن نّعْڒثْ، دّْمَانِي ن ثَاروْسَا ذِي ڒخْڒَا ؤُژْغنْثْ. مَانِي خْسنْ أَذْ أَوْضنْ أَقَا-ث ذ أَعفَّانْ، ؤُڒَا ذ جّهْذْ نْسنْ وَارْ إِدْجِي شَا نِيشَانْ. ◘23:‏10 إِرْم. 5‏:‏7، 8؛ 9‏:‏2 ١١ مَاغَارْ أَمْ ؤُنَابِي أَمْ ؤُكهَّانْ تّْوَافسْذنْ، عَاذْ ذِي ثَادَّارْثْ إِنُو تَّافغْ ثُوعفّْنَا نْسنْ، أَمُّو إِ إِقَّارْ سِيذِي. ◘23:‏11 إِرْم. 6‏:‏13؛ 8‏:‏10؛ 14‏:‏18 ١٢ س ؤُيَا أَذْ د-أَسنْ إِذْوڒْ وبْرِيذْ نْسنْ أَمْ يِيجّْ نْ ڒوْضَا إِتّحْرُودْجُوضْ ذِي ثَادْجسْثْ. أَذْ تّْوَاعَارّْننْ ؤُ نِيثْنِي أَذْ زَّايسْ د-وْضَانْ، مَاغَارْ أَذْ خَاسنْ د-سّهْوِيغْ إِشْثْ ن ثشْثِي ثَاعفَّانْثْ ذڭْ ؤُسڭّْوَاسْ إِ زَّايْسنْ إِ غَا خڒْفغْ، أَمُّو إِ إِقَّارْ سِيذِي.“ ◘23:‏12 إِزهد. 35‏:‏6؛ 73‏:‏18؛ إِرْم. 13‏:‏16

١٣ ”أَقَا نشّْ ژْرِيغْ ثِيمسْڒَايِينْ إِسّْثبْهَاثنْ غَارْ إِنَابِييّنْ ن سَامَارْيَا: نِيثْنِي ثُوغَا تّْنَابّنْ س بَاعْلْ ؤُشَا تّْغَارَّانْ ڒْْڭنْسْ إِنُو. ١٤ مَاشَا غَارْ إِنَابِييّنْ ن ؤُرْشَالِيمْ ژْرِيغْ إِجّْ ن نّْعِي ذ أَعفَّانْ قَاعْ: نِيثْنِي زنَّانْ، ؤُيُورنْ أَمْ سّْخَارِّيقنْ ؤُشَا سّْجهْذنْ إِفَاسّنْ ن إِعفَّاننْ أَڒَامِي ؤُڒَا ذ إِجّْ وَارْ د-إِعْقبْ زڭْ وبْرِيذْ نّسْ أَعفَّانْ. مَامّشْ تّْوَاڒِيغْ نشّْ، مَارَّا إِذْسنْ أَمْ سَاذُومْ، ؤُشَا إِمزْذَاغْ ن ؤُرْشَالِيمْ إِ نشّْ أَمْ عَامُورَّا. ◘23:‏14 إِشا. 1‏:‏9 ١٥ س ؤُيَا، أَمُّو إِ إِقَّارْ سِيذِي ن ڒْْعسْكَارَاثْ، أَربِّي ن إِسْرَائِيل: خْزَارْ، نشّْ أَذْ وْشغْ شِّيحْ ذ مَاشَّا إِ ڒْڭنْسْ-أَ ؤُڒَا ذ أَمَانْ ن أَرّْهَاجْ مَاحنْذْ أَذْ ثنْ سْونْ، مِينْزِي زڭْ إِنَابِييّنْ ذِي ؤُرْشَالِيمْ إِفّغْ-د ؤُغسّبْ ن شَّارِيعَا غَارْ مَارَّا ثَامُّورْثْ. ◘23:‏15 إِرْم. 8‏:‏14؛ 9‏:‏15 ١٦ أَمُّو إِ إِقَّارْ سِيذِي ن ڒْْعسْكَارَاثْ: وَارْ تّسْڒِيمْ شَا إِ وَاوَاڒنْ ن إِنَابِييّنْ نِّي ذ أَومْ إِتّْنبَّانْ، أَمْ سَّاوَاڒنْ أَكِيذْومْ بَاطڒْ. نِيثْنِي سَّاوَاڒنْ إِجّْ ن ڒوْحِييْ ن وُوڒْ ن يِيخفْ نْسنْ، وَارْ سِّيوِيڒنْ ڒوْحِييْ زڭْ ؤُقمُّومْ ن سِيذِي. ١٧ ڒبْذَا قَّارنْ إِ يِينِّي ذ أَيِي إِسّحْقَارَانْ: سِيذِي إِنَّا إِ-ث، أَذْ غَارْومْ يِيڒِي ڒهْنَا! ؤُ إِ كُوڒْ إِجّْ ونِّي إِڭُّورنْ ذِي ڒقْسَاحثْ ن وُوڒْ نّسْ، قَّارنْ: وَارْ د خَاومْ إِتّمْسَارْ ؤُڒَا ذ إِجّْ ن ڒْْغَارْ! ◘23:‏17 إِرْم. 6‏:‏14؛ 8‏:‏11؛ حِز. 13‏:‏10؛ زَاك. 10‏:‏2 ١٨ مَاغَارْ مَانْ ونْ ثُوغَا إِبدّْ ذِي ڒْْحڒْقثْ ن إِمْشَاوَارنْ ن سِيذِي، إِژْرَا أَوَاڒْ نّسْ ؤُ إِسْڒَا أَسْ؟ وِي إِسّْحسّنْ إِ وَاوَاڒْ نّسْ ؤُشَا إِسْڒَا غَارسْ؟ ١٩ خْزَارْ، ثَاحَارْيَاضْثْ ن سِيذِي، إِفّغْ-د زَّايسْ وسْعَارْ، إِشْثْ ن ثْحَارْيَاضْثْ ثزّبْزِيبْ نِّي د غَا إِهْوَانْ خْ ؤُزدْجِيفْ ن إِعفَّاننْ. ◘23:‏19 إِرْم. 30‏:‏23، 24 ٢٠ أَغْضَابْ ن سِيذِي وَارْ د-إِذِّيكّْوِيڒْ شَا أَڒْ غَا يِيڒِينْ إِخَارِّيصنْ ن وُوڒْ نّسْ. ذڭْ ؤُنڭَّارْ ن وُوسَّانْ أَذْ أَسْ ثْفهْممْ س ڒفْهَامثْ ثكْمڒْ. ٢١ نشّْ وَارْ د-سّكِّيغْ شَا إِنَابِييّنْ نِّي، وَاخَّا أَمنِّي ڭُّورنْ تَّازّْڒنْ نِيثْنِي. نشّْ وَارْ غَارْسنْ سِّيوْڒغْ شَا، وَاخَّا أَمنِّي بْذَانْ أَذْ نبَّانْ ذغْيَا زڭْ يِيخفْ نْسنْ. ◘23:‏21 إِرْم. 14‏:‏14 ٢٢ مْڒِي ثُوغَا نِيثْنِي بدّنْ ذِي ڒْْهڒْقثْ ن إِمْشَاوَارنْ إِنُو، إِڒِي أَرِّينْ ڒْْڭنْسْ إِنُو أَذْ إِسڒْ إِ وَاوَاڒنْ إِنُو ؤُ إِڒِي أَرِّينْ ثنْ أَذْ د-ذوْڒنْ زڭْ وبْرِيذْ نْسنْ أَعفَّانْ ؤُ زِي ڒْْغَارْ ن ثْمڭَّا نْسنْ.“

٢٣ ”نشّْ ذ إِجّْ ن أَربِّي زِي ڒَْاذَاسْ، أَمُّو إِ إِقَّارْ سِيذِي، وَارْ إِدْجِي إِجّْ ن أَربِّي زِي ڒَْاڭّْوَاجْ؟ ٢٤ مَا إِزمَّارْ شَا ن يِيجّنْ أَذْ إِنُّوفَّارْ ذڭْ إِمُوشَانْ إِنُّوفَّارنْ، أَڒَامِي نشّْ وَارْ ث ژَترّغْ، إِقَّارْ سِيذِي. مَا وَارْ إِدْجِي ذ نشّْ ونِّي إِشُّورنْ أَجنَّا ذ ثمُّورْثْ؟، إِقَّارْ سِيذِي. ◘23:‏24 إِزهد. 139‏:‏7‏-‏12؛ عَام. 9‏:‏2، 3 ٢٥ نشّْ سْڒِيغْ مِينْ قَّارنْ إِنَابِييّنْ نِّي إِتّْنبَّانْ أَمْ سّْخَارِّيقنْ ذڭْ يِيسمْ إِنُو، قَّارنْ: ’ثُوغَا غَارِي إِشْثْ ن ثِيرْجَا، إِشْثْ ن ثِيرْجَا!‘ ٢٦ أَڒْ مڒْمِي عَاذْ أَذْ إِڒِينْثْ ثِيرْجَا ذڭْ وُوڒْ ن إِنَابِييّنْ نِّي إِتّْنبَّانْ أَمْ سّْخَارِّيقنْ؟ نِيثْنِي ذ إِنَابِييّنْ ن وشْمَاطْ ن وُوڒْ ن يِيخفْ نْسنْ، ٢٧ إِنِّي يَارزُّونْ أَذْ أَرّنْ ڒْْڭنْسْ إِنُو أَذْ إِتُّو إِسمْ إِنُو س ثِيرْجَا نْسنْ نِّي تّْهَاجَانْ إِجّْ إِ ونّغْنِي، أَمْ مَامّشْ إِبَابَاثنْ نْسنْ تُّونْ إِسمْ إِنُو س بَاعْلْ. ◘23:‏27 ڒقض. 3‏:‏7؛ 8‏:‏33، 34 ٢٨ أَنَابِي نِّي غَارسْ إِشْثْ ن ثِيرْجَا، أجّْ إِ-ث أَذْ ت إِحَاجَا، ؤُ أَنَابِي نِّي غَارْ إِدْجَا وَاوَاڒْ إِنُو، أجّْ إِ-ث أَذْ إِسِّيوڒْ أَوَاڒْ إِنُو س ثِيذتّْ. مَاغَارْ مِينْ د-يِيوْينْ ڒُْومْ غَارْ إِمنْذِي، إِقَّارْ سِيذِي. ٢٩ مَا وَارْ إِدْجِي وَاوَاڒْ إِنُو أَمْ ثْمسِّي، إِقَّارْ سِيذِي، ؤُشَا أَمْ يِيجّْ ن وفْضِيسْ إِ إِڒبّْزنْ ثَاصْضَارْثْ؟ ٣٠ س ؤُيَا، خْزَارْ، نشّْ أَذْ ڒقْفغْ إِنَابِييّنْ نِّي، أَمُّو إِ إِقَّارْ سِيذِي، إِنِّي إِتَّاشَارنْ أَوَاڒنْ إِنُو إِجّْ ن ونّغْنِي. ◘23:‏30 أَعَوذ. 18‏:‏20؛ إِرْم. 14‏:‏14، 15 ٣١ خْزَارْ، نشّْ أَذْ ڒقْفغْ إِنَابِييّنْ نِّي، إِقَّارْ سِيذِي، إِنِّي إِسّْخدَّامنْ إِڒسْ نْسنْ ؤُ سَّاوَاڒنْ زَّايسْ أَمُّو: ’نتَّا إِقَّارْ!‘ ٣٢ خْزَارْ، نشّْ أَذْ ڒقْفغْ إِنِّي إِتّْنبَّانْ س ثِيرْجَا إِخَارِّيقنْ، أَمُّو إِ إِقَّارْ سِيذِي. نِيثْنِي تّْحَاجَانْ ثِيرْجَا نِّي ؤُ أَمُّو إِ تّْغَارَّانْ ڒْْڭنْسْ إِنُو زڭْ إِخَارِّيقنْ نْسنْ ذ ڒْْهَارْذْ نْسنْ إِبطّْڒنْ. نشّْ وَارْ ثنْ د-سّكّغْ ؤُ وَارْ ذ أَسنْ وْشِيغْ أَوَاڒْ. نِيثْنِي وَارْ دْجِينْ ذ نّْفعْ إِ ڒْْڭنْسْ، أَمُّو إِ إِقَّارْ سِيذِي.“ ◘23:‏32 صَاف. 3‏:‏4

٣٣ ”خْمِي شكْ إِ غَا إِسّقْسَا إِجّْ ن ڒْْڭنْسْ نِيغْ إِجّْ ن ؤُنَابِي نِيغْ إِجّْ ن ؤُكهَّانْ، أَذْ يِينِي: ’مِينْ إِعْنَا خنِّي ڒْْحُوكْمْ إِسَّاڭّْوَاذنْ ن سِيذِي؟‘، خنِّي شكْ أَذْ أَسنْ ثِينِيذْ: ’مِينْ إِعْنَا خنِّي ڒْْحُوكْمْ إِسَّاڭّْوَاذنْ؟‘ ’أَذْ كنِّيوْ نْضَارغْ!‘، أَمُّو إِ إِقَّارْ سِيذِي. ٣٤ أَنَابِي ذ ؤُكهَّانْ ذ ڒْْڭنْسْ نِّي إِقَّارنْ أَمْ سْثهزَّانْ: ’ڒْْحُوكْمْ إِسَّاڭّْوَاذنْ ن سِيذِي؟‘، أَرْيَازْ نِّي ذ ثَادَّارْثْ نِّي أَذْ زَّايسْ خڒْفغْ. ٣٥ أَمُّو إِتّْخصَّا أَذْ ثِينِيمْ، كُوڒْ  إِجّْ إِ جَّارْ نّسْ ؤُ كُوڒْ إِجّْ إِ ؤُمَاسْ: ’مَامّشْ خَاكْ د-يَارَّا سِيذِي؟‘، ؤُ: ’مِينْ إِنَّا سِيذِي؟‘ ٣٦ وَارْ ثِيذَارمْ عَاذْ ڒْْحُوكْمْ إِسَّاڭّْوَاذنْ ن سِيذِي، مَاغَارْ ڒْْحُوكْمْ إِسَّاڭّْوَاذنْ ن سِيذِي أَذْ يِيڒِي مِينْ غَا يِينِي كُوڒْ إِجّْ: أَقَا كنِّيوْ ثسّْفَارْغمْ أَوَاڒنْ ن أَربِّي إِدَّارنْ، سِيذِي ن ڒْْعسْكَارَاثْ، أَربِّي نّغْ.

٣٧ أَمُّو إِ غَا ثِينِيذْ إِ ؤُنَابِي: ’مَامّشْ خَاكْ د-يَارَّا سِيذِي؟‘، نِيغْ: ’مِينْ إِنَّا سِيذِي؟‘ ٣٨ مَاشَا ؤُمِي ثقَّارمْ كنِّيوْ: ’ڒْْحُوكْمْ إِسَّاڭّْوَاذنْ ن سِيذِي؟‘، س ؤُيَا، أَمُّو إِ إِقَّارْ سِيذِي، ؤُمِي كنِّيوْ ثقَّارمْ أَوَاڒْ-أَ: ’ڒْْحُوكْمْ إِسَّاڭّْوَاذنْ ن سِيذِي؟‘، وَاخَّا نشّْ سّكّغْ-د غَارْومْ إِجّنْ حِيمَا أَذْ أَومْ يِينِي: ’كنِّيوْ وَارْ ثقَّارمْ شَا: ڒْْحُوكْمْ إِسَّاڭّْوَاذنْ ن سِيذِي؟‘، ٣٩ س ؤُيَا، خْزَارْ، نشّْ أَذْ كنِّيوْ تُّوغْ قَاعْ. نشّْ أَذْ كنِّيوْ نْضَارغْ زِي زَّاثْ إِ وُوذمْ إِنُو أَكْ-ذ ثنْذِينْثْ نْومْ نِّي ذ أَومْ وْشِيغْ إِ كنِّيوْ ؤُڒَا إِ ڒجْذُوذْ نْومْ. ٤٠ نشّْ أَذْ خَاومْ د-سّهْوِيغْ ڒْْحڭْرَا إِ ڒبْذَا ذ ڒفْضِيحثْ إِ ڒبْذَا نِّي وَارْ إِتّْوَاتُّونْعمَّارْصْ.“ ◘23:‏40 إِرْم. 20‏:‏11