١ أَوَاڒْ إِ د-إِفّْغنْ زِي سِيذِي غَارْ إِرْمِييَا - ؤُمِي نابُوخَاذْرَاصَّارْ، أَجدْجِيذْ ن بَابِيلْ، ذ مَارَّا ڒْْعسْكَارْ نّسْ ذ مَارَّا ثِيڭلْذِيوِينْ ن دُّونشْثْ إِ إِدْجَانْ سَاذُو فُوسْ نّسْ ذ مَارَّا ڒڭْنُوسْ ثُوغَا تّْمنْغَانْ أَكْ-ذ ؤُرْشَالِيمْ ؤُ أَكْ-ذ مَارَّا ثِيندَّامْ نّسْ - إِ إِنَّانْ: ◘34:‏1 2 إِج. 25؛ إِرْم. 52

٢ ”أَمُّو إِ إِقَّارْ سِيذِي، أَربِّي ن إِسْرَائِيل: ’ؤُيُورْ ؤُشَا سِيوڒْ أَكْ-ذ صِيذْقِييَا، أَجدْجِيذْ ن يَاهُوذَا، إِنِي أَسْ: أَمُّو إِ إِقَّارْ سِيذِي، خْزَارْ، نشّْ أَذْ وْشغْ ثَانْذِينْثْ-أَ ذڭْ ؤُفُوسْ ن ؤُجدْجِيذْ ن بَابِيلْ ؤُ نتَّا أَذْ أَسْ إِقّذْ ثِيمسِّي. ◘34:‏2 إِرْم. 21‏:‏10؛ 32‏:‏29 ٣ ؤُڒَا ذ شكْ س يِيخفْ نّشْ وَارْ ثْنجّْمذْ إِ ؤُفُوسْ نّسْ، مَاشَا أَذْ شكْ طّْفنْ ؤُ أَذْ شكْ وْشنْ ذڭْ ؤُفُوسْ نّسْ. ثِيطّْ ذِي ثِيطّْ أَذْ ثْژَارذْ أَجدْجِيذْ ن بَابِيلْ ؤُشَا أَذْ كِيذسْ ثسِّيوْڒذْ زڭْ ؤُقمُّومْ غَارْ ؤُقمُّومْ ؤُشَا أَذْ د-ثَاوْضذْ أَڒْ بَابِيلْ. ◘34:‏3 إِرْم. 32‏:‏4 ٤ سڒْ مَاشَا إِ وَاوَاڒْ ن سِيذِي، صِيذْقِييَا، أَجدْجِيذْ ن يَاهُوذَا. أَمُّو إِ خَاكْ إِقَّارْ سِيذِي: ’شكْ وَارْ ثتّْوَانْغذْ شَا س سِّيفْ. ٥ أَذْ ثمّْثذْ ذِي ڒهْنَا ؤُشَا أَمْ مَامّشْ سَّارْغنْ ثِيمسِّييَاثْ إِ ڒجْذُوذْ نّشْ، إِجدْجِيذنْ ن زِيشْ نِّي ثُوغَا إِدْجَانْ قْبڒْ إِ شكْ، أَذْ سَّارْغنْ عَاوذْ ذ ثِيمسِّييَاثْ إِ شكْ ؤُشَا أَذْ خَاكْ وْثنْ أَڭجْذُورْ، أَذْ إِنِينْ: أَخْ، سِيذِي!‘، مَاغَارْ نشّْ سِّيوْڒغْ أَوَاڒْ-أَ، أَمُّو إِ إِقَّارْ سِيذِي.‘ “

٦ إِسِّيوڒْ ؤُنَابِي إِرْمِييَا مَارَّا أَوَاڒنْ-أَ إِ صِيذْقِييَا، أَجدْجِيذْ ن يَاهُوذَا، ذِي ؤُرْشَالِيمْ، ٧ ؤُمِي ثُوغَا ڒْْعسْكَارْ ن ؤُجدْجِيذْ ن بَابِيلْ إِتّْمنْغَا أَكْ-ذ ؤُرْشَالِيمْ ؤُ أَكْ-ذ مَارَّا ثِيندَّامْ ن يَاهُوذَا نِّي إِقِّيمنْ، أَكْ-ذ لَاخِيشْ ذ عَازِيقَا، مَاغَارْ ثِينَا ثُوغَا عَاذْ قِّيمنْثْ جَارْ ثْندَّامْ ن يَاهُوذَا، مِينْزِي ثُوغَا أَثنْثْ ذ ثِيندَّامْ إِفَارْينْ.

٨ أَوَاڒْ نِّي د-إِفّْغنْ زِي سِيذِي غَارْ إِرْمِييَا، أَوَارْنِي مَا إِقّنْ ؤُجدْجِيذْ صِيذْقِييَا إِجّْ ن ڒْْعَاهْذْ أَكْ-ذ مَارَّا ڒْْڭنْسْ نِّي إِدْجَانْ ذِي ؤُرْشَالِيمْ، مَاحنْذْ أَذْ بَارّْحنْ س إِجّْ ن ؤُسَارّحْ جَارْ أَسنْ، ◘34:‏8 ؤُف. 21‏:‏2 ٩ مَاحنْذْ كُوڒْ  إِجّنْ أَذْ يَارْخُو إِ إِسْمغْ نّسْ ؤُ إِ ثَايَّا نّسْ، إِ ؤُعِيبْرَانِي ؤُ إِ ثْعِيبْرَانشْثْ، أَڒَامِي وَارْ إِتّْغِيمِي جَارْ أَسنْ ؤُڒَا ذ إِجّنْ ونِّي إِدْجَانْ ذ إِسْمغْ غَارْ إِجّْ ن ورْيَازْ زِي يَاهُوذَا، غَارْ ؤُمَاسْ. ١٠ مَارَّا ڒْْحُوكَّامْ ذ مَارَّا ڒْْڭنْسْ نِّي إِقّْننْ ڒْْعَاهْذْ، سْڒِينْ أَقَا كُوڒْ أَرْيَازْ أَذْ يَارْخُو إِ إِسْمغْ نّسْ ؤُ كُوڒْ أَرْيَازْ أَذْ يَارْخُو إِ ثَايَّا نّسْ حِيمَا وَارْ إِتّْغِيمِي غَارْسنْ ؤُڒَا ذ إِجّْ ن إِسْمغْ. نِيثْنِي وْشِينْ أَمزُّوغْ إِ مَانْ أَيَا ؤُشَا سّكّنْ ثنْ. ١١ مَاشَا أَوَارْنِي أَسْ بدّْڒنْ، أَرِّينْ-د إِسمْغَانْ ذ ثِييَّا إِنِّي ؤُمِي ثُوغَا أَرْخُونْ، حْصَارنْ ثنْ عَاوذْ مَاحنْذْ أَذْ إِڒِينْ عَاوذْ ذ إِمْسمْغَانْ ذ ثِييَّا.

١٢ خنِّي يُوسَا-د وَاوَاڒْ ن سِيذِي غَارْ إِرْمِييَا، إِنَّا: ١٣ ”أَمُّو إِ إِقَّارْ سِيذِي، أَربِّي ن إِسْرَائِيل: ’نشّْ ڭِّيغْ إِجّْ ن ڒْْعَاهْذْ أَكْ-ذ ڒجْذُوذْ نْومْ ذڭْ وَاسّْ نِّي ذِي ثنْ د-سُّوفّْغغْ زِي مِيصْرَا، زِي ثَادَّارْثْ ن ثسْمُوغِي، نِّيغْ: ١٤ أَوَارْنِي ڒَْامِي عْذُونْ سبْعَا ن إِسڭّْوُوسَا إِتّْخصَّا كُوڒْ  إِجّْ أَذْ إِسّكّْ ؤُمَاسْ أَعِيبْرَانِي نِّي ذ أَشْ إِزّنْزنْ إِخفْ نّسْ ؤُشَا ثُوغَا إِخدّمْ إِ شكْ ستَّا ن إِسڭّْوُوسَا. إِتّْخصَّا أَذْ أَسْ ثَارْخُوذْ أَذْ يُويُورْ ذِي ثْڒلِّي! مَاشَا ڒجْذُوذْ نْومْ وَارْ غَارِي د-سْڒِينْ ؤُ وَارْ ذ أَيِي وْشِينْ شَا أَمزُّوغْ. ◘34:‏14 ؤُف. 21‏:‏2؛ أَعَوذ. 15‏:‏12 ١٥ وَاخَّا كنِّيوْ ثْذوْڒمْ-د، ثڭِّيمْ مِينْ إِدْجَانْ نِيشَانْ ذِي ثِيطَّاوِينْ إِنُو أَمْ إِبَارّحْ كُوڒْ  إِجّْ س ؤُسَارْخُو إِ جَّارْ نّسْ ؤُشَا ثڭِّيمْ إِجّْ ن ڒْْعَاهْذْ زَّاثْ إِ وُوذمْ إِنُو ذِي ثَادَّارْثْ مِينْ خفْ إِتّْوَابَارّحْ إِسمْ إِنُو، ١٦ كنِّيوْ مَاشَا ثنّْقڒْبمْ عَاوذْ ؤُشَا ثسّْعِيدْجْثمْ إِسمْ إِنُو. كُوڒْ  إِجّْ يَارَّا-د إِسْمغْ نّسْ ؤُ كُوڒْ  إِجّْ يَارَّا-د ثَايَّا نّسْ نِّي ؤُمِي ثُوغَا ثَارْخُومْ مَاحنْذْ أَذْ ؤُيُورنْ نِيثْنِي مَانِي خْسنْ، ؤُشَا كنِّيوْ ثحْصَارمْ ثنْ عَاوذْ مَاحنْذْ أَذْ أَومْ إِڒِينْ ذ إِمْسمْغَانْ ذ ثِييَّا.‘ “

١٧ ”س ؤُيَا، أَمُّو إِ إِقَّارْ سِيذِي: ’كنِّيوْ وَارْ غَارِي ثسْڒِيمْ مَاحنْذْ كُوڒْ إِجّْ أَذْ إِبَارّحْ س ؤُسَارْخُو إِ ؤُمَاسْ ؤُ كُوڒْ إِجّْ إِ جَّارْ نّسْ. خْزَارْ، أَمُّو نشّْ أَذْ أَومْ بَارّْحغْ س ؤُسَارْخُو، أَمُّو إِ إِقَّارْ سِيذِي، مَاحنْذْ أَذْ كنِّيوْ سلّْمغْ إِ سِّيفْ، إِ طَّاعُونْ ؤُ إِ ڒَاژْ. نشّْ أَذْ كنِّيوْ ڭّغْ ذ إِشْثْ ن ڒْْقشْعثْ ن ؤُنخْڒِيعْ إِ مَارَّا ثِيڭلْذِيوِينْ ن دُّونشْثْ. ◘34:‏17 أَعَوذ. 28‏:‏25؛ إِرْم. 15‏:‏4؛ 24‏:‏9، 10 ١٨ نشّْ أَذْ أَرّغْ إِرْيَازنْ نِّي إِعْذُونْ خْ ڒْْعَاهْذْ إِنُو، إِنِّي وَارْ إِطِّيفنْ ذڭْ وَاوَاڒنْ ن ڒْْعَاهْذْ نِّي ڭِّينْ زَّاثْ إِ وُوذمْ إِنُو، أَمْ ؤُعجْمِي نِّي بْضَانْ خْ ثْنَاينْ ذ ونِّي جَارْ إِزيْنَاثْ نّسْ شُوقنْ نِيثْنِي: ◘34:‏18 أَمز. 15‏:‏10 ١٩ ڒْْحُوكَّامْ ن يَاهُوذَا ذ ڒْْحُوكَّامْ ن ؤُرْشَالِيمْ، إِمْسخَّارنْ إِشنّْعنْ، إِكهَّاننْ ذ مَارَّا ڒْْڭنْسْ ن ثمُّورْثْ، إِنِّي إِشُوقنْ مَارَّا جَارْ إِزِييْنَاثْ ن ؤُعجْمِي. ٢٠ نشّْ أَذْ ثنْ وْشغْ ذڭْ ؤُفُوسْ ن ڒْْعذْيَانْ نْسنْ ؤُ ذڭْ ؤُفُوسْ ن يِينِّي يَارزُّونْ أَذْ ثنْ نْغنْ ؤُشَا ڒْْخشْبَاثْ نْسنْ أَذْ إِڒِينْثْ ذ مَاشَّا إِ إِجْضَاضْ ن ؤُجنَّا ؤُ إِ ڒْمَاڒْ ن ثمُّورْثْ. ◼34:‏20 ’إِنِّي يَارزُّونْ أَذْ ثنْ نْغنْ‘ - س ثْعِيبْرَانِيثْ ’إِنِّي يَارزُّونْ ڒعْمَارْ نْسنْ‘.  ◘34:‏20 إِرْم. 7‏:‏33؛ 16‏:‏4؛ 19‏:‏7 ٢١ ؤُڒَا ذ صِيذْقِييَا، أَجدْجِيذْ ن يَاهُوذَا، ذ ڒْْحُوكَّامْ نّسْ أَذْ ثنْ ڭّغْ ذڭْ ؤُفُوسْ ن ڒْْعذْيَانْ نْسنْ، ذڭْ ؤُفُوسْ ن يِينِّي يَارزُّونْ ثُوذَارْثْ نْسنْ، ذڭْ ؤُفُوسْ ن ڒْْعسْكَارْ ن ؤُجدْجِيذْ ن بَابِيلْ نِّي خَاومْ إِفّْغنْ ڒخُّو. ◘34:‏21 إِرْم. 37‏:‏11 ٢٢ خْزَارْ، نشّْ أَذْ ؤُمُورغْ، أَمُّو إِ إِقَّارْ سِيذِي، ؤُ نشّْ أَذْ ثنْ د-أَرّغْ غَارْ ثنْذِينْثْ-أَ ؤُ نِيثْنِي أَذْ كِيذسْ مّنْغنْ، أَذْ ت طّْفنْ ؤُشَا أَذْ أَسْ قّْذنْ ثِيمسِّي. نشّْ أَذْ أَرّغْ ثِيندَّامْ ن يَاهُوذَا ذ إِشْثْ ن ثمُّورْثْ إِتّْوَاردّْدْجنْ، وَارْ ذَايسْ إِتّْغِيمِي ؤُڒَا ذ إِجّْ ن ؤُمزْذُوغْ عَاذْ.‘ “