أَذْلِيسْ إِقدّْسنْ يُوحَانَّا ١٢

١٢

أَذْهَانْ س ڒعْطُورْ إِغْڒَانْ ذِي بَايْثْ-عَانْيَا

١ ستَّا ن وُوسَّانْ قْبڒْ ڒْْعِيذْ ن ثْغَارْصْثْ ن ؤُسعْذُو، يُوسَا-د يَاسُوع غَارْ بَايْثْ-عَانْيَا، مَانِي ثُوغَا إِدْجَا أَلِيعَازَارْ، ونِّي د-إِسّْنكَّارْ يَاسُوع زِي ثَادَّارْثْ ن إِمتِّيننْ. ◘ ٢ ڭِّينْ أَسْ ذِينْ إِجّْ ن ؤُمنْسِي. مَارْثَا ثُوغَا ثْسخَّارْ، ؤُ أَلِيعَازَارْ ثُوغَا ذ إِجّنْ زڭْ إِنِّي أَكِيذسْ إِقِّيمنْ غَارْ طَّابْڒَا. ٣ ثكْسِي-د مَارْيَامْ إِجّْ ن ؤُغَارَّافْ نْ زّشْثْ إِ وذْهَانْ زِي ڒعْطُورْ نْ صّنْبلْ ثصْفَا ثِيغْڒَا، ثذْهنْ إِضَارنْ ن يَاسُوع، خنِّي ثمْسحْ إِضَارنْ نّسْ س ؤُشُووَّافْ نّسْ. ثَادَّارْثْ ثشُّورْ س ڒفْوَاحثْ ن زّشْثْ ن وذْهَانْ. ٤ إِجّنْ زڭْ إِمحْضَارنْ نّسْ ونِّي ؤُمِي قَّارنْ يَاهُوذَا إِسْخَارِييُوطِي ونِّي ث إِ غَا إِغْذَارنْ، إِنَّا: ٥ ”مَايمِّي وَارْ ثمّنْزْ شَا ڒفْوَاحثْ-أَ ن صّنْبلْ س ثڒْثْ مْيَا ن ذِينَارْ، حِيمَا أَذْ ثمّوْشْ إِ إِمزْڒَاضْ؟“ ◘ ٦ نتَّا إِنَّا أَيَا، وَارْ إِدْجِي مِينْزِي شْقَانْ ث إِمزْڒَاضْ، مَاشَا مِينْزِي نتَّا ذ أَشفَّارْ، ثُوغَا غَارسْ سّنْذُوقْ، ؤُشَا يَارْبُو مِينْ ذَايسْ إِمَّارْسنْ. ◘ ٧ يَاسُوع إِنَّا: ”جّمْ ت، أَقَا ثْخمّڒْ إِ-ت إِ وَاسّْ ن ونْضڒْ إِنُو. ◘ ٨ مِينْزِي إِمزْڒَاضْ أَقَا أَثنْ ڒبْذَا أَكِيذْومْ، مَاشَا نشّْ وَارْ كِيذْومْ دْجِيغْ إِ ڒبْذَا.“ ◘

٩ أَطَّاسْ ن ڒْْغَاشِي زڭْ وُوذَاينْ سْڒِينْ بلِّي يَاسُوع أَقَا-ث ذِينِّي. ؤُسِينْ-د نِيثْنِي، وَارْ إِدْجِي حَاشَا زِي سِّيبّثْ ن يَاسُوع، مَاشَا عَاوذْ حِيمَا أَذْ ژَترنْ أَلِيعَازَارْ، ونِّي د-إِسّْنكَّارْ زِي ثَادَّارْثْ ن إِمتِّيننْ. ◘ ١٠ مْشَاوَارنْ إِمقّْرَاننْ ن إِكهَّاننْ، حِيمَا أَذْ نْغنْ ؤُڒَا ذ أَلِيعَازَارْ، ١١ مِينْزِي أَطَّاسْ ن وُوذَاينْ فّْغنْ-د زِي سِّيبّثْ نّسْ ؤُشَا ؤُمْننْ ذِي يَاسُوع.

أَذَافْ ن يَاسُوع غَارْ ؤُرْشَالِيمْ

١٢ ثِيوشَّا نّسْ، ؤُمِي سْڒِينْ أَطَّاسْ ن ڒْْغَاشِي إِنِّي د يُوسِينْ غَارْ ڒْْعِيذْ بلِّي يَاسُوع يُوسَا-د غَارْ ؤُرْشَالِيمْ، ◘ ١٣ كْسِينْ إِفثْوَانْ ن ثِينِي ؤُشَا فّْغنْ، حِيمَا أَذْ ث ڒْْقَانْ، ڒَْاغَانْ:

”ؤُصَانَّا!

سّعْذْ ن ونِّي د-يُوسِينْ

س يِيسمْ ن سِيذِي،

أَجدْجِيذْ ن إِسْرَائِيل!“ ◘

١٤ يُوفَا يَاسُوع إِجّْ ن وسْنُوسْ ؤُشَا إِنْيَا خَاسْ، أَمْ مَامّشْ ثُورَا:

١٥ ”وَارْ تّڭّْوذْ شَا، أَ يدْجِيسْ ن صِيهْيُونْ،

خْزَارْ، أَجدْجِيذْ نّمْ أَذْ د-يَاسْ،

إِقِّيمْ خْ وسْنُوسْ، أَحنْجِيرْ ن ثغْيُوتْشْ.“ ◘

١٦ إِمحْضَارنْ نّسْ وَارْ فْهِيمنْ شَا ثِيمسْڒَايِينْ-أَ ذِي ڒْْوقْثْ نِّي. مَاشَا أَوَارْنِي ڒَْامِي إِتّْوَاسُّوعْڒَا يَاسُوع، ڒخْذنِّيعقْڒنْ بلِّي مَانْ أَيَا ثُورَا خَاسْ ؤُشَا بلِّي نِيثْنِي ڭِّينْ زَّايسْ مَانْ أَيَا. ١٧ ڒْْغَاشِي إِ ثُوغَا إِدْجَانْ أَكِيذسْ، ثُوغَا إِشْهذْ أَقَا نتَّا إِڒَاغَا-د خْ أَلِيعَازَارْ زڭْ ونْضڒْ ؤُشَا إِسّْنكَّارْ إِ-ث-إِ-د زِي ثَادَّارْثْ ن إِمتِّيننْ. ١٨ س مَانْ أَيَا إِفّغْ ڒْْغَاشِي أَمقّْرَانْ مَاحنْذْ أَذْ ث مّڒْقَانْ، مِينْزِي نِيثْنِي سْڒِينْ بلِّي إِڭَّا ڒعْڒَامثْ-أَ. ١٩ إِفَارِيسِييّنْ نَّانْ جَارْ أَسنْ: ”ثتّْوَاڒَامْ مْلِيحْ بلِّي كنِّيوْ ثتَّاكّْوَاضمْ غَارْ وَالُو، خْزَارمْ، أَقَا قَاعْ دُّونشْثْ ثضْفَارْ إِ-ث-إِ-د.“ ◘

يَاسُوع إِسَّاوَاڒْ خْ ڒْْموْثْ ذ ثْنُوكْرَا نّسْ

٢٠ ثُوغَا ذِينْ شَا ن إِوْذَانْ زِي ڒڭْنُوسْ جَارْ أَسنْ إِنِّي د-إِڭعّْذنْ غَارْ ؤُرْشَالِيمْ حِيمَا أَذْعبْذنْ ذِي ڒْْعِيذْ. ◘ ٢١ إِنَا رُوحنْ غَارْ فِيلِيبُّوسْ، ونِّي زِي ثنْذِينْثْ ن بَايْثْ-صَايْذَا ذِي لْجَالِيلْ. سّقْسَانْ ث، نَّانْ: ”أَ سِيذِي، نخْسْ أَذْ نْژَارْ يَاسُوع.“ ◘ ٢٢ يُوسَا-د فِيلِيبُّوسْ، إِنَّا ت إِ أَنْذْرَاوُوسْ، ؤُشَا أَنْذْرَاوُوسْ ذ فِيلِيبُّوسْ نَّانْ ت إِ يَاسُوع. ٢٣ يَاسُوع يَارَّا-د، إِنَّا أَسنْ: ”أَقَا ثِيوضْ-د ثْسَاعّثْ إِ ذِي إِ غَا إِتّْوَاسّْعُودْجْ مِّيسْ ن بْنَاذمْ. ◘ ٢٤ س ثِيذتّْ، س ثِيذتّْ، نشّْ أَذْ أَومْ إِنِيغْ: مَاڒَا وَارْ د-إِوْضِي ڒْْحبّْ ن يِيرْذنْ ذِي ثمُّورْثْ، أَذْ إِمّثْ، خنِّي أَذْ إِقِّيمْ وحّْذسْ، مَاشَا مَاڒَا إِمُّوثْ، خنِّي أَذْ د-يَاوِي ڒْْغِيدْجثْ أَطَّاسْ. ◘ ٢٥ ونِّي إِتّخْسنْ ثُوذَارْثْ نّسْ، أَذْ ت إِخْسَارْ، مَاشَا ونِّي إِ غَا إِشَارْهنْ ثُوذَارْثْ نّسْ ذِي دُّونشْثْ-أَ، أَذْ ت إِخمّڒْ إِ ثُوذَارْثْ إِتّْذُومَانْ. ◘ ٢٦ مَاڒَا شَا ن يِيجّنْ إِسخَّارْ أَيِي، أجّْ إِ-ث أَذْ أَيِي إِضْفَارْ. مَانِي غَا إِڒِيغْ نشّْ، ذِينِّي إِ غَا يِيڒِي عَاوذْ ؤُمْسخَّارْ إِنُو. مَاڒَا شَا ن إِجّنْ إِخْذمْ أَيِي، أَذْ ث إِشنّعْ بَابَا. ◘ ٢٧ ڒخُّو ؤُڒْ إِنُو إِنّهْوڒْ، مِينْ غَا إِنِيغْ؟ أَ بَابَا، سنْجمْ أَيِي زِي ثْسَاعّثْ-أَ؟ مَاشَا خْ ؤُينِّي إِ د-ؤُسِيغْ غَارْ ثْسَاعّثْ-أَ. ◘ ٢٨ أَ بَابَا، سْعُودْجِي إِسمْ نّشْ.“ خنِّي ثُوسَا-د إِشْثْ ن ثْمِيجَّا زڭْ ؤُجنَّا، ثنَّا: ”سْعُودْجغْ ث ؤُشَا أَذْ ث سْعُودْجغْ عَاوذْ!“ ٢٩ ڒْْغَاشِي إِ ثُوغَا إِبدّنْ ذِينْ إِسْڒَا إِ-ت، نِيثْنِي نَّانْ: ”أَقَا إِمْسَارْ وَاجَّاجْ.“ إِنّغْنِي نَّانْ: ”أَقَا إِسِّيوڒْ-د إِجّْ ن لْمَالَاكْ أَكِيذسْ.“

٣٠ يَارَّا-د يَاسُوع، إِنَّا أَسنْ: ”ثْمِيجَّا-يَا وَارْ ثدْجِي شَا ذِي طّْوعْ إِنُو مَاشَا ذِي طّْوعْ نْومْ. ◘ ٣١ ڒخُّو أَذْ يِيڒِي ڒْْحُوكْمْ خْ دُّونشْثْ-أَ، ڒخُّو أَذْ إِمّنْضَارْ ؤُمقّْرَانْ ن دُّونشْثْ-أَ غَارْ بَارَّا. ◘ ٣٢ ؤُ نشّْ، خْ مِينِّي إِ غَا تّْوَاسّْڭعّْذغْ زِي ثمُّورْثْ، أَذْ غَارِي د-جبْذغْ مَارَّا.“ ◘ ٣٣ إِنَّا مَانْ أَيَا حِيمَا أَذْ إِسّْشنْ غَارْ مَانْ ڒْْموْثْ إِ غَا إِمّثْ.

٣٤ ڒْْغَاشِي يَارَّا-د خَاسْ: ”نشِّينْ نسْڒَا زِي شَّارِيعَا أَقَا لْمَاسِيحْ أَذْ إِقِّيمْ إِ ڒبْذَا. إِ مَامّشْ ثقَّارذْ شكْ بلِّي إِتّْخصَّا إِ مِّيسْ ن بْنَاذمْ أَذْ إِتّْوَاسّْڭعّذْ؟ مِينْ إِعْنَا مِّيسْ-أَ ن بْنَاذمْ؟“ ◘ ٣٥ يَاسُوع إِنَّا أَسنْ: ”ثَافَاوْثْ أَذْ ثِيڒِي أَكِيذْومْ ذْرُوسْ ن ڒْْوقْثْ عَاذْ. ؤُيُورمْ، ڒَْامِي غَارْومْ ثَافَاوْثْ، حِيمَا وَارْ كنِّيوْ ثتّطّفْ ثَادْجسْثْ. ونِّي إِڭُّورنْ ذِي ثَادْجسْثْ، وَارْ إِسِّينْ مَانِي إِڭُّورْ. ◘ ٣٦ أَمْنمْ ذِي ثْفَاوْثْ مَاحنْذْ ثَافَاوْثْ عَاذْ أَقَا-ت غَارْومْ، حِيمَا كنِّيوْ أَذْ ثِيڒِيمْ ثَارْوَا ن ثْفَاوْثْ.“ أَمُّو إِ ثُوغَا إِسَّاوَاڒْ يَاسُوع. ڒخْذنِّي يُويُورْ ؤُشَا إِنُّوفَارْ زَّايْسنْ.

بْڒَا لْ-إِيمَانْ ن وُوذَاينْ

٣٧ وَاخَّا ثُوغَا نتَّا إِتّڭّْ مَارَّا ڒعْڒَامَاثْ-أَ زَّاثْسنْ، نِيثْنِي وَارْ زَّايسْ ؤُمِيننْ شَا، ٣٨ حِيمَا أَذْ إِتّْوَاكمّڒْ وَاوَاڒْ ن ؤُنَابِي إِشَاعْيَا إِ إِنَّانْ:

”أَ سِيذِي، وِي يُومْننْ س ڒخْبَارْ نّغْ

ؤُ إِ ؤُمِي إِتّْوَاسَّارْڭبْ ؤُفُوسْ ن سِيذِي؟“ ◘

٣٩ س ؤُينِّي وَارْ زمَّارنْ أَذْ أَمْننْ، مِينْزِي إِشَاعْيَا إِنَّا عَاوذْ:

٤٠ ”نِيثْنِي سّْذَارْغْڒنْ ثِيطَّاوِينْ ن يِيخفْ نْسنْ،

سّقْسحنْ ؤُڒَاونْ نْسنْ،

حِيمَا وَارْ تّثْوِيڒِينْ س ثِيطَّاوِينْ نْسنْ،

وَارْ فهّْمنْ س وُوڒْ نْسنْ،

أَذْ ثُوبنْ ؤُشَا نشّْ أَذْ ثنْ سّْڭنْفِيغْ.“ ◘

٤١ إِنَّا إِشَاعْيَا أَمُّو، ؤُمِي إِژْرَا أَعُودْجِي نّسْ ؤُشَا ثُوغَا إِسَّاوَاڒْ خَاسْ. ◘ ٤٢ ؤُمْننْ زَّايسْ عَاوذْ أَطَّاسْ ن إِمقّْرَاننْ ن ڒْْڭنْسْ، مَاشَا س سِّيبّثْ ن إِفَارِيسِييّنْ وَارْ زَّايسْ شهْذنْ شَا س بْطَايْطَايْ، حِيمَا وَارْ ثنْ سُّوفُّوغنْ زِي ثمْزِيذَا. ◘ ٤٣ مِينْزِي نِيثْنِي ثُوغَا خْسنْ أَعُودْجِي زڭْ إِوْذَانْ خْ ؤُعُودْجِي زِي أَربِّي. ◘

٤٤ مَاشَا يَاسُوع إِڒَاغَا، إِنَّا: ”ونِّي ذَايِي إِتَّامْننْ، وَارْ ذَايِي إِتِّيمنْ شَا، مَاشَا ذڭْ ونِّي ذ أَيِي د-إِسّكّنْ. ٤٥ ونِّي ذ أَيِي إِژْرِينْ، إِژْرَا ونِّي ذ أَيِي د-إِسّكّنْ. ◘ ٤٦ نشّْ ذ ثَافَاوْثْ إِ د-يُوسِينْ غَارْ دُّونشْثْ، حِيمَا كُوڒْ إِجّنْ ونِّي ذَايِي إِتَّامْننْ، وَارْ إِتّْغِيمِي شَا ذِي ثَادْجسْثْ. ◘ ٤٧ مَاڒَا شَا ن يِيجّنْ إِسْڒَا إِ وَاوَاڒنْ إِنُو، مَاشَا وَارْ ذَايْسنْ إِتّطّفْ، نشّْ وَارْ خَاسْ حكّْمغْ شَا. نشّْ وَارْ د-ؤُسِيغْ شَا، حِيمَا أَذْ حكْمغْ خْ دُّونشْثْ، مَاشَا حِيمَا أَذْ وْشغْ ثُوذَارْثْ إِ دُّونشْثْ. ◘ ٤٨ ونِّي ذ أَيِي إِسّحْقَارنْ ؤُشَا وَارْ إِقْبِيڒْ أَوَاڒنْ إِنُو، غَارسْ ونِّي خَاسْ إِ غَا إِحكْمنْ: أَوَاڒْ إِ نِّيغْ، أَذْ خَاسْ إِحْكمْ ذڭْ وَاسّْ أَنڭَّارُو. ◘ ٤٩ مِينْزِي نشّْ وَارْ سِّيوْڒغْ شَا زِي غَارِي، مَاشَا بَابَا ونِّي ذ أَيِي-د-إِسّكّنْ إِوْشَا أَيِي إِشْثْ ن ثوْصيّثْ خْ مِينْ غَا إِنِيغْ ذ مِينْ خفْ غَا سِّيوْڒغْ،◘ ٥٠ ؤُ نشّْ سّْنغْ ثِيوصَّا نّسْ، أَقَا أَثنْثْ ذ ثُوذَارْثْ إِتّْذُومَانْ. س ؤُيَا، مِينْ سَّاوَاڒغْ، سَّاوَاڒغْ ث أَمْ مَامّشْ ذ أَيِي إِنَّا بَابَا.“

◘١٢:١ 12:‏1 [مت. 26‏:‏6‏-‏13؛ مك. 14‏:‏3‏-‏9] — مت. 26‏:‏6؛ مك. 14‏:‏3؛ لك. 7‏:‏37؛ يُوح. 11‏:‏2.

◘١٢:٥ 12:‏5 مك. 14‏:‏5.

◘١٢:٦ 12:‏6 يُوح. 13‏:‏29.

◘١٢:٧ 12:‏7 مك. 14‏:‏8.

◘١٢:٨ 12:‏8 أَعَوذ. 15‏:‏11؛ مت. 26‏:‏11؛ مك. 14‏:‏7.

◘١٢:٩ 12:‏9 يُوح. 11‏:‏44.

◘١٢:١٢ 12:‏12 [مت. 21‏:‏1‏-‏11؛ مك. 11‏:‏1‏-‏11؛ لك. 19‏:‏28‏-‏40] — مت. 21‏:‏8؛ مك. 11‏:‏8؛ لك. 19‏:‏36.

◘١٢:١٣ 12:‏13 إِزهد. 118‏:‏25، 26؛ مت. 21‏:‏9؛ مك. 11‏:‏9، 10

◘١٢:١٥ 12:‏15 إِشا. 62‏:‏11؛ زَاك. 9‏:‏9؛ مت. 21‏:‏5.

◘١٢:١٩ 12:‏19 يُوح. 11‏:‏47.

◘١٢:٢٠ 12:‏20 ڒخ. 8‏:‏27.

◘١٢:٢١ 12:‏21 يُوح. 1‏:‏45.

◘١٢:٢٣ 12:‏23 يُوح. 13‏:‏32؛ 17‏:‏1.

◘١٢:٢٤ 12:‏24 1 كُور. 15‏:‏36.

◘١٢:٢٥ 12:‏25 مت. 10‏:‏39؛ 16‏:‏25؛ مك. 8‏:‏35؛ لك. 9‏:‏24؛ 17‏:‏33.

◘١٢:٢٦ 12:‏26 يُوح. 14‏:‏3؛ 17‏:‏24.

◘١٢:٢٧ 12:‏27 مت. 26‏:‏37، 38، 39؛ مك. 14‏:‏34؛ لك. 22‏:‏44.

◘١٢:٣٠ 12:‏30 يُوح. 11‏:‏42.

◘١٢:٣١ 12:‏31 يُوح. 14‏:‏30؛ 16‏:‏11؛ كُول. 2‏:‏15.

◘١٢:٣٢ 12:‏32 ڒخْڒ. 21‏:‏9؛ 2 إِج. 18‏:‏4؛ يُوح. 3‏:‏14؛ 8‏:‏28.

◘١٢:٣٤ 12:‏34 2 صم. 7‏:‏16؛ 1 إِم. 22‏:‏10؛ إِزهد. 45‏:‏7؛ 89‏:‏37؛ 110‏:‏4؛ إِشا. 9‏:‏5؛ إِرْم. 23‏:‏6؛ حِز. 37‏:‏26؛ دَان. 2‏:‏44؛ 7‏:‏14، 27؛ مِيخَا 4‏:‏7؛ عبر. 1‏:‏8.

◘١٢:٣٥ 12:‏35 إِرْم. 13‏:‏16؛ يُوح. 1‏:‏9؛ 8‏:‏12؛ 9‏:‏5؛ 12‏:‏46؛ أَفا. 5‏:‏8؛ 1 تس. 5‏:‏4

◘١٢:٣٨ 12:‏38 إِشا. 53‏:‏1؛ رُوم. 10‏:‏16.

◘١٢:٤٠ 12:‏40 إِشا. 6‏:‏9‏-‏10؛ حِز. 12‏:‏2؛ مت. 13‏:‏14؛ مك. 4‏:‏12؛ لك. 8‏:‏10؛ ڒخ. 28‏:‏26؛ رُوم. 11‏:‏8

◘١٢:٤١ 12:‏41 إِشا. 6‏:‏1.

◘١٢:٤٢ 12:‏42 يُوح. 7‏:‏13؛ 9‏:‏22.

◘١٢:٤٣ 12:‏43 يُوح. 5‏:‏44.

◘١٢:٤٥ 12:‏45 يُوح. 10‏:‏30؛ 14‏:‏9.

◘١٢:٤٦ 12:‏46 إِشا. 42‏:‏6؛ 49‏:‏6؛ يُوح. 1‏:‏9؛ 8‏:‏12؛ 9‏:‏5؛ 12‏:‏46؛ ڒخ. 13‏:‏47.

◘١٢:٤٧ 12:‏47 يُوح. 3‏:‏17؛ 9‏:‏39.

◘١٢:٤٨ 12:‏48 مك. 16‏:‏16؛ يُوح. 3‏:‏18؛ 8‏:‏24.

◘١٢:٤٩ 12:‏49 أَعَوذ. 18‏:‏18؛ يُوح. 3‏:‏11؛ 5‏:‏20؛ 7‏:‏16؛ 8‏:‏28؛ 14‏:‏10، 24؛ 16‏:‏13.