أَذْلِيسْ إِقدّْسنْ يُوحَانَّا ١٧

١٧

ثَاژَادْجِيثْ ن يَاسُوع أَمْ ؤُكهَّانْ أَمقّْرَانْ

١ ثُوغَا يَاسُوع إِسَّاوَاڒْ س مَانْ أَيَا ؤُشَا إِسّْڭعّذْ ثِيطَّاوِينْ نّسْ غَارْ ؤُجنَّا، إِنَّا: ”أَ بَابَا، أَقَا ثَاسَاعّثْ ثِيوضْ-د. سُوعْڒَا مِّيشْ، حِيمَا ؤُڒَا ذ مِّيشْ أَذْ شكْ إِسُّوعْڒَا، ◘ ٢ أَڒَامِي ذ أَسْ ثوْشِيذْ صُّولْطَا خْ مَارَّا دَّاثْ، حِيمَا خنِّي نتَّا أَذْ إِوْشْ ثُوذَارْثْ إِتّْذُومَانْ إِ كُوڒْ إِجّنْ إِ ذ أَسْ ثوْشِيذْ. ◘ ٣ ذ ثَانِيثَا ذ ثُوذَارْثْ إِتّْذُومَانْ، أَقَا نِيثْنِي أَذْ شكْ سّْننْ، مَاغَارْ شكْ وحّْذكْ ذ أَربِّي ذ ثِيذتّْ، ذ يَاسُوع لْمَاسِيحْ ونِّي د-ثسّكّذْ. ◘ ٤ نشّْ سُّوعْڒِيغْ شكْ خْ ثمُّورْثْ. نشّْ كمّْڒغْ ڒْْخذْمثْ إِ ذ أَيِي ثوْشِيذْ حِيمَا أَذْ ت ڭّغْ. ◘ ٥ ڒخُّو، سْعُودْجِي أَيِي، أَ بَابَا، غَارْ إِخفْ نّشْ س ؤُعُودْجِي إِ ثُوغَا غَارِي قْبڒْ مَا أَذْ ثِيڒِي دُّونشْثْ. ◘

٦ سشْنغْ إِسمْ نّشْ إِ إِوْذَانْ إِنِّي ذ أَيِي ثوْشِيذْ زِي دُّونشْثْ. نِيثْنِي ثُوغَا أَثنْ نّشْ، ثوْشِيذْ ثنْ إِ نشّْ، أَقَا طّْفنْ ذڭْ وَاوَاڒْ نّشْ. ٧ ڒخُّو سّْنغْ بلِّي مَارَّا مِينْ ذ أَيِي ثوْشِيذْ، أَقَا-ث زَّايكْ د-يُوسَا. ٨ مِينْزِي نشّْ وْشِيغْ أَسنْ أَوَاڒنْ إِ ذ أَيِي ثوْشِيذْ ؤُشَا نِيثْنِي قبْڒنْ زَّايْسنْ، سّْننْ س ثِيذتّْ بلِّي نشّْ فّْغغْ-د زَّايكْ، ؤُمْننْ أَقَا شكْ ثسّكّذْ أَيِي-د. ◘ ٩ نشّْ تَّارغْ ذِي طّْوعْ نْسنْ، وَارْ تّتَّارغْ ذِي طّْوعْ ن دُّونشْثْ، مَاشَا ذِي طّْوعْ ن يِينِّي ذ أَيِي ثوْشِيذْ، مِينْزِي أَقَا أَثنْ نّشْ. ١٠ مَارَّا مِينْ إِدْجَانْ إِنُو أَقَا-ث نّشْ ؤُ مِينْ إِدْجَانْ نّشْ أَقَا-ث إِنُو، ؤُ نشّْ تّْوَاسّْعُودْجغْ ذَايْسنْ. ◘

١١ زِي ڒخُّو نشّْ وَارْ دْجِيغْ عَاذْ ذِي دُّونشْثْ، مَاشَا نِيثْنِي أَقَا أَثنْ ذِي دُّونشْثْ، ؤُشَا نشّْ أَذْ غَاركْ د-أَسغْ. أَ بَابَا إِقدّْسنْ، حْضَا ثنْ ذڭْ يِيسمْ نّشْ، إِسمْ نِّي ذ أَيِي ثوْشِيذْ، حِيمَا نِيثْنِي أَذْ إِڒِينْ ذ إِجّنْ أَمْ نشِّينْ. ١٢ ڒَْامِي ذ أَيِي ثُوغَا أَكِيذْسنْ، حْضِيغْ ثنْ ذڭْ يِيسمْ نّشْ. نشّْعسّغْ خْ يِينِّي ذ أَيِي ثوْشِيذْ. ؤُڒَا ذ إِجّْ زَّايْسنْ وَارْ إِتّْوَاهلّكْ، مْغِيرْ مِّيسْ ن ثهْلِيكثْ، حِيمَا أَذْ إِتّْوَاكمّڒْ مِينْ يُورَانْ ذِي ثِيرَا إِقدّْسنْ. ◘

١٣ مَاشَا ڒخُّو أَذْ غَاركْ د-أَسغْ ؤُ سَّاوَاڒغْ خْ مَانْ أَيَا ذِي دُّونشْثْ، حِيمَا أَذْ ثِيڒِي ڒفْرَاحثْ إِنُو ثكْمڒْ ذَايْسنْ. ١٤ وْشِيغْ أَسنْ أَوَاڒْ نّشْ ؤُشَا دُّونشْثْ ثُوغَا ثْشَارّهْ إِ-ثنْ، مِينْزِي وَارْ دْجِينْ شَا زِي دُّونشْثْ، أَمْ نشّْ وَارْ دْجِيغْ شَا زِي دُّونشْثْ. ◘ ١٥ نشّْ وَارْ تَّارغْ حِيمَا أَذْ ثنْ ثكْسِيذْ زِي دُّونشْثْ، مَاشَا حِيمَا أَذْ ثنْ ثحْضِيذْ زڭْ ؤُمْعفَّانْ. ١٦ نِيثْنِي وَارْ دْجِينْ شَا زِي دُّونشْثْ أَمْ نشّْ وَارْ دْجِيغْ شَا زِي دُّونشْثْ. ١٧ أَ بَابَا، سْقدّسْ إِ-ثنْ ذِي ثِيذتّْ، أَوَاڒْ نّشْ ذ ثِيذتّْ. ◘ ١٨ أَمْ مَامّشْ إِ ذ أَيِي د-ثسّكّذْ غَارْ دُّونشْثْ، أَمُّو إِ ثنْ سّكّغْ عَاوذْ غَارْ دُّونشْثْ. ◘ ١٩ سّْقدَّاسغْ إِخفْ إِنُو ذِي طّْوعْ نْسنْ، حِيمَا أَذْ تّْوَاقدّْسنْ ؤُڒَا ذ نِيثْنِي ذِي ثِيذتّْ. ◘

٢٠ وَارْ تَّارغْ ذِي طّْوعْ ن يِينَا وَاهَا، مَاشَا عَاوذْ ذِي طّْوعْ ن يِينِّي ذَايِي يُومْننْ س وَاوَاڒْ نْسنْ. ٢١ حِيمَا أَذْ إِڒِينْ مَارَّا ذ إِجّنْ، أَ بَابَا، أَمْ شكْ ذَايِي ؤُ نشّْ ذَايكْ، حِيمَا ؤُڒَا ذ نِيثْنِي أَذْ إِڒِينْ ذ إِجّنْ ذَايْنغْ، حِيمَا أَذْ ثَامنْ دُّونشْثْ بلِّي أَقَا ذ شكْ إِ ذ أَيِي د-إِسّكّنْ. ◘ ٢٢ نشّْ وْشِيغْ أَسنْ أَعُودْجِي إِ ذ أَيِي ثوْشِيذْ، حِيمَا أَذْ إِڒِينْ ذ إِجّنْ أَمْ مَامّشْ نشِّينْ ندْجْ ذ إِجّنْ. ٢٣ نشّْ ذَايْسنْ، شكْ ذَايِي، حِيمَا أَذْ إِڒِينْ تّْوَاكمّْڒنْ غَارْ إِجّنْ، حِيمَا أَذْ ثسّنْ دُّونشْثْ أَقَا شكْ ثسّكّذْ أَيِي-د ؤُ ثخْسذْ ثنْ أَمْ مَامّشْ إِ ذ أَيِي ثخْسذْ.

٢٤ أَ بَابَا، خْسغْ إِ يِينِّي ذ أَيِي ثوْشِيذْ أَذْ إِڒِينْ أَكِيذِي مَانِي مَا دْجِيغْ نشّْ، ؤُشَا أَذْ ژَترنْ أَعُودْجِي إِنُو إِ ذ أَيِي ثوْشِيذْ، مِينْزِي شكْ ثخْسذْ أَيِي قْبڒْ مَا أَذْ ثتّْوَاڭّْ دُّونشْثْ. ◘ ٢٥ أَ بَابَا إِنُو إِسڭّْذنْ، أَقَا دُّونشْثْ وَارْ شكْ ثسِّينْ، مَاشَا نشّْ أَقَا سّْنغْ شكْ ؤُ إِنَا سّْننْ أَقَا شكْ ثسّكّذْ أَيِي-د. ◘ ٢٦ نشّْ سّشْنغْ أَسنْ إِسمْ نّشْ ؤُ أَذْ ث سّشْنغْ، حِيمَا ثَايْرِي إِ زِي ثُوغَا ذ أَيِي ثتّخْسذْ أَذْ ثِيڒِي ذَايْسنْ ؤُ نشّْ ذَايْسنْ.“

◘١٧:١ 17:‏1 يُوح. 12‏:‏23؛ 13‏:‏32.

◘١٧:٢ 17:‏2 إِزهد. 8‏:‏7؛ مت. 11‏:‏27؛ 28‏:‏18؛ لك. 10‏:‏22؛ يُوح. 3‏:‏35؛ 5‏:‏27؛ 1 كُور. 15‏:‏25؛ فِيل. 2‏:‏10؛ عبر. 2‏:‏8.

◘١٧:٣ 17:‏3 إِشا. 53‏:‏11؛ إِرْم. 9‏:‏22

◘١٧:٤ 17:‏4 يُوح. 4‏:‏34؛ 13‏:‏32؛ 14‏:‏13؛ 19‏:‏30.

◘١٧:٥ 17:‏5 يُوح. 1‏:‏1، 2؛ 10‏:‏30؛ 14‏:‏9.

◘١٧:٨ 17:‏8 يُوح. 16‏:‏27.

◘١٧:١٠ 17:‏10 يُوح. 16‏:‏15.

◘١٧:١٢ 17:‏12 إِشا. 8‏:‏18؛ يُوح. 6‏:‏39؛ 10‏:‏28؛ 18‏:‏9؛ عبر. 2‏:‏13.

◘١٧:١٤ 17:‏14 يُوح. 15‏:‏19.

◘١٧:١٧ 17:‏17 إِزهد. 119‏:‏142؛ يُوح. 8‏:‏4.

◘١٧:١٨ 17:‏18 يُوح. 20‏:‏21.

◘١٧:١٩ 17:‏19 1 كُور. 1‏:‏2، 30؛ 1 تس. 4‏:‏7.

◘١٧:٢١ 17:‏21 يُوح. 10‏:‏38؛ 14‏:‏11؛ ڭال. 3‏:‏28.

◘١٧:٢٤ 17:‏24 يُوح. 12‏:‏26؛ 14‏:‏3.

◘١٧:٢٥ 17:‏25 يُوح. 15‏:‏21؛ 16‏:‏3، 27؛ 17‏:‏8.