أَذْلِيسْ إِقدّْسنْ أَيُوبْ ٨

ڒْهَارْذْ أَمزْوَارُو ن بِيلْذَاذْ

١ خَاسْ ؤُشَا يَارَّا-د بِيلْذَاذْ، ونِّي د-يُوسِينْ زِي شُوحَا، إِنَّا:

٢ مشْحَاڒْ إِ غَا ثكّذْ ثسَّاوَاڒذْ أَمُّو،

أَذْ إِڒِينْ وَاوَاڒنْ ن ؤُقمُّومْ نّشْ

أَمشْنَاوْ أَسمِّيضْ ن ثْهَارْيَاضْثْ.

٣ مَا أَذْ إِسّْفَارْغْ أَربِّي ثَاسْغَارْثْ،

نِيغْ أَذْ إِسّْفَارْغْ

ؤُمْزمَّارْ خْ كُوڒْشِي ثَاسڭْذَا؟ ◘

٤ مَاڒَا أَكِيذسْ خْضَانْ إِحنْجِيرنْ نّشْ،

أَقَا إِسّكّْ إِ-ثنْ ذڭْ ؤُفُوسْ ن ؤُخطُّو نْسنْ.

٥ مَاڒَا شكْ ثَارزُّوذْ أَربِّي س جّهْذْ،

ثتّْزَاوْڭذْ أَحِينِّي

غَارْ ؤُمْزمَّارْ خْ كُوڒْشِي، ◘

٦ مَاڒَا ثدْجِيذْ ذ أَمزْذَاڭْ ؤُ ثْسڭّْمذْ،

خنِّي أَذْ أَشْ إِوْشَا ثَايْنِيثْ نِيشَانْ،

أَذْ إِعْذڒْ ثَازذِّيغْثْ نّشْ إِ شكْ.

٧ وَاخَّا ثَامزْوَارُوثْ نّشْ

أَذْ ثِيڒِي ذ ثُوقْڒِيتْشْ،

ثَانڭَّارُوثْ نّشْ أَذْ ثِيڒِي ثمْغَارْ أَطَّاسْ.

٨ وَاهْ، سقْسَا خنِّي غَارْ جِّيڒْ إِعْذُونْ،

حكَّارْ ذِي ڒجْذُوذْ نْسنْ. ◘

٩ مَاغَارْ نشِّينْ ن إِضنَّاضْ وَاهَا،

وَارْ نسِّينْ وَالُو،

مَاغَارْ ؤُسَّانْ نّغْ خْ ثمُّورْثْ أَمْ ثِيڒِي. ◘

١٠ مَا وَارْ شكْ سّڒْمِيذنْ نِيثْنِي،

مَا وَارْ غَاركْ سِّيوِيڒنْ،

مَا وَارْ د-سُّوفُّوغنْ أَوَاڒنْ

زڭْ وُوڒْ نْسنْ؟

١١ مَا إِغمِّي ؤُغَانِيمْ ن بَابِيرُوسْ

بْڒَا سّبْخثْ،

مَا إِمقَّارْ ؤُغَانِيمْ غَارْ ثْمَا ن إِغْزَارْ

بْڒَا أَمَانْ؟

١٢ خْمِي إِتّْنوَّارْ، وَارْ إِمْجَارْ عَاذْ،

إِتَّاژغْ قْبڒْ مَارَّا أَرْبِيعْ نّغْنِي. ◘

١٣ أَمُّو إِ دْجَانْ إِمسْرَاقْ

ن مَارَّا إِنِّي إِتُّونْ أَربِّي،

ڒَْايَاسْ ن ؤُمْنَافقْ أَذْ إِفْنَا. ◼ ◘

١٤ مِينْ خفْ إِعمّذْ، أَذْ إِتّْوَاقْضعْ،

مِينْ خفْ إِتّْشَاڒْ،

أَذْ د-إِبَانْ ذ أَخْمَاڒْ ن قُونْذْعَا.

١٥ أَذْ إِسنّذْ خْ ثَادَّارْثْ نّسْ،

مَاشَا وَارْ ثتّْبذِّي،

أَذْ ذَايسْ إِشبَّارْ،

مَاشَا وَارْ ثتّْغِيمِي ثْبدّْ.

١٦ نتَّا ذ أَزِيزَا ذِي ثْفَاوْثْ ن ثْفُوشْثْ،

ڒفْرُوعْ نّسْ إِمژْيَاننْ تّْبزَّاعنْ

خْ وحْوِيشْ نّسْ.

١٧ إِژوْرَانْ نّسْ مُّوذنْ إِخفْ نْسنْ

خْ إِجّْ ن ؤُعُورِّيشْ ن يژْرَا،

إِتَّارْجَا إِشْثْ ن ثَادَّارْثْ ن يژْرَا إِ يِيخفْ نّسْ.

١٨ مَاڒَا نتَّا إِقدْجعْ إِ-ث

زڭْ ومْشَانْ نّسْ،

أَذْ ث إِنْكَارْ ومْشَانْ نِّي، أَذْ يِينِي:

’عمَّارْصْ وَارْ شكْ ژْرِيغْ!‘

١٩ خْزَارْ، ثَا ثدْجَا ذ ڒفْرَاحثْ

ن وبْرِيذْ ن ثُوذَارْثْ نّسْ

ؤُ إِنّغْنِي أَذْغمْينْ زڭْ ؤُشَاڒْ.

٢٠ خْزَارْ، أَربِّي وَارْ إِنطَّارْ

ونِّي إِكمْڒنْ

مَاشَا وَارْ إِتِّيشْ أَفُوسْ إِ إِعفَّاننْ.

٢١ عَاذْ أَذْ إِشُّورْ أَقمُّومْ نّشْ

س ثْضحَّاشْثْ،

ؤُ إِينْشِيشنْ نّشْ س ؤُسْڒِيوْڒوْ.

٢٢ إِمشْرَاهْ نّشْ أَذْ يَارْضنْ ڒفْضِيحثْ

ؤُ أَقِيضُونْ ن إِعفَّاننْ وَارْ إِتِّيڒِي عَاذْ.

◘٨:٣ 8:‏3 أَعَوذ. 32‏:‏4؛ 2 إِم. 19‏:‏7؛ دَان. 9‏:‏14

◘٨:٥ 8:‏5 أَيُوبْ 22‏:‏23

◘٨:٨ 8:‏8 أَعَوذ. 4‏:‏32

◘٨:٩ 8:‏9 أَمز. 47‏:‏9؛ 1 إِم. 29‏:‏15؛ أَيُوبْ 7‏:‏5، 6، 7؛ إِزهد. 39‏:‏13؛ 102‏:‏12؛ 144‏:‏4

◘٨:١٢ 8:‏12 إِزهد. 129‏:‏6؛ إِرْم. 17‏:‏6

◼٨:١٣ 8:‏13 ’أَمْنَافقْ‘ - بْنَاذمْ نِّي إِتّڭّنْ س ثْنَاينْ ن وُوذْمَاونْ.

◘٨:١٣ 8:‏13 أَيُوبْ 11‏:‏20؛ 18‏:‏14؛ إِزهد. 112‏:‏10؛ أَوڒن. 10‏:‏28