أَذْلِيسْ إِقدّْسنْ أَيُوبْ ٢١

٢١

ثَامْوَارِّيثْ ن أَيُوبْ خْ صُوفَارْ: ڒفْڒحْ ن ورْيَازْ أَعفَّانْ

١ خنِّي يَارَّا-د أَيُوبْ، إِنَّا:

٢ سْڒمْ مْلِيحْ إِ وَاوَاڒنْ إِنُو،

حِيمَا أَذْ أَومْ إِڒِينْ إِ ؤُسْفوّجْ.

٣ كْسِيمْ أَيِي، خنِّي أَذْ سِّيوْڒغْ،

ؤُ أَوَارْنِي ڒَْامِي سِّيوْڒغْ،

ثْزمَّارمْ أَذْ ثْعفَّارمْ.

٤ مَا أَشثْشِي إِنُو خْ إِجّْ ن بْنَاذمْ؟

نِيغْ مَايمِّي وَارْ ذ أَيِي د-إِكَّارْ

أَذْ يِيڒِي بُوحْبڒْ إِنُو بْڒَا تَّاسِيعْ ن ڒْْخَاضَارْ؟

٥ قڒْبمْ-د غَارِي ؤُشَا جْعَارمْ،

سَارْسمْ أَفُوسْ خْ ؤُقمُّومْ.

٦ مَاڒَا خمّغْ وَاهَا ذڭْ ؤُيَا، تّْنخْڒِيعغْ

ؤُ ثْمنّعْ ثَارْجِيجِيثْ أَرِّيمثْ إِنُو.

٧ مَايمِّي تّْغِيمَانْ إِعفَّاننْ دَّارنْ،

مَايمِّي دَّاكّْوَاڒنْ إِوسُّورَا،

تّْمَارْنِينْ عَاذْ ذِي جّهْذْ نْسنْ؟ ◘

٨ ثَارْوَا نْسنْ تّْغِيمَانْ بدّنْ

زَّاثْ إِ ؤُغمْبُوبْ نْسنْ، أَقَا أَثنْ غَارْسنْ،

ؤُ إِحنْجِيرنْ إِغدُّوثنْ نْسنْ

زَّاثْ إِ ثِيطَّاوِينْ نْسنْ. ◼

٩ ثُوذْرِينْ نْسنْ أَقَا أَثنْثْ

ذِي ڒهْنَا نْهْڒَا أَنخْڒِيعْ،

أَعْمُوذْ ن أَربِّي وَارْ ثنْ إِشِّيثْ.

١٠ أَفُونَاسْ نّسْ إِتَّارَّا ؤُ وَارْ إِخطِّي،

ثَافُونَاسْثْ نّسْ ثتَّارُو،

عمَّارْصْ وَارْ ثْغطّڒْ أَعذِّيسْ.

١١ تّجَّانْ إِمژْيَاننْ نْسنْ

ڭُّورنْ أَمْ يِيشْثْ ن ثْحِيمَارْثْ،

إِحنْجِيرنْ نْسنْ تّجَّانْ ثنْ نڭّْزنْ.

١٢ نِيثْنِي سّْڭعَّاذنْ ثْمِيجَّا نْسنْ

غَارْ ؤُبنْذِيرْ ذ ڒْْڭَامْبْرِي،

فَارّْحنْ غَارْ ثْمِيجَّا ن ثمْجَا.

١٣ سّْعدُّونْ ؤُسَّانْ نْسنْ ذِي زّْهَارْ،

مَاشَا هكّْوَانْ غَارْ ڒَْاخَارْثْ

ذڭْ ورْمَاشْ ن وَابْڒِيونْ.

١٤ قَّارنْ إِ أَربِّي: ’حيّذْ خَانغْ،

مَاغَارْ وَارْ ذ أَنغْ إِعْجِيبْ

أَذْ نسّنْ إِبْرِيذنْ نّشْ. ◘

١٥ مَانْ ونْ إِدْجَانْ ذ أَمْزمَّارْ خْ كُوڒْشِي

مَاحنْذْ أَذْ أَسْ نْسخَّارْ؟

مَانْ لْفَايْذَا إِ غَارْنغْ

مَاڒَا نْزِييَّارْ خَاسْ س ثْژَادْجِيثْ نّغْ؟‘ ◘

١٦ خْزَارْ، زّْهَارْ نْسنْ وَارْ إِدْجِي ذڭْ ؤُفُوسْ نْسنْ.

شّْوَارْ ن إِعفَّاننْ إِڭّْوجْ خَافِي. ◘

١٧ مشْحَاڒْ ن ثْوَاڒَاوِينْ

ثْخسِّي خنِّي إِ إِعفَّاننْ ثْفَاوْثْ نْسنْ،

ؤُشَا إِڒقّفْ إِ-ثنْ ؤُضيّعْ،

مشْحَاڒْ ن ثْوَاڒَاوِينْ إِبطَّا نتَّا

خَاسنْ ڒحْڒِيقْ ذڭْ وغْضَابْ نّسْ، ◘

١٨ أَڒَامِي إِ غَا ذوْڒنْ

أَمْ ؤُڒُومْ زَّاثْ إِ ؤُسمِّيضْ،

أَمْ إِغدْجْ ثخْضفْ إِ-ث ثْحَارْيَاضْثْ؟

١٩ مَا ثقَّارمْ: ’أَربِّي إِتّْخمّڒْ لْعِيقَابْ

إِ ڒْْمُوعْصِييّثْ نّسْ إِ إِحنْجِيرنْ نّسْ!‘

أجّْ إِ-ث أَذْ أَسْ ت إِخدْجصْ

أَڒْ غَا يَاشَا نتَّا سِيمَانْثْ نّسْ!

٢٠ أجّْ ثِيطَّاوِينْ نّسْ

أَذْ ژَترنْثْ أَهلّكْ نّسْ،

أجّْ إِ-ث أَذْ إِسُو س يِيخفْ نّشْ

زڭْ وسْعَارْ ن ؤُمْزمَّارْ خْ كُوڒْشِي.

٢١ مَاغَارْ مَامّشْ إِ غَا يَارْضَا عَاذْ

ذِي أَيْثْبَابْ ن ثَادَّارْثْ نّسْ

أَوَارْنِي إِ ڒْْموْثْ نّسْ،

مَاڒَا ثتّْوَاڭّْ عَاذْ قدَّا ن إِيُورنْ نّسْ؟ ◼

٢٢ مَا زمَّارنْ أَذْ سّْڒمْذنْ

ثُوسّْنَا إِ أَربِّي،

ونِّي إِحكّْمنْ

خْ يِينِّي إِدْجَانْ ذڭْ ؤُجنَّا يُوعْڒَانْ؟ ◘

٢٣ أَقَا ذِينْ إِجّنْ إِمُّوثْ ذِي زّْهَارْ إِمُونْ،

أَمْ إِدَّارْ عَاذْ قَاعْ ذِي ڒهْنَا ؤُ ذِي ڒْْهُوذْنثْ.

٢٤ أَمْعمَّارنْ ڒمْذَاوذْ نّسْ س ؤُغِي

ؤُ إِتّْوَابزّڭْ وَاذُوفْ ن يغْسَانْ نّسْ.

٢٥ ونّغْنِي إِمُّوثْ س ڒعْمَارْ ذ أَمَارْزَاڭْ،

وَارْ د-يِيوِي ڒِْيقِّي إِ وَالُو ن ڒْْخَارْ.

٢٦ مُوننْ زّْڒنْ نِيثْنِي ذڭْ ؤُشَاڒْ

ؤُ إِكشَّاونْ ذْڒِينْ ثنْ. ◘

٢٧ خْزَارْ، سّْنغْ إِخَارِّيصنْ نْومْ،

ؤُڒَا ذ ثِيمعْمَاتْشْ نِّي زِي ذ أَيِي ثْذڒْممْ،

٢٨ خْمِي ثقَّارمْ:

’مَانِي ثدْجَا ثَادَّارْثْ ن ؤُمْشنّعْ

إِتّْمژْرِينْ ذِي صُّولْطَا،

مَانِي ثدْجَا ثْقِيضُونْثْ س ثْزذِّيغِينْ،

ثَازذِّيغْثْ ن ؤُعفَّانْ؟‘

٢٩ مَاعمَّارْصْ وَارْ ثسّقْسِيمْ إِمْسبْرِيذنْ؟

أَقَا إِشيَّارنْ نْسنْ إِتّْقَارَّانْ

وَارْ ثْزمَّارمْ أَذْ ثنْ ثنْكَارمْ:

٣٠ مَاغَارْ أَعفَّانْ أَذْ إِتّْوَاحْضَا

ذڭْ وَاسّْ ن أَرْژِييّثْ،

ذڭْ وَاسّْ ن ؤُذُوقّزْ ن ؤُفُوڭمْ

أَذْ تّْوَاوْينْ نِيثْنِي ذِي ڒَْامَانْ. ◘

٣١ مَانْ ونْ إِ ث غَا إِسّشْننْ أَبْرِيذْ نّسْ

ذڭْ ؤُغمْبُوبْ نّسْ؟

مَاڒَا إِڭَّا شَا ن ثُوعفّْنَا،

وِي ث إِ غَا إِخدْجْصنْ؟

٣٢ نتَّا مَاشَا أَذْ إِتّْوَاكْسِي

غَارْ ونْضڒْ نّسْ ذ أَمقّْرَانْ

ؤُ غَارْ ثوْرِيرْثْ ن ونْضڒْ نّسْ

إِتّْعسّْ نتَّا س يِيخفْ نّسْ.

٣٣ تّْعجِيبنْ أَسْ إِبُورْسَا ن ثغْزُورْثْ،

ضفَّارنْ ث مَارَّا إِوْذَانْ

ؤُ إِنِّي ذ أَسْ إِتِّيزْوَارنْ،

وَارْ زمَّارنْ أَذْ ثنْ حسْبنْ.

٣٤ مَامّشْ ثخْسمْ أَذْ أَيِي ثْعزَّامْ

س وَاوَاڒنْ إِخْوَانْ؟

زِي ثمْوَارِّيثْ نْومْ وَارْ إِتّْغِيمِي وَالُو

مْغِيرْ ڒغْضَارْ وَاهَا.

◘٢١:٧ 21:‏7 إِزهد. 17‏:‏10؛ 73‏:‏12؛ إِرْم. 12‏:‏1؛ حَاب. 1‏:‏16

◼٢١:٨ 21:‏8 ’أَرَا‘ - س ثْعِيبْرَانِيثْ ’زَّارِيعثْ‘.

◘٢١:١٤ 21:‏14 أَيُوبْ 22‏:‏17

◘٢١:١٥ 21:‏15 ؤُف. 5‏:‏2؛ مـَال. 3‏:‏14

◘٢١:١٦ 21:‏16 أَيُوبْ 22‏:‏18

◘٢١:١٧ 21:‏17 أَيُوبْ 20‏:‏29؛ إِزهد. 11‏:‏6، 7

◼٢١:٢١ 21:‏21 ’أَوَارْنِي إِ ڒْموْثْ نّسْ‘ - س ثْعِيبْرَانِيثْ ’أَوَارْنِي أَسْ‘.

◘٢١:٢٢ 21:‏22 إِشا. 40‏:‏13؛ رُوم. 11‏:‏34؛ 1 كُور. 2‏:‏16

◘٢١:٢٦ 21:‏26 أَيُوبْ 17‏:‏14

◘٢١:٣٠ 21:‏30 أَوڒن. 16‏:‏4