أَذْلِيسْ إِقدّْسنْ أَيُوبْ ٣٧

٣٧

أَكمّڒْ ن ڒْْهَارْذْ وِيسّْ أَربْعَا ن إِلِيهُو: ڒمْغَارثْ ن أَربِّي ذِي طَّابِيعَا

١ وَاهْ، س ؤُيَا إِتَّارْجِيجْ وُوڒْ إِنُو،

إِنطُّو زڭْ ومْشَانْ نّسْ.

٢ سْڒمْ مْلِيحْ إِ زّْهِيرْ ن ثْمِيجَّا نّسْ،

إِ وجْذَابْ ن وَاجَّاجْ إِ د-إِتّكّنْ

زڭْ ؤُقمُّومْ نّسْ. ◘

٣ إِسّكّْ إِ-ث سَاذُو مَارَّا أَجنَّا،

ؤُشَا إِسّكّْ ثَافَاوْثْ نّسْ

أَڒْ إِنڭُّورَا ن ثمُّورْثْ.

٤ أَوَارْنِي أَسْ إِزهَّارْ س ثْمِيجَّا إِجهْذنْ،

إِهمْهمْ س ثْمِيجَّا ن لْعَاضَامَا نّسْ

ؤُ وَارْ إِمنّعْ أَسَّامنْ،

مَاڒَا ثتّْوَاسڒْ ثْمِيجَّا نّسْ.

٥ أَربِّي إِدَّارْذِيحْ س ثْمِيجَّا نّسْ

س ثبْرِيذْثْ ن ڒعْجبْ،

إِتّڭّْ ڒحْوَايجْ ثِيمقّْرَانِينْ،

نشِّينْ وَارْ أَسنْثْ نْفهّمْ. ◘

٦ مَاغَارْ إِقَّارْ إِ وذْفڒْ:

’وْضَا غَارْ ثمُّورْثْ!‘،

ؤُشَا خنِّي أَذْ د-يَاسْ ونْژَارْ،

أَنْژَارْ إِشَّاثنْ س إِغزْرَانْ نّسْ إِجهْذنْ. ◘

٧ نتَّا إِتّْشمّعْ أَفُوسْ ن مْكُوڒْ بْنَاذمْ،

حِيمَا مَارَّا إِوْذَانْ أَذْ سّْننْ،

أَقَا ذ ڒخْذَايمْ نّسْ.

٨ ڒوْحُوشْ تّْنُوفَّارنْ ذِي ڒمْرَاڭحْ

ؤُ تّْغِيمَانْ ذڭْ إِفْرَانْ نْسنْ.

٩ ثتَّاسْ-د ثْحَارْيَاضْثْ زْ

أڭْ وخَّامْ نّسْ ن ذَاخڒْ

ؤُ أَكْ-ذ ؤُسمِّيضْ ن شَّامَالْ

ثتَّاسْ-د ؤُڒَا ذ ثسْمضْ.

١٠ س ؤُسُوضِي ن نّفْسْ نّسْ

إِتَّاوِي-د أَربِّي أَجْرِيسْ،

جمْذنْ وَاطَّاسْ ن وَامَانْ. ◘

١١ وَاهْ، إِتّْعمَّارْ إِسيْنُوثنْ س ثُوفّثْ،

إِتّْبزّعْ أَسيْنُو ن ثْفَاوْثْ نّسْ.

١٢ وَانِيثَا إِتّْرَاحْ إِتَّاسْ-د،

مَامّشْ ث إِندّهْ نتَّا،

حِيمَا أَذْ ڭّنْ مَارَّا

مِينْ إِ ذ أَسنْ يُومُورْ

خْ وُوذمْ ن ثمُّورْثْ، خْ ثمُّورْثْ.

١٣ أَذْ ثَافْ أَذْ ث ثْژَارذْ أَمْ يِيجّْ ن وعْمُوذْ،

نِيغْ أَمْ إِ ڒفْضڒْ ن ثمُّورْثْ،

نِيغْ أَمْ وسْشَانْ ن ثْمخْسَا إِشُووَّارنْ. ◘

١٤ أوْشْ أَمزُّوغْ إِ مَانْ أَيَا، أَ أَيُوبْ،

بدّْ، سْقَارْ، ؤُ حْضَا خْ ڒعْجَايبْ ن أَربِّي.

١٥ مَا ثسّْنذْ

مَامّشْ إِ خَاسنْ إِضبَّارْ أَربِّي،

مَامّشْ إِسّْرُوغَا ثْفَاوْثْ ن ؤُسيْنُو نّسْ؟

١٦ مَا ثسّْنذْ

مَامّشْ تّحْرَارَانْ إِسيْنُوثنْ،

مَا ثسّْنذْ ڒعْجَايبْ

ن ونِّي غَارْ ثدْجَا ثُوسّْنَا ثْمُونْ.

١٧ شكْ، ونِّي ؤُمِي إِحمَّا وَارُّوضْ،

مَاڒَا نتَّا إِسَّارْسَا ثَامُّورْثْ

س أَرِّيحْ ن لْجَانُوبْ،

١٨ مَا ثْبزّْعذْ أَكِيذسْ ڒْْقُوبّثْ ن ؤُجنَّا،

ثنِّي ذِينْ إِبدّنْ

أَمْ يِيشْثْ ن ثِيسِيثْ إِفسْينْ؟ ◘

١٩ سَارْڭبْ أَنغْ شكْ مِينْ إِ ذ أَسْ غَا نِينِي،

مَاغَارْ نشِّينْ وَارْ نْزمَّارْ

أَذْ نْفسَّارْ وَالُو مْلِيحْ زَّاثسْ

زِي سِّيبّثْ ن ثَادْجسْثْ.

٢٠ مَا أَذْ أَسْ هَاجَانْ، أَقَا سِّيوْڒغْ أَمُّو؟

مَاڒَا شَا ن يِيجّنْ أَذْ ت يِينِي،

أَذْ إِتّْوَاصَارْضْ نِيشَانْ. ◼

٢١ ڒخُّو وَارْ إِتّْوِيڒِي بْنَاذمْ ثَافَاوْثْ،

ثنِّي يَارقّنْ ذڭْ إِسيْنُوثنْ،

مَاشَا مَاڒَا إِعْذُو ؤُسُوضِي ن ؤُسمِّيضْ،

أَقَا إِفَارّضْ إِ-ثنْ.

٢٢ زِي شَّامَالْ إِتَّاسْ-د وُورغْ،

ثِيسِّيقْثْ إِسَّاڭّْوَاذنْ ثَارْسَا خْ أَربِّي.

٢٣ أَمْزمَّارْ خْ كُوڒْشِي،

ونِّي وَارْ نْزمَّارْ أَذْ ث نَافْ،

ونِّي ذ أَمقّْرَانْ ذِي جّهْذْ،

نتَّا وَارْ إِتّْذدْجِي ڒْْحقّْ

ذ ثْسڭْذَا إِفيّْضنْ. ◘

٢٤ س ؤُيَا تّڭّْوذنْ زَّايسْ إِوْذَانْ،

نتَّا وَارْ إِخزَّارْ

غَارْ يِينِّي إِحسّْبنْ إِخفْ نْسنْ ذ إِمِيغِيسنْ.

◘٣٧:٢ 37:‏2 إِزهد. 29‏:‏3

◘٣٧:٥ 37:‏5 أَيُوبْ 5‏:‏9؛ 9‏:‏10؛ 36‏:‏26

◘٣٧:٦ 37:‏6 إِزهد. 147‏:‏16

◘٣٧:١٠ 37:‏10 أَيُوبْ 38‏:‏29، 30؛ إِزهد. 147‏:‏17، 18

◘٣٧:١٣ 37:‏13 ؤُف. 9‏:‏18، 23؛ 1 صم. 12‏:‏18، 19؛ عِز. 10‏:‏9؛ أَيُوبْ 36‏:‏31

◘٣٧:١٨ 37:‏18 أَمز. 1‏:‏6

◼٣٧:٢٠ 37:‏20 ’أَذْ إِتّْوَاصَارْذْ نِيشَانْ‘ - إِخْسْ أَذْ يِينِي س لْغَاضَابْ ن سِيذِي.

◘٣٧:٢٣ 37:‏23 أَيُوبْ 9‏:‏4؛ 12‏:‏13، 16؛ 36‏:‏5؛ إِزهد. 99‏:‏4