١ ”مَاغَارْ، خْزَارْ، ذڭْ وُوسَّانْ نِّي ؤُ ذِي ڒْْوقْثْ نِّي، خْمِي غَا سّنْقڒْبغْ ثَامحْبَاسْثْ ن يَاهُوذَا ذ ؤُرْشَالِيمْ، ٢ أَذْ سّْمُونغْ مَارَّا ڒڭْنُوسْ، أَذْ ثنْ نذْهغْ غَارْ ثغْزُورْثْ ن يَاهُوشَافَاطْ. ذِينِّي أَذْ أَكِيذْسنْ مْشَارَّاعغْ مِينْزِي نِيثْنِي زُوزَّارنْ ڒْْڭنْسْ إِنُو ذ ثسْغَارْثْ إِنُو جَارْ ڒڭْنُوسْ ؤُ مِينْزِي نِيثْنِي بْضَانْ ثَامُّورْثْ إِنُو. ٣ نِيثْنِي ڭِّينْ ثَاقدُّوحْثْ خْ ڒْْڭنْسْ إِنُو ؤُ وْشِينْ إِجّْ ن وحْرَامْ ذ تّخْڒِيصثْ إِ ثمْغَارْثْ ن فَارْقْ-شّْغڒْ ؤُ إِشْثْ ن ثحْرَامْثْ ثمّنْزْ إِ بِينُو، حِيمَا نِيثْنِي زمَّارنْ أَذْ سْونْ.

٤ ؤُ عَاوذْ، مِينْ غَارْومْ أَكِيذِي، صُورْ ذ صِيذُونْ ذ مَارَّا جّْوَايهْ ن فِيلِيشِيثْ. مَا ثخْسمْ أَذْ أَيِي ثْخدْجْصمْ مِينْ ڭِّيغْ؟ مَاڒَا ثخْسمْ أَذْ أَيِي ثْخدْجْصمْ، نشّْ أَذْ سّْعقْبغْ ذغْيَا ؤُ س ثَازْڒَا مِينْ ثڭِّيمْ خْ إِزدْجِيفنْ نْومْ، ٥ مِينْزِي كنِّيوْ ثكّْسِيمْ نُّوقَارْثْ ذ وُورغْ إِنُو ؤُ مِينْزِي كنِّيوْ ثِيوْيمْ ڒقْشُوعْ إِنُو يِيغْڒَانْ غَارْ ثْزَاوِييِّينْ نْومْ. ٦ كنِّيوْ ثزّنْزمْ إِحنْجِيرنْ ن يَاهُوذَا ذ إِحنْجِيرنْ ن ؤُرْشَالِيمْ إِ إِحنْجِيرنْ ن يَاوَانْ، حِيمَا أَذْ ثنْ ثسِّيڭّْوجمْ خْ ثمُّورْثْ نْسنْ. ٧ خْزَارْ، نشّْ أَذْ ثنْ سّكَّارغْ زڭْ ومْشَانْ مَانِي ثنْ ثزّنْزمْ ؤُ أَذْ سّْعقْبغْ مِينْ ثڭِّيمْ خْ إِزدْجِيفنْ نْومْ. ٨ أَذْ زّنْزغْ إِحنْجِيرنْ نْومْ ذ يسِّيثْومْ ذڭْ ؤُفُوسْ ن إِحنْجِيرنْ ن يَاهُوذَا ؤُ يِينَا أَذْ ثنْ زّنْزنْ إِ إِسَابَائِيّنْ، إِجّْ ن ڒْْڭنْسْ إِڭّْوجْ أَطَّاسْ، مَاغَارْ سِيذِي أَقَا إِسِّيوڒْ.“

٩ ”ڒَْاغَامْ أَيَا جَارْ ڒڭْنُوسْ، قدّْسمْ أَمنْغِي، سكَّارمْ أَيْثْ ن بُو-ثغْرُوضْثْ، جّمْ مَارَّا إِعسْكَارِييّنْ أَذْ د-قَارّْبنْ، أَذْ ڭعّْذنْ إِ ؤُمنْغِي. ١٠ حدّمْ دُّوزَانْ نْومْ ذ ڒسْيُوفْ ؤُڒَا ذ ڒمْوَاسْ نْومْ ن وزْبَارْ أَڒْ غَا ذوْڒنْ ذ فْڒِيثْشَاثْ، أجّْ ونِّي إِضعْفنْ أَذْ يِينِي: ’نشّْ ذ بُو-ثغْرُوضْثْ!‘ ١١ أَزّْڒمْ ؤُ ثَاسمْ-د، أَ مَارَّا ڒڭْنُوسْ إِ د-إِنّْضنْ. سْندّهْ غَارْ ذِينِّي، أَ سِيذِي، أَيْثْ نّشْ ن بُو-ثغْرُوضْثْ! ١٢ جّمْ ڒڭْنُوسْ أَذْ كَّارنْ أَذْ ڭعّْذنْ غَارْ ثغْزُورْثْ ن يَاهُوشَافَاطْ. مَاغَارْ ذِينِّي أَذْ قِّيمغْ نشّْ حِيمَا أَذْ شَارّْعغْ مَارَّا ڒڭْنُوسْ إِ-د-إِنّْضنْ. ١٣ ڭّمْ أَمْجَارْ ذَايسْ، مَاغَارْ صَّابثْ ثنّْڭْوَا، أَسمْ-د، هْوَامْ، مِينْزِي ثَاسِيرْثْ ن ؤُضِيڒْ ثشُّورْ ؤُ صّْوَارجْ ن ثْسِيرْثْ فيّْضنْ، مَاغَارْ ثَاعفَّانْثْ نْسنْ ذ ثَامقّْرَانْثْ.“ ◘4:‏13 أَسَا. 14‏:‏15

١٤ ”إِبَارُّوثنْ، إِبَارُّوثنْ ذِي ثغْزُورْثْ ن ثڒْوِيحْثْ إِتّحْرُودْجُوضنْ ن ؤُسَارْوثْ، مَاغَارْ أَسّْ ن سِيذِي يُوذسْ، ذِي ثغْزُورْثْ ن ثڒْوِيحْثْ إِتّحْرُودْجُوضنْ إِ ؤُسَارْوثْ. ١٥ ثَافُوشْثْ ذ ثْزِيرِي بَّارْشْننْثْ، إِثْرَانْ أَرِّينْ ثَافَاوْثْ نْسنْ. ◘4:‏15 يُووِ. 2‏:‏10؛ 3‏:‏4. ١٦ سِيذِي أَذْ إِزهَّارْ زِي صِيهْيُونْ ؤُ أَذْ يَارّْ ثْمِيجَّا نّسْ أَذْ إِتّْوَاسڒْ زِي ؤُرْشَالِيمْ أَڒَامِي إِجنْوَانْ ذ ثمُّورْثْ أَذْ أَرْجِيجنْ، مَاشَا سِيذِي ذ أَذُورِّي إِ ڒْڭنْسْ نّسْ ذ لْبُورْجْ إِ أَيْثْ ن إِسْرَائِيل.“

١٧ ”أَذْ ثسّْنمْ، أَقَا نشّْ ذ سِيذِي، أَربِّي نْومْ، ونِّي إِزدّْغنْ خْ صِيهْيُونْ، أَذْرَارْ إِنُو إِقدّْسنْ ؤُ ثَانْذِينْثْ ن ؤُرْشَالِيمْ أَذْ ثِيڒِي ثْقدّسْ.عمَّارْصْ أَذْ ت شُوقنْ عَاذْ إِبَارَّانِييّنْ.“ ◘4:‏17 أَسَا. 21‏:‏27

١٨ ”ذڭْ وَاسّْ نِّي أَذْ إِمْسَارْ أَقَا إِذُورَارْ أَذْ ؤُذْمنْ س بِينُو ژمّنْ ث جْذِيذْ ؤُ ثِيوْرِيرِينْ أَذْ سّفْينْثْ س ؤُغِي ذ مَارَّا ثِيغزْرَاثِينْ ن يَاهُوذَا أَذْ ذَايْسنْ تَّازّْڒنْ وَامَانْ ؤُ يِيشْثْ ن ثَاڒَا أَذْ ثدُّوقّزْ ذِي ثَادَّارْثْ ن سِيذِي، أَذْ ثْفيّضْ ثغْزُورْثْ ن شِيطِّيمْ. ◘4:‏18 عَام. 9‏:‏13 ١٩ مِيصْرَا أَذْ ثذْوڒْ ذ إِشْثْ ن ثمُّورْثْ إِتّْوَاردّْدْجنْ ؤُ إِذُومْ ذ إِشْثْ ن ثمُّورْثْ إِخْڒَانْ زِي سِّيبّثْ ن لْعُونْفْ إِ ڭِّينْ ضِيدّْ إِ أَيْثْ ن يَاهُوذَا نِّي زِي سِّيزّْڒنْ نِيثْنِي إِذَامّنْ إِمزْذَاڭنْ ذِي ثمُّورْثْ نْسنْ. ٢٠ ثَامُّورْثْ ن يَاهُوذَا مَاشَا أَذْ ثقِّيمْ إِ ڒبْذَا ؤُ ؤُرْشَالِيمْ زِي جِّيڒْ أَڒْ جِّيڒْ. ٢١ نشّْ أَذْ حسْبغْ إِذَامّنْ نْسنْ، إِنِّي ثْيْغَا حسَّابغْ وَارْ إِزْذِيڭنْ، ذ إِمزْذَاڭنْ.

ؤُشَا سِيذِي أَذْ إِزْذغْ ذِي صِيهْيُونْ.“