١ إِمْسَارْ ؤُمِي عْذُونْ أَطَّاسْ ن وُوسَّانْ أَوَارْنِي ؤُمِي سِيذِي ثُوغَا إِڭَّا إِ إِسْرَائِيل ڒْْهُوذْنثْ زِي مَارَّا ڒْْعذْيَانْ نّسْ إِ ذ أَسْ د-إِنّْضنْ ؤُ ؤُمِي ثُوغَا يَاشُووَا إِوْسَارْ، إِمْغَارْ ذڭْ وُوسَّانْ، ٢ أَقَا إِڒَاغَا يَاشُووَا إِ مَارَّا إِسْرَائِيل، إِمْغَارنْ نّسْ ذ إِزدْجِيفنْ نّسْ ذ ڒْْقُوضَاثْ نّسْ ذ إِمحْضَاينْ نّسْ، إِنَّا أَسنْ: ”نشّْ وْسَارغْ ؤُ مْغَارغْ ذڭْ وُوسَّانْ ٣ ؤُشَا كنِّيوْ ثژْرِيمْ مَارَّا مِينْ إِڭَّا سِيذِي، أَربِّي نْومْ، أَكْ-ذ مَارَّا ڒڭْنُوسْ-أَ زَّاثْ إِ ثِيطَّاوِينْ نْومْ، مَاغَارْ سِيذِي، أَربِّي نْومْ سِيمَانْثْ نّسْ، ذ ونِّي ثُوغَا إِمّنْغنْ ذِي طّْوعْ نْومْ. ٤ خْزَارْ نشّْ بْضِيغْ أَومْ ڒڭْنُوسْ-أَ إِ إِقِّيمنْ جَارْ أَومْ س ثْقدُّوحْثْ، أَمْ ثسْغَارْثْ ن ڒْْوَارْثْ إِ ثْقبَّاڒْ نْومْ، أَكْ-ذ مَارَّا ڒڭْنُوسْ إِ ثحِّيغْ زِي لْ-ؤُرْذُونْ أَڒْ ڒبْحَارْ أَمقّْرَانْ مَانِي ثْغدْجِي ثْفُوشْثْ. ٥ سِيذِي، أَربِّي نْومْ، أَذْ خَاسنْ إِبَارّزْ زَّاثْ إِ وُوذمْ نْومْ ؤُ أَذْ خَاسنْ يَاژّڒْ زَّاثْ إِ وُوذمْ نْومْ زِي ڒْْوَارْثْ نْسنْ ؤُ كنِّيوْ أَذْ ثطّْفمْ ثَامُّورْثْ نْسنْ ذ ڒْْوَارْثْ، أَمْ مَامّشْ إِ ذ أَومْ إِسِّيوڒْ سِيذِي، أَربِّي نْومْ. ◘23:‏5 ؤُف. 14‏:‏14؛ 23‏:‏27؛ ڒخْڒ. 33‏:‏53؛ أَعَوذ. 6‏:‏19؛ ياش. 13‏:‏6 ٦ حْضَامْ أَطَّاسْ س جّهْذْ ؤُ ڭّمْ مَارَّا مِينْ يُورِينْ ذڭْ وذْلِيسْ-أَ إِتّْوَانّْضنْ ن شَّارِيعَا ن مُوسَا، حِيمَا وَارْ خَاسْ ثْحيِّيذمْ ؤُڒَا غَارْ يفُوسْ ؤُڒَا غَارْ ؤُزڒْمَاضْ، ◘23:‏6 أَعَوذ. 5‏:‏32؛ 28‏:‏14 ٧ حِيمَا كنِّيوْ وَارْ تّْصُورَامْ إِخفْ نْومْ أَكْ-ذ ڒڭْنُوسْ-أَ إِنِّي عَاذْ إِقِّيمنْ غَارْومْ، ؤُ وَارْ تّْفكَّارمْ عَاذْ ذڭْ يِيسمْ ن إِربِّيثنْ نْسنْ ؤُ وَارْ خَاسنْ تّْجَادْجَامْ ؤُ حِيمَا كنِّيوْ وَارْ ذ أَسنْ ثْعبّْذمْ ؤُ وَارْ ذ أَسنْ ثتّْبنْذْقمْ. ◘23:‏7 ؤُف. 23‏:‏13؛ إِزهد. 16‏:‏4؛ إِرْم. 5‏:‏7؛ صَاف. 1‏:‏5؛ أَفا. 5‏:‏3 ٨ مَاغَارْ إِتّْخصَّا أَذْ ثْڒصْقمْ إِ سِيذِي، أَربِّي نْومْ، أَمْ مَامّشْ إِ ث ثڭِّيمْ أَڒْ أَسّْ-أَ. ◘23:‏8 أَعَوذ. 11‏:‏22 ٩ سِيذِي يُوژّڒْ خْ ڒڭْنُوسْ مْغَارنْ ؤُ جّهْذنْ زَّاثْ إِ وُوذمْ نْومْ. ؤُ خَاومْ كنِّيوْ، أَڒْ أَسّْ-أَ وَارْ ذِينْ حذْ إِ إِزمَّارنْ أَذْ إِبدّْ زَّاثْ إِ وُوذمْ نْومْ. ١٠ إِجّْ ن ورْيَازْ زَّايْومْ إِزمَّارْ أَذْ يَاژّڒْ خْ وَاڒفْ ن يرْيَازنْ، مِينْزِي سِيذِي، أَربِّي نْومْ سِيمَانْثْ نّسْ، ذ ونِّي إِتّْمنْغَانْ ذِي طّْوعْ نْومْ، أَمْ مَامّشْ ثُوغَا أَكِيذْومْ إِسِّيوڒْ. ◘23:‏10 لَاوِي 26‏:‏8؛ أَعَوذ. 32‏:‏30 ١١ حْضَامْ خنِّي أَڒْ طَّارْفْ خْ ڒعْمُورْ نْومْ حِيمَا أَذْ ثخْسمْ سِيذِي، أَربِّي نْومْ. ١٢ مِينْزِي مَاڒَا كنِّيوْ ثْحيّْذمْ خَاسْ ؤُڒَا ذ إِشْثْ ن جُّورّثْ وَاهَا، ؤُشَا أَذْ ثْڒصْقمْ إِ مِينْ كِيذْومْ إِقِّيمنْ عَاذْ ن ڒڭْنُوسْ، إِ يِينِّي كِيومْ إِقِّيمنْ، ؤُشَا أَذْ ثْذوْڒمْ ذ إِضڭّْوَاڒنْ ؤُ أَذْ غَارْسنْ ثَاذْفمْ ؤُ نِيثْنِي أَمْ نّغْنِي، ١٣ خنِّي أَذْ ثسّْنمْ نِيشَانْ، أَقَا سِيذِي، أَربِّي نْومْ، وَارْ إِتِّيژّڒْ عَاذْ خْ ڒڭْنُوسْ-أَ زَّاثْ إِ وُوذمْ نْومْ. نِيثْنِي أَذْ ذوْڒنْ ذ ڒْْفخْ ذ ثْرَاشَّا إِ كنِّيوْ، ذ ثِييِّيثَا س ؤُركُّوضْ خْ إِغزْذِيسنْ نْومْ ذ إِسنَّاننْ إِ ثِيطَّاوِينْ نْومْ، أَڒْ غَا ثتّْوَاثحَّامْ زِي ثمُّورْثْ ثَاصبْحَانْثْ إِ ذ أَومْ إِوْشَا سِيذِي، أَربِّي نْومْ. ١٤ خْزَارْ، أَسّْ-أَ نشّْ سِيمَانْثْ إِنُو أَذْ ؤُيُورغْ أَبْرِيذْ ن مَارَّا ثَامُّورْثْ ؤُ كنِّيوْ أَذْ ثسّْنمْ س مَارَّا ؤُڒْ نْومْ ؤُ س مَارَّا ڒعْمَارْ نْومْ، أَقَا ؤُڒَا ذ إِجّْ ن وَاوَاڒْ زِي مَارَّا أَوَاڒنْ إِ خَاومْ إِنَّا سِيذِي، أَربِّي نْومْ، وَارْ د-إِفِّيغْ. مَارَّا فّْغنْ-د خَاومْ، ؤُڒَا ذ إِجّْ ن وَاوَاڒْ وَارْ إِقِّيمْ وَارْ د-إِفِّيغْ. ١٥ ؤُشَا أَذْ إِمْسَارْ، أَمْ مَامّشْ خَاومْ د-يُوسَا مَارَّا أَوَاڒْ إِشْنَانْ إِ كِيذْومْ إِسِّيوڒْ سِيذِي، أَربِّي نْومْ، أَمُّو إِ خَاومْ إِ غَا إِسّقْفڒْ سِيذِي ؤُڒَا ذ كُوڒْ أَوَاڒْ إِعفّْننْ أَڒْ نتَّا كنِّيوْ إِثحَّا زِي ثمُّورْثْ-أَ ثَاصبْحَانْثْ إِ ذ أَومْ إِوْشَا سِيذِي، أَربِّي نْومْ. ١٦ مَاڒَا كنِّيوْ ثْعدَّامْ خْ ڒْْعَاهْذْ ن سِيذِي، أَربِّي نْومْ، ڒْْعَاهْذْ نِّي خْ ذ أَومْ يُومُورْ نتَّا ؤُشَا كنِّيوْ أَذْ ثُويُورمْ أَذْ ثْعبْذمْ إِ إِربِّيثنْ نّغْنِي ؤُشَا أَذْ أَسنْ ثُوضَارمْ، خنِّي أَذْ خَاومْ يَارغْ وغْضَابْ ن سِيذِي ؤُشَا كنِّيوْ أَذْ ثتّْوَاثحَّامْ ذغْيَا زِي ثمُّورْثْ ثَاصبْحَانْثْ إِ ذ أَومْ إِوْشَا نتَّا.