إِزْڒَانْ س إِڭجْذُورنْ
1
إِزْڒِي أَمزْوَارُو - خْ ؤُرْشَالِيمْ
1 أَلِيفْ. مَامّشْ ثقِّيمْ ذِيهَا
ثنْذِينْثْ وحّْذسْ!
ثُوغَا ڒبْذَا ثشُّورْ س ڒْغَاشِي،
ثذْوڒْ أَمْ يِيشْثْ ن ثَاجَّاتْشْ،
ثُوغَا-ت ذ ثَامقّْرَانْثْ جَارْ ڒڭْنُوسْ،
إِدْجِيسْ ن ؤُجدْجِيذْ جَارْ لْعَامَالَاثْ،
ثذْوڒْ غَارْ ثسْمُوغِي.
2 بِيثْ. ثتّْرُو إِمطَّاونْ إِمرْزَاڭنْ س دْجِيڒثْ،
إِمطَّاونْ نّسْ خْ إِمڭِّيزنْ نّسْ.
وَارْ غَارسْ وِي ت غَا إِعزَّانْ
زِي مَارَّا إِنِّي ت إِتّخْسنْ،
مَارَّا إِمدُّوكَّاڒْ نّسْ غْذَارنْ-ت،
ذوْڒنْ أَسْ ذ ڒْعذْيَانْ. ◘1:2 إِزهد. 6:7
3 ڭِيملْ. ثتّْوَاحبّسْ ثمُّورْثْ ن يَاهُوذَا زِي سِّيبّثْ ن ڒغْبنْ،
ؤُ زِي سِّيبّثْ ن ڒْقدّْ
ن ثْخمَّاسْثْ نّسْ إِقسْحنْ.
ثتّْغِيمَا جَارْ ڒڭْنُوسْ، وَارْ ثُوفِي أَرَّاحثْ،
مَارَّا إِنِّي ت إِضَافَّارنْ حَارّْثنْ خَاسْ
ذِي ڒْوسْطْ ن ڒحْصَارَاثْ نّسْ.
4 ذَالِيثْ. إِبْرِيذنْ غَارْ صِيهْيُونْ شضْننْ،
مِينْزِي ؤُڒَا ذ إِجّْ وَارْ إِڭُّورْ عَاذْ غَارْ ڒْعِيذْ.
مَارَّا ثِيوُّورَا نّسْ خْڒَانْثْ،
إِكهَّاننْ نّسْ زهَّارنْ،
ثِيعْزَارِييِّينْ نّسْ شضْننْثْ،
ؤُشَا نتَّاثْ سِيمَانْثْ نّسْ ثشُّورْ س ثَارْزُوڭِي.
5 هِي. إِغْرِيمنْ نّسْ ذوْڒنْ حكّْمنْ خَاسْ،
ڒْعذْيَانْ نّسْ فَارّْحنْ،
مَاغَارْ سِيذِي إِسّشْضنْ إِ-ت
زِي سِّيبّثْ ن ڒْقدّْ ن ڒْمُوعْصِييّثْ نّسْ.
إِحنْجِيرنْ نّسْ إِمژْيَاننْ ؤُيُورنْ ذِي ثْمحْبَاسْثْ
زَّاثْ إِ ثِيطَّاوِينْ ن إِغْرِيمنْ نْسنْ.
6 وَاوْ. أَشوَّارْ ن يدْجِيسْ ن صِيهْيُونْ
إِنْڭزْ زَّايسْ،
مَارَّا ڒْحُوكَّامْ نّسْ ڭِّينْ أَمْ ؤُذَاذنْ
إِنِّي وَارْ إِتِّيفنْ دّمْنثْ ن ثَاروْسَا.
ڭُّورنْ نِيثْنِي بْڒَا جّهْذْ
زَّاثْ إِ ثِيطَّاوِينْ ن ونِّي ثنْ إِضَافَّارنْ.
7 زَايِينْ. ذڭْ وُوسَّانْ ن ڒغْبنْ نّسْ
ؤُ ذڭْ وَاطَّاسْ ن وثْلَاعْ نّسْ
أَذْ ثعْقڒْ ؤُرْشَالِيمْ خْ مَارَّا مِينْ ذَايسْ إِغْڒَانْ،
مِينْ غَارسْ ثُوغَا زِيشْ.
ڒَْامِي إِوْضَا ڒْڭنْسْ نّسْ س ؤُفُوسْ ن وغْرِيمْ،
ثُوغَا وَارْ ذِينْ وِي ذ أَسْ إِ غَا إِوْشنْ أَفُوسْ.
إِغْرِيمنْ نّسْ ژْرِينْ ت،
سْثهْزَانْ زڭْ ؤُردّدْجْ نّسْ.
8 خِيثْ. ؤُرْشَالِيمْ ثُوغَا ثْخطَّا أَطَّاسْ.
خْ ؤُيَا ثذْوڒْ أَمْ يِيشْثْ ن ثمْغَارْثْ
ذڭْ وُوسَّانْ ن وعْزَاڒْ نّسْ.
مَارَّا إِنِّي ثُوغَا ت إِتّْوقَّارنْ،
سّحْقَارَانْ ت،
مِينْزِي ژْرِينْ ڒحْيَا نّسْ.
ؤُڒَا نتَّاثْ سِيمَانْثْ نّسْ ثْزهَّارْ،
ثذْوڒْ غَارْ ضفَّارْ. ◘1:8 إِشا. 47:3
9 ثِيث. ثَاخْمُوجِي نّسْ ثڒْصقْ
غَارْ ثْمُووَّا ن ؤُبحْرُورْ نّسْ،
أَنڭَّارُو نّسْ وَارْ ذَايسْ ثْخمّْ.
أَقَا ثهْوَا-د غَارْ ڒَادْجَاغْ
س إِجّْ ن وبْرِيذْ إِسّْثبْهْثنْ،
ؤُڒَا ذ إِجّْ وَارْ ت إِعزِّي.
خْزَارْ مَاشَا ڒغْبنْ إِنُو، أَ سِيذِي،
مَاغَارْ ڒعْذُو إِسّْمقَّارْ إِخفْ نّسْ. ◘1:9 أَعَوذ. 32:29
10 يُوذْ. أَغْرِيمْ إِسّْوِيژّضْ أَفُوسْ نّسْ
غَارْ مَارَّا مِينْ ذَايسْ إِغْڒَانْ.
إِوَا ثژْرَا نتَّاثْ مَامّشْ ؤُذْفنْ ڒڭْنُوسْ
غَارْ زَّاوشْثْ نّسْ إِقدّْسنْ،
ڒڭْنُوسْ مِينْ خفْ ثُومُورذْ،
وَارْ إِعدّڒْ أَذْ د-أَذْفنْ
غَارْ وڭْرَاوْ ن ڒْڭنْسْ نّشْ.
11 كَافْ. قَاعْ إِمزْذَاغْ نّسْ زهَّارنْ،
أَرزُّونْ أَغْرُومْ.
نِيثْنِي وْشِينْ ڒقْشُوعْ إِغْڒَانْ نْسنْ
ذِي طّْوعْ ن مَاشَّا،
مَاحنْذْ أَذْ د-أَرّنْ أَسفْسِي غَارْ ڒعْمَارْ نْسنْ.
خْزَارْ، أَ سِيذِي، وَاڒَا
مَامّشْ ذوْڒغْ تّْوَاسّحْقَارغْ. ◘1:11 إِرْم. 52:6
12 لَامِيذْ. مَا وَارْ ذَايْومْ إِشْقِي،
كنِّيوْ إِنِّي إِعدُّونْ خْ وبْرِيذْ؟
وَاڒَامْ ؤُ خْزَارمْ،
مَا ذِينْ شَا ن ڒحْرِيقْ أَمْ ڒحْرِيقْ إِ ذ أَيِي إِتّْوَاڭّنْ،
إِ زِي ذ أَيِي إِسّْخيّقْ سِيذِي،
ذڭْ وَاسّْ ن ڒْحَاذُوقْ ن وغْضَابْ نّسْ.
13 مِيمْ. زِي سنّجْ إِ د-إِسّكّْ نتَّا ثِيمسِّي
ذڭْ إِغْسَانْ إِنُو،
ثْشبَّارْ ذَايْسنْ.
نتَّا إِنْضَارْ-د ثْرَاشَّا غَارْ إِضَارنْ إِنُو،
يَارَّا أَيِي أَذْ ذوْڒغْ غَارْ ضفَّارْ،
أَقَا يَاردّدْجْ أَيِي،
إِسّهْڒشْ أَيِي أَسّْ أَمْ إِكْمڒْ.
14 نُونْ. إِتّْوَاشدّْ ؤُزَايْڒُو ن إِعذِييّنْ إِنُو س
ؤُفُوسْ نّسْ،
أَقَا تّْوَامُوذنْ، ڭعّْذنْ-د خْ يِيرِي إِنُو.
نتَّا يَارَّا جّهْذْ إِنُو أَذْ إِفْشڒْ.
إِوْشَا أَيِي سِيذِي إِنُو ذڭْ إِفَاسّنْ نْسنْ،
نشّْ وَارْ زمَّارغْ أَذْ بدّغْ عَاذْ.
15 سَامِيخْ. إِنْضَارْ سِيذِي إِنُو
مَارَّا أَيْثْ ن بُو-صُّولْطَا إِنُو ذِي ڒْوسْثْ إِنُو،
أَمْ مَامّشْ إِبَارّحْ
س إِجّْ ن ؤُمُونِي إِفَارْزنْ ضِيدّْ إِنُو،
مَاحنْذْ أَذْ يَارْژْ إِحُوذْرِييّنْ إِنُو،
سِيذِي إِنُو أَقَا إِعْفسْ ذِي ثْسِيرْثْ ن ؤُضِيڒْ،
ن ثعْزَارشْثْ، ن يدْجِيسْ ن يَاهُوذَا. ◘1:15 إِرْم. 14:17
16 عَايِينْ. س مَانْ أَيَا تّْرُوغْ،
أَ ثِيطّْ إِنُو، أَ ثِيطّْ إِنُو إِسَّازَّاڒنْ إِمطَّاونْ،
مِينْزِي أَمسْفوّجْ نِّي إِزمَّارنْ
أَذْ د-يَارّْ ڒعْمَارْ إِنُو،
إِڭّْوجْ خَافِي.
تّْوَاثحَّانْ إِحنْجِيرنْ إِنُو،
مِينْزِي ڒعْذُو إِجْهذْ خَاسنْ.◘1:16 إِرْم. 13:17
17 بِي. ثسّْوِيژّضْ صِيهْيُونْ إِفَاسّنْ نّسْ،
مَاشَا نتَّاثْ وَارْ غَارسْ وِي ت غَا إِسّْفوّْجنْ.
يُومُورْ سِيذِي خْ يَاعْقُوبْ،
أَقَا إِغْرِيمنْ نّسْ أَذْ أَسْ د-نّْضنْ.
ؤُرْشَالِيمْ ثذْوڒْ جَارْ أَسنْ أَمْ يِيشْثْ ن ثمْغَارْثْ
ذڭْ وُوسَّانْ ن وعْزَاڒْ نّسْ.
18 ثْسَاذِي. سِيذِي ذ أَمْسڭّذْ،
مَاغَارْ نشّْ ثُوغَاغوّْغغْ خْ ڒُومُورَاثْ نّسْ.
سْڒمْ خنِّي، مَارَّا ڒڭْنُوسْ،
خْزَارمْ غَارْ ڒهْڒِيقْ إِنُو.
ثِيعْزَارِييِّينْ إِنُو ذ إِحُوذْرِييّنْ إِنُو
ؤُيُورنْ ذِي ثْمحْبَاسْثْ.◼1:18 ’خْ ڒُومُورَاثْ نّسْ‘ - س ثْعِيبْرَانِيثْ ’خْ ؤُقمُّومْ نّسْ‘.
19 قُوفْ. نشّْ ڒَاغِيغْ خْ يِينِّي ذ أَيِي إِتّخْسنْ،
مَاشَا نِيثْنِي شمْثنْ أَيِي.
إِكهَّاننْ إِنُو ذ إِمْغَارنْ إِنُو
ضڒْقنْ إِ بُوحْبڒْ ذِي ثنْذِينْثْ،
ؤُمِي ثُوغَا أَرزُّونْ مَاشَّا إِ يِيخفْ نْسنْ،
حِيمَا أَذْ سّْمحْضنْ ڒعْمَارْ نْسنْ. ◘1:19 إِرْم. 30:14
20 رِيخْ. خْزَارْ، أَ سِيذِي،
مَاغَارْ نشّْ ذِي ڒحْصَارثْ،
ثَاكْرِيشْثْ إِنُو ثنّحْوڒْ،
ؤُڒْ إِنُو إِنّقْڒبْ-د زِي ذَاخڒْ إِنُو،
مَاغَارْ ثُوغَاغوّْغغْ أَطَّاسْ.
ذِي بَارَّا إِ ذ أَيِي يُوشَارْ سِّيفْ إِحنْجِيرنْ إِنُو،
ذَاخڒْ إِحكّمْ ڒْموْثْ. ◘1:20 إِشا. 16:11؛ إِرْم. 48:36
21 شِينْ. سْڒِينْ مَامّشْ زهَّارغْ،
مَاشَا نشّْ وَارْ غَارِي ؤُڒَا ذ إِجّْ ن ؤُمسْفوّجْ،
مَارَّا ڒْعذْيَانْ إِنُو سْڒِينْ خْ أَرْژِييّثْ إِنُو.
فَارْحنْ أَقَا شكْ إِ ت إِڭِّينْ.
خْمِي د غَا ثسِّيوْضذْ أَسّْ إِ زِي د-ثْعڒْمذْ،
خنِّي أَذْ إِڒِينْ أَمْ مَامّشْ دْجِيغْ نشّْ.
22 ثَافْ. أجّْ أَذْ د-يَاسْ مَارَّا ڒْغَارْ نْسنْ زَّاثكْ،
أڭّْ زَّايْسنْ أَمْ مَامّشْ زَّايِي ثڭِّيذْ
زِي سِّيبّثْ ن مَارَّا إِعذِّيينْ إِنُو،
مِينْزِي إِزهَّارنْ إِنُو ذ أَطَّاسْ،
ؤُڒْ إِنُو يُوحڒْ أَطَّاسْ.