أَذْلِيسْ إِقدّْسنْ لُوكَا ١٢

١٢

يَاسُوع إِسَّاوَاڒْ غَارْ إِمحْضَارنْ نّسْ ذ ڒْْغَاشِي

١ ؤُمِي مُوننْ إِبَارُّوثنْ ن ڒْْغَاشِي س وَاطَّاسْ، أَڒَامِي بْذَانْ عْڒَاينْعفّْسنْ إِجّْ خْ ونّغْنِي، إِبْذَا إِقَّارْ إِ إِمحْضَارنْ نّسْ: ”غَارْ ؤُمزْوَارْ حْضَامْ إِخفْ نْومْ زڭْ ونْثُونْ ن إِفَارِيسِييّنْ، أَقَا-ث ذ نِّيفَاقْ!◘ ٢ مِينْزِي وَارْ ذِينْ مِينْ إِذْڒِينْ، وَارْ إِتّتّْوَاسّضْهَارْ، ؤُ وَارْ ذِينْ مِينْ إِنُوفَّارنْ، وَارْ إِتّتّْوِيسِّينْ. ◘ ٣ مِينْزِي مَارَّا مِينْ ثنَّامْ ذِي ثَادْجسْثْ، أَذْ إِتّْوَاسڒْ ذِي ثْفَاوْثْ، ؤُ مِينْ خفْ ثسِّيوْڒمْ ذڭْ ؤُمزُّوغْ ذڭْ وخَّامْ ن ذَاخڒْ، أَذْ إِتّْوَابَارّحْ زَّايسْ خْ ثْزغْوِينْ.“

٤ ”نشّْ أَذْ أَومْ إِنِيغْ، أَ إِمدُّوكَّاڒْ إِنُو: وَارْ ثڭّْوْذمْ شَا زڭْ إِنِّي إِنقّنْ أَرِّيمثْ، مَاشَا أَوَارْنِي مَانْ أَيَا وَارْ زمَّارنْ أَذْ ڭّنْ كْثَارْ عَاذْ. ◘ ٥ مَاشَا نشّْ أَذْ أَومْ سّشْنغْ ونِّي زِي غَا ثڭّْوذمْ: ڭّْوذمْ زڭْ ونِّي غَارْ إِدْجَا صُّولْطَا، مَاحنْذْ أَذْ إِنْضَارْ ذِي جهنَّامَا أَوَارْنِي ڒَْامِي إِنْغَا. وَاهْ، أَذْ أَومْ إِنِيغْ، زڭْ وَانِيثَا إِ غَا ثڭّْوذمْ! ٦ مَا وَارْ تّْمنْزِينْ خمْسَا ن ژَّاوشْ س ثْنَاينْ ن إِصُولْذِييّنْ ن نّْحَاسْ؟ ؤُشَا ؤُڒَا ذ إِجّْ زَّايْسنْ وَارْ إِتّتّْوَاتُّو زَّاثْ إِ أَربِّي. ◘ ٧ مَاشَا زَّايْومْ، عَاذْ إِژُوطَّانْ ن ؤُشُوَّافْ ن ؤُزدْجِيفْ نْومْ تّْوَاحسْبنْ. س ؤُينِّي وَارْ ثڭّْوْذمْ شَا، كنِّيوْ حْسنْ زِي ژَّاوشْ أَطَّاسْ!“ ◼ ◘

٨ ”نشّْ أَذْ أَومْ إِنِيغْ، مَارَّا وِي زَّايِي إِ غَا إِشهْذنْ قِيبَاتْشْ إِ إِوْذَانْ، أَذْ زَّايسْ إِشْهذْ عَاوذْ مِّيسْ ن بْنَاذمْ زَّاثْ إِ لْمَالَاكَاثْ ن أَربِّي. ◘ ٩ مَاشَا وِي ذ أَيِي غَا إِنْكَارنْ قِيبَاتْشْ إِ إِوْذَانْ، ؤُڒَا ذ نتَّا س يِيخفْ نّسْ أَذْ إِتّْوَانْكَارْ قِيبَاتْشْ إِ لْمَالَاكَاثْ ن أَربِّي. ◘

١٠ كُوڒْ إِجّْ ونِّي إِ غَا إِنِينْ أَوَاڒْ ضِيدّْ ن مِّيسْ ن بْنَاذمْ، أَقَا أَذْ أَسْ إِتّْوَاغْفَارْ مَانْ أَيَا. مَاشَا ونِّي إِ غَا إِشقّْفنْ ذِي أَرُّوحْ إِقدّْسنْ وَارْ ذ أَسْ إِتّتّْوَاغْفَارْ شَا مَانْ أَيَا!“ ◘

١١ ”خْمِي كنِّيوْ إِ غَا نذْهنْ غَارْ ثمْزِيذَاوِينْ، زَّاثْ إِ ڒْْحُوكَّامْ ذ أَيْثْ ن بُو-صُّولْطَا، وَارْ كسِّيمْ شَا س ومْنُوسْ مِينْ زِي إِ د غَا ثَارّمْ نِيغْ مِينْ غَا ثِينِيمْ، ◘ ١٢ مِينْزِي أَرُّوحْ إِقدّْسنْ أَذْ أَومْ إِسّڒْمذْ ذِي ثْسَاعّثْ نِّي مِينْ إِتّْخصَّا أَذْ ثِينِيمْ.“

أَمذْيَا ن بَابْ ن وَاڭْڒَا

١٣ إِنَّا أَسْ إِجّنْ زِي ڒْْغَاشِي: ”أَ أَمْسغَّارْ، إِنِي أَسْ إِ ؤُمَا، حِيمَا أَذْ كِيذِي إِبْضَا ڒْْوَارْثْ.“ ١٤ مَاشَا يَاسُوع إِنَّا أَسْ: ”أَ بْنَاذمْ، وِي ذ أَيِي يَارِّينْ خَاومْ ذ ڒْْقَاضِي نِيغْ ذ ڒْْعَاذڒْ؟“ ١٥ إِنَّا إِ إِمحْضَارنْ نّسْ: ”غَارْومْ، حْضَامْ إِخفْ نْومْ زِي طّْمعْ، مَاغَارْ ثُوذَارْثْ وَارْ ثدْجِي ذڭْ ؤُفيّضْ ن وَاڭْڒَا.“ ◘

١٦ خَاسْ ؤُشَا إِحَاجَا أَسنْ إِجّْ ن ؤُمذْيَا: ”ثَامُّورْثْ ن إِجّْ ن ورْيَازْ ذ بَابْ ن وَاڭْڒَا ثِيوْيِي أَسْ-د صَّابثْ أَطَّاسْ. ١٧ إِخَارّصْ ذڭْ إِخفْ نّسْ: ’مِينْ غَا ڭّغْ؟، مِينْزِي وَارْ غَارِي بُو ڒْْمَارْسِي إِ ذِي إِ غَا يَارْوغْ مَارَّا ڒْْغِيدْجثْ إِنُو.‘ ١٨ إِنَّا: ’أَمُّو إِ غَا ڭّغْ: أَذْ هذْمغْ ڒمْرَاسِي إِنُو، خنِّي أَذْ بْنِيغْ ڒمْرَاسِي ذ إِمقّْرَاننْ خَاسنْ ؤُشَا أَذْ ذَايْسنْ خزْنغْ مَارَّا ڒْْغِيدْجثْ ذ وَاڭْڒَا إِنُو. ١٩ أَذْ إِنِيغْ إِ يِيخفْ إِنُو: ’أَ ڒعْمَارْ إِنُو، غَاركْ أَطَّاسْ ن وَاڭْڒَا إِ إِتّْوَاخْزنْ ذِينْ إِ وَاطَّاسْ ن إِسڭّْوُوسَا. أَريّحْ، ثشّذْ، ثسْوذْ ؤُ ثْفَارْحذْ!‘ ◘ ٢٠ مَاشَا إِنَّا أَسْ أَربِّي: ’أَ أَفْغُوڒْ، أَقَا دْجِيڒثْ-أَ أَذْ زَّايكْ إِتّْوَاتَّارْ ڒعْمَارْ نّشْ. خنِّي إِ ؤُمِي غَا يِيڒِي مِينْ ثسّْوجْذذْ؟‘ ◘ ٢١ أَمُّو إِ غَا إِمْسَارْ إِ ونِّي إِيَارّْونْ ڒكْنُوزْ إِ يِيخفْ نّسْ، مَاشَا وَارْ إِدْجِي ذ بَابْ ن وَاڭْڒَا ذِي أَربِّي.“

ثَاڭلْذِيثْ ن أَربِّي ذ أَمزْوَارُو

٢٢ إِنَّا إِ إِمحْضَارنْ نّسْ: ”س ؤُينِّي نشّْ أَذْ أَومْ إِنِيغْ: وَارْ كسِّيمْ س ومْنُوسْ إِ ڒعْمَارْ نْومْ مِينْ غَا ثشّمْ، ؤُڒَا إِ أَرِّيمثْ نْومْ مِينْ غَا ثْيَارْضمْ. ◘ ٢٣ ڒعْمَارْ كْثَارْ زِي مَاشَّا ؤُ أَرِّيمثْ كْثَارْ زڭْ ورُّوضْ. ٢٤ خْزَارمْ غَارْ إِبَاغْڒِيونْ! أَقَا وَارْ زَارّْعنْ، وَارْ مجَّارنْ، وَارْ غَارْسنْ ثِيسْرَافِينْ نِيغْ ذ ڒمْرَاسِي، مَاشَا أَربِّي إِسّشَّا إِ-ثنْ. مشْحَاڒْ أَطَّاسْ ثْسكّْوِيمْ كنِّيوْ كْثَارْ خْ إِجْضَاضْ! ◘ ٢٥ مَانْ ونْ زَّايْومْ إِزمَّارْ س ومْنُوسْ نّسْ أَذْ يَارْنِي ذِي ثُوزّڭَّارْثْ نّسْ إِجّْ ن ؤُغِيڒْ وَاهَا؟ ◘ ٢٦ مَاڒَا كنِّيوْ وَارْ ثْزمَّارمْ ؤُڒَا خْ مِينْ إِدْجَانْ ذ أَمژْيَانْ قَاعْ، مَايمِّي غَا ثكْسِيمْ س ومْنُوسْ خْ مِينْ إِقِّيمنْ؟“

٢٧ ”خْزَارمْ مَامّشْغمّْينْثْ ثْلِيلِّيشِينْ! وَارْ خدّْمنْثْ، وَارْ تّْقَارضْشنْثْ، مَاشَا نشّْ أَذْ أَومْ إِنِيغْ، أَقَا ؤُڒَا ذ سُولِيمَانْ ذِي قَاعْ أَعُودْجِي نّسْ وَارْ يَارْضْ شَا أَمْ ؤُڒَا ذ إِشْثْ زَّايْسنْثْ. ◼ ٢٨ مَاڒَا أَربِّي إِسّْيَارْضْ أَمُّو أَرْبِيعْ إِ إِدْجَانْ أَسّْ-أَ ذڭْ إِيَّارْ ؤُشَا ثِيوشَّا أَذْ إِمّنْضَارْ ذِي ثفْقُونْثْ، مشْحَاڒْ إِحْڒَا أَطَّاسْ أَذْ إِسّْيَارْضْ نتَّا كنِّيوْ إِ ذِي إِدْجَا ذْرُوسْ ن لْ-إِيمَانْ!“

٢٩ ”س ؤُينِّي وَارْ أَرزُّومْ شَا خْ مِينْ غَا ثشّمْ ؤُڒَا خْ مِينْ غَا ثسْومْ، وَارْ تّجِّيمْ إِخَارِّيصنْ نْومْ أَذْغفْڒمْ خْ مَانْ أَيَا. ٣٠ مِينْزِي مَارَّا ثِيمسْڒَايِينْ-أَ أَرزُّونْ ذَايْسنْثْ ڒڭْنُوسْ ن دُّونشْثْ، مَاشَا بَابَاثْومْ إِسّنْ بلِّي ثحْذَاجمْ ثنْثْ. ٣١ مَاشَا أَرْزُومْ ثَاڭلْذِيثْ ن أَربِّي ؤُشَا ثِيمسْڒَايِينْ-أَ مَارَّا أَذْ أَومْ تّْوَامَّارْنِينْثْ.“ ◘

٣٢ ”وَارْ تّڭّْوذْ، شمْ، أَ ثَاحِيمَارْثْ ثَامژْيَانْثْ، مِينْزِي يَارْضَا بَابَاثْومْ أَذْ أَومْ إِوْشْ ثَاڭلْذِيثْ. ٣٣ زنْزمْ مِينْ غَارْومْ، وْشمْ صّذْقثْ! ڭّمْ إِ يِيخفْ نْومْ ثِيشْيَارِينْ ن ثْمنْيَاثْ إِ وَارْ يَارشِّينْ، ؤُشَا خمّْڒمْ إِجّْ ن ڒْْكنْزْ إِ وَارْ إِقطِّينْ ذڭْ إِجنْوَانْ، مَانِي وَارْ إِتِّيذفْ ؤُشفَّارْ ؤُڒَا ذ ثْشِينْذَا وَارْ ثتّڭّْ سُّوسّْ. ◘ ٣٤ مِينْزِي مَانِي غَا يِيڒِي ڒْْكنْزْ نْومْ، ذِينِّي إِ غَا يِيڒِي عَاوذْ وُوڒْ نْومْ.“

أَعْقَابْ ن بَابْ ن ثَادَّارْثْ

٣٥ ”أَذْ إِڒِينْثْ ثجْعِينَّاثِينْ نْومْ حزّْممْثْ س إِبُويَاسْ ؤُ ڒفْنَارَاثْ نْومْ أَرقّنْثْ. ◘ ٣٦ إِڒِيمْ أَمْ إِوْذَانْ إِ إِتّْرَاجَانْ سِيذِي نْسنْ خْمِي د غَا يعْقبْ زڭْ وخَّامْ ن وُورَارْ، حِيمَا، خْمِي د غَا يَاسْ، أَذْ إِسّْقَارْقبْ، زمَّارنْ أَذْ أَسْ أَرْزْمنْ ذغْيَا. ٣٧ سّعْذْ ن إِمْسخَّارنْ نِّي، خْمِي د غَا يَاسْ سِيذِيثْسنْ، أَذْ ثنْ يَافْ فَاقنْ. س ثِيذتّْ، نشّْ أَذْ أَومْ إِنِيغْ، أَقَا أَذْ إِحزّمْ إِخفْ نّسْ ؤُشَا أَذْ ثنْ إِسّْغِيمْ، خنِّي أَذْ د-يَاسْ أَذْ خَاسنْ إِسخَّارْ. ٣٨ مَاڒَا يُوسَا-د غَارْ حطُّو وِيسّْ ثْنَاينْ ن دْجِيڒثْ نِيغْ غَارْ حطُّو وِيسّْ ثْڒَاثَا ؤُشَا يُوفَا إِ-ثنْ أَمُّو، سّعْذْ ن إِمْسخَّارنْ نِّي. ◘ ٣٩ مَاشَا سّْنمْ أَيَا: مَاڒَا بَابْ ن ثَادَّارْثْ إِسّنْ ذِي مَانْ ثْسَاعّثْ إِ ذِي غَا إِخشّْ ؤُشفَّارْ، خنِّي أَذْ يِيڒِي إِفَاقْ، وَارْ إِتّجِّي ثَادَّارْثْ نّسْ أَذْ ت أَشَارنْ. ◘ ٤٠ إِڒِيمْ كنِّيوْ عَاوذْ ثْوجْذمْ، مِينْزِي مِّيسْ ن بْنَاذمْ أَذْ د-يَاسْ ذڭْ إِشْثْ ن ثْسَاعّثْ إِ وَارْ ثتّْرِيجِيمْ.“ ◘

أَمذْيَا ن ووْكِيڒْ أَمْثِيقِّي

٤١ إِنَّا أَسْ شِيمْعُونْ بُوطْرُوسْ: ”أَ سِيذِيثْنغْ، مَا إِ نشِّينْ إِ ثْعَاوْذذْ أَمذْيَا-يَا نِيغْ إِ مَارَّا؟“ ٤٢ إِنَّا أَسْ يَاسُوع: ”مَانْ ونْ إِدْجَانْ خنِّي ذ أَوْكِيڒْ أَمِيغِيسْ إِ ذِي إِدْجَا ڒَْامَانْ، ذ ونِّي إِ غَا يڭّْ سِيذِيسْ خْ إِمْسخَّارنْ نّسْ حِيمَا أَذْ أَسنْ إِوْشْ ڒعْوتْشْ نْسنْ ذِي ڒْْوقْثْ نّسْ؟ ◘ ٤٣ سّعْذْ ن ؤُمْسخَّارْ نِّي إِ غَا يَافْ سِيذِي نّسْ، خْمِي د غَا يَاسْ، إِتّڭّْ أَمُّو. ٤٤ س ثِيذتّْ، نشّْ أَذْ أَومْ إِنِيغْ، بلِّي أَذْ ث يڭّْ خْ مَارَّا أَڭْڒَا نّسْ. ٤٥ مَاشَا مَاڒَا أَمْسخَّارْ نِّي أَذْ يِينِي ذڭْ وُوڒْ نّسْ: ’أَقَا سِيذِي إِنُو إِعطَّاڒْ خْ وعْقَابْ!‘، ؤُشَا إِبْذَا إِشَّاثْ إِمْسخَّارنْ ذ ثِييَّا، إِتّتّْ، إِسسّْ، إِسْشَارْ، ٤٦ خنِّي أَذْ د-يَاسْ سِيذِي ن ؤُمْسخَّارْ نِّي ذڭْ إِجّْ ن وَاسّْ وَارْ إِتّْرِيجِي ؤُ ذڭْ إِشْثْ ن ثْسَاعّثْ إِ وَارْ إِسِّينْ. وَانِيثَا أَذْ ث إِقطّسْ ذ إِشدْجِيقنْ، أَذْ إِڭّْ ثَاسْغَارْثْ نّسْ أَكْ-ذ إِغدَّارنْ. ٤٧ أَمْسخَّارْ نِّي إِسّْننْ ڒْْخَاضَارْ ن سِيذِي نّسْ ؤُشَا وَارْ إِسّوْجذْ إِخفْ نّسْ ؤُڒَا وَارْ إِڭِّي عْلَاحْسَابْ ڒْْخَاضَارْ ن سِيذسْ، أَذْ إِكْسِي ثِييِّيثَا أَطَّاسْ. ◘ ٤٨ مَاشَا ونِّي وَارْ إِسِّيننْ ڒْْخَاضَارْ ن سِيذسْ أَمْ إِڭَّا شَا مِينْ إِسْذَاهدْجنْ ثِييِّيثَا، أَذْ إِتّْوَاوّثْ س ذْرُوسْ ن ثِييِّيثَا. زِي كُوڒْ إِجّنْ ؤُمِي إِمّوْشْ أَطَّاسْ، أَذْ زَّايسْ إِتّْوَاتَّارْ أَطَّاسْ، ؤُ وِي ؤُمِي إِتّْوَاكلّفْ أَطَّاسْ، أَذْ زَّايسْ إِتّْوَاتَّارْ كْثَارْ.“

ثَاوَاسِيثْ ن يَاسُوع أَذْ ثَاوِي أَبطُّو

٤٩ ”ؤُسِيغْ-د حِيمَا أَذْ نْضَارغْ ثِيمسِّي خْ ثمُّورْثْ ؤُ معْلِيكْ ؤُفِيغْ أَذْ ثِيڒِي ثَارْغَا. ◘ ٥٠ مَاشَا غَارِي إِجّْ ن ؤُسغْضصْ إِ زِي غَا تّْوَاسّْغضْصغْ، ؤُ تّْوَاحْصَارغْ أَطَّاسْ أَڒْ ذ غَا إِتّْوَاكمّڒْ. ◘ ٥١ مَا إِتّْغِيڒْ أَومْ بلِّي ؤُسِيغْ-د حِيمَا أَذْ سِّيوْضغْ ڒهْنَا خْ ثمُّورْثْ؟ لَّ، أَذْ أَومْ إِنِيغْ، ذ أَمزْوَارْ أَبطُّو. ◘ ٥٢ مِينْزِي زِي ڒخُّو ذ ثْسَاونْثْ أَذْ مّْسبْضَانْ خمْسَا ذڭْ إِشْثْ ن ثَادَّارْثْ، ثْڒَاثَا ضِيدّْ ثْنَاينْ ؤُ ثْنَاينْ ضِيدّْ ثْڒَاثَا. ٥٣ بَابَاسْ أَذْ إِمّْسبْضَا خْ مِّيسْ، ؤُ مِّيسْ خْ بَابَاسْ، ؤُ يمَّاسْ خْ يدْجِيسْ، ؤُ يدْجِيسْ خْ يمَّاسْ، ؤُ ڒَْالَّاسْ خْ ثسْڒِيثْ، ؤُ ثَاسْڒِيثْ خْ ڒَْالَّاسْ.“ ◘

إِتّْخصَّا أَذْ نْميّزْ زّْمَانَاثْ

٥٤ إِنَّا إِ ڒْْغَاشِي: ”خْمِي غَا ثْژَارمْ إِجّْ ن ؤُسيْنُو إِڭعّذْ-د زِي ڒْْغَارْبْ، ذغْيَا أَذْ ثِينِيمْ: ’أَذْ يِيڒِي ونْژَارْ!‘ ؤُشَا أَمُّو إِ غَا إِمْسَارْ! ◘ ٥٥ خْمِي غَا ثْژَارمْ أَسمِّيضْ ن لْجَانُوبْ إِتّْسُوضْ، خنِّي أَذْ ثِينِيمْ: ’أَذْ يِيڒِي ڒحْمُو!‘، ؤُشَا أَمُّو إِ غَا إِمْسَارْ. ٥٦ أَ إِمْنَافْقنْ، أَقَا ثسّْنمْ أَذْ ثْميّْزمْ ؤُذمْ ن ثمُّورْثْ ذ ؤُجنَّا. مَا زّْمَانْ-أَ مَامّشْ وَارْ ثْزمَّارنْ أَذْ ث ثْميّْزمْ؟“

ڭّمْ أَصْڒَاحْ أَكْ-ذ وغْرِيمْ نّكْ

٥٧ ”مَايمِّي وَارْ ثْحكّْممْ س يِيخفْ نْومْ مِينْ إِدْجَانْ ذ صَّاحْ؟ ◘ ٥٨ مِينْزِي، خْمِي غَا ثْرَاحذْ غَارْ ڒْْحَاكمْ أَكْ-ذ وغْرِيمْ نّشْ، أڭّْ ثِيزمَّارْ أَمْ ثدْجِيذْ عَاذْ أَكِيسْ ذڭْ وبْرِيذْ مَاحنْذْ أَذْ زَّايسْ ثتّْوَافكّذْ، حِيمَا وَارْ شكْ إِتّْجَارِّي غَارْ ڒْْقَاضِي ؤُشَا ڒْْقَاضِي أَذْ شكْ إِسلّمْ إِ ومْخَازْنِي، خنِّي أَذْ شكْ إِنْضَارْ ؤُمْخَازْنِي ذِي ڒحْبسْ. ٥٩ أَذْ أَشْ إِنِيغْ، شكْ وَارْ د سّنِّي ثتّفّْغذْ أَڒْ غَا ثْخدْجْصذْ أَصُولْذِي أَنڭَّارُو!“

◘١٢:١ 12:‏1 [مت. 10‏:‏28‏-‏33؛ 12‏:‏32؛ 10‏:‏19‏-‏20] — مت. 16‏:‏16؛ مك. 8‏:‏15.

◘١٢:٢ 12:‏2 أَيُوبْ 12‏:‏22؛ مت. 10‏:‏26؛ مك. 4‏:‏22؛ لك. 8‏:‏17.

◘١٢:٤ 12:‏4 إِشا. 51‏:‏7؛ إِرْم. 1‏:‏8؛ مت. 10‏:‏28.

◘١٢:٦ 12:‏6 مت. 10‏:‏29.

◼١٢:٧ 12:‏7 ’ژَّاوشْ‘ - نِيغْ: ’إِژَّاوْجِيونْ‘.

◘١٢:٧ 12:‏7 1 صم. 14‏:‏45؛ 2 صم. 14‏:‏11؛ 1 إِج. 1‏:‏52؛ لك. 21‏:‏18.

◘١٢:٨ 12:‏8 مت. 10‏:‏32.

◘١٢:٩ 12:‏9 مت. 10‏:‏33؛ مك. 8‏:‏38؛ لك. 9‏:‏26؛ 2 تِيم. 2‏:‏12؛ 1 يُوح. 2‏:‏23.

◘١٢:١٠ 12:‏10 1 يُوح. 5‏:‏16.

◘١٢:١١ 12:‏11 مت. 10‏:‏19؛ مك. 13‏:‏11؛ لك. 21‏:‏14.

◘١٢:١٥ 12:‏15 1 تِيم. 6‏:‏7.

◘١٢:١٩ 12:‏19 أَمب. 11‏:‏9؛ 1 كُور. 15‏:‏32؛ يَاع. 5‏:‏5.

◘١٢:٢٠ 12:‏20 إِزهد. 39‏:‏7؛ إِزهد. 52‏:‏7؛ أَمب. 2‏:‏18، 19؛ إِرْم. 17‏:‏11.

◘١٢:٢٢ 12:‏22 [مت. 6‏:‏19‏-‏21، 25‏-‏34] — إِزهد. 55‏:‏23؛ مت. 6‏:‏25؛ فِيل. 4‏:‏6؛ 1 تِيم. 6‏:‏8؛ 1 بُط. 5‏:‏7.

◘١٢:٢٤ 12:‏24 أَيُوبْ 38‏:‏41؛ إِزهد. 147‏:‏9.

◘١٢:٢٥ 12:‏25 مت. 6‏:‏27.

◼١٢:٢٧ 12:‏27 ’ثِيلِيلِّيشِينْ‘ - إِجّْ ن مَارْكَا ن نُّووَارَاثْ ذَايْسنْ أَژْرِي أَطَّاسْ.

◘١٢:٣١ 12:‏31 1 إِم. 3‏:‏13؛ إِزهد. 37‏:‏25.

◘١٢:٣٣ 12:‏33 مت. 6‏:‏20؛ 19‏:‏21؛ لك. 16‏:‏9؛ 1 تِيم. 6‏:‏19.

◘١٢:٣٥ 12:‏35 [مت. 24‏:‏45‏-‏51] — أَفا. 6‏:‏14؛ 1 بُط. 1‏:‏13.

◘١٢:٣٨ 12:‏38 مت. 24‏:‏42.

◘١٢:٣٩ 12:‏39 مت. 24‏:‏43؛ 1 تس. 5‏:‏2؛ 2 بُط. 3‏:‏10؛ أَسَا. 3‏:‏3؛ 16‏:‏15.

◘١٢:٤٠ 12:‏40 مت. 24‏:‏44؛ 25‏:‏13؛ مك. 13‏:‏33؛ لك. 21‏:‏34؛ 1 تس. 5‏:‏6.

◘١٢:٤٢ 12:‏42 مت. 24‏:‏45؛ 25‏:‏21؛ 1 كُور. 4‏:‏2.

◘١٢:٤٧ 12:‏47 يَاع. 4‏:‏17.

◘١٢:٤٩ 12:‏49 [مت. 10‏:‏34‏-‏36]

◘١٢:٥٠ 12:‏50 مت. 20‏:‏22؛ مك. 10‏:‏38.

◘١٢:٥١ 12:‏51 مت. 10‏:‏34.

◘١٢:٥٣ 12:‏53 مِيخَا 7‏:‏6

◘١٢:٥٤ 12:‏54 [مت. 16‏:‏2‏-‏3]

◘١٢:٥٧ 12:‏57 [مت. 5‏:‏25‏-‏26]