١ ؤُسِينْ-د غَارسْ إِفَارِيسِييّنْ ذ إِصَاذُوقِييّنْ، سّقْسَانْ ث حِيمَا أَذْ ث جَارّْبنْ، مَاحنْذْ أَذْ أَسنْ إِسّْشنْ شَا ن ڒعْڒَامثْ زڭْ ؤُجنَّا. ◘16:‏1 [مك. 8‏:‏11‏-‏13؛ لك. 12‏:‏54‏-‏56] — مت. 12‏:‏38؛ لك. 11‏:‏29؛ يُوح. 6‏:‏30. ٢ مَاشَا نتَّا يَارَّا-د، إِنَّا أَسنْ: ”غَارْ ثْمذِّيثْ أَذْ ثِينِيمْ: ’أَقَا ڒْْحَاڒْ إِفّغْ!‘، مِينْزِي أَجنَّا ذ أَزڭّْوَاغْ. ◘16:‏2 لك. 12‏:‏54. ٣ ؤُ غَارْ ڒفْجَارْ أَذْ ثِينِيمْ: ’أَقَا أَسّْ-أَ أَذْ إِسُوضْ ؤُسمِّيضْ!‘، مِينْزِي أَجنَّا ذ أَزڭّْوَاغْ أَڒْ أَبَارْشَانْ. أَ إِمْنَافْقنْ، كنِّيوْ ثسّْنمْ أَذْ ثْفَارْزمْ ؤُذمْ ن ؤُجنَّا، مَاشَا ڒعْڒَامَاثْ ن زّْمَانْ-أَ وَارْ ثْزمَّارمْ أَذْ ثنْثْ ثْفَارْزمْ. ٤ جِّيڒْ أَعفَّانْ إِزنَّانْ يَارزُّو إِشْثْ ن ڒعْڒَامثْ، مَاشَا وَارْ ذ أَسْ إِتّْموْشِي ؤُڒَا ذ إِشْثْ ن ڒعْڒَامثْ مْغِيرْ ڒعْڒَامثْ ن يُونُوسْ، أَنَابِي!“ خنِّي إِجَّا إِ-ثنْ، إِرُوحْ. ◘16:‏4 يُون. 2‏:‏1؛ مت. 12‏:‏39؛ لك. 11‏:‏29.

٥ ڒَْامِي د-إِوْضنْ إِمحْضَارنْ نّسْ غَارْ ؤُجمَّاضْ ن ڒبْحَارْ، تُّونْ أَذْ كِيسنْ د-أَوْينْ أَغْرُومْ. ◘16:‏5 [مك. 8‏:‏14‏-‏21] ٦ إِنَّا أَسنْ يَاسُوع: ”حْضَامْ إِخفْ نْومْ زڭْ ونْثُونْ ن إِفَارِيسِييّنْ ذ إِصَاذُوقِييّنْ.“ ◘16:‏6 مك. 8‏:‏15؛ لك. 12‏:‏1. ٧ نِيثْنِي مْشَاوَارنْ جَارْ أَسنْ خْ مَانْ أَيَا، نَّانْ: ”أَقَا إِنَّا مَانْ أَيَا مِينْزِي وَارْ ذ نِيوِي شَا أَغْرُومْ!“ ٨ يَاسُوع، أَمْ ثُوغَا إِسّنْ مَانْ أَيَا، إِنَّا أَسنْ: ”أَ كنِّيوْ إِ ذِي إِدْجَا ذْرُوسْ ن لْ-إِيمَانْ، مَايمِّي ثمْشَاوَارمْ جَارْ أَومْ أَقَا مَانْ أَيَا إِدْجَا ؤُمِي وَارْ د-ثِيوْيمْ أَغْرُومْ؟ ٩ مَا عَاذْ وَارْ ثفْهِيممْ شَا؟ مَا وَارْ ثعْقِيڒمْ شَا خْ خمْسَا ن إِڒقّْوَازْ ن وغْرُومْ إِ خمْسَا-أَڒَافْ، ؤُ مشْحَاڒْ ن ثْسُودْجَاثِينْ إِ ثْيَارْومْ؟ ◘16:‏9 مت. 14‏:‏17؛ مك. 6‏:‏38؛ لك. 9‏:‏13؛ يُوح. 6‏:‏9. ١٠ نِيغْ خْ سبْعَا ن إِڒقّْوَازْ ن وغْرُومْ إِ أَربْعَا أَڒَافْ، ؤُ مشْحَاڒْ ن ثْسُودْجَاثِينْ إِ ثْيَارْومْ؟ ◘16:‏10 مت. 15‏:‏34. ١١ مَا عَاذْ وَارْ ثفْهِيمنْ شَا بلِّي نشّْ وَارْ كِيومْ سِّيوْڒغْ شَا خْ وغْرُومْ ؤُمِي ذ أَومْ نِّيغْ: ’حْضَامْ إِخفْ نْومْ زڭْ ونْثُونْ ن إِفَارِيسِييّنْ ذ إِصَاذُوقِييّنْ‘؟“ ١٢ سّنِّي فهْمنْ أَقَا نتَّا وَارْ ذ أَسنْ إِنِّي، مَاحنْذْ أَذْ حْضَانْ إِخفْ نْسنْ زڭْ ونْثُونْ ن وغْرُومْ، مَاشَا زِي ثْغُورِي ن إِفَارِيسِييّنْ ذ إِصَاذُوقِييّنْ.

١٣ ڒَْامِي د-يِيوضْ يَاسُوع غَارْ ثمُّورْثْ ن قَايْصَارِييَا-فِيلِيبُّوسْ، إِسّقْسَا إِمحْضَارنْ نّسْ: ”مِينْ عْنِيغْ نشّْ، مِّيسْ ن بْنَاذمْ، عْلَاحْسَابْ مِينْ قَّارنْ إِوْذَانْ؟“ ◘16:‏13 [مك. 8‏:‏27‏-‏30؛ لك. 9‏:‏18‏-‏21] ١٤ نَّانْ أَسْ: ”شَا قَّارنْ ’ذ يُوحَانَّا أَمْسغْضَاصْ‘، ؤُ ونّغْنِي: ’ذ إِلِييَا‘، ؤُ ونّغْنِي عَاوذْ: ’ذ إِرْمِييَا‘ نِيغْ ’ذ إِجّنْ زڭْ إِنَابِييّنْ‘.“ ◘16:‏14 مت. 14‏:‏2؛ مك. 6‏:‏15؛ 8‏:‏28؛ لك. 9‏:‏8، 19 ١٥ إِنَّا أَسنْ: ”مَاشَا كنِّيوْ، مِينْ خَافِي ثقَّارمْ؟“ ١٦ يَارَّا-د خَاسْ شِيمْعُونْ بُوطْرُوسْ، إِنَّا: ”شكْ ذ لْمَاسِيحْ، مِّيسْ ن أَربِّي إِدَّارنْ.“ ◘16:‏16 يُوح. 6‏:‏69. ١٧ يَارَّا-د خَاسْ يَاسُوع، إِنَّا أَسْ: ”سّعْذْ نّشْ، أَ شِيمْعُونْ، مِّيسْ ن يُونَا، مِينْزِي وَارْ إِدْجِي ذ أَيْسُومْ نِيغْ ذ إِذَامّنْ إِ ذ أَشْ إِمْڒنْ مَانْ أَيَا، مَاشَا ذ بَابَا إِ إِدْجَانْ ذڭْ إِجنْوَانْ. ◘16:‏17 مت. 11‏:‏25. ١٨ عَاوذْ نشّْ أَذْ أَشْ إِنِيغْ، أَقَا شكْ ذ ’بُوطْرُوسْ‘، ذ أَژْرُو، ؤُ خْ وژْرُو-يَا أَذْ بْنِيغْ ثَامسْمُونْثْ إِنُو ؤُشَا ثِيوُّورَا ن ڒَْاخَارْثْ وَارْ ذ أَسْ زمَّارنْثْ. ◘16:‏18 إِزهد. 118‏:‏22؛ إِشا. 28‏:‏16؛ 33‏:‏20؛ يُوح. 1‏:‏43؛ 1 كُور. 3‏:‏11. ١٩ ذ نشّْ أَذْ أَشْ وْشغْ ثِيسَارُوثِينْ ن ثْڭلْذِيثْ ن إِجنْوَانْ، ؤُ مَارَّا مِينْ غَا ثْشدّذْ ذِي ثمُّورْثْ، أَذْ يِيڒِي إِشدّْ ذڭْ إِجنْوَانْ، ؤُ مَارَّا مِينْ غَا ثْفسْيذْ ذِي ثمُّورْثْ، أَذْ يِيڒِي إِفْسِي ذڭْ إِجنْوَانْ.“ ◘16:‏19 مت. 18‏:‏18؛ يُوح. 20‏:‏22. ٢٠ ڒخْذنِّي يُومُورْ إِمحْضَارنْ نّسْ، حِيمَا وَارْ خبَّارنْ حذْ بلِّي نتَّا ذ لْمَاسِيحْ.

٢١ سّنِّي إِبْذَا يَاسُوع أَذْ إِسّْشنْ إِ إِمحْضَارنْ نّسْ بلِّي إِتّْخصَّا أَسْ أَذْ إِرَاحْ غَارْ ؤُرْشَالِيمْ، أَذْ إِودّبْ أَطَّاسْ زڭْ إِمْغَارنْ ن ڒْْڭنْسْ ؤُ زڭْ إِمقّْرَاننْ ن إِكهَّاننْ ذ إِمْسڒْمَاذنْ ن إِذْلِيسنْ، أَذْ إِتّْوَانغْ ؤُشَا أَذْ د-إِتّْوَاسّْنكَّارْ ذڭْ وَاسّْ وِيسّْ ثْڒَاثَا. ◘16:‏21 [مك. 8‏:‏31‏-‏9‏:‏1؛ لك. 9‏:‏22‏-‏27] — مت. 17‏:‏22؛ 20‏:‏18؛ مك. 9‏:‏31؛ 10‏:‏33؛ لك. 18‏:‏31؛ 24‏:‏7. ٢٢ مَاشَا بُوطْرُوسْ يِيوْيِي ث وحّْذسْ، إِبْذَا إِتّْوبّخْ إِ-ث، إِنَّا: ”وَارْ إِتِّيڒِي، أَ سِيذِي! مَانْ أَيَا وَارْ ذ أَشْ إِتّمْسَارْعمَّارْصْ.“ ٢٣ مَاشَا نتَّا إِنّقْڒبْ، إِنَّا إِ بُوطْرُوسْ: ”فّغْ خَافِي، أَ شِّيطَانْ، شكْ ذ إِشْثْ ن ثْعنْكْرِيفْثْ إِ نشّْ، مِينْزِي وَارْ شكْ إِشْقِي مِينْ إِدْجَانْ ن أَربِّي، مَاشَا مِينْ إِدْجَانْ ن إِوْذَانْ.“ ◘16:‏23 2 صم. 19‏:‏22. ٢٤ ڒخْذنِّي إِنَّا يَاسُوع إِ إِمحْضَارنْ نّسْ: ”مَاڒَا شَا ن إِجّنْ إِخْسْ أَذْ أَيِي إِضْفَارْ، أَذْ إِنْكَارْ إِخفْ نّسْ، أَذْ إِكْسِي صَّالِيبْ نّسْ ؤُشَا أَذْ أَيِي إِضْفَارْ. ◘16:‏24 مت. 10‏:‏38؛ مك. 8‏:‏34؛ لك. 9‏:‏23؛ 14‏:‏27. ٢٥ مِينْزِي ونِّي إِخْسنْ أَذْ إِسّنْجمْ ثُوذَارْثْ نّسْ، أَذْ ت إِودَّارْ، مَاشَا ونِّي إِ غَا إِودَّارنْ ثُوذَارْثْ نّسْ ذِي طّْوعْ إِنُو أَذْ ت يَافْ. ◘16:‏25 مت. 10‏:‏39؛ مك. 8‏:‏35؛ لك. 9‏:‏24؛ 17‏:‏33؛ يُوح. 12‏:‏25. ٢٦ مِينْزِي مَانْ ڒفْضڒْ إِ غَارسْ غَارْ بْنَاذمْ مَاڒَا يَارْبحْ دُّونشْثْ مَارَّا، مَاشَا إِڒْقفْ إِ-ث ذْرُوشْثْ ذِي ڒعْمَارْ نّسْ؟ نِيغْ مِينْ غَا إِوْشْ بْنَاذمْ إِ وصْڒَاحْ ن ڒعْمَارْ نّسْ؟ ◘16:‏26 إِزهد. 49‏:‏9؛ مك. 8‏:‏37؛ لك. 9‏:‏25. ٢٧ مِينْزِي مِّيسْ ن بْنَاذمْ أَذْ د-يَاسْ س ؤُعُودْجِي ن بَابَاسْ أَكْ-ذ لْمَالَاكَاثْ نّسْ، ؤُشَا خنِّي أَذْ إِخدْجصْ كُوڒْ إِجّنْ عْلَاحْسَابْ مِينْ إِڭَّا. ◘16:‏27 أَيُوبْ 34‏:‏11؛ إِزهد. 62‏:‏13؛ مت. 24‏:‏30؛ 25‏:‏31؛ 26‏:‏64؛ رُوم. 2‏:‏6. ٢٨ س ثِيذتّْ نشّْ أَذْ أَومْ إِنِيغْ، أَقَا شَا زڭْ إِنَا إِ ذَا إِبدّنْ، وَارْ تّْقِيسِينْ شَا ڒْْموْثْ أَڒْ غَا ژَترنْ مِّيسْ ن بْنَاذمْ إِتَّاسْ-د ذِي ثْڭلْذِيثْ نّسْ.“ ◘16:‏28 مك. 9‏:‏1؛ لك. 9‏:‏27.