أَذْلِيسْ إِقدّْسنْ مَاتَّا ٢٤

٢٤

أَوَاڒْ ن يَاسُوع خْ ثُوقَّاثْ ن دُّونشْثْ

١ خنِّي إِفّغْ يَاسُوع زِي زَّاوشْثْ ثَامقّْرَانْثْ مَاحنْذْ أَذْ يُويُورْ، مَاشَا ؤُسِينْ-د غَارسْ إِمحْضَارنْ نّسْ، سّشْننْ أَسْ ڒبْنِييَّاثْ ن زَّاوشْثْ ثَامقّْرَانْثْ. ◘ *

٢ نتَّا إِنَّا أَسنْ: ”مَا وَارْ ثژْرِيمْ مَارَّا مَانْ أَيَا؟ س ثِيذتّْ، نشّْ أَذْ أَومْ إِنِيغْ: وَارْ ذَا إِتّْغِيمِي ؤُڒَا ذ إِجّْ ن وژْرُو خْ وژْرُو نّغْنِي إِ وَارْ إِتّْنهْذِيمْ.“ ◘

٣ ؤُمِي ثُوغَا يَاسُوع إِقِّيمْ خْ وذْرَارْ ن زِّيثُونْ، ؤُسِينْ-د إِمحْضَارنْ نّسْ، ثُوغَا تّمْسَاوَاڒَانْ، نَّانْ أَسْ: ”إِنِي أَنغْ، مڒْمِي إِ غَا إِمْسَارْ أَيَا ؤُ مَانْ ڒعْڒَامثْ ن ثْوَاسِيثْ نّشْ ؤُ ن قطُّو ن دُّونشْثْ؟“ ◘ ٤ يَاسُوع يَارَّا-د، إِنَّا أَسنْ: ”حْضَامْ إِخفْ نْومْ، وَارْ كنِّيوْ إِخدّعْ حذْ. ◘ ٥ مِينْزِي أَطَّاسْ أَذْ د-أَسنْ س يِيسمْ إِنُو، أَذْ إِنِينْ: ’أَقَا نشّْ ذ لْمَاسِيحْ!‘، ؤُشَا أَذْ خذْعنْ أَطَّاسْ. ◘ ٦ ؤُشَا أَذْ ثسْڒمْ خْ ڭَارَّاثْ ؤُ خْ ڒخْبُورَاثْ ن إِمنْغَانْ. غَارْومْ أَقَا أَذْ ثڭّْوذمْ، مِينْزِي س ؤُغِيڒْ أَذْ يِيڒِي مَانْ أَيَا، مَاشَا وَارْ إِتِّيڒِي عَاذْ ذ أَنڭَّارْ. ٧ مِينْزِي ڒْْڭنْسْ أَذْ إِغوّغْ خْ إِجّْ ن ڒْْڭنْسْ نّغْنِي ؤُ ثَاڭلْذِيثْ خْ ثْڭلْذِيثْ نّغْنِي، أَذْ يِيڒِي ڒَْاژْ ذ ڒهْڒَاشَاثْ يوْعَارنْ ذ إِنْهزَّانْ ن ثمُّورْثْ ذَا ذ ذِيهَا. ◘ ٨ مَارَّا مَانْ أَيَا ذ بدُّو ن ڒوْجعْ ن ثَارُوثْ. ٩ خنِّي أَذْ كنِّيوْ د-أَوْينْ غَارْ ڒْْمحْنثْ ؤُشَا أَذْ كنِّيوْ نْغنْ، ؤُ مَارَّا ڒڭْنُوسْ أَذْ كنِّيوْ شَارْهنْ زِي سِّيبّثْ ن يِيسمْ إِنُو. ◘ ١٠ ڒخْذنِّي أَذْ نْقَارْضنْ وَاطَّاسْ، أَذْ شَارْهنْ إِجّنْ ونّغْنِي ؤُشَا أَذْ سلّْمنْ إِجّنْ ونّغْنِي. ١١ أَذْ كَّارنْ وَاطَّاسْ ن إِنَابِييّنْ إِسّْخَارِّيقنْ ؤُشَا أَذْ غْوَانْ أَطَّاسْ. ◘ ١٢ س وَاطَّاسْ ن ڒْْمُوعْصِييّثْ أَذْ ثُوذْرُوسْ ثَايْرِي ن وَاطَّاسْ ن إِوْذَانْ، ◼ ◘ ١٣ مَاشَا وِي غَا إِصْبَارنْ غَارْ ؤُنڭَّارْ، أَقَا نتَّا أَذْ إِدَّارْ. ◘ ١٤ ڒخْبَارْ-أَ أَصبْحَانْ ن ثْڭلْذِيثْ أَذْ زَّايسْ بَارّْحنْ ذِي دُّونشْثْ مَارَّا ذ شّْهَاذثْ إِ مَارَّا ڒڭْنُوسْ ؤُشَا ڒخْذنِّي أَذْ د-يَاسْ ؤُنڭَّارْ.“

١٥ ”خْمِي غَا ثْژَارمْ ڒعْڒَامثْ ن نّْعِي ن وَاريّبْ، مِينْ خفْ إِسِّيوڒْ ؤُنَابِي ذَانِييَالْ، ذڭْ ومْشَانْ إِقدّْسنْ - أجّْ ونِّي ث إِ غَا إِغَارنْ أَذْ إِفْثنْ - ◘ ١٦ ڒخْذنِّي جّمْ إِنِّي إِدْجَانْ ذِي يَاهُوذِييَّا أَذْ أَروْڒنْ غَارْ إِذُورَارْ. ◘ ١٧ ونِّي إِدْجَانْ خْ ثْزقَّا وَارْ د-إِهكّْوِي شَا حِيمَا أَذْ إِكْسِي شَا زِي ثَادَّارْثْ نّسْ، ١٨ ؤُ ونِّي إِدْجَانْ ذڭْ إِيَّارْ، وَارْ د-إِذِّيكّْوِيڒْ شَا حِيمَا أَذْ د-يَاوِي أَرُّوضْ نّسْ. ١٩ ؤُشْثْ خْ ثِينِّي إِدْجَانْ س دّيْسثْ ذ ثِينِّي إِسُّوطُّوضنْ ذڭْ وُوسَّانْ نِّي! ٢٠ ژَتدْجمْ، حِيمَا وَارْ ثتِّيڒِي ثَاروْڒَا نْومْ ذِي ڒْْمشْثَا نِيغْ ذِي سّبْثْ، ◘ ٢١ مِينْزِي ڒخْذنِّي أَذْ ثِيڒِي ڒْْمحْنثْ ثَامقّْرَانْثْ إِ وَارْ إِمْسَارنْعمَّارْصْ زڭْ وَامِي ثدْجَا دُّونشْثْ أَڒْ إِ ڒخُّو ؤُعمَّارْصْ وَارْ ثتِّيڒِي عَاذْ. ◘ ٢٢ مْڒِي ؤُسَّانْ نِّي وَارْ تّْوَاسّْمژْينْ، خنِّي وَارْ إِتّْوَاسّنْجمْ ؤُڒَا ذ إِجّْ ن بْنَاذمْ، مَاشَا ؤُسَّانْ نِّي أَذْ تّْوَاسّْمژْينْ ذِي طّْوعْ ن يِينِّي إِتّْوَافَارْزنْ. ٢٣ مَاڒَا إِنَّا أَومْ حذْ: ’خْزَارمْ، أَقَا ذَا لْمَاسِيحْ!‘ نِيغْ: ’أَقَا-ث ذِيهَا!‘ وَارْ ث تِّيمْنمْ. ◘ ٢٤ مِينْزِي أَذْ إِڒِينْ إِمَاسِيحنْ إِفَالْسُوثنْ ذ إِنَابِييّنْ إِسّْخَارِّيقنْ، أَذْ ڭّنْ ڒعْڒَامَاثْ مْغَارنْثْ، حِيمَا، مْڒِي زمَّارنْ، أَذْ خذْعنْ عَاوذْ إِنِّي إِتّْوَافَارْزنْ. ◘ ٢٥ خْزَارمْ، أَقَا نِّيغْ أَومْ ث قْبڒْ. ٢٦ مَاڒَا نَّانْ أَومْ: ’خْزَارمْ، نتَّا أَقَا-ث ذِي ڒخْڒَا!‘، وَارْ تّْرِيحمْ شَا ذِينْ، نِيغْ: ’خْزَارمْ، نتَّا أَقَا-ث ذَاخڒْ إِ وخَّامْ!‘، وَارْ ت تِّيمْنمْ. ◘ ٢٧ مِينْزِي أَمْ وَاجَّاجْ إِ د-إِتّفّْغنْ زِي شَّارْقْ ؤُشَا إِتّڭّْ ثَافَاوْثْ أَڒْ ڒْْغَارْبْ، أَمُّو إِ غَا ثِيڒِي ثْوَاسِيثْ ن مِّيسْ ن بْنَاذمْ. ٢٨ مَانِي غَا ثِيڒِي أَرِّيمثْ ذِيهَا أَذْ مُوننْ إِڭِيذَارنْ.“ ◘

٢٩ ”ڒخْذنِّي أَوَارْنِي ڒْْمحْنثْ ن وُوسَّانْ نِّي، أَذْ ثْبَارْشنْ ثْفُوشْثْ ؤُ ثَازِيرِي وَارْ ثتِّيشْ عَاذْ طّْيَا نّسْ ؤُ إِثْرَانْ أَذْ د-وْضَانْ زڭْ ؤُجنَّا ؤُ صُّولَاطَاثْ ن إِجنْوَانْ أَذْ تّْوَانْهزّنْثْ. ◘ ٣٠ خنِّي أَذْ د-ثضْهَارْ ڒعْڒَامثْ ن مِّيسْ ن بْنَاذمْ ذڭْ ؤُجنَّا ؤُ مَارَّا ثِيقبَّاڒْ ن ثمُّورْثْ أَذْ وْثنْثْ أَڭجْذُورْ ؤُشَا أَذْ ژَترنْثْ مِّيسْ ن بْنَاذمْ يُوسَا-د خْ إِسيْنُوثنْ ن ؤُجنَّا س جّهْذْ ؤُ س ؤُعُودْجِي أَطَّاسْ. ◘ ٣١ نتَّا أَذْ إِسّكّْ لْمَالَاكَاثْ نّسْ س ڒْْحسّْ إِجهْذنْ ن ؤُسُوضِي ذڭْ ؤُيِيشّْ ن إِشَارِّي، ؤُشَا أَذْ د-سّْمُوننْثْ إِنِّي إِتّْوَافَارْزنْ زِي أَربْعَا ن إِغزْذِيسنْ ن ؤُسمِّيضْ، زِي طَّارْفْ أَنڭَّارُو ن إِجنْوَانْ أَڒْ ونّغْنِي.“ ◘

٣٢ ”ڒمْذمْ زڭْ ؤُمذْيَا ن وَارْثُو: خْمِي غَا ذوْڒنْ ڒفْرُوعْ نّسْ ذ إِڒقَّاغنْ، أَذْ د-سُّوفّْغنْ ثِيفْرَايْ، أَذْ ثسّْنمْ أَقَا أَنبْذُو يُوذسْ-د. ◘ ٣٣ أَمُّو عَاوذْ كنِّيوْ، خْمِي غَا ثْژَارمْ مَارَّا مَانْ أَيَا، أَذْ ثسّْنمْ أَقَا يُوذسْ-د، غَارْ ثوَّارْثْ.“

٣٤ ”س ثِيذتّْ، نشّْ أَذْ أَومْ إِنِيغْ: جِّيڒْ-أَ وَارْ إِعدُّو أَڒْ غَا إِمْسَارْ مَانْ أَيَا مَارَّا. ٣٥ أَجنَّا ذ ثمُّورْثْ أَذْ عْذُونْ، مَاشَا أَوَاڒنْ إِنُو وَارْعدُّونْعمَّارْصْ. ◘

٣٦ مَاشَا خْ وَاسّْ نِّي نِيغْ خْ ثَاسَاعّثْ نِّي وَارْ خَاسْ إِسِّينْ ؤُڒَا ذ إِجّْ، ؤُڒَا ذ لْمَالَاكَاثْ ن إِجنْوَانْ، مْغِيرْ بَابَا وحّْذسْ. ◘ ٣٧ أَمْ مَامّشْ ثُوغَا إِدْجَا ذڭْ وُوسَّانْ ن نُوحْ أَمُّو إِ غَا ثِيڒِي غَارْ ثْوَاسِيثْ ن مِّيسْ ن بْنَاذمْ. ◘ ٣٨ مِينْزِي أَمْ مَامّشْ ثنْ ثُوغَا ذڭْ وُوسَّانْ قْبڒْ طُّوفَانْ، تّتّنْ، سسّنْ، مدْجْشنْ ؤُ سّْمدْجَاشنْ أَڒْ أَسّْ إِ ذِي يُوذفْ نُوحْ غَارْ ؤُغَارَّابُو، ◼ ◘ ٣٩ ؤُشَا وَارْ ؤُشِينْ وَالُو أَڒَامِي د-يُوسَا طُّوفَانْ، إِمْحَا إِ-ثنْ مَارَّا، أَمُّو إِ غَا ثِيڒِي غَارْ ثْوَاسِيثْ ن مِّيسْ ن بْنَاذمْ. ٤٠ ذِي ڒْْوقْثْ نِّي أَذْ إِڒِينْ ثْنَاينْ ذڭْ إِيَّارْ، إِجّنْ أَذْ ث كْسِينْ ؤُ ونّغْنِي أَذْ ث جّنْ. ◘ ٤١ ثْنَاينْ ن ثمْغَارِينْ أَذْ حَارْينْثْ س ثْسِيرْثْ، إِشْثنْ أَذْ ت كْسِينْ ؤُ ثنّغْنِي أَذْ ت جّنْ. ٤٢ س ؤُيَا حْضَامْ، مِينْزِي وَارْ ثسِّينمْ شَا ذِي مَانْ ثَاسَاعّثْ إِ د غَا يَاسْ سِيذِيثْومْ. ◘ ٤٣ مَاشَا سّْنمْ أَيَا: مَاڒَا بَابْ ن ثَادَّارْثْ إِسّنْ ذِي مَانْ حطُّو ن دْجِيڒثْ إِ د غَا يَاسْ ؤُشفَّارْ، إِڒِي إِقِّيمْ إِحطَّا، وَارْ ث إِتّجِّي أَذْ يَاذفْ غَارْ ثَادَّارْثْ نّسْ. ◘ ٤٤ س ؤُيَا، إِڒِيمْ ثْوجْذمْ، مِينْزِي مِّيسْ ن بْنَاذمْ أَذْ د-يَاسْ ذڭْ إِشْثْ ن ثْسَاعّثْ وَارْ ت ثتّْرِيجِيمْ.“

٤٥ ”وِي إِدْجَانْ خنِّي ذ أَمْسخَّارْ أَمْثِيقِّي ذ أَمِيغِيسْ إِ إِڭَّا بَابْ نّسْ، حِيمَا أَذْ إِبْضَا خْ أَيْثْبَابْ ن ثَادَّارْثْ نّسْ مِينْ غَا شّنْ ذِي ڒْْوقْثْ نّسْ؟◘ ٤٦ سّعْذْ ن ؤُمْسخَّارْ ونِّي إِ غَا يَافنْ سِيذِيسْ إِڒْهَا أَمُّو خْمِي د غَا يَاسْ. ٤٧ س ثِيذتّْ، نشّْ أَذْ أَومْ إِنِيغْ، أَذْ ث إِڭّْ خْ مَارَّا أَڭْڒَا نّسْ. ٤٨ مَاشَا مَاڒَا أَمْسخَّارْ أَعفَّانْ نِّي أَذْ يِينِي ذڭْ وُوڒْ نّسْ: ’سِيذِي إِنُو إِعطَّاڒْ مَاحنْذْ أَذْ د-يَاسْ!‘، ٤٩ ؤُشَا إِبْذَا إِشَّاثْ إِمْسخَّارنْ إِمْعَاشَارنْ نّسْ، أَذْ إِشّْ أَذْ إِسُو أَكْ-ذ إِمسْكَارنْ، ٥٠ خنِّي أَذْ د-يَاسْ سِيذِيسْ ن ؤُمْسخَّارْ نِّي ذڭْ إِجّْ ن وَاسّْ إِ ذِي وَارْ ث إِتّْرِيجِي ؤُ ذڭْ إِشْثْ ن ثْسَاعّثْ وَارْ ت إِسِّينْ، ٥١ أَذْ ث إِقسّْ ذ إِوثْوِيثنْ ؤُشَا أَذْ ثِيڒِي ثسْغَارْثْ نّسْ أَكْ-ذ إِمْنَافْقنْ. ذِينْ إِ غَا يِيڒِينْ إِمطَّاونْ ذ ؤُغزِّي ن ثغْمَاسْ.“ ◘

◘٢٤:١ 24:‏1 [مك. 13‏:‏1‏-‏37؛ لك. 12‏:‏41‏-‏48؛ 17‏:‏26‏-‏30، 34‏-‏36؛ 21‏:‏5‏-‏33]

◘٢٤:٢ 24:‏2 1 إِج. 9‏:‏7، 8؛ مِيخَا 3‏:‏12؛ لك. 19‏:‏44.

◘٢٤:٣ 24:‏3 مك. 13‏:‏1، 3؛ لك. 21‏:‏7؛ ڒخ. 1‏:‏6.

◘٢٤:٤ 24:‏4 إِرْم. 29‏:‏8؛ أَفا. 5‏:‏6؛ كُول. 2‏:‏18؛ 2 تس. 2‏:‏3؛ 1 يُوح. 4‏:‏1.

◘٢٤:٥ 24:‏5 إِرْم. 14‏:‏14؛ 23‏:‏25؛ يُوح. 5‏:‏43.

◘٢٤:٧ 24:‏7 إِشا. 19‏:‏2.

◘٢٤:٩ 24:‏9 مت. 10‏:‏17؛ لك. 21‏:‏11، 12؛ يُوح. 15‏:‏20؛ 16‏:‏2؛ أَسَا. 2‏:‏10.

◘٢٤:١١ 24:‏11 2 بُط. 2‏:‏1.

◼٢٤:١٢ 24:‏12 ’ثَايْرِي‘ - نِيغْ ’ڒمْحِيبّثْ‘.

◘٢٤:١٢ 24:‏12 2 تِيم. 3‏:‏1.

◘٢٤:١٣ 24:‏13 مت. 10‏:‏22؛ مك. 13‏:‏13؛ لك. 21‏:‏19؛ أَسَا. 2‏:‏7، 10؛ 3‏:‏10.

◘٢٤:١٥ 24:‏15 دَان. 9‏:‏27؛ مك. 13‏:‏14؛ لك. 21‏:‏20.

◘٢٤:١٦ 24:‏16 مك. 13‏:‏14؛ لك. 21‏:‏21

◘٢٤:٢٠ 24:‏20 ڒخ. 1‏:‏12.

◘٢٤:٢١ 24:‏21 دَان. 12‏:‏1.

◘٢٤:٢٣ 24:‏23 مك. 13‏:‏21؛ لك. 21‏:‏8.

◘٢٤:٢٤ 24:‏24 أَعَوذ. 13‏:‏2؛ 2 تس. 2‏:‏11.

◘٢٤:٢٦ 24:‏26 لك. 17‏:‏23.

◘٢٤:٢٨ 24:‏28 أَيُوبْ 39‏:‏30؛ لك. 17‏:‏37.

◘٢٤:٢٩ 24:‏29 إِشا. 13‏:‏10؛ 34‏:‏4؛ حِز. 32‏:‏7؛ يُووِ. 3‏:‏4؛ 3‏:‏15؛ مك. 13‏:‏24؛ لك. 21‏:‏25.

◘٢٤:٣٠ 24:‏30 دَان. 7‏:‏10؛ مت. 16‏:‏27؛ 25‏:‏31؛ 26‏:‏64؛ مك. 13‏:‏26؛ 14‏:‏62؛ لك. 21‏:‏27؛ ڒخ. 1‏:‏11؛ 2 تس. 1‏:‏10؛ أَسَا. 1‏:‏7.

◘٢٤:٣١ 24:‏31 1 كُور. 15‏:‏52؛ 1 تس. 4‏:‏16.

◘٢٤:٣٢ 24:‏32 مك. 13‏:‏28؛ لك. 21‏:‏29.

◘٢٤:٣٥ 24:‏35 إِزهد. 102‏:‏27؛ إِشا. 51‏:‏6؛ مك. 13‏:‏31؛ عبر. 1‏:‏11.

◘٢٤:٣٦ 24:‏36 ڒخ. 1‏:‏7

◘٢٤:٣٧ 24:‏37 أَمز. 6‏:‏2؛ لك. 17‏:‏26؛ 1 بُط. 3‏:‏20؛ 2 بُط. 2‏:‏5.

◼٢٤:٣٨ 24:‏38 ’طُّوفَانْ‘ - إِخْسْ أَذْ يِينِي ڒْْحمْڒثْ ثَامقّْرَانْثْ خْ مَارَّا دُّونشْثْ ذڭْ وُوسَّانْ ن نُوحْ، عْڒَاحَاڒْ أَڒْفَايْنْ ؤُ-خمْسَا-مْيَا ن إِسڭّْوُوسَا قْبڒْ مَا أَذْ إِخْڒقْ لْمَاسِيحْ. خْزَارْ أَمز. 6.

◘٢٤:٣٨ 24:‏38 أَمز. 7‏:‏7.

◘٢٤:٤٠ 24:‏40 لك. 17‏:‏34؛ 1 تس. 4‏:‏17.

◘٢٤:٤٢ 24:‏42 مت. 25‏:‏13؛ مك. 13‏:‏33؛ لك. 12‏:‏40؛ 21‏:‏36.

◘٢٤:٤٣ 24:‏43 لك. 12‏:‏39؛ 1 تس. 5‏:‏2؛ 2 بُط. 3‏:‏10؛ أَسَا. 3‏:‏3؛ 16‏:‏15.

◘٢٤:٤٥ 24:‏45 مت. 25‏:‏21

◘٢٤:٥١ 24:‏51 مت. 8‏:‏12؛ 13‏:‏42؛ 22‏:‏13؛ 25‏:‏30؛ لك. 13‏:‏28.