أَذْلِيسْ إِقدّْسنْ مِيخَا ٦

أَشثْشِي ن سِيذِي خْ ڒْْڭنْسْ نّسْ ؤُ خْ ؤُرْشَالِيمْ

١ ”سْڒمْ خنِّي مِينْ إِقَّارْ سِيذِي:

كَّارْ، شَارّعْ زَّاثْ إِ وُوذمْ ن إِذُورَارْ،

ؤُ أجّْ ثِيوْرِيرِينْ أَذْ سْڒنْثْ إِ ثْمِيجَّا نّشْ!

٢ سْڒمْ، أَ إِذُورَارْ، إِ دّعْوثْ ن سِيذِي،

ؤُڒَا ذ كنِّيوْ، ذْسُوسَا إِمثْننْ ن ثمُّورْثْ،

مِينْزِي سِيذِي غَارسْ إِشْثْ ن دّعْوثْ

أَكْ-ذ ڒْْڭنْسْ نّسْ

نتَّا إِڭُّورْ غَارْ ثَادَّارْثْ ن شّْرعْ

أَكْ-ذ إِسْرَائِيل.“ ◘

٣ ”أَ ڒْْڭنْسْ إِنُو، مِينْ ذ أَشْ ڭِّيغْ،

ؤُ س مَانْثنْ إِ زِي شكْ سِّيحْڒغْ؟

شهّذْ ضِيدّْ إِنُو!

٤ نشّْ نذْهغْ شكْ زِي ثمُّورْثْ ن مِيصْرَا،

زِي ثَادَّارْثْ ن ثسْمُوغِي.

نشّْ سّكّغْ-د مُوسَا

ذ هَارُونْ ذ مَارْيَامْ

زَّاثْ إِ ؤُغمْبُوبْ نّشْ. ◘

٥ أَ ڒْْڭنْسْ إِنُو، فكَّارْ مْلِيحْ ذِي ڒْْغَارْ

إِ ثُوغَا إِنكّْوَا أَذْ يڭّْ بَالَاكْ،

أَجدْجِيذْ ن مُوآبَ،

ؤُ ذِي مِينْ خَاسْ د-يَارَّا بِيلْعَامْ،

مِّيسْ ن بَاعُورْ

ؤُ ذِي مِينْ إِمْسَارنْ زِي شِيطِّيمْ أَڒْ جِيلْجَالْ،

حِيمَا أَذْ ثسّْنذْ

ثِيمڭَّا إِسڭّْذنْ ن سِيذِي.“ ◘

مِينْ إِخْسْ سِيذِي زِي ڒْْڭنْسْ نّسْ؟

٦ ”س مِينْ زِي غَا رَاحغْ

أَذْ مّڒْقِيغْ أَكْ-ذ سِيذِي،

أَذْ أَضَارغْ زَّاثْ إِ أَربِّي يُوعْڒَانْ؟

مَا أَذْ رَاحغْ أَذْ ث مّڒْقِيغْ

س ثْغَارْصَا ن وشْمَاضْ،

نِيغْ س إِعجْمِييّنْ ن إِجّْ ن ؤُسڭّْوَاسْ؟ ◼

٧ مَا أَذْ يَارْضَا سِيذِي

س ڒُْوڒُوفْ ن إِشَارِّييّنْ،

سعشْرَا ن ڒُْوڒُوفْ ن ثْغزْرَاثِينْ ن زّشْثْ؟

مَا أَذْ وْشغْ أَمنْزُو إِنُو إِ ؤُخطُّو إِنُو،

ڒْْغِيدْجثْ ن ؤُعذِّيسْ إِنُو

إِ دّْنُوبْ ن ڒعْمَارْ إِنُو؟

٨ نتَّا إِسَّارْڭبْ إِ شكْ، أَ بْنَاذمْ،

مِينْ إِشْنَانْ،

ؤُ مِينْ زَّايكْ إِتّتَّارْ سِيذِي،

أَقَا أَذْ ثڭّذْ ڒْْخَارْ،

أَذْ ثخْسذْ ثَامخْسِيوْثْ إِشوَّارنْ،

ؤُ أَذْ ثُويُورذْ أَكْ-ذ أَربِّي نّشْ

س ؤُوَاضعْ!“ ◘

أَردّدْجْ ن إِعفَّاننْ

٩ ”ثْمِيجَّا ن سِيذِي ثتّْڒَاغَا إِ ثنْذِينْثْ.

إِسمْ نّشْ إِتَّاوِي-د ؤُفكِّي.

سْڒمْ إِ وعْمُوذْ

ؤُ غَارْ ونِّي ث-إِ-د إِسّكّنْ!

١٠ مَا ذِينْ عَاذْ ڒخْزِينْ شُّورنْ س ڒْْغَارْ

ذِي ثَادَّارْثْ ن ؤُعفَّانْ

ؤُڒَا ذ إِجّْ ن نّْعِي ن ڒْْمُوذْ ن إِفَا إِنْقصْ؟

١١ مَا إِزمَّارْ أَذْ إِڒِيغْ ذ أَمزْذَاڭْ

س ڒْْمِيزَانَاثْ ن ڒْْغَارْ،

ؤُ س يِيشْثْ ن ثشْيَارْثْ ثشُّورْ

س ڒوْزْنَاثْ إِغشّنْ؟ ◘

١٢ أَيْثْ بُو-وَاڭْڒَا نّسْ أَقَا شُّورنْ س لْعُونْفْ،

ؤُڒَا ذ إِمزْذَاغْ نّسْ قَّارنْ إِخَارِّيقنْ

ؤُ إِڒسْ نْسنْ أَقَا إِتّْغشَّا

ذڭْ ؤُقمُّومْ نْسنْ.“ ◘

١٣ ”خنِّي نشّْ أَقَا جَارْحغْ شمْ س ثيِّيثَا،

أَقَا ثتّْوَاردّْدْجذْ

زِي سِّيبّثْ ن دّْنُوبْ نّمْ.

١٤ أَذْ ثشّذْ، مَاشَا وَارْ ثتّْجِيوِينذْ،

ؤُ أَذْ ذَايمْ يِيڒِي ڒَْاژْ ذِي ذَاخڒْ نّمْ.

أَذْ ثفّْغذْ،

مَاشَا وَارْ ثْنجّْمذْ،

ؤُ مِينْ إِنجْمنْ،

أَذْ ث سّعْذُوغْ إِ سِّيفْ. ◘

١٥ ڭُّورْ أَذْ ثْزَارْعذْ، مَاشَا وَارْ ثْمجَّارذْ،

أَذْ ثدّْزذْ أَژمُّورْ،

مَاشَا وَارْ ثْذهّْنذْ إِخفْ نّمْ س زّشْثْ

أَذْ ثْژمّذْ ؤُڒَا ذ بِينُو ن جْذِيذْ زڭْ ؤُضِيڒْ،

مَاشَا وَارْ ثسّسّذْ بِينُو. ◘

١٦ مَاغَارْ ڒْْڭنْسْ إِحطَّانْ ثِيوصَّا ن عُومْرِي

ؤُ مَارَّا ثِيمڭَّا ثِيعفَّانِينْ

ن ثَادَّارْثْ ن أَخَابْ،

ؤُ كنِّيوْ ثْضفَّارمْ ڒشْوَارْ نْسنْ،

أَڒَامِي شمْ إِ غَا يَارّغْ

ذ إِشْثْ ن ڒْْقشْعثْ ن ؤُنخْڒِيعْ

ؤُڒَا ذ إِمزْذَاغْ نّسْ إِ ؤُسمْژِي.

أَمُّو إِ غَا ثَارْبُومْ ڒْْحڭْرَا ن ڒْْڭنْسْ إِنُو.“ ◘

◘٦:٢ 6:‏2 حُوش. 4‏:‏1

◘٦:٤ 6:‏4 ؤُف. 12‏:‏51؛ 14‏:‏30؛ 20‏:‏2

◘٦:٥ 6:‏5 ڒخْڒ. 22‏:‏5؛ 23‏:‏7؛ 25؛ ياش. 5

◼٦:٦ 6:‏6 ’أَمْوَا‘ - نِيغْ ’أَينْذُوزْ‘ نِيغْ ’يُوڭُّو‘.

◘٦:٨ 6:‏8 أَعَوذ. 10‏:‏12

◘٦:١١ 6:‏11 حُوش. 12‏:‏8

◘٦:١٢ 6:‏12 إِرْم. 9‏:‏7

◘٦:١٤ 6:‏14 حُوش. 4‏:‏10

◘٦:١٥ 6:‏15 أَعَوذ. 28‏:‏38؛ Ḥag. 1‏:‏6

◘٦:١٦ 6:‏16 1 إِج. 16‏:‏25، 26، 30‏-‏34