أَذْلِيسْ إِقدّْسنْ مَارْكُوسْ ١٠

١٠

يَاسُوع إِسِّيوڒْ خْ ڒمْڒَاشْ ذ وَادْجَافْ

١ إِكَّارْ، يُويُورْ سّنِّي ؤُشَا يِيوضْ غَارْ ثمُّورْثْ ن يَاهُوذِييَّا، غَارْ ومْشَانْ ن ؤُژكّْوِي ن لْ-ؤُرْذُونْ. مُوننْ-د خَاسْ ڒْْغَاشِي أَطَّاسْ ؤُ عَاوذْ ثُوغَا إِسّڒْمَاذْ إِ-ثنْ أَمْ مَامّشْ ثُوغَا إِنُّومْ. ◘ ٢ ؤُسِينْ-د غَارسْ إِفَارِيسِييّنْ، سّقْسَانْ ث حِيمَا أَذْ ث جَارّْبنْ: ”مَا إِحدْجڒْ إِ ورْيَازْ أَذْ إِدْجفْ إِ ثمْغَارْثْ نّسْ؟“ ٣ يَارَّا-د، إِنَّا أَسنْ: ”مِينْ خفْ ثُوغَا كنِّيوْ يُومُورْ مُوسَا؟“ ٤ نَّانْ: ”مُوسَا إِوْشَا تّسْرِيحْ أَذْ ثتّْوَارِي ثبْرَاثْ ن وَادْجَافْ مَاحنْذْ أَرْيَازْ أَذْ أَسْ إِدْجفْ.“ ◘ ٥ يَارَّا-د يَاسُوع، إِنَّا أَسنْ: ”خْ سِّيبّثْ ن ڒقْسَاحثْ ن وُوڒَاونْ نْومْ أَقَا يُورَا أَومْ ثَاوْصيّثْ-أَ، ٦ مَاشَا زِي بدُّو زِي مَانِي ثتّْوَاڭّْ دُّونشْثْ، إِخْڒقْ إِ-ثنْ-د أَربِّي ذ أَوْثمْ ذ ثوْثمْثْ. ◘ ٧ س ؤُينِّي أَذْ إِسْمحْ ورْيَازْ ذِي بَابَاسْ ذ يمَّاسْ، أَذْ إِقّنْ غَارْ ثمْغَارْثْ نّسْ، ◘ ٨ ؤُشَا ثْنَاينْ إِذْسنْ خنِّي أَذْ إِڒِينْ ذ إِشْثْ ن دَّاثْ، ؤُشَا أَمُّو وَارْ تِّيڒِينْ عَاذْ ذ ثْنَاينْ، مَاشَا أَذْ إِڒِينْ ذ إِشْثْ ن أَرِّيمثْ. ◘ ٩ س ؤُيَا مِينْ إِسّْمُونْ أَربِّي، وَارْ ث إِبطِّي بْنَاذمْ.“ ◘

١٠ ذِي ثَادَّارْثْ سّقْسَانْ ث إِمحْضَارنْ نّسْ عَاوذْ خْ مَانْ أَيَا. ١١ إِنَّا أَسنْ: ”وِي غَا إِدْجْفنْ إِ ثمْغَارْثْ نّسْ ؤُشَا أَذْ يَاوِي ثنّغْنِيثْ، أَقَا نتَّا إِزْنَا. ◘ ١٢ ؤُ مَاڒَا ثَامْغَارْثْ ثدْجفْ إِ ورْيَازْ نّسْ، ؤُشَا خنِّي أَذْ ثِيڒِي إِ ورْيَازْ نّغْنِي، أَقَا نتَّاثْ ثزْنَا.“

يَاسُوع إِبَاركْ إِحنْجِيرنْ

١٣ إِوْينْ أَسْ-د إِحنْجِيرنْ حِيمَا أَذْ ثنْ إِحَاذَا، مَاشَا إِمحْضَارنْ وبّْخنْ إِنِّي ثنْ د-يِيوْينْ. ◘ ١٤ ؤُمِي إِژْرَا يَاسُوع مَانْ أَيَا، إِخيّقْ، إِنَّا أَسنْ: ”جّمْ إِحنْجِيرنْ أَذْ غَارِي د-أَسنْ، وَارْ ثنْ منّْعمْ، مِينْزِي ثَاڭلْذِيثْ ن أَربِّي ن يِينِّي إِدْجَانْ أَمْ نِيثْنِي. ◘ ١٥ س ثِيذتّْ، نشّْ أَذْ أَومْ إِنِيغْ: ”وِي وَارْ إِقبّْڒنْ ثَاڭلْذِيثْ ن أَربِّي أَمْ يِيجّْ ن ؤُحنْجِيرْ، أَقَاعمَّارْصْ وَارْ غَارسْ إِتِّيذفْ.“ ١٦ إِذَارّعْ أَسنْ، ؤُشَا أَمْ خَاسنْ إِسَّارْسْ إِفَاسّنْ نّسْ، إِبَارْكْ إِ-ثنْ. ◘

يَاسُوع ذ ورْيَازْ بُو-وَاڭْڒَا

١٧ ؤُمِي إِفّغْ مَاحنْذْ أَذْ يُويُورْ ذڭْ وبْرِيذْ، يُوزّڒْ-د غَارسْ إِجّنْ، إِوْضَا أَسْ غَارْ إِفَادّنْ ؤُشَا إِسّقْسَا ث، إِنَّا: ”أَ أَمْسغَّارْ أَصبْحَانْ، مِينْ غَا ڭّغْ حِيمَا أَذْ وَارْثغْ ثُوذَارْثْ إِتّْذُومَانْ؟“ ◘ ١٨ إِنَّا أَسْ يَاسُوع: ”مَايمِّي ذ أَيِي ثتّْڒَاغِيذْ: ’أَصبْحَانْ‘؟ ؤُڒَا ذ إِجّْ وَارْ إِدْجِي ذ أَصبْحَانْ، مْغِيرْ إِجّنْ وَاهَا: أَربِّي! ١٩ شكْ ثسّْنذْ ثِيوصَّا: ’وَارْ زنِّي، وَارْ نقّْ، وَارْ تِّيشَارْ، وَارْ شهّذْ س ژُورْ، وَارْ تّْغشَّا، وقَّارْ بَابَاشْ ذ يمَّاشْ.‘ “ ◘ ٢٠ يَارَّا-د، إِنَّا أَسْ: ”وَاهْ، أَ أَمْسغَّارْ، أَقَا مَارَّا ثِينَا ثُوغَا ضفَّارغْ ثنْثْ زِي ثمْژِي إِنُو.“ ٢١ إِخْزَارْ ذَايسْ يَاسُوع ؤُشَا إِسّْعِيزّْ إِ-ث، إِنَّا أَسْ: ”ثقِّيمْ إِشْثنْ عَاذْ: ؤُيُورْ، زنْزْ مَارَّا مِينْ غَاركْ، أوْشْ إِ-ث إِ إِمزْڒَاضْ ؤُشَا أَذْ غَاركْ يِيڒِي إِجّْ ن ڒْْكنْزْ ذڭْ ؤُجنَّا. خنِّي كْسِي صَّالِيبْ نّشْ، ضْفَارْ أَيِي-د!“ ◘ ٢٢ مَاشَا نتَّا ثُوغَا إِحْزنْ س وَاوَاڒْ نِّي، ؤُشَا إِرُوحْ إِشْضنْ، مِينْزِي ثُوغَا غَارسْ أَطَّاسْ ن وَاڭْڒَا.

٢٣ إِخْزَارْ يَاسُوع غَارْ إِمحْضَارنْ نّسْ، إِنَّا أَسنْ: ”مشْحَاڒْ إِوْعَارْ خْ يِينِّي غَارْ إِدْجَا أَڭْڒَا حِيمَا أَذْ أَذْفنْ غَارْ ثْڭلْذِيثْ ن أَربِّي!“ ◘ ٢٤ ثْبهْثنْ إِمحْضَارنْ زڭْ وَاوَاڒنْ نّسْ. مَاشَا يَاسُوع إِعَاوذْ إِطّفْ ذڭْ وَاوَاڒْ، إِنَّا أَسنْ: ”أَ ثَارْوَا إِنُو، مشْحَاڒْ إِوْعَارْ خْ يِينِّي إِتّْشَاڒَانْ خْ وَاڭْڒَا نْسنْ مَاحنْذْ أَذْ د-أَذْفنْ غَارْ ثْڭلْذِيثْ ن أَربِّي! ٢٥ إِهْونْ أَذْ يَاذفْ وڒْغمْ زِي ثِيطّْ ن ثْسِينفْثْ زڭْ وَاذَافْ ن بُو-وَاڭْڒَا غَارْ ثْڭلْذِيثْ ن أَربِّي.“ ٢٦ إِمَّارْنِي ذَايْسنْ عَاذْ ؤُنخْڒِيعْ، نَّانْ إِ وَايَاوْيَا: ”وِي إِزمَّارنْ خنِّي أَذْ إِتّْوَاسّنْجمْ؟“ ٢٧ إِخْزَارْ ذَايْسنْ يَاسُوع، إِنَّا: ”غَارْ إِوْذَانْ وَارْ إِزمَّارْ، مَاشَا غَارْ أَربِّي وَارْ إِدْجِي أَمنِّي، مِينْزِي أَقَا غَارْ أَربِّي كُوڒْشِي ذِي ثْزمَّارْ نّسْ.“ ◘

ڒْمُونثْ ن وضْفَارْ ن يَاسُوع

٢٨ إِبْذَا بُوطْرُوسْ أَذْ يِينِي: ”خْزَارْ، أَقَا نشِّينْ نجَّا كُوڒْشِي، نضْفَارْ إِ شكْ-د.“ ◘ ٢٩ يَارَّا-د خَاسْ يَاسُوع، إِنَّا: ”س ثِيذتّْ، نشّْ أَذْ أَومْ إِنِيغْ: وَارْ ذِينْ إِدْجِي ؤُڒَا ذ إِجّنْ ونِّي إِسمْحنْ ذِي ثَادَّارْثْ نِيغْ ذڭْ أَيْثْمَاسْ نِيغْ ذِي يسّْمَاسْ نِيغْ ذِي بَابَاسْ نِيغْ ذِي يمَّاسْ نِيغْ ذِي ثمْغَارْثْ نِيغْ ذِي ثَارَّاوْثْ ؤُڒَا ذڭْ إِيَّارنْ ذِي طّْوعْ إِنُو ؤُ ذِي طّْوعْ ن ڒخْبَارْ أَصبْحَانْ، ٣٠ إِ وَارْ إِكسِّينْ مْيَا ن ثْسقَّارْ. ڒخُّو ذِي ڒْْوقْثْ-أَ أَذْ إِكْسِي ثُوذْرِينْ ذ أَيْثْمَاسْ ذ يسّْمَاسْ ذ ثْيمَّاثِينْ ذ ثَارَّاوْثْ ذ ييَّارنْ أَكْ-ذ ؤُمَارّثْ، ؤُشَا ذِي زّْمَانْ إِ د غَا يَاسنْ أَذْ إِكْسِي ثُوذَارْثْ إِتّْذُومَانْ. ٣١ مَاشَا أَطَّاسْ ن يِينِّي إِدْجَانْ ذ إِمزْوُورَا أَذْ إِڒِينْ ذ إِنڭُّورَا، ؤُشَا إِنِّي إِدْجَانْ ذ إِنڭُّورَا أَذْ إِڒِينْ ذ إِمزْوُورَا.“ ◘

يَاسُوع إِسَّاوَاڒْ خْ ڒْْموْثْ ذ ثْنُوكْرَا نّسْ إِ ثْوَاڒَا وِيسّْ ثْڒَاثَا

٣٢ ثُوغَا-ثنْ ذڭْ وبْرِيذْ مَاحنْذْ أَذْ ڭعّْذنْ غَارْ ؤُرْشَالِيمْ ؤُ يَاسُوع ثُوغَا إِزْوَارْ أَسنْ. نِيثْنِي ثُوغَا تّْبهْثنْ ؤُشَا ڭّْوذنْ ؤُمِي ث-إِ-د-ضفَّارنْ. إِكْسِي ثنْعَاشْ غَارْ ؤُغزْذِيسْ ؤُشَا إِبْذَا إِقَّارْ أَسنْ خْ مِينْ ذ أَسْ غَا إِمْسَارنْ، إِنَّا: ◘ ٣٣ ”خْزَارْ، نشِّينْ أَذْ نْڭعّذْ غَارْ ؤُرْشَالِيمْ ؤُ مِّيسْ ن بْنَاذمْ أَذْ إِمّوْشْ ذڭْ إِفَاسّنْ ن إِمقّْرَاننْ ن إِكهَّاننْ ذ إِمْسڒْمَاذنْ ن إِذْلِيسنْ، ؤُ نِيثْنِي أَذْ خَاسْ حكْمنْ س ڒْْموْثْ، أَذْ ث سلّْمنْ إِ ڒڭْنُوسْ. ٣٤ أَذْ ث سّحْقَارنْ، أَذْ ث هتّْكنْ س ؤُركُّوضْ، أَذْ خَاسْ سُّوسْفنْ، أَذْ ث نْغنْ، ؤُشَا ذڭْ وَاسّْ وِيسّْ ثْڒَاثَا أَذْ إِكَّارْ.“

ثُوثْرَا ن يَاعْقُوبْ ذ يُوحَانَّا

٣٥ يُوسَا-د غَارسْ يَاعْقُوبْ ذ يُوحَانَّا، ثَارْوَا ن زَابْذِي، نَّانْ أَسْ: ”أَ أَمْسغَّارْ، نخْسْ أَذْ أَنغْ ثڭّذْ مَارَّا مِينْ زَّايكْ غَا نتَّارْ.“ ◘ ٣٦ إِنَّا أَسنْ: ”مِينْ ثخْسمْ أَذْ أَومْ ڭّغْ؟“ ٣٧ نَّانْ أَسْ: ”أوْشْ أَنغْ أَذْ نقِّيمْ، إِجّنْ غَارْ ؤُفُوسِي نّشْ ؤُ ونّغْنِي غَارْ ؤُزڒْمَاضْ نّشْ، ذڭْ ؤُعُودْجِي نّشْ.“ ٣٨ مَاشَا نتَّا إِنَّا أَسنْ: ”أَقَا وَارْ ثسِّينمْ شَا مِينْ ثتَّارمْ. مَا ثْزمَّارمْ أَذْ ثسْومْ ڒْْكَاسْ إِ زِي غَا سْوغْ نشّْ نِيغْ أَذْ ثتّْوَاسّْغضْصمْ س ؤُسغْضصْ إِ زِي غَا تّْوَاسّْغضْصغْ نشّْ؟“ ◘ ٣٩ نَّانْ أَسْ: ”نْزمَّارْ!“ إِنَّا أَسنْ يَاسُوع: ”ڒْْكَاسْ إِ غَا سْوغْ نشّْ، أَذْ ث ثسْومْ، ؤُ أَسغْضصْ إِ زِي تّْوَاسّْغضْصغْ نشّْ، أَذْ زَّايسْ تّْوَاسّْغضْصمْ، ◼ ◘ ٤٠ مَاشَا أَغِيمِي خْ يفُوسْ إِنُو نِيغْ خْ ؤُزڒْمَاضْ إِنُو، وَارْ غَارِي إِدْجِي ذڭْ ؤُفُوسْ إِنُو مَاحنْذْ أَذْ ث وْشغْ، مَاشَا أَذْ إِمّوْشْ إِ يِينِّي ؤُمِي إِتّْوَاسّوْجذْ.“ ◘

٤١ ڒَْامِي سْڒِينْعشْرَا ن إِمحْضَارنْ مَانْ أَيَا، خيّْقنْ خْ يَاعْقُوبْ ذ يُوحَانَّا. ◘ ٤٢ خنِّي إِڒَاغَا أَسنْ-د يَاسُوع غَارسْ، إِنَّا أَسنْ: ”كنِّيوْ ثسّْنمْ بلِّي إِنِّي إِتّْوَاحسْبنْ ذ ڒْْحُوكَّامْ ن ڒڭْنُوسْ، أَقَا حكّْمنْ خَاسنْ، ؤُ إِمقّْرَاننْ نْسنْ، أَقَا تّْصدْجَاضنْ خَاسنْ. ◘ ٤٣ وَارْ إِتِّيڒِي أَمُّو جَارْ أَومْ، مَاشَا ونِّي إِخْسنْ أَذْ إِذْوڒْ ذ أَمقّْرَانْ جَارْ أَومْ، أَقَا نتَّا أَذْ يِيڒِي ذ أَمْسخَّارْ نْومْ، ◘ ٤٤ ؤُ ونِّي إِخْسنْ أَذْ يِيڒِي ذ أَمزْوَارُو جَارْ أَومْ، أَقَا نتَّا أَذْ يِيڒِي ذ أَمْسخَّارْ إِ مَارَّا. ٤٥ مِينْزِي عَاوذْ مِّيسْ ن بْنَاذمْ وَارْ د-يُوسِي، حِيمَا أَذْ خَاسْ سخَّارنْ، مَاشَا حِيمَا أَذْ إِخْذمْ، أَذْ إِوْشْ ثُوذَارْثْ نّسْ ذ أَصْڒَاحْ إِ وَاطَّاسْ ن إِوْذَانْ.“ ◘

أَسْڭنْفِي ن مِّيسْ ن ثِيمَاوُوسْ أَذَارْغَاڒْ

٤٦ إِوْضنْ-د غَارْ أَرِيحَا. ڒَْامِي د-إِفّغْ يَاسُوع زِي أَرِيحَا أَكْ-ذ إِمحْضَارنْ نّسْ ذ وَاطَّاسْ ن ڒْْغَاشِي، ثُوغَا ثِيمَاوُوسْ، مِّيسْ ن ثِيمَاوُوسْ، إِجّْ ن ورْيَازْ ذ أَذَارْغَاڒْ، إِقِّيمْ ذڭْ وبْرِيذْ، إِتّتَّارْ. ◘ ٤٧ ؤُمِي إِسْڒَا بلِّي يَاسُوع نَّاصِيرِي أَقَا-ث ذِينْ، إِبْذَا إِسْغُويُّو، إِقَّارْ: ”أَ، مِّيسْ ن ذَاوُوذْ، أَرْحمْ أَيِي!“ ٤٨ وبّْخنْ ث أَطَّاسْ حِيمَا أَذْ إِسْقَارْ، مَاشَا نتَّا إِقِّيمْ إِسْغُويُّو كْثَارْ: ”أَ مِّيسْ ن ذَاوُوذْ، أَرْحمْ أَيِي!“ ٤٩ إِبدّْ يَاسُوع ؤُشَا يُومُورْ أَذْ خَاسْ د-ڒَْاغَانْ. ڒَْاغَانْ-د إِ ؤُذَارْغَاڒْ، نَّانْ أَسْ: ”أڭّْ ؤُڒْ! كَّارْ، أَقَا إِتّْڒَاغَا-د خَاكْ!“ ٥٠ إِنْضَارْ ؤُذَارْغَاڒْ أَجدْجَابْ نّسْ، إِكَّارْ ؤُشَا يُوسَا-د غَارْ يَاسُوع. ٥١ يَارَّا-د يَاسُوع، إِنَّا أَسْ: ”مِينْ ثخْسذْ أَذْ أَشْ ث ڭّغْ؟“ إِنَّا أَسْ ؤُذَارْغَاڒْ: ”أَ أَمْسڒْمَاذْ إِنُو، حِيمَا أَذْ ثْوَاڒِيغْ.“ ٥٢ إِنَّا أَسْ يَاسُوع: ”خْزَارْ، لْ-إِيمَانْ نّشْ إِوْشَا أَشْ ثُوذَارْثْ!“ ڒخْذنِّي إِذْوڒْ إِتّْوَاڒَا، ؤُشَا إِضْفَارْ إِ-ث ذڭْ وبْرِيذْ. ◘

◘١٠:١ 10:‏1 [مت. 19‏:‏1‏-‏12] — مت. 19‏:‏1.

◘١٠:٤ 10:‏4 أَعَوذ. 24‏:‏1، 3؛ إِرْم. 3‏:‏1؛ مت. 5‏:‏31.

◘١٠:٦ 10:‏6 أَمز. 1‏:‏27، 2‏:‏24، 5‏:‏2؛ مت. 19‏:‏4.

◘١٠:٧ 10:‏7 أَمز. 2‏:‏24؛ 1 كُور. 6‏:‏16؛ أَفا. 5‏:‏31.

◘١٠:٨ 10:‏8 أَمز. 2‏:‏24؛ مت. 19‏:‏5، 6؛ أَفا. 5‏:‏31؛ 1 كُور. 6‏:‏16.

◘١٠:٩ 10:‏9 1 كُور. 7‏:‏10.

◘١٠:١١ 10:‏11 مت. 5‏:‏32؛ 19‏:‏9؛ لك. 16‏:‏18؛ 1 كُور. 7‏:‏10.

◘١٠:١٣ 10:‏13 [مت. 19‏:‏13‏-‏15؛ لك. 18‏:‏15‏-‏17] — مت. 19‏:‏13؛ لك. 18‏:‏15.

◘١٠:١٤ 10:‏14 مت. 18‏:‏3؛ 19‏:‏14؛ 1 كُور. 14‏:‏20؛ 1 بُط. 2‏:‏2.

◘١٠:١٦ 10:‏16 مت. 19‏:‏15؛ مك. 9‏:‏36.

◘١٠:١٧ 10:‏17 [مت. 19‏:‏16‏-‏30؛ لك. 18‏:‏18‏-‏30] — مت. 19‏:‏16؛ لك. 18‏:‏18.

◘١٠:١٩ 10:‏19 ؤُف. 20‏:‏12‏-‏16؛ 21‏:‏12؛ أَعَوذ. 5‏:‏16‏-‏20؛ أَعَوذ. 24‏:‏14؛ رُوم. 13‏:‏9.

◘١٠:٢١ 10:‏21 مت. 6‏:‏19؛ لك. 12‏:‏33؛ 1 تِيم. 6‏:‏17.

◘١٠:٢٣ 10:‏23 أَوڒن. 11‏:‏28؛ مت. 19‏:‏23؛ لك. 18‏:‏24.

◘١٠:٢٧ 10:‏27 أَيُوبْ 42‏:‏2؛ إِرْم. 32‏:‏17؛ زَاك. 8‏:‏6؛ لك. 1‏:‏37.

◘١٠:٢٨ 10:‏28 مت. 4‏:‏20؛ 19‏:‏27؛ لك. 5‏:‏11؛ 18‏:‏28.

◘١٠:٣١ 10:‏31 مت. 19‏:‏30؛ 20‏:‏16؛ لك. 13‏:‏30.

◘١٠:٣٢ 10:‏32 [مت. 20‏:‏17‏-‏19؛ لك. 18‏:‏31‏-‏34] — مت. 16‏:‏21؛ 17‏:‏22؛ 20‏:‏18؛ مك. 8‏:‏31؛ 9‏:‏31؛ لك. 9‏:‏22؛ 18‏:‏31؛ 24‏:‏7.

◘١٠:٣٥ 10:‏35 [مت. 20‏:‏20‏-‏28] — مت. 20‏:‏20.

◘١٠:٣٨ 10:‏38 مت. 20‏:‏22؛ لك. 12‏:‏50.

◼١٠:٣٩ 10:‏39 أَفسَّارْ - ڒْْكَاسْ إِ ثُوغَا إِسْوَا لْمَاسِيحْ أَقَا-ث ذ ڒعْذَابْ إِ إِكْسِي خْ صَّالِيبْ ؤُمِي أَغْضَابْ ن سِيذِي إِهْوَا خَاسْ ذِي طّْوعْ ن مَارَّا إِمذْنَابْ إِ ذِينْ إِدْجَانْ ؤُ أَذْ ذِينْ إِڒِينْ خْ ڒحْسَابْ صِّيفثْ ن أَذَامْ ونِّي إِخْضَانْ خْ سِيذِي أَربِّي (خْزَارْ إِشا. 53:4-7).

◘١٠:٣٩ 10:‏39 مت. 20‏:‏23

◘١٠:٤٠ 10:‏40 مت. 25‏:‏34.

◘١٠:٤١ 10:‏41 مت. 20‏:‏24.

◘١٠:٤٢ 10:‏42 مت. 20‏:‏25؛ لك. 22‏:‏25.

◘١٠:٤٣ 10:‏43 1 بُط. 5‏:‏3.

◘١٠:٤٥ 10:‏45 يُوح. 13‏:‏14؛ أَفا. 1‏:‏7؛ فِيل. 2‏:‏7؛ كُول. 1‏:‏14؛ 1 تِيم. 2‏:‏6؛ ثِيث. 2‏:‏14.

◘١٠:٤٦ 10:‏46 [مت. 20‏:‏29‏-‏34؛ لك. 18‏:‏35‏-‏43] — مت. 20‏:‏29؛ لك. 18‏:‏35.

◘١٠:٥٢ 10:‏52 مت. 9‏:‏22؛ مك. 5‏:‏34.