أَذْلِيسْ إِقدّْسنْ مَارْكُوسْ ١٣

١٣

أَبَارّحْ ن يَاسُوع خْ قطُّو ن دُّونشْثْ

١ أَڒَامِي د-إِفّغْ زِي زَّاوشْثْ ثَامقّْرَانْثْ، إِنَّا أَسْ إِجّنْ زڭْ إِمحْضَارنْ نّسْ: ”أَ أَمْسغَّارْ، خْزَارْ، مَامّشْ دْجَانْ إِژْرَا-يَا ذ ڒبْنِي-يَا!“ ◘ ٢ يَارَّا-د يَاسُوع، إِنَّا أَسْ: ”مَا ثژْرِيذْ ڒبْنِي-يَا إِمْغَارنْ؟ وَارْ ذَا إِتّْغِيمِي ؤُڒَا ذ إِجّْ ن وژْرُو خْ وژْرُو نّغْنِي إِ وَارْ إِتّْنهْذِيمْ.“ ◘

٣ ڒَْامِي ثُوغَا إِقِّيمْ خْ وذْرَارْ ن زِّيثُونْ قِيبَاتْشْ إِ زَّاوشْثْ ثَامقّْرَانْثْ، سّقْسَانْ ث بُوطْرُوسْ ذ يَاعْقُوبْ ذ يُوحَانَّا ذ أَنْذْرَاوُوسْ ڒَْامِي ثنْ ثُوغَا وحّذْسنْ: ◘ ٤ ”إِنِي أَنغْ مڒْمِي إِ غَا يِيڒِي مَانْ أَيَا، ؤُ مَانْ أَذْ ثِيڒِي ڒعْڒَامثْ أَقَا مَارَّا ثِيمسْڒَايْنْ-أَ أَذْ أَوْضنْثْ؟“ ◘

٥ إِبْذَا يَاسُوع إِقَّارْ أَسنْ: ”خْزَارمْ، حِيمَا وَارْ كنِّيوْ إِغكّْوِي حذْ. ◘ ٦ أَقَا أَطَّاسْ أَذْ د-أَسنْ س يِيسمْ إِنُو قَّارنْ: ’أَقَا ذ نشّْ!‘، ؤُشَا أَذْ غْوَانْ أَطَّاسْ. ◘ ٧ مَاڒَا ثسْڒِيمْ خْ إِمنْغَانْ ذ ڒخْبَارْ ن ڭَارَّاثْ، وَارْ تّْنخْڒِيعمْ شَا، مِينْزِي س ؤُغِيڒْ أَذْ يِيڒِي مَانْ أَيَا، مَاشَا وَارْ إِتِّيڒِي عَاذْ ذ أَنڭَّارْ. ٨ مِينْزِي ڒْْڭنْسْ أَذْ إِكَّارْ ضِيدّْ إِ ڒْْڭنْسْ نّغْنِي ؤُ ثَاڭلْذِيثْ ضِيدّْ إِ ثْڭلْذِيثْ نّغْنِي. أَذْ إِڒِينْ إِنْهزَّانْ ن ثمُّورْثْ زڭْ ومْشَانْ غَارْ ومْشَانْ نّغْنِي ؤُشَا أَذْ يِيڒِي ڒَْاژْ ذ ؤُغوُّوغْ. ثِيمسْڒَايِينْ-أَ ذ بدُّو ن ڒوْجعْ ن ثَارْوَا. ◘

٩ حْضَامْ إِخفْ نْومْ، مِينْزِي أَذْ كنِّيوْ سلّْمنْ إِ ثُوذْرِينْ ن شّْرعْ، أَذْ كنِّيوْ هتّْكنْ س ؤُركُّوضْ ذِي ثمْزِيذَاوِينْ نْسنْ ؤُشَا أَذْ كنِّيوْ سِّيوْضنْ غَارْ إِجدْجِيذنْ ذ ڒْْحُوكَّامْ ذِي سِّيبّثْ إِنُو، ذ شّْهَاذثْ إِ نِيثْنِي. ◘ ١٠ مَاشَا غَارْ ؤُمزْوَارْ إِتّْخصَّا أَذْ إِتّْوَابَارّحْ س ڒخْبَارْ أَصبْحَانْ ذِي مَارَّا ڒڭْنُوسْ. ١١ خْمِي كنِّيوْ إِ غَا ڭوّْذنْ حِيمَا أَذْ كنِّيوْ سلّْمنْ، وَارْ كسِّيمْ س ومْنُوسْ قْبڒْ زِي مِينْ غَا ثِينِيمْ، وَارْ ذَايسْ ثْخَارِّيصمْ شَا، مَاشَا مِينْ مَا ذ أَومْ إِ غَا إِمّوْشنْ ذِي ثْسَاعّثْ نِّي، سِيوْڒمْ زَّايسْ، مِينْزِي وَارْ ثدْجِيمْ ذ كنِّيوْ إِ إِسَّاوَاڒنْ، مَاشَا ذ أَرُّوحْ إِقدّْسنْ. ◘ ١٢ ؤُمَاسْ أَذْ إِسلّمْ ؤُمَاسْ مَاحنْذْ أَذْ ث نْغنْ، ؤُ بَابَاسْ أَذْ إِسلّمْ مِّيسْ، ؤُشَا أَذْ ثكَّارْ ثَارْوَا خْ لْوَالِيذِينْ نّسْ ؤُشَا أَذْ ثنْ نْغنْ. ◘ ١٣ أَذْ كنِّيوْ شَارْهنْ مَارَّا ذِي سِّيبّثْ ن يِيسمْ إِنُو، مَاشَا ونِّي إِ غَا إِصْبَارنْ أَڒْ أَنڭَّارْ، أَذْ إِتّْوَاسّنْجمْ. ◘

١٤ خْمِي غَا ثْژَارمْ نّْعِي ن وَاريّبْ، مِينْ خفْ ثُوغَا إِسَّاوَاڒْ ؤُنَابِي ذَانِييَالْ، إِتّْبدَّا مَانِي وَارْ إِتّْخصَّا أَذْ إِبدّْ - ونِّي إِغْرِينْ أَذْ إِفْهمْ! - ڒخْذنِّي إِتّْخصَّا إِ يِينِّي إِدْجَانْ ذِي يَاهُوذِييَّا، أَذْ أَروْڒنْ غَارْ إِذُورَارْ، ◘ ١٥ ؤُ ونِّي إِدْجَانْ خْ ثْزقَّا وَارْ د-إِهكّْوِي شَا غَارْ ثَادَّارْثْ ؤُ وَارْ إِتِّيذفْ شَا حِيمَا أَذْ إِكْسِي شَا زِي ثَادَّارْثْ نّسْ، ١٦ ؤُ ونِّي إِدْجَانْ ذڭْ إِيَّارْ وَارْ د-إِتّْعِيقِّيبْ شَا حِيمَا أَذْ إِكْسِي أَسڒْهَامْ نّسْ. ١٧ ؤُشْثْ خْ ثِينِّي إِدْجَانْ س دّيْسثْ ذ ثِينِّي إِسُّوطُوضنْ ذڭْ وُوسَّانْ نِّي! ١٨ ژَتدْجمْ حِيمَا وَارْ ثتِّيڒِي ثَاروْڒَا نْومْ ذِي ڒْْمشْثَا، ١٩ مِينْزِي ذڭْ وُوسَّانْ نِّي أَذْ ذِينْ ثِيڒِي إِشْثْ ن ڒْْمحْنثْ إِ وَارْ ثُوغِي أَمْ نتَّاثْ زڭْ وَامِي د-إِخْڒقْ أَربِّي دُّونشْثْ أَڒْ ڒخُّو، ؤُشَا وَارْ ثتِّيڒِيعمَّارْصْ عَاوذْ. ◘ ٢٠ مَاڒَا سِيذِي وَارْ إِسّمْژِي ؤُسَّانْ نِّي، وَارْ ثْنجّمْ ؤُڒَا ذ إِشْثْ ن دَّاثْ، مَاشَا ذِي طّْوعْ ن يِينِّي إِتّْوَافَارْزنْ، إِنِّي إِ إِخْضَارْ نتَّا، أَقَا إِسّمْژِي ؤُسَّانْ نِّي.

٢١ خنِّي مَاڒَا إِنَّا أَومْ إِجّنْ: ’أَقَا لْمَاسِيحْ ذَا!‘، نِيغْ: ’أَقَا-ث ذِيهَا!‘، وَارْ ث تَّامْنمْ. ◘ ٢٢ مِينْزِي أَذْ كَّارنْ إِمَاسِيحنْ إِفَالْسُوثنْ ذ إِنَابِييّنْ إِسّْخَارِّيقنْ، أَذْ ڭّنْ ڒعْڒَامَاثْ ذ ڒعْجَايبْ حِيمَا، مَاڒَا إِزمَّارْ، أَذْ خذْعنْ عَاذْ إِنِّي إِتّْوَافَارْزنْ. ◘ ٢٣ كنِّيوْ مَاشَا، حْضَامْ، أَقَا مَارَّا نِّيغْ أَومْ ث قْبڒْ.

٢٤ مَاشَا ذڭْ وُوسَّانْ نِّي، أَوَارْنِي ڒْْمحْنثْ نِّي، أَذْ ثبَّارْشنْ ثْفُوشْثْ ؤُشَا ثَازِيرِي وَارْ ثتِّيشْ عَاذْ ثَافَاوْثْ نّسْ، ◘ ٢٥ إِثْرَانْ أَذْ د-وْضَانْ زڭْ ؤُجنَّا ؤُشَا صُّولَاطَاثْ إِ إِدْجَانْ ذڭْ إِجنْوَانْ أَذْ تّْوَانْهزّنْثْ. ◘ ٢٦ خنِّي أَذْ ژَترنْ مِّيسْ ن بْنَاذمْ خْمِي د غَا يَاسْ ذڭْ إِسيْنُوثنْ، س جّهْذْ ذ ؤُعُودْجِي أَمقّْرَانْ. ◘ ٢٧ ڒخْذنِّي أَذْ إِسّكّْ لْمَالَاكَاثْ نّسْ ؤُشَا أَذْ إِيْرُو إِنِّي زَّايسْ إِتّْوَافَارْزنْ زِي أَربْعَا ن ثْغمُّورَا ن ؤُسمِّيضْ، زِي طَّارْفْ أَنڭَّارُو ن ثمُّورْثْ أَڒْ طَّارْفْ أَنڭَّارُو ن ؤُجنَّا. ◘

٢٨ ڒمْذمْ زڭْ وَارْثُو ن ثَازَارْثْ أَمتِّيڒْ-أَ: خْمِي غَا ذوْڒنْ ڒفْرُوعْ نّسْ أَذْ د-أَرضْبنْ ؤُشَا ثِيفْرَايْ أَذْ د-فّْغنْثْ، خنِّي أَذْ ثسّْنمْ أَقَا أَنبْذُو يِيوضْ-د. ◘ ٢٩ أَمُّو إِتّْخصَّا ؤُڒَا ذ كنِّيوْ، خْمِي غَا ثْژَارمْ ثِيمسْڒَايِينْ-أَ تّمْسَارَانْثْ، أَذْ ثسّْنمْ، أَقَا مَانْ أَيَا يُوذسْ-د، خْ ثوَّارْثْ. ٣٠ س ثِيذتّْ أَذْ أَومْ إِنِيغْ، جِّيڒْ-أَ وَارْ إِعدُّو شَا أَڒْ ذ غَا يِيڒِي مَانْ أَيَا مَارَّا. ٣١ أَجنَّا ذ ثمُّورْثْ أَذْ عْذُونْ، مَاشَا أَوَاڒنْ إِنُو وَارْعدُّونْعمَّارْصْ. ◘ ٣٢ مَاشَا أَسّْ نِّي ذ ثْسَاعّثْ نِّي ؤُڒَا ذ إِجّْ وَارْ ث إِسِّينْ، ؤُڒَا ذ لْمَالَاكَاثْ نِّي إِدْجَانْ ذڭْ ؤُجنَّا، ؤُڒَا ذ مِّيسْ، مْغِيرْ بَابَاسْ. ◘

٣٣ خْژَارمْ، حْضَامْ، ژَتدْجمْ، مِينْزِي وَارْ ثسِّينمْ شَا مڒْمِي د غَا ثَاوضْ ڒْْوقْثْ نِّي. ◘ ٣٤ أَقَا-ث أَمْ يِيجّْ ن بْنَاذمْ إِتّْخصَّا أَسْ أَذْ إِسَافَارْ، إِجَّا ثَادَّارْثْ نّسْ، إِوكّڒْ إِمْسخَّارنْ نّسْ س صُّولْطَا، إِوْشَا إِ كُوڒْ إِجّْ زَّايْسنْ ڒْْخذْمثْ نّسْ، ؤُشَا إِعْڒمْ أَسْ إِ ؤُعسَّاسْ ن ثوَّارْثْ مَاحنْذْ أَذْ إِقِّيمْ أَذْ إِحْضَا. ٣٥ إِوَا حْضَامْ خنِّي، مِينْزِي وَارْ ثسِّينمْ شَا مڒْمِي إِ د غَا يَاسْ بَابْ ن ثَادَّارْثْ، غَارْ ؤُعشِّي نِيغْ غَارْ وزْينْ ن دْجِيڒثْ نِيغْ غَارْ ؤُسْقُوقعْ ن ؤُيَاژِيضْ نِيغْ غَارْ صّْبحْ زِيشْ، ٣٦ حِيمَا، مَاڒَا د-إِتِّيسْ ذغْيَا، وَارْ كنِّيوْ إِتِّيفْ ثتّطّْصمْ. ٣٧ مِينْ ذ أَومْ قَّارغْ ڒخُّو، قَّارغْ ث إِ مَارَّا: فَاقمْ!“

◘١٣:١ 13:‏1 [مت. 24‏:‏1‏-‏44؛ لك. 21‏:‏5‏-‏33] — مت. 24‏:‏1؛ لك. 21‏:‏5.

◘١٣:٢ 13:‏2 1 إِج. 9‏:‏7، 8؛ مِيخَا 3‏:‏12؛ لك. 19‏:‏44.

◘١٣:٣ 13:‏3 مت. 24‏:‏3؛ لك. 21‏:‏7.

◘١٣:٤ 13:‏4 ڒخ. 1‏:‏6.

◘١٣:٥ 13:‏5 إِرْم. 29‏:‏8؛ أَفا. 5‏:‏6؛ 2 تس. 2‏:‏2، 3؛ 1 يُوح. 4‏:‏1.

◘١٣:٦ 13:‏6 إِرْم. 14‏:‏14؛ 23‏:‏21.

◘١٣:٨ 13:‏8 إِشا. 19‏:‏2.

◘١٣:٩ 13:‏9 مت. 10‏:‏17؛ 24‏:‏9؛ لك. 21‏:‏12؛ يُوح. 15‏:‏19؛ 16‏:‏2؛ أَسَا. 2‏:‏10.

◘١٣:١١ 13:‏11 مت. 10‏:‏19؛ لك. 12‏:‏11؛ 21‏:‏4.

◘١٣:١٢ 13:‏12 حِز. 38‏:‏21؛ مِيخَا 7‏:‏6.

◘١٣:١٣ 13:‏13 مت. 10‏:‏22؛ 24‏:‏13؛ لك. 21‏:‏19؛ أَسَا. 2‏:‏7، 10.

◘١٣:١٤ 13:‏14 دَان. 9‏:‏27؛ مت. 24‏:‏15؛ لك. 21‏:‏20، 21.

◘١٣:١٩ 13:‏19 مت. 24‏:‏21

◘١٣:٢١ 13:‏21 مت. 24‏:‏23؛ لك. 21‏:‏8.

◘١٣:٢٢ 13:‏22 أَعَوذ. 13‏:‏2؛ 2 تس. 2‏:‏11.

◘١٣:٢٤ 13:‏24 إِشا. 13‏:‏10؛ حِز. 32‏:‏7؛ يُووِ. 3‏:‏4؛ 3‏:‏15؛ مت. 24‏:‏29؛ لك. 21‏:‏25؛ أَسَا. 6‏:‏12.

◘١٣:٢٥ 13:‏25 إِشا. 13‏:‏10؛ 34‏:‏4.

◘١٣:٢٦ 13:‏26 دَان. 7‏:‏10؛ مت. 16‏:‏27؛ 24‏:‏30؛ مك. 14‏:‏62؛ لك. 21‏:‏27؛ ڒخ. 1‏:‏11؛ 1 تس. 4‏:‏16؛ 2 تس. 1‏:‏10؛ أَسَا. 1‏:‏7.

◘١٣:٢٧ 13:‏27 أَعَوذ. 30‏:‏4، 5

◘١٣:٢٨ 13:‏28 مت. 24‏:‏32؛ لك. 21‏:‏29.

◘١٣:٣١ 13:‏31 إِزهد. 102‏:‏27؛ إِشا. 40‏:‏8؛ 51‏:‏6؛ عبر. 1‏:‏11.

◘١٣:٣٢ 13:‏32 مت. 24‏:‏36؛ ڒخ. 1‏:‏7.

◘١٣:٣٣ 13:‏33 مت. 24‏:‏42؛ 25‏:‏13؛ لك. 12‏:‏40؛ 21‏:‏36؛ 1 تس. 5‏:‏6.