١ ذڭْ وَاسّْ وِيسّْ أَربْعَا ؤُ-عِيشْرِينْ ن ؤُيُورْ-أَ مُوننْ أَيْثْ ن إِسْرَائِيل س ؤُژُومِّي ؤُ ڒحّْفنْ ذڭْ وَارُّوضْ ن ثْخُونْشَايْ ن وشْضَانْ ؤُ س ثْعجَّاجْثْ خْ ؤُزدْجِيفْ. ◼9:‏1 ’ذڭْ وَارُّوضْ ن وشْضَانْ‘ - س ثْعِيبْرَانِيثْ ’س ثْخَانْشثْ‘. ’ثَاعجَّاشْثْ‘ - س ثْعِيبْرَانِيثْ ’ؤُشَاڒْ‘. ٢ بْضَانْ زَّارِيعثْ ن إِسْرَائِيل إِخفْ نْسنْ زِي مَارَّا إِبَارَّانِييّنْ، ؤُشَا أَمْ قِّيمنْ كَّارنْ، نعْمنْ زِي دّْنُوبْ نْسنْ ذ ڒْْمُوعْصِييّثْ ن ڒجْذُوذْ نْسنْ. ٣ خَاسْ ؤُشَا ذوْڒنْ بدّنْ ذڭْ ومْشَانْ نْسنْ عَاوذْ ؤُشَا غْرِينْ أَسنْ إِشْثْ ن ثرْبَاعْثْ ن وَاسّْ زڭْ وذْلِيسْ إِتّْوَانّْضنْ ن شَّارِيعَا ن سِيذِي، أَربِّي نْسنْ، ؤُشَا إِشْثْ ن ثرْبَاعْثْ نّغْنِي نعْمنْ نِيثْنِي س دّْنُوبْ نْسنْ ؤُشَا سجْذنْ إِ سِيذِي، أَربِّي نْسنْ. ٤ خْ دّْرُوجْ ن إِلَاوِييّنْ إِبدّْ يشُوعَا ذ بَانِي، قَاذْمِييِيلْ، شَابَانْيَا، بُونِّي، شَارَابْيَا، بَانِي ذ كَانَانِي، ڒَْاغَانْ س ثْمِيجَّا إِجهْذنْ غَارْ سِيذِي، أَربِّي نْسنْ. ٥ ؤُشَا إِلَاوِييّنْ، يشُوعَا، قَاذْمِييِيلْ، بَانِي، حَاشَابْنِييَا، شَارَابْيَا، هُوذِييَا، شَابَانْيَا ذ فَاثَاحْيَا، نَّانْ: ”كَّارمْ، ثْبَارْكمْ سِيذِي، أَربِّي نْومْ، زِي ڒبْذَا أَڒْ ڒبْذَا! إِڒِي أَذْ إِتّْوَابَاركْ إِسمْ ن ؤُعُودْجِي نّشْ، ونِّي يُوعْڒَانْ خْ مَارَّا لْبَارَاكَا ذ ؤُسمْغَارْ!“

٦ ”شكْ ذ سِيذِي، مْغِيرْ شكْ. شكْ ثڭِّيذْ أَجنَّا ؤُڒَا ذ أَجنَّا ن إِجنْوَانْ ذ مَارَّا ثِيزمَّارْ نْسنْ، ثَامُّورْثْ ذ مَارَّا مِينْ خَاسْ إِدْجَانْ، ڒبْحُورْ ذ مَارَّا مِينْ ذَايسْ إِدْجَانْ ؤُ شكْ ثوْشِيذْ أَسنْ ثُوذَارْثْ ؤُشَا ڒْْعسْكَارَاثْ ن ؤُجنَّا تّْبنْذَاقنْثْ إِ شكْ. ◘9:‏6 أَمز. 1؛ إِزهد. 146‏:‏6؛ ڒخ. 14‏:‏15؛ 17‏:‏24؛ أَسَا. 14‏:‏7

٧ شكْ ذ سِيذِي، أَربِّي، ونِّي إِفَارْزنْ أَبْرَامْ. شكْ ثسُّوفّْغذْ ث-إِ-د زِي ؤُرْ ن إِكَالْذَانِييّنْ ؤُشَا ثڭِّيذْ أَسْ إِبْرَاهِيمْ. ◘9:‏7 أَمز. 11‏:‏31، 32؛ 12‏:‏1

٨ شكْ ثُوفِيذْ ؤُڒْ نّسْ ذَايسْ ڒَْامَانْ زَّاثْ إِ وُوذمْ نّشْ ؤُ ثڭِّيذْ أَكِيذسْ ڒْْعَاهْذْ بلِّي شكْ أَذْ ثوْشذْ إِ زَّارِيعثْ نّسْ ثَامُّورْثْ ن أَيْثْ ن كنْعَانْ، ن إِحِيتِّييّنْ، ن إِمُورِييّنْ، ن إِفَارِيزِييّنْ، ن إِيابُوسِييّنْ ؤُ ن إِجِيرْجَاسِييّنْ، ؤُشَا ثڭِّيذْ عْلَاحْسَابْ أَوَاڒنْ نّشْ، مِينْزِي شكْ ذ أَمْسڭّذْ إِ ثدْجِيذْ. ◘9:‏8 أَمز. 12‏:‏7؛ 13‏:‏15؛ 15‏:‏6، 18؛ 17‏:‏8؛ 26‏:‏4

٩ شكْ ثژْرِيضْ ثَامَارَا ن ڒجْذُوذْ نّغْ ذِي مِيصْرَا ؤُ ثسْڒِيذْ إِغُويَّانْ نْسنْ زِي غَارْ ڒبْحَارْ ن ثلْڭَا. ◘9:‏9 ؤُف. 3‏:‏7؛ 14‏:‏10

١٠ شكْ ثڭِّيذْ ڒعْڒَامَاثْ ذ لْمُوعْجِيزَاثْ غَارْ فِيرْعُونْ ؤُ غَارْ مَارَّا إِمْسخَّارنْ نّسْ ؤُ جَارْ ڒْْڭنْسْ ن ثمُّورْثْ، مِينْزِي شكْ ثسّْنذْ، أَقَا نِيثْنِي ڭِّينْ ضِيدّْ نْسنْ س ثُوفّثْ ؤُشَا شكْ ثڭِّيذْ إِ يِيخفْ نّشْ إِجّْ ن إِسمْ، أَمْ ثدْجَا أَسّْ-أَ. ◘9:‏10 ؤُف. 7؛ 8؛ 9؛ 10؛ 11؛ 12؛ 14

١١ شكْ ثبْضِيذْ ڒبْحَارْ زَّاثْ إِ وُوذمْ نْسنْ أَڒَامِي نِيثْنِي عْذُونْ خْ ثمُّورْثْ يُوژْغنْ ذِي ڒْْوسْطْ ن ڒبْحَارْ، ؤُشَا إِنِّي خَاسنْ إِتَّاژّْڒنْ ثنْضَارذْ ثنْ ذِي ڒَْادْجَاغْ أَمْ يِيجّْ ن وژْرُو ذڭْ وَامَانْ إِجهْذنْ. ◘9:‏11 ؤُف. 14‏:‏22‏-‏31

١٢ زڭْ إِجّْ ن ؤُقلِّيجْ ن ؤُسيْنُو ثْڭوّْذذْ ثنْ س وَاسّْ ؤُ س يِيجّْ ن ؤُقلِّيجْ ن ثْمسِّي س دْجِيڒثْ، حِيمَا أَذْ أَسنْ ثوْشذْ ثَافَاوْثْ خْ وبْرِيذْ إِ خْ إِ غَا ؤُيُورنْ. ◘9:‏12 ؤُف. 13‏:‏21؛ 14‏:‏19؛ 40‏:‏38؛ إِزهد. 105‏:‏39

١٣ شكْ ثهْوِيذْ-د خْ وذْرَارْ ن سِينَا ؤُ ثسِّيوْڒذْ أَكِيذْسنْ زڭْ ؤُجنَّا ؤُشَا ثوْشِيذْ أَسنْ لْفَارَايِيضْ إِسڭّْذنْ ذ إِزرْفَانْ إِ ذِي إِدْجَا ڒَْامَانْ ذ ثْوصَّا ذ ڒُْومُورَاثْ إِصبْحنْ. ◘9:‏13 ؤُف. 19‏:‏20؛ 20‏:‏1‏-‏21

١٤ ثسّشْنذْ أَسنْ سّبْثْ نّشْ إِقدّْسنْ ؤُشَا ثڭِّيذْ خَاسنْ ڒُْومُورَاثْ ذ ثْوصَّا ذ شَّارِيعَا س ثْسخَّارْثْ ن مُوسَا، أَمْسخَّارْ نّشْ.

١٥ شكْ ثوْشِيذْ أَسنْ أَغْرُومْ زڭْ ؤُجنَّا إِ ڒَاژْ نْسنْ ؤُشَا ثسُّوفّْغذْ أَسنْ-د أَمَانْ زِي ثصْضَارْثْ إِ ؤُفَاذِي نْسنْ ؤُشَا ثنِّيذْ أَسنْ أَذْ أَذْفنْ غَارْ ثمُّورْثْ، ثنِّي إِ ثسّْڭعّْذذْ أَفُوسْ نّشْ حِيمَا أَذْ ثجَّادْجذْ أَذْ ثنْ ت-إِ-د-ثوْشذْ، حِيمَا أَذْ ت طّْفنْ ذ ڒْْوَارْثْ.“ ◘9:‏15 ؤُف. 16‏:‏14؛ 17‏:‏6؛ ڒخْڒ. 20‏:‏9

١٦ ”أَقَا نِيثْنِي أَكْ-ذ ڒجْذُوذْ نّغْ ڭِّينْ س ثُوفّثْ ذ ثْغنَّانْثْ ؤُ وَارْ سْڒِينْ شَا غَارْ ڒُْومُورَاثْ نّشْ.

١٧ نِيثْنِي ؤُڭِينْ أَذْ غَارسْ سْڒنْ، وَارْ فكَّارنْ ذِي لْمُوعْجِيزَاثْ نّشْ إِ غَارْسنْ ثڭِّيذْ ؤُ نِيثْنِيغنَّانْ ؤُ ذڭْ ؤُغوّغْ نْسنْ ڭِّينْ إِجّْ ذ ؤُزدْجِيفْ خْ يِيخفْ نْسنْ حِيمَا أَذْعقْبنْ غَارْ ثسْمُوغِي نْسنْ. مَاشَا شكْ ذ إِجّْ ن أَربِّي إِغفَّارنْ، ذَايكْ ڒْْخَاضَارْ ذ أَرّحْمثْ، غَاركْ تَّاسِيعْ ن ڒْْخَاضَارْ ذ ثَامخْسِيوْثْ إِشوَّارنْ س وَاطَّاسْ، ؤُ شكْ وَارْ ذَايْسنْ ثسْمِيحذْ شَا. ◘9:‏17 ؤُف. 34‏:‏7؛ ڒخْڒ. 14‏:‏4، 18؛ إِزهد. 86‏:‏5

١٨ عَاذْ، ؤُمِي ڭِّينْ نِيثْنِي إِجّْ ن ؤُعجْمِي إِفسْينْ إِ يِيخفْ نْسنْ، نَّانْ: ’وَا ذ أَربِّي نّشْ إِ شكْ إِ د-إِسُّوفّْغنْ زِي مِيصْرَا‘، ؤُشَا شقّْفنْ أَطَّاسْ، ◼9:‏18 ’أَمْوَا‘ - نِيغْ ’أَينْذُوزْ‘ نِيغْ ’يُوڭُّو‘.  ◘9:‏18 ؤُف. 32 ١٩ أَقَا شكْ ذِي أَرّحْمثْ نّشْ ثَامقّْرَانْثْ وَارْ ثنْ ثجِّيذْ شَا ذِي ڒخْڒَا. أَقلِّيجْ ن ؤُسيْنُو إِ إِدْجَانْ حِيمَا أَذْ ثنْ إِڭوّذْ س وَاسّْ، وَارْ خَاسنْ إِڭّْوِيجْ شَا، ؤُڒَا ذ أَقلِّيجْ ن ثْمسِّي إِ إِدْجَانْ حِيمَا أَذْ أَسنْ إِوْشْ ثَافَاوْثْ ذڭْ وبْرِيذْ إِ خْ إِ غَا ؤُيُورنْ، وَارْ خَاسنْ إِڭّْوِيجْ شَا س دْجِيڒثْ. ◘9:‏19 ؤُف. 13‏:‏22؛ 40‏:‏38

٢٠ شكْ ثوْشِيذْ أَرُّوحْ نّشْ أَصبْحَانْ، حِيمَا أَذْ ثنْ إِسّڒْمذْ، ؤُ شكْ وَارْ ذ أَسنْ ثكِّيسذْ شَا ’مَانَّا‘ نّكْ زڭْ ؤُقمُّومْ نْسنْ ؤُشَا ثوْشِيذْ أَسنْ أَمَانْ إِ ؤُفَاذِي نْسنْ. ◘9:‏20 ڒخْڒ. 11‏:‏17؛ ياش. 5‏:‏12

٢١ أَربْعِينْ ن إِسڭّْوُوسَا شكْ ثتّْهلِّيذْ ذَايْسنْ ذِي ڒخْڒَا. وَارْ غَارْسنْ إِتّْخِيصَّا ؤُڒَا ذ شَا ن ڒْْحَاجّثْ، أَرُّوضْ نْسنْ وَارْ يَارْشِي شَا ؤُشَا إِضَارنْ نْسنْ وَارْ ؤُفّنْ. ◘9:‏21 أَعَوذ. 2‏:‏7؛ 8‏:‏4؛ 29‏:‏5

٢٢ شكْ ثوْشِيذْ أَسنْ مَارَّا ثِيڭلْذِيوِينْ ذ ڒڭْنُوسْ ؤُشَا ثبْضِيذْ أَسنْ ثنْ ذ ثَاسْغَارْثْ س إِجّْ ن ويْمِيرْ. نِيثْنِي طّْفنْ ثَامُّورْثْ ن سِيحُونْ ذ ڒْْوَارْثْ، أَقَا-ت ذ ثَامُّورْثْ ن ؤُجدْجِيذْ ن حَاشْبُونْ، ذ ثمُّورْثْ ن عُوجْ، أَجدْجِيذْ ن بَاشَانْ. ◘9:‏22 ڒخْڒ. 21‏:‏21، 33

٢٣ شكْ ثَارِّيذْ إِحنْجِيرنْ نْسنْ أَطَّاسْ أَمْ يِيثْرَانْ ذڭْ ؤُجنَّا ؤُ ثسِّيذْفذْ ثنْ غَارْ ثمُّورْثْ إِ خْ ثُوغَا ثنِّيذْ إِ ڒجْذُوذْ نْسنْ، أَذْ غَارسْ د-أَذْفنْ حِيمَا أَذْ ت طّْفنْ ذ ڒْْوَارْثْ. ◘9:‏23 أَمز. 22‏:‏17

٢٤ يُوذفْ غَارسْ وَارَّاوْ ؤُشَا طّْفنْ ت ذ ڒْْوَارْثْ ؤُ زَّاثْ إِ وُوذمْ نْسنْ أَقَا ثڭِّيذْ إِمزْذَاغْ ن ثمُّورْثْ سَاذُو أَفُوسْ نْسنْ، ؤُڒَا ذ إِجدْجِيذنْ نْسنْ ذ ڒڭْنُوسْ ن ثمُّورْثْ، حِيمَا أَذْ زَّايْسنْ ڭّنْ مِينْ إِ ذ أَسنْ إِتّْغِيڒْ مْلِيحْ.

٢٥ نِيثْنِي حوّْسنْ ثِيندَّامْ إِفَارْينْ ذ إِشْثْ ن ثمُّورْثْ إِسّغْمَاينْ ؤُ نِيثْنِي طّْفنْ عَاوذْ ثُوذْرِينْ ذ ڒْْوَارْثْ شُّورنْثْ س مَارَّا ڒْْخَارْ، أَنُوثنْ إِتّْوَاغْزنْ، إِمَارْجَاعنْ ن ؤُضِيڒْ ذ ڒعْرَاصِيثْ ن زِّيثُونْ ذ ثْشجِّيرَا ن فْرُوثَا س ؤُفيّضْ، ؤُشَا نِيثْنِي شِّينْ، جِّيوْننْ، ذوْڒنْ صحّنْ ؤُشَا أَرِّينْ-د مژْرِي س ثْشُونِي نّشْ ثَامقّْرَانْثْ.

٢٦ مَاشَا نِيثْنِي ذوْڒنْ وَارْ طِّيعنْ ؤُشَاغوّْغنْ خَاكْ ؤُشَا نْضَارنْ شَّارِيعَا نّشْ ؤُ نْغِينْ إِنَابِييّنْ نّشْ إِنِّي ثُوغَا إِشهّْذنْ جَارْ أَسنْ مَاحنْذْ أَذْ ثنْ د-أَرّنْ غَاركْ. أَقَا شقّْفنْ ذَايكْ س يِيجّْ ن ؤُشقّفْ إِمْغَارْ. ◘9:‏26 1 إِج. 18‏:‏4؛ 19‏:‏10؛ 2 إِم. 24‏:‏20، 21

٢٧ س ؤُيَا ثَارِّيذْ ثنْ ذڭْ ؤُفُوسْ ن إِغْرِيمنْ نْسنْ إِنِّي إِ ثنْ إِحْصَارنْ، مَاشَا مَاڒَا ڒَْاغَانْ-د خَاكْ ذِي ڒْْوقْثْ ن ڒحْصَارثْ نْسنْ، خنِّي ثسْڒِيذْ غَارْسنْ زڭْ ؤُجنَّا ؤُشَا ذِي أَرّحْمثْ نّشْ ثَامقّْرَانْثْ ثوْشِيذْ أَسنْ إِمْسنْجَامنْ نِّي إِ ثنْ إِفكّنْ زڭْ ؤُفُوسْ ن إِغْرِيمنْ نْسنْ. ◘9:‏27 ڒقض. 2‏:‏14‏-‏23

٢٨ مَاڒَا ؤُفِينْ ڒْْهُوذْنثْ، ڭِّينْ عَاوذْ ڒْْغَارْ زَّاثْ إِ وُوذمْ نّشْ ؤُشَا ثڭِّيذْ ثنْ ذڭْ ؤُفُوسْ ن ڒْْعذْيَانْ نْسنْ ؤُشَا نِيثْنِي سدْجْضنْ خَاسنْ. ؤُمِي ثُوبنْ، ڒَْاغَانْ-د خَاكْ، أَقَا ثسْڒِيذْ أَسنْ زڭْ ؤُجنَّا ؤُ أَمُّو إِ ثْفكّذْ إِ-ثنْ س أَرّحْمثْ نّشْ أَطَّاسْ ن ثْوَاڒَاوِينْ.

٢٩ شكْ ثْشهْذذْ ضِيدّْ نْسنْ حِيمَا أَذْ د -عقْبنْ غَارْ شَّارِيعَا نّشْ، مَاشَا نِيثْنِي ڭِّينْ س ثُوفّثْ ؤُ وَارْ سْڒِينْ شَا غَارْ ثْوصَّا نّشْ. أَقَا خْضَانْ زِي جِّيهثْ ن لْفَارَايِيضْ نّشْ، ؤُمِي بْنَاذمْ ونِّي إِ زَّايْسنْ إِ غَا يڭّْ أَذْ زَّايْسنْثْ إِدَّارْ، ؤُشَا نِيثْنِي أَرِّينْ-د غَارْسنْ أَعْرُورْ، ثُوغَا سّْقسْحنْ إِرِي نْسنْ، وَارْ غَاركْ د-سْڒِينْ. ◘9:‏29 لَاوِي 18‏:‏5؛ حِز. 20‏:‏11؛ رُوم. 10‏:‏5؛ ڭال. 3‏:‏12

٣٠ أَطَّاسْ ن إِسڭّْوُوسَا ثْحمّْڒذْ أَكِيذْسنْ، ثْشهْذذْ ضِيدّْ إِ نْسنْ س أَرُّوحْ نّشْ، س ثْسخَّارْثْ ن إِنَابِييّنْ، مَاشَا نِيثْنِي وَارْ سْڒِينْ. س ؤُينِّي ثوْشِيذْ ثنْ ذڭْ ؤُفُوسْ ن ڒڭْنُوسْ ن ثمُّورَا. ◘9:‏30 2 إِج. 17‏:‏13؛ 2 إِم. 36‏:‏15

٣١ مَاشَا ذِي أَرّحْمثْ نّشْ ثَامقّْرَانْثْ وَارْ ثنْ ثَارذْدْجذْ شَا ؤُ وَارْ ذَايْسنْ ثسْمِيحذْ شَا، مَاغَارْ شكْ ذ إِجّْ ن أَربِّي ذ أَحْنِينْ ذ أَرْحِيمْ.

٣٢ ”خنِّي ڒخُّو، أَربِّي نّغْ، أَقَا شكْ، أَربِّي ذ أَمقّْرَانْ، إِزمَّارنْ، إِسَّاڭّْوَاذنْ، ونِّي إِتّطّْفنْ ذِي ڒْْعَاهْذْ ؤُ ذِي ثْمخْسِيوْثْ إِشوَّارنْ، وَارْ حسّبْ شَا ذْرُوسْ مَارَّا ڒغْبنْ إِ خَانغْ د-إِكِّينْ، خْ إِجدْجِيذنْ نّغْ، خْ ڒْْحُوكَّامْ نّغْ ؤُ خْ إِكهَّاننْ نّغْ ؤُ خْ إِنَابِييّنْ نّغْ ؤُ خْ ڒجْذُوذْ نّغْ ؤُ خْ مَارَّا ڒْْڭنْسْ نّغْ زڭْ وُوسَّانْ ن إِجدْجِيذنْ ن أَشُّورْ أَڒْ أَسّْ-أَ.

٣٣ ثُوغَا شكْ ذ أَمْسڭّذْ ذِي مَارَّا مِينْ خَانغْ إِكِّينْ، مَاغَارْ شكْ ثڭِّيذْ أَنغْ س ڒَْامَانْ، مَاشَا نشِّينْ نڭَّا س ڒقْجَاحثْ. ◘9:‏33 أَعَوذ. 32‏:‏4؛ دَان. 9‏:‏14

٣٤ إِجدْجِيذنْ نّغْ، ڒْْحُوكَّامْ نّغْ، إِكهَّاننْ نّغْ ذ ڒجْذُوذْ نّغْ وَارْ ضفَّارنْ شَّارِيعَا نّشْ ؤُشَا وَارْ سْڒِينْ غَارْ ڒُْومُورَاثْ نّشْ ؤُڒَا غَارْ شّْهَاذَاثْ نّشْ نِّي ثْشهْذذْ ضِيدّْ إِ نْسنْ.

٣٥ س ثْڭلْذِيثْ نْسنْ ؤُ س ڒْْخَارْ نْسنْ أَطَّاسْ إِ ذ أَسنْ ثوْشِيذْ ؤُ س ثمُّورْثْ ثَامقّْرَانْثْ إِسّغْمَاينْ إِ ذ أَسنْ ثوْشِيذْ، وَارْ شكْ سخَّارنْ شَا ؤُشَا وَارْ ثُوبنْ زِي ثْمڭَّا نْسنْ ثِيعفَّانِينْ.

٣٦ خْزَارْ أَسّْ-أَ أَقَا نشِّينْ ذ إِمْسمْغَانْ ؤُ ثَامُّورْثْ إِ ثوْشِيذْ إِ ڒجْذُوذْ نّغْ مَاحنْذْ أَذْ زَّايسْ نشّْ ڒْْغِيدْجثْ ذ ڒْْخَارْ، خْزَارْ أَقَا نشِّينْ ذ إِمْسمْغَانْ إِ ذَايسْ ندْجْ.

٣٧ ڒْْغِيدْجثْ ثَامقّْرَانْثْ نّسْ أَذْ ثْرَاحْ غَارْ إِجدْجِيذنْ، إِنِّي إِ خَانغْ ثڭِّيذْ ذِي سِّيبّثْ ن دّْنُوبْ نّغْ، ؤُشَا نِيثْنِي تّْصدْجَاضنْ خْ أَرَّايمْ نّغْ ؤُ خْ ڒْْمَاڒْ نّغْ أَمْ مَامّشْ ذ أَسنْ إِتّْغِيڒْ مْلِيحْ، ؤُ نشِّينْ أَقَا أَنغْ ذِي ڒحْصَارثْ ذ ثَامقّْرَانْثْ.“