1 إِسِّيوڒْ سِيذِي أَكْ-ذ مُوسَا، إِنَّا:

2 ”أڭّْ إِ يِيخفْ نّشْ ثْنَاينْ ن ڒبْوَاقْ إِزِيرَارنْ ن نُّوقَارْثْ، س يِيجّْ ن ؤُمَارْسُو س وفْضِيسْ أَذْ ثنْ ثڭّذْ ؤُشَا أَذْ إِڒِينْ إِ ؤُبَارّحْ ن ثْمسْمُونْثْ ؤُ إِ ؤُسْمُوطِّي ن ڒمْرَاڭحْ ن ڒْْعسْكَارْ.

3 خْمِي ذَايْسنْ غَا سُوضنْ، أَذْ غَاركْ ثْمُونْ ثْمسْمُونْثْ مَارَّا غَارْ وَاذَافْ ن ؤُقِيضُونْ ن ؤُمْسَاڭَارْ. 4 خْمِي غَا سُوضنْ ذڭْ إِجّْ زِي ثْنَاينْ نِّي، خنِّي مْغِيرْ ڒْْحُوكَّامْ، إِزدْجِيفنْ خْ ڒُْوڒُوفْ ن إِسْرَائِيل، إِ خَاكْ د غَا إِمُوننْ. 5 خْمِي غَا ثْسُوضمْ س وسْرُودّحْ ذِي ڒْْبُوقْ، خنِّي أَذْ مُّوطِّيينْثْ ڒمْرَاڭحْ نِّي إِمَّارْسنْ غَارْ شَّارْقْ. 6 خْمِي غَا ثْسُوضمْ س وسْرُودّحْ ذِي ڒْْبُوقْ ثْنَاينْ ن ثْوَاڒَاوِينْ، خنِّي أَذْ مُّوطِّيينْثْ ڒمْرَاڭحْ نِّي إِمَّارْسنْ غَارْ ؤُغزْذِيسْ ن لْجَانُوبْ. أَذْ سُوضنْ س وسْرُودّحْ ؤُمِي غَا مُوطِّيينْ زڭْ ومْشَانْ غَارْ ومْشَانْ نّغْنِي. 7 إِ ثْمسْمُونْثْ ن وڭْرَاوْ ن ڒْْڭنْسْ إِتّْخصَّا أَذْ ثْسُوضمْ ذِي ڒبْوَاقْ، مَاشَا بْڒَا أَسْرُودّحْ. 8 أَذْ سُوضنْ وَارَّاوْ ن هَارُونْ، إِكهَّاننْ، ذِي ڒبْوَاقْ. أَذْ ثِيڒِي ذ إِشْثْ ن ثوْصيّثْ إِ ڒبْذَا إِ مَارَّا جِّيڒَاثْ نْومْ.“

9 ”خْمِي د غَا ثفّْغمْ غَارْ ڭَارَّا ذِي ثمُّورْثْ نْومْ، حِيمَا أَذْ ثْمنْغمْ أَكْ-ذ وغْرِيمْ نِّي كنِّيوْ د-إِهكّْوڒنْ، خنِّي أَذْ ثْسُوضمْ س وسْرُودّحْ ذِي ڒبْوَاقْ ؤُشَا كنِّيوْ أَذْ ثتّْوَاثِيذَارمْ زَّاثْ إِ وُوذمْ ن سِيذِي، أَربِّي نْومْ، ؤُشَا أَذْ ثْنجْممْ زِي ڒْعذْيَانْ نْومْ. 10 أَمُّو ذِي كُوڒْ إِجّْ ن وَاسّْ ن ڒفْرَاحثْ ؤُ ذِي ڒعْيُوذَاثْ إِتّْوَاڭّنْ ؤُ ذڭْ ؤُمزْوَارُو ن إِيُورنْ نْومْ أَذْ ثْسُوضمْ ذِي ڒبْوَاقْ خْمِي غَا ثَاوْيمْ ثِيغَارْصَا ن وشْمَاضْ نْومْ ذ ثْغَارْصَا ن ؤُقَاذِي نْومْ ؤُشَا أَمُّو إِ غَا إِڒِينْثْ ذِي طّْوعْ نْومْ إِ ڒِْيذَارثْ زَّاثْ إِ وُوذمْ ن أَربِّي، نشّْ ذ سِيذِي، أَربِّي نْومْ.“ ◘10:‏10 إِزهد. 68‏:‏

11 إِمْسَارْ ذڭْ ؤُسڭّْوَاسْ وِيسّْ ثْنَاينْ، ذڭْ ؤُيُورْ وِيسّْ ثْنَاينْ، ذڭْ وَاسّْ وِيسّْ عِيشْرِينْ ن ؤُيُورْ، أَقَا إِتّْوَاسّْڭعّذْ ؤُسيْنُو زِي سنّجْ ن ثْزذِّيغْثْ ن شّْهَاذثْ. 12 ؤُشَا فسْينْ أَيْثْ ن إِسْرَائِيل إِقِيضَانْ نْسنْ، مُّوطِّيينْ زڭْ ومْشَانْ غَارْ ومْشَانْ زِي ڒخْڒَا ن سِينَا ؤُشَا إِبدّْ-د ؤُسيْنُو ذِي ڒخْڒَا ن فَارَانْ. 13 أَمُّو فسْينْ إِقِيضَانْ نْسنْ ثْوَاڒَا ثَامزْوَارُوثْ، خْ ڒُْومُورْ ن سِيذِي، خْ ؤُفُوسْ ن مُوسَا.

14 ذ أَمزْوَارُو ثتّْوَاكّسْ ثْعدْجَانْثْ ن ڒْْمَارْڭحْ ن ڒْْعسْكَارْ ن أَيْثْ ن يَاهُوذَا، ؤُيُورنْ أَمْ تّْوَاستّْفنْ عْلَاحْسَابْ ثِيرْبِيعِينْ ن ڒْْعسْكَارْ نْسنْ. نَاحْشُونْ، مِّيسْ ن عَامِّينَاذَابْ، ثُوغَا ذ أَزدْجِيفْ خْ ڒْْعسْكَارْ. ◘10:‏14 ڒخْڒ. 1‏:‏7؛ 2‏:‏3 15 نَاثَانَايِيلْ، مِّيسْ ن صُوغَارْ، ثُوغَا ذ أَزدْجِيفْ خْ ڒْْعسْكَارْ ن ثقْبِيتْشْ ن أَيْثْ ن إِسَّاكَارْ. 16 إِلِييَابْ، مِّيسْ ن حِيلُونْ، ثُوغَا ذ أَزدْجِيفْ خْ ڒْْعسْكَارْ ن ثقْبِيتْشْ ن أَيْثْ ن زِيبُولُونْ.

17 أَوَارْنِي مَانْ أَيَا هذْمنْ ثْزذِّيغْثْ ؤُشَا فسْينْ أَيْثْ ن جَارْشُونْ ذ أَيْثْ ن مَارَارِي إِقِيضَانْ نْسنْ ؤُشَا أَرْبُونْ ثَازذِّيغْثْ.

18 خنِّي ثتّْوَاكّسْ ثْعدْجَانْثْ ن ڒْْمَارْڭحْ ن ڒْْعسْكَارْ ن رُوبِينْ ؤُيُورنْ، تّْوَاستّْفنْ عْلَاحْسَابْ ثِيرْبِيعِينْ ن ڒْْعسْكَارْ نْسنْ. إِلِيصُورْ، مِّيسْ ن شَاذَايُورْ، ثُوغَا ذ أَزدْجِيفْ خْ ڒْْعسْكَارْ نّسْ. 19 شَالُومِييِيلْ، مِّيسْ ن صُورِيشَادَّايْ، ثُوغَا ذ أَزدْجِيفْ خْ ڒْْعسْكَارْ ن ثقْبِيتْشْ ن أَيْثْ ن شِيمْعُونْ. 20 إِلْيَاسَافْ، مِّيسْ ن ذَاعُويِيلْ، ثُوغَا ذ أَزدْجِيفْ خْ ڒْْعسْكَارْ ن ثقْبِيتْشْ ن أَيْثْ ن جَاذْ.

21 خنِّي فسْينْ أَيْثْ ن قَاهَاثْ إِقِيضَانْ نْسنْ، أَرْبُونْ زَّاوشْثْ إِقدّْسنْ. ؤُشَا أَيْثْ ن جَارْشُونْ ذ أَيْثْ ن مَارَارِي بْنَانْ ثَازذِّيغْثْ قْبڒْ ثْوَاسِيثْ نْسنْ. ◘10:‏21 ڒخْڒ. 4‏:‏4

22 أَوَارْنِي أَسْ ثتّْوَاكّسْ ثْعدْجَانْثْ ن ڒْْمَارْڭحْ ن ڒْْعسْكَارْ ن أَيْثْ ن إِفْرَايِيمْ، ؤُيُورنْ، تّْوَاستّْفنْ عْلَاحْسَابْ ثِيرْبِيعِينْ ن ڒْْعسْكَارْ نْسنْ. إِلِيشَامَاعْ، مِّيسْ ن عَامِّيهُوذْ، ثُوغَا ذ أَزدْجِيفْ خْ ڒْْعسْكَارْ نّسْ. 23 جَامَالِييِيلْ، مِّيسْ ن فَاذَاهْصُورْ، ثُوغَا ذ أَزدْجِيفْ خْ ڒْْعسْكَارْ ن ثقْبِيتْشْ ن أَيْثْ ن مَانَاسَّا. 24 أَبِيذُونْ، مِّيسْ ن جِيذْعُونِي، ثُوغَا ذ أَزدْجِيفْ خْ ڒْْعسْكَارْ ن ثقْبِيتْشْ ن أَيْثْ ن بِينْيَامِينْ.

25 خنِّي ثتّْوَاكّسْ ثْعدْجَانْثْ ن ڒْْمَارْڭحْ ن ڒْْعسْكَارْ ن أَيْثْ ن ذَانْ، أَمْ ؤُغزْذِيسْ ؤُنڭَّارْ ن مَارَّا ڒمْرَاڭحْ، ؤُشَا ؤُيُورنْ، تّْوَاستّْفنْ عْلَاحْسَابْ ثِيرْبِيعِينْ ن ڒْْعسْكَارْ نْسنْ. أَخِيعَازَارْ، مِّيسْ ن عَامِّيشَادَّايْ، ثُوغَا ذ أَزدْجِيفْ خْ ڒْْعسْكَارْ نّسْ. 26 فَاجْعِييِيلْ، مِّيسْ ن عُوكْرَانْ، ثُوغَا ذ أَزدْجِيفْ خْ ڒْْعسْكَارْ ن ثقْبِيتْشْ ن أَيْثْ ن أَشِيرْ. 27 أَخِيرَاعْ، مِّيسْ ن عِينَانْ، ثُوغَا ذ أَزدْجِيفْ خْ ڒْْعسْكَارْ ن ثقْبِيتْشْ ن أَيْثْ ن زِيبُولُونْ.

28 أَمُّو إِ سّْمُوطِّيينْ أَيْثْ ن إِسْرَائِيل إِقِيضَانْ نْسنْ زڭْ ومْشَانْ غَارْ ومْشَانْ، أَمْ تّْوَاستّْفنْ نِيثْنِي عْلَاحْسَابْ ڒْْعسْكَارَاثْ نْسنْ، أَمُّو إِ فسْينْ نِيثْنِي إِقِيضَانْ نْسنْ.

29 إِنَّا مُوسَا إِ حُوبَابْ، مِّيسْ ن رَاعُويِيلْ، أَمِيذْيَانِي، أَضڭّْوَاڒْ ن مُوسَا: ”نشِّينْ أَذْ نمُّوطِّي غَارْ ومْشَانْ إِ ذ أَنغْ إِنَّا سِيذِي: ’نشّْ أَذْ أَومْ ث-إِ-د وْشغْ!‘ أَسْ-د أَكِيذْنغْ، أَذْ أَشْ نڭّْ ثْشُونِي، مِينْزِي سِيذِي إِسِّيوڒْ خْ إِسْرَائِيل س ڒْْخِيرْ.“ 30 نتَّا إِنَّا أَسْ: ”نشّْ وَارْ تّْرِيحغْ، مَاغَارْ أَذْ ؤُيُورغْ غَارْ ثمُّورْثْ إِنُو ؤُ غَارْ ڒَْادْجْ إِنُو.“ 31 ؤُشَا نتَّا إِنَّا أَسْ: ”تّْزَاوْڭغْ شكْ، وَارْ ذ أَنغْ تّجِّي، مِينْزِي شكْ ثسّْنذْ مَامّشْ إِشُووَّارْ أَذْ نوّثْ إِقِيضَانْ نّغْ. شكْ أَقَا ثْذوْڒذْ أَنغْ - أَمْ مَامّشْ نقَّارْ - أَمْ ثِيطَّاوِينْ. 32 خْمِي غَا ثْرَاحذْ أَكِيذْنغْ ؤُشَا أَذْ أَنغْ د-يَاسْ ڒْْخِيرْ إِ ذَايْنغْ غَا إِڭّْ سِيذِي، أَقَا نشِّينْ أَذْ أَشْ نڭّْ ثْشُونِي عَاوذْ.“

33 ؤُشَا فسْينْ إِقِيضَانْ نْسنْ، ؤُيُورنْ زڭْ وذْرَارْ ن سِيذِي ثِيشْڒِي ن ثْڒَاثَا ن وُوسَّانْ. تَّابُوثْ ن ڒْْعَاهْذْ ثُويُورْ زَّاثْ إِ وُوذمْ نْسنْ ثِيشْڒِي ن ثْڒَاثَا ن وُوسَّانْ، حِيمَا أَذْ يَارْزُو خْ إِجّْ ن ومْشَانْ إِ أَرَّاحثْ. 34 ذڭْ ؤُزِيڒْ ثُوغَا أَسيْنُو ن سِيذِي سنّجْ نْسنْ ؤُمِي كّْسنْ إِقِيضَانْ نْسنْ زِي ڒْْمَارْڭحْ ن ڒْْعسْكَارْ. 35 ڒَْامِي ثتّْوَاسّْمُوطِّي تَّابُوثْ، ثمْسَارْ ڒبْذَا بلِّي مُوسَا إِنَّا: ”كَّارْ، أَ سِيذِي، أجّْ ڒعْذْيَانْ نّشْ أَذْ مّْزدْجَاعنْ ؤُ إِنِّي كنِّيوْ إِشَارّْهنْ أَذْ أَروْڒنْ زڭْ وُوذمْ نّشْ!“ ◘10:‏35 إِزهد. 68‏:‏2 36 غَارْ ؤُبذِّي ن تَّابُوثْ، إِنَّا: ”ذْوڒْ-د، أَ سِيذِي، غَارْعشْرَا ن ڒُْوڒُوفْ ن ڒُْوڒُوفْ ن إِسْرَائِيل!“