1 إِسِّيوڒْ سِيذِي أَكْ-ذ مُوسَا، إِنَّا:

2 ”سِيوڒْ أَكْ-ذ أَيْثْ ن إِسْرَائِيل، إِنِي أَسنْ: ’خْمِي غَا ثَاذْفمْ غَارْ ثمُّورْثْ مَانِي غَا ثْزدّْغمْ، ثَامُّورْثْ نِّي ذ أَومْ غَا وْشغْ، 3 ؤُشَا أَذْ ثسّْوجْذمْ ذِينْ إِشْثْ ن ثوْهِيبْثْ ن ثْمسِّي إِ سِيذِي، إِشْثْ ن ثْغَارْصْثْ ن وشْمَاضْ نِيغْ إِشْثْ ن ثوْهِيبْثْ إِ ثْغَارْصْثْ إِ ؤُكمّڒْ ن إِجّْ ن لْوَاعْذْ نِيغْ إِشْثْ ن ثوْهِيبْثْ س ڒْْخَاضَارْ نِيغْ إِشْثْ ن ثوْهِيبْثْ إِ ڒعْيُوذَاثْ نْومْ إِتّْوَاڭّنْ، مَاحنْذْ أَذْ ثِيڒِي ذ إِشْثْ ن ڒفْوَاحثْ إِتّْفُوحنْ إِ سِيذِي، زِي ڒبْهَايمْ نِيغْ زڭْ وُودْجِي، 4 خنِّي ونِّي د غَا إِقدّْمنْ ثَاوْهِيبْثْ نّسْ إِ سِيذِي، أَذْ يَاوِي عَاوذْ إِشْثْ ن ثوْهِيبْثْ ن ڒْْغِيدْجثْ زڭْ إِشْثْ ن ثعْشَارْثْ ن يِيجّْ ن إِفَا ن وَارنْ أَزْذَاذْ إِخدْجْضنْ س يِيجّْ ن أَرْبعْ ن إِجّْ ن ؤُهِينُو ن زّشْثْ. ◘15:‏4 لَاوِي 2‏:‏1؛ 6‏:‏14 5 أَذْ ثسّْوجْذذْ أَكْ-ذ مَانْ أَيَا إِجّْ ن أَرْبعْ ن إِجّْ ن ؤُهِينُو ن بِينُو أَمْ ثوْهِيبْثْ ن ؤُسيّبْ إِ كُوڒْ إِجّْ ن إِزْمَارْ، مَاحنْذْ أَذْ ثِيڒِي خْ ثْغَارْصْثْ ن وشْمَاضْ نِيغْ خْ ثوْهِيبْثْ إِ ثْغَارْصْثْ، 6 نِيغْ، مَاڒَا أَذْ ثِيڒِي إِ يِيجّْ ن إِشَارِّي، خنِّي إِتّْخصَّا أَذْ ثسّْوجْذذْ إِشْثْ ن ثوْهِيبْثْ ن ڒْْغِيدْجثْ زِي ثْنَاينْ ن ثعْشُورَايْ ن إِجّْ ن إِفَا ن وَارنْ أَزْذَاذْ إِخدْجْضنْ س إِشْثْ ن تُّوڒُوثْ ن إِجّْ ن ؤُهِينُو ن زّشْثْ، 7 ؤُشَا أَذْ ثْقدّْمذْ عَاوذْ إِشْثْ ن تُّوڒُوثْ ن إِجّْ ن ؤُهِينُو ن بِينُو أَمْ ثوْهِيبْثْ ن ؤُسيّبْ، أَمْ يِيشْثْ ن ڒفْوَاحثْ إِتّْفُوحنْ إِ سِيذِي.‘ “

8 ”خْمِي غَا ثسّْوجْذذْ أَمژْيَانْ ن ؤُفُونَاسْ أَمْ ثْغَارْصْثْ ن وشْمَاضْ نِيغْ أَمْ ثوْهِيبْثْ إِ ثْغَارْصْثْ مَاحنْذْ أَذْ يِيڒِي إِ ؤُكمّڒْ ن إِجّْ ن لْوَاعْذْ نِيغْ أَمْ ثْغَارْصْثْ ن ڒهْنَا إِ سِيذِي، 9 خنِّي إِتّْخصَّا أَذْ ثْقدّْمذْ أَكْ-ذ ؤُمژْيَانْ ن ؤُفُونَاسْ عَاوذْ إِشْثْ ن ثوْهِيبْثْ ن ڒْْغِيدْجثْ ن ثْڒَاثَا ن ثعْشُورَايْ ن إِجّْ ن إِفَا ن وَارنْ أَزْذَاذْ إِخدْجْضنْ ذڭْ وزْينْ ن ؤُهِينُو ن زّشْثْ، 10 ؤُشَا إِتّْخصَّا عَاوذْ أَذْ د-ثَاوْيذْ أَزْينْ ن ؤُهِينُو ن بِينُو أَمْ ثوْهِيبْثْ ن ؤُسيّبْ، أَمْ ثوْهِيبْثْ ن ثْمسِّي، إِشْثْ ن ڒفْوَاحثْ إِتّْفُوحنْ إِ سِيذِي. 11 أَمُّو إِ إِتّْخصَّا أَذْ ڭّنْ إِ كُوڒْ أَفُونَاسْ، نِيغْ إِ كُوڒْ إِشَارِّي، نِيغْ إِ كُوڒْ إِجّْ زڭْ وُودْجِي، زڭْ إِحُوڒِييّنْ نِيغْ زڭْ إِغَايْضنْ. 12 عْلَاحْسَابْ ڒْْقدّْ ن إِمُودَّارنْ إِ ثْغَارْصْثْ إِ غَا ثسّْوجْذمْ، أَذْ ثڭّمْ أَمُّو إِ كُوڒْ إِجّْ ن ؤُمُودَّارْ، عْلَاحْسَابْ ڒْْقدّْ إِكمّْڒنْ ن إِمُودَّارنْ. 13 مَارَّا إِنِّي د-إِتّْوَاخڒْقنْ ذِي ثمُّورْثْ أَذْ ڭّنْ ثِيمسْڒَايِينْ-أَ أَمُّو، خْمِي د غَا قدّْمنْ نِيثْنِي إِشْثْ ن ثوْهِيبْثْ ن ثْمسِّي، إِشْثْ ن ڒفْوَاحثْ إِتّْفُوحنْ إِ سِيذِي. 14 خْمِي غَا ثَافذْ جَارْ مَارَّا جِّيڒَاثْ نْومْ إِجّْ ن ؤُبَارَّانِي إِ إِقِّيمنْ أَكِيذْومْ، نِيغْ إِجّنْ ونِّي إِزدّْغنْ ذِي ڒْْوسْطْ نْومْ، أَقَا نتَّا أَذْ إِسّوْجذْ إِشْثْ ن ثوْهِيبْثْ ن ثْمسِّي، إِشْثْ ن ڒفْوَاحثْ إِتّْفُوحنْ إِ سِيذِي، خنِّي أَذْ ت إِڭّْ أَمْ مَامّشْ ت ثتّڭّمْ كنِّيوْ.“

15 أَيْ، أَڭْرَاوْ ن ڒْْڭنْسْ، أَذْ ذِينْ ثِيڒِي إِشْثْ ن ثوْصيّثْ، إِشْثْ ن ثوْصيّثْ إِ ڒبْذَا إِ كنِّيوْ ؤُ إِ ؤُبَارَّانِي نِّي أَكِيذْومْ إِقِّيمنْ إِ مَارَّا جِّيڒَاثْ نْومْ. أَذْ يِيڒِي ؤُبَارَّانِي أَمْ مَامّشْ ثدْجَامْ كنِّيوْ زَّاثْ إِ وُوذمْ ن سِيذِي. ◘15:‏15 ؤُف. 12‏:‏49؛ ڒخْڒ. 9‏:‏14 16 أَذْ يِيڒِي إِجّْ ن ؤُزرْفْ ذ إِشْثْ ن لْفَارِيضَا إِ كنِّيوْ ؤُ إِ ؤُبَارَّانِي نِّي أَكِيذْومْ إِقِّيمنْ.“

17 إِسِّيوڒْ سِيذِي أَكْ-ذ مُوسَا، إِنَّا:

18 ”سِيوڒْ أَكْ-ذ أَيْثْ ن إِسْرَائِيل ؤُشَا إِنِي أَسنْ: ’خْمِي غَا ثَاذْفمْ غَارْ ثَامُّورْثْ مَانِي كنِّيوْ غَا يْأَوْيغْ، 19 خنِّي أَذْ إِمْسَارْ، ؤُمِي غَا ثشّمْ أَغْرُومْ زِي ڒْْغِيدْجثْ ن ثمُّورْثْ، أَقَا كنِّيوْ أَذْ ثسّْڭعّْذمْ إِشْثْ ن ثوْهِيبْثْ ن ؤُسْڭعّذْ إِ سِيذِي. 20 زِي ثْمزْوَارُوثْ ن وَارشْثِي نْومْ أَذْ ثسّْڭعّْذمْ إِشْثْ ن ثمْسمّنْثْ أَمْ ثوْهِيبْثْ ن ؤُسْڭعّذْ. أَذْ ت ثسّْڭعّْذمْ أَمْ مَامّشْ ثسّْڭعّْذمْ ثَاوْهِيبْثْ ن ؤُسْڭعّذْ ن ؤُنذْرَارْ. 21 زِي ثْمزْوَارُوثْ ن وَارشْثِي نْومْ أَذْ ثْقدّْممْ إِشْثْ ن ثوْهِيبْثْ ن ؤُسْڭعّذْ إِ سِيذِي ذِي مَارَّا جِّيڒَاثْ نْومْ.‘ “

22 ”مَاڒَا ثْودَّارمْ ؤُ وَارْ ثتّڭّمْ مَارَّا ڒُْومُورَاثْ-أَ إِ ثُوغَا إِسَّاوَاڒْ سِيذِي أَكْ-ذ مُوسَا 23 - مَارَّا مِينْ ذ أَومْ يُومُورْ سِيذِي س ثْسخَّارْثْ ن مُوسَا زڭْ وَاسّْ مِينْ زِي ث يُومُورْ سِيذِي، سّنِّي ذ ثْسَاونْثْ، ذِي مَارَّا رجْيُوڒْ نْومْ - 24 خنِّي أَذْ إِمْسَارْ، مَاڒَا إِتّْوَاڭّْ س ؤُودَّارْ بَارَّا إِ ثِيطَّاوِينْ ن ثْمسْمُونْثْ، أَقَا ثَامسْمُونْثْ مَارَّا أَذْ ثسّوْجذْ إِجّْ ن ؤُفُونَاسْ، أَمژْيَانْ ن ثْفُونَاسْثْ، أَمْ ثْغَارْصْثْ ن وشْمَاضْ، أَمْ إِشْثْ ن ڒفْوَاحثْ إِتّْفُوحنْ إِ سِيذِي أَكْ-ذ ثوْهِيبْثْ نّسْ ن ڒْْغِيدْجثْ ذ ثوْهِيبْثْ نّسْ ن ؤُسيّبْ عْلَاحْسَابْ لْفَارِيضَا ؤُ أَكْ-ذ يِيجّْ ن ؤُمْيَانْ زڭْ إِغَايْضنْ أَمْ ثْغَارْصْثْ ن دّنْبْ. 25 خنِّي أَذْ إِڭّْ ؤُكهَّانْ أَسْڒَاحْ إِ مَارَّا ثَامسْمُونْثْ ن أَيْثْ ن إِسْرَائِيل ؤُشَا أَذْ أَسنْ إِتّْوَاغْفَارْ، مِينْزِي مَانْ أَيَا إِمْسَارْ زڭْ ؤُودَّارْ، ؤُشَا نِيثْنِي قدّْمنْ ثَاوْهِيبْثْ نْسنْ، إِشْثْ ن ثوْهِيبْثْ ن ثْمسِّي إِ سِيذِي، ؤُڒَا ذ ثَاغَارْصْثْ نْسنْ ن دّنْبْ، زَّاثْ إِ وُوذمْ ن سِيذِي. ◼15:‏25 ’إِفْذِي‘ - خْزَارْ إِزهد. 78:35. 26 مَارَّا ثَامسْمُونْثْ ن أَيْثْ ن إِسْرَائِيل أَذْ ثتّْوَاغْفَارْ، ؤُڒَا ذ أَبَارَّانِي نِّي إِزدّْغنْ ذِي ڒْْوسْطْ نْومْ، خْ ؤُمِي إِمْسَارْ أَمْ إِودَّارْ مَارَّا ڒْْڭنْسْ.“

27 ”مَاڒَا إِجّنْ بْنَاذمْ إِخْضَا أَمْ نتَّا إِودَّارْ، خنِّي أَذْ د-إِسّْقَارّبْ إِشْثْ ن ثْغَايْضثْ ن إِجّْ ن ؤُسڭّْوَاسْ أَمْ ثْغَارْصْثْ ن دّنْبْ. ◼15:‏27 ’بْنَاذمْ‘ - س ثْعِيبْرَانِيثْ ’ڒعْمَارْ‘. أَمُّو ؤُڒَا ذِي أَيَاثْ وِيسّْ 28 ذ 30.  ◘15:‏27 لَاوِي 4‏:‏27 28 أَكهَّانْ أَذْ إِڭّْ أَصْڒَاحْ زَّاثْ إِ وُوذمْ ن سِيذِي خْ بْنَاذمْ نِّي ثُوغَا إِودَّارْ، أَمْ ثُوغَا إِخْضَا س ؤُودَّارْ زَّاثْ إِ وُوذمْ ن سِيذِي، أَمْ خَاسْ إِ غَا يڭّْ أَسْڒَاحْ ؤُشَا خنِّي أَذْ أَسْ إِتّْوَاغْفَارْ.

29 أَذْ ذِينْ يِيڒِي إِجّْ ن ؤُزرْفْ إِ ونِّي إِڭِّينْ شَا س ؤُودَّارْ، إِ ونِّي د-إِخڒْقنْ ذِي ثمُّورْثْ ؤُڒَا إِ ؤُبَارَّانِي نِّي إِزدّْغنْ ذِي ڒْْوسْطْ نْومْ.“

30 ”مَاشَا بْنَاذمْ نِّي إِڭِّينْ شَا س ؤُفُوسْ إِڭعّْذنْ، مَا نتَّا إِتّْوَاخْڒقْ-د ذِي ثمُّورْثْ نِيغْ نتَّا ذ أَبَارَّانِي، أَقَا نتَّا إِشقّفْ ذِي سِيذِي ؤُشَا بْنَاذمْ نِّي أَذْ إِتّْوَاقسّْ زِي ڒْْوسْطْ ن ڒْْڭنْسْ نّسْ، ◼15:‏30 ’س ؤُفُوسْ إِسّْڭعّْذنْ‘ - مَانْ أَيَا إِخْسْ أَذْ يِينِي أَقَا إِڭَّا إِ-ث س نعْمَاذَا. 31 ؤُمِي إِسّحْقَارْ أَوَاڒْ ن سِيذِي ؤُ يَارْژَا ڒُْومُورْ نّسْ. بْنَاذمْ نِّي أَذْ إِتّْوَاقسّْ قَاعْ زِي ڒْْڭنْسْ نّسْ، ڒْْمُوعْصِييّثْ نّسْ أَذْ ثِيڒِي خَاسْ.“

32 ڒَْامِي ثُوغَا أَيْثْ ن إِسْرَائِيل ذِي ڒخْڒَا، ؤُفِينْ إِجّْ ن ورْيَازْ إِتّْحَارْوَاشْ أَكشُّوضْ ذڭْ وَاسّْ ن سّبْثْ. 33 إِنِّي ث يُوفِينْ أَمْ ثُوغَا إِتّْحَارْوَاشْ أَكشُّوضْ، إِوْينْ ث غَارْ مُوسَا ذ هَارُونْ ذ مَارَّا ثَامسْمُونْثْ. 34 ڭِّينْ ث ذِي ثْحطُّوثْ، مِينْزِي ثُوغَا وَارْ د-إِبِينْ مِينْ زَّايسْ غَا ڭّنْ. ◘15:‏34 لَاوِي 24‏:‏12 35 خنِّي إِنَّا سِيذِي إِ مُوسَا: ”أَرْيَازْ نِّي أَذْ إِتّْوَانغْ نِيشَانْ. مَارَّا ثَامسْمُونْثْ أَذْ ث ثَارْجمْ بَارَّا إِ ڒْْمَارْڭحْ ن ڒْْعسْكَارْ.“ 36 خنِّي ثسُّوفّغْ إِ-ث مَارَّا ثْمسْمُونْثْ بَارَّا إِ ڒْْمَارْڭحْ ن ڒْْعسْكَارْ ؤُشَا نِيثْنِي أَرجْمنْ ث أَڒَامِي إِمُّوثْ، أَمْ مَامّشْ ث يُومُورْ سِيذِي إِ مُوسَا.

37 إِسِّيوڒْ سِيذِي أَكْ-ذ مُوسَا، إِنَّا:

38 ”سِيوڒْ أَكْ-ذ أَيْثْ ن إِسْرَائِيل ؤُشَا إِنِي أَسنْ، أَذْ ڭّنْ إِ يِيخفْ نْسنْ ثِيشَارْشِيفَا غَارْ ثْغمُّورَا ن وَارُّوضْ نْسنْ ذِي مَارَّا جِّيڒَاثْ نْسنْ ؤُشَا أَذْ ڭّنْ إِجّْ ن ؤُفِيڒُو ذ أَذحْمِي غَارْ ثْشَارْشِيفَا، ثِينِّي غَارْ ثْغمُّورَا. ◘15:‏38 أَعَوذ. 22‏:‏12؛ مت. 23‏:‏5 39 أَذْ يِيڒِي ؤُفِيڒُو غَارْ ثْشَارْشِيفْثْ، حِيمَا أَذْ ثْوَاڒَامْ أَفِيڒُو نِّي ؤُشَا أَذْ ثِيذَارمْ ذِي مَارَّا ڒُْومُورَاثْ ن سِيذِي ؤُشَا أَذْ ثنْثْ ثڭّمْ ؤُ وَارْ ثْضفَّارمْ شّهْوَاثْ ن وُوڒَاونْ نْومْ ذ ثِيطَّاوِينْ نْومْ، إِنِّي أَوَارْنِي أَسنْثْ ثنُّوممْ أَذْ ثسّفْسذمْ إِخفْ نْومْ، 40 ؤُ حِيمَا أَذْ ثْخَارّْصمْ ذِي ڒُْومُورَاثْ إِنُو، أَذْ زَّايْسنْثْ ثڭّمْ، مَاحنْذْ أَذْ ثِيڒِيمْ ثتّْوَاقدّْسمْ زَّاثْ إِ أَربِّي نْومْ. 41 نشّْ ذ سِيذِي، أَربِّي نْومْ ونِّي كنِّيوْ د-إِسُّوفّْغنْ زِي ثمُّورْثْ ن مِيصْرَا حِيمَا أَذْ إِڒِيغْ ذ أَربِّي نْومْ. نشّْ ذ سِيذِي، أَربِّي نْومْ!“