١ ؤُمِي إِسْڒَا أَكنْعَانِي، أَجدْجِيذْ ن عَارَاذْ نِّي إِزدّْغنْ ذِي ثمُّورْثْ ن لْجَانُوبْ، بلِّي يُوسَا-د إِسْرَائِيل خْ وبْرِيذْ ن إِبرْڭَاڭنْ، إِمّْنغْ ضِيدّْ إِ إِسْرَائِيل ؤُشَا إِطّفْ شَا زَّايْسنْ ذ إِمحْبَاسْ.

٢ خنِّي إِوْشَا إِسْرَائِيل إِجّْ ن وَاوَاڒْ إِ سِيذِي ؤُشَا إِنَّا: ”مَاڒَا ذ ثِيذتّْ ثْعَارّْنذْ ڒْْڭنْسْ-أَ ذڭْ ؤُفُوسْ إِنُو، نشّْ أَذْ حَارّْمغْ ثِيندَّامْ نْسنْ إِ ؤُثحِّي.“ ٣ سِيذِي إِسْثَاجبْ إِ إِسْرَائِيل ؤُشَا إِسلّمْ أَسْ أَيْثْ ن كنْعَانْ ؤُشَا نِيثْنِي حَارّْمنْ إِ-ثنْ إِ ؤُثحِّي ؤُڒَا ذ مَارَّا ثِيندَّامْ نْسنْ ؤُشَا إِڒَاغَا أَمْشَانْ نِّي س يِيسمْ ن حُورْمَا. ◼21:‏3 ’إِسْثَاجبْ إِ إِسْرَائِيل‘ - س ثْعِيبْرَانِيثْ ’إِسْڒَا إِ ثْمِيجَّا ن إِسْرَائِيل‘.

٤ خنِّي فسْينْ إِقِيضَانْ نْسنْ زڭْ وذْرَارْ ن هُورْ، رُوحنْ خْ وبْرِيذْ غَارْ ڒبْحَارْ ن ثلْڭَا ؤُشَا س مَانْ أَيَا ثُوغَا إِتّْخصَّا أَذْ نّْضنْ إِ ثمُّورْثْ ن إِذُومْ. ؤُشَا ڒْْڭنْسْ وَارْ إِصْبِيرْ ذڭْ وبْرِيذْ. ٥ أَقَا إِقَاشحْ ڒْْڭنْسْ ضِيدّْ إِ أَربِّي ذ مُوسَا: ”مَايمِّي ذ أَنغْ د-ثسُّوفّْغمْ زِي مِيصْرَا، مَاحنْذْ أَذْ نمّثْ ذِي ڒخْڒَا-يَا؟ وَارْ ذَا إِدْجِي وغْرُومْ ؤُڒَا ذ أَمَانْ. ڒعْمَارْ نّغْ إِعِيفّْ زڭْ وغْرُومْ-أَ إِ وَارْ إِسكّْوِينْ!“

٦ خنِّي إِضْڒقْ سِيذِي إِفِيغْرَانْ يَارقّنْ جَارْ ڒْْڭنْسْ، إِنِّي إِزعْفنْ ڒْْڭنْسْ ؤُشَا إِمُّوثْ وَاطَّاسْ ن ڒْْڭنْسْ ن إِسْرَائِيل. ◘21:‏6 1 كُور. 10‏:‏9 ٧ يُوسَا-د ڒْْڭنْسْ غَارْ مُوسَا، نَّانْ: ”أَقَا نخْضَا، مِينْزِي نْقَاشحْ أَكْ-ذ سِيذِي ؤُ أَكِيذكْ. ژَتدْجْ إِ سِيذِي مَاحنْذْ أَذْ خَانغْ إِكّسْ إِفِيغْرَانْ-أَ.“ خنِّي إِژُودْجْ مُوسَا ذِي طّْوعْ ن ڒْْڭنْسْ. ◼21:‏7 ’إِفِيغْرَانْ‘ - س ثْعِيبْرَانِيثْ ’أَفِيغَارْ‘.

٨ إِنَّا سِيذِي إِ مُوسَا: ”أڭّْ إِجّْ ن ؤُفِيغَارْ يَارقّنْ ؤُشَا سَارْسْ إِ-ث خْ إِشْثْ ن ثحْنَاشْثْ ؤُشَا مَانْ ونْ مَا إِتّْوَازعْفنْ ؤُ أَذْ غَارسْ إِخْزَارْ، أَذْ إِدَّارْ.“ ◘21:‏8 يُوح. 3‏:‏14 ٩ ؤُشَا إِڭَّا مُوسَا إِجّْ ن ؤُفِيغَارْ ن نّْحَاسْ ؤُشَا إِسَّارْسْ إِ-ث خْ ثحْنَاشْثْ ؤُشَا خْمِي إِزعّفْ شَا ن ؤُفِيغَارْ شَا ن يِيجّنْ، ؤُشَا وَانِيثَا إِخزَّارْ غَارْ ؤُفِيغَارْ ن نّْحَاسْ، خنِّي أَذْ إِقِّيمْ إِدَّارْ. ◘21:‏9 2 إِج. 18‏:‏4؛ يُوح. 3‏:‏14

١٠ خنِّي فسْينْ أَيْثْ ن إِسْرَائِيل إِقِيضَانْ نْسنْ ؤُشَا وْثِينْ إِقِيضَانْ نْسنْ ذِي ؤُبُوثْ. ◘21:‏10 ڒخْڒ. 33‏:‏43 ١١ خنِّي كّْسنْ إِقِيضَانْ نْسنْ زِي ؤُبُوثْ، وْثِينْ إِقِيضَانْ نْسنْ غَارْ أَرْوِينَاثْ ن عَابَارِيمْ ذِي ڒخْڒَا إِ إِدْجَانْ زَّاثْ إِ وُوذمْ ن مُوآبَ مَانِيسْ د-ثْنقَّارْ ثْفُوشْثْ. ١٢ سّنِّي كّْسنْ إِقِيضَانْ نْسنْ ؤُشَا وْثِينْ إِقِيضَانْ نْسنْ ذِي ثغْزُورْثْ ن زَارَاذْ. ١٣ سّنِّي كّْسنْ إِقِيضَانْ نْسنْ ؤُشَا وْثِينْ إِقِيضَانْ نْسنْ خْ ؤُجمَّاضْ ن يغْزَارْ ن أَرْنُونْ، ونِّي إِسِّيزْڒنْ ذِي ڒخْڒَا، إِفّغْ زِي جِّيهثْ ن ويْمِيرْ ن إِمُورِييّنْ، مِينْزِي أَقَا أَرْنُونْ ذ أَيْمِيرْ أَكْ-ذ مُوآبَ، جَارْ مُوآبَ ذ إِمُورِييّنْ. ◘21:‏13 ڒقض. 11‏:‏18 ١٤ خْ ؤُيَا قَّارنْ ذڭْ وذْلِيسْ إِتّْوَانّْضنْ ن ڭَارَّاثْ ن سِيذِي:

”وَاهِيبْ ذِي سُوفَا ذ ثْغزْرَاثِينْ ن أَرْنُونْ،

١٥ ؤُ ثِيغزْرَاثِينْ إِ د-إِهكّْوَانْ،

أَڒَامِي ميّْڒنْثْ غَارْ ثْزذِّيغْثْ ن عَارْ،

ذ ثنِّي إِسنّْذنْ خْ ويْمِيرْ ن مُوآبَ.“ ◘21:‏15 أَعَوذ. 2‏:‏36؛ ياش. 13‏:‏9، 16؛ 2 صم. 24‏:‏5

١٦ سّنِّي رُوحنْ غَارْ بِي‘رْ، ’أَنُو‘. وَا أَقَا ذ أَنُو مِينْ خفْ إِنَّا سِيذِي إِ مُوسَا: ”سْمُونْ ڒْْڭنْسْ، خنِّي أَذْ أَسنْ وْشغْ أَمَانْ.“ ١٧ خنِّي إِغنّجْ إِسْرَائِيل إِزْڒِي-يَا:

”نْڭزْ، أَ أَنُو!“

أَرِّيمْ-د خَاسْ س إِجّْ ن إِزْڒِي:

١٨ ”شكْ أَنُو، ونِّي غْزِينْ ڒْْحُوكَّامْ،

ونِّي إِنقْشنْ ثَارْوَا ن ثَاصِيڒثْ ن ڒْْڭنْسْ

أَكْ-ذ ؤُمْڭوَّاذْ نْسنْ

س إِزدْجَاضنْ نْسنْ ن ڒحْكَامثْ.“

زِي ڒخْڒَا رُوحنْ غَارْ مَاتَّانَا، ١٩ ؤُشَا زِي مَاتَّانَا غَارْ نَاحْلِييِيلْ، زِي نَاحْلِييِيلْ غَارْ بَامُوثْ، ٢٠ ؤُشَا زِي بَامُوثْ غَارْ ثغْزُورْثْ نِّي إِدْجَانْ ذڭْ إِيَّارْ ن مُوآبَ، خْ ثْقِيشَّاثْ ن فِيسْجَا نِّي إِتّْسِيجَّانْ غَارْ ثْنزْرُوفْثْ.

٢١ خنِّي إِسّكّْ إِسْرَائِيل إِرقَّاسنْ غَارْ سِيحُونْ، أَجدْجِيذْ ن إِمُورِييّنْ، إِنَّا: ◘21:‏21 أَعَوذ. 2‏:‏26؛ ڒقض. 11‏:‏19

٢٢ ”أجّْ أَيِي أَذْ شُوقغْ ذِي ثمُّورْثْ نّشْ. وَارْ نتّْميِّيڒْ شَا غَارْ إِيَّارنْ نِيغْ غَارْ إِمَارْجَاعنْ نّشْ ن ؤُضِيڒْ ؤُ وَارْ نْسسّْ أَمَانْ زڭْ وَانُوثنْ. أَذْ نعْذُو خْ وبْرِيذْ إِڭلّْذنْ، أَڒْ غَا نعْذُو خْ ثمُّورْثْ نّشْ.“ ◘21:‏22 ڒخْڒ. 20‏:‏17 ٢٣ مَاشَا سِيحُونْ وَارْ يجِّي أَذْ إِژْوَا إِسْرَائِيل خْ جّْوَايهْ نّسْ. إِسّْمُونْ سِيحُونْ مَارَّا ڒْْڭنْسْ نّسْ ؤُشَا إِفّغْ، حِيمَا أَذْ إِمْسَاڭَارْ أَكْ-ذ إِسْرَائِيل، غَارْ ڒخْڒَا، ؤُشَا يُوسَا-د ذِي يَاهَاصْ ؤُشَا إِمّْنغْ أَكْ-ذ إِسْرَائِيل. ◘21:‏23 أَعَوذ. 2‏:‏30؛ 29‏:‏7؛ ياش. 24‏:‏8؛ ڒقض. 11‏:‏20 ٢٤ ؤُشَا إِسْرَائِيل إِوْثَا إِ-ث س ڒقْضعْ ن سِّيفْ ؤُشَا إِكْسِي ثمُّورْثْ نّسْ ذ ڒْْوَارْثْ، زِي أَرْنُونْ أَڒْ يَابُّوقْ، أَڒْ أَيْثْ ن عَامُّونْ، مِينْزِي جِّيهثْ ن أَيْثْ ن عَامُّونْ أَقَا-ث ذ إِجّْ ن لْبُورْجْ إِجهْذنْ. ◘21:‏24 أَعَوذ. 2‏:‏33، 37؛ 29‏:‏7؛ ياش. 12‏:‏2؛ 24‏:‏8؛ ڒقض. 11‏:‏2؛ إِزهد. 135‏:‏11، 12؛ 136‏:‏19؛ عَام. 2‏:‏9 ٢٥ إِكْسِي إِسْرَائِيل مَارَّا ثِيندَّامْ-أَ ؤُشَا إِزْذغْ إِسْرَائِيل ذِي مَارَّا ثِيندَّامْ ن إِمُورِييّنْ، ذِي حَاشْبُونْ ؤُ ذِي مَارَّا ثْندَّامْ إِ غَارسْ د-إِقّْننْ. ◘21:‏25 أَعَوذ. 2‏:‏34، 35 ٢٦ مِينْزِي حَاشْبُونْ ثُوغَا ذ ثَانْذِينْثْ ن سِيحُونْ، أَجدْجِيذْ ن إِمُورِييّنْ، ؤُشَا نتَّا ثُوغَا إِمّْنغْ أَكْ-ذ ؤُجدْجِيذْ إِ ذ أَسْ د-إِزْوَارنْ ن مُوآبَ ؤُشَا إِكْسِي زَّايسْ مَارَّا ثَامُّورْثْ نّسْ أَڒْ أَرْنُونْ. ٢٧ خْ ؤُيَا قَّارنْ إِنِّي إِسَّاوَاڒنْ س وَاوَاڒنْ إِوزْننْ:

”أَسمْ-د غَارْ حَاشْبُونْ،

أَذْ ثتّْوَابْنَا ؤُ أَذْ ثتّْوَاعْذڒْ

ثنْذِينْثْ ن سِيحُونْ!

٢٨ مِينْزِي ثفّغْ-د ثْمسِّي زِي حَاشْبُونْ

ذ إِجّْ ن ؤُعشَّاڒْ زِي ثنْذِينْثْ ن سِيحُونْ،

أَشعَّاڒْ نِّي إِشَّا عَارْ ن أَيْثْ ن مُوآبَ

ڒْْحُوكَّامْ ن ڒُْوعْڒَاثْ ن أَرْنُونْ. ◘21:‏28 إِشا. 48‏:‏45

٢٩ ؤُشْثْ خَاكْ، مُوآبَ!

أَقَا إِتّْوَاهلّكْ ڒْْڭنْسْ ن كَامُوشْ.

إِحنْجِيرنْ نّسْ إِ ثُوغَا يَاروْڒنْ

ذ ثْحنْجِيرِينْ نّسْ،

أَقَا إِسلّمْ إِ-ثنْ ذ إِمحْبَاسْ إِ سِيحُونْ،

أَجدْجِيذْ ن إِمُورِييّنْ. ◘21:‏29 1 إِج. 11‏:‏7، 33

٣٠ أَقَا نوّثْ إِ-ثنْ س فْڒِيثْشَاثْ.

حَاشْبُونْ إِتّْوَاهلّكْ أَڒْ ذِيبُونْ.

نَاردّدْجْ إِ-ثنْ أَڒْ نُوفَاحْ

ثنِّي إِدْجَانْ أَڒْ مِيذَابَا.“

٣١ أَمُّو إِ إِذْوڒْ إِسْرَائِيل أَذْ إِزْذغْ ذِي ثمُّورْثْ ن إِمُورِييّنْ. ٣٢ ؤُشَا إِسّكّْ مُوسَا إِبرْڭَاڭنْ غَارْ يَاعْزِيرْ ؤُشَا كْسِينْ ثِيندَّامْ إِ غَارسْ د-إِقّْننْ ؤُشَا كّْسنْ ثَاسْغَارْثْ ن إِمُورِييّمْ نِّي ثُوغَا ذِينْ إِزدّْغنْ.

٣٣ خنِّي ميّْڒنْ زڭْ وبْرِيذْ نْسنْ، ؤُڒْينْ أَبْرِيذْ غَارْ بَاشَانْ. خنِّي إِفّغْ-د عُوجْ، أَجدْجِيذْ ن بَاشَانْ، نتَّا ذ مَارَّا ڒْْڭنْسْ نّسْ، مَاحنْذْ أَذْ كِيذْسنْ إِمْسَاڭَارْ إِ ؤُمنْغِي ذِي إِذْرَاعِي. ◘21:‏33 أَعَوذ. 3‏:‏1؛ 29‏:‏7 ٣٤ إِنَّا سِيذِي إِ مُوسَا: ”وَارْ زَّايسْ تّڭّْوذْ شَا، مِينْزِي نشّْ ڭِّيغْ ث ذڭْ ؤُفُوسْ نّشْ، أَكْ-ذ مَارَّا ڒْْڭنْسْ نّسْ ذ ثمُّورْثْ نّسْ ؤُشَا أَذْ زَّايسْ ثڭّذْ أَمْ مَامّشْ ثڭِّيذْ زِي سِيحُونْ أَجدْجِيذْ ن إِمُورِييّنْ، ونِّي ثُوغَا إِزدّْغنْ ذِي حَاشْبُونْ.“ ◘21:‏34 إِزهد. 136‏:‏20 ٣٥ ؤُشَا أَردّْدْجنْ ث، نتَّا ذ إِحنْجِيرنْ نّسْ ذ مَارَّا ڒْْڭنْسْ نّسْ، أَڒْ مَانِي وَارْ إِقِّيمْ ؤُڒَا ذ إِجّْ ن ؤُمَاڒْوَارْ زَّايسْ ؤُشَا كْسِينْ ثَامُّورْثْ نّسْ ذ ڒْْوَارْثْ. ◘21:‏35 إِزهد. 136‏:‏20، 21، 22