1 خنِّي ؤُسِينْثْ-إِ-د يسِّيسْ ن صَالُوفْحَاذْ، مِّيسْ ن حَافَارْ، مِّيسْ ن جِيلْعَاذْ، مِّيسْ ن مَاكِيرْ، مِّيسْ ن مَانَاسَّا، إِنِّي إِدْجَانْ ن ڒَْادْجَاثْ ن مَانَاسَّا، مِّيسْ ن يُوسُوفْ. إِنَا ذ إِسْمَاونْ ن يسِّيسْ: مَاحْلَا، نُوعَا، حُوجْلَا، مِيلْكَا ذ ثِيرْصَا. ◘27:‏1 ڒخْڒ. 26‏:‏33؛ 36‏:‏2؛ ياش. 17‏:‏3 2 ثُوغَا بدّنْثْ زَّاثْ إِ وُوذمْ ن مُوسَا ؤُ زَّاثْ إِ وُوذمْ ن أَلِيعَازَارْ، أَكهَّانْ، ؤُ زَّاثْ إِ وُوذمْ ن ڒْْحُوكَّامْ ؤُ زَّاثْ إِ وُوذمْ ن مَارَّا ثَامسْمُونْثْ غَارْ وَاذَافْ ن ؤُقِيضُونْ ن ؤُمْسَاڭَارْ، نَّانْثْ: 3 ”بَابَاثْنغْ إِمُّوثْ ذِي ڒخْڒَا ؤُ وَارْ ث ثُوغِي جَارْ ؤُبَارُّو ن يِينِّي إِمُوننْ ضِيدّْ إِ سِيذِي، ذڭْ ؤُبَارُّو ن قُورَاحْ وَارْ ذِينْ ث ثُوغِي نتَّا، مِينْزِي إِمُّوثْ ذِي دّْنُوبْ نّسْ ؤُ وَارْ غَارسْ ثُوغِي إِحنْجِيرنْ. ◼27:‏3 ’جَارْ‘ - س ثْعِيبْرَانِيثْ ’ذِي ڒْْوسْثْ ن‘.  ◘27:‏3 ڒخْڒ. 14‏:‏35؛ 16‏:‏1؛ 26‏:‏64 4 مَايمِّي غَا إِكّسْ إِسمْ ن بَابَاثْنغْ زِي جَارْ ڒَْادْجْ نّسْ، مَا مِينْزِي وَارْ غَارسْ ثُوغِي بُو ؤُحنْجِيرْ؟ أوْشْ أَنغْ أَڭْڒَا ذِي ڒْْوسْطْ ن أَيْثْمَاسْ ن بَابَاثْنغْ.“

5 مُوسَا يِيوِي دّعْوَا نْسنْثْ زَّاثْ إِ وُوذمْ ن سِيذِي. 6 إِسِّيوڒْ سِيذِي أَكْ-ذ مُوسَا، إِنَّا:

7 ”أَقَا أَيَا أَمْ مَامّشْ ث نَّانْثْ يسِّيسْ ن صَالُوفْحَاذْ. إِتّْخصَّا أَذْ أَسنْثْ ثوْشذْ ثَاسْغَارْثْ ن ڒْْوَارْثْ ذِي  ڒْوسْثْ ن أَيْثْمَاسْ ن بَابَاثْسنْ ؤُشَا أَذْ خَاسنْثْ ثسّعْذُوذْ ڒْْوَارْثْ ن بَابَاثْسنْثْ. ◘27:‏7 ڒخْڒ. 36‏:‏2 8 ؤُشَا أَذْ ثسِّيوْڒذْ أَكْ-ذ أَيْثْ ن إِسْرَائِيل، أَذْ ثِينِيذْ: ’مَاڒَا شَا ن يِيجّنْ إِمُّوثْ بْڒَا مِّيسْ، خنِّي أَذْ ثسّعْذُومْ ڒْْوَارْثْ نّسْ غَارْ يدْجِيسْ، 9 ؤُ مَاڒَا وَارْ غَارسْ يدْجِيسْ، أَذْ ثوْشمْ ڒْْوَارْثْ نّسْ إِ يَايْثْمَاسْ. 10 مَاڒَا وَارْ غَارسْ أَيْثْمَاسْ عَاوذْ، أَذْ ثوْشمْ ڒْْوَارْثْ نّسْ إِ يَايْثْمَاسْ ن بَابَاسْ. 11 مَاڒَا بَابَاسْ وَارْ غَارسْ أَيْثْمَاسْ عَاوذْ، أَذْ ثوْشمْ ڒْْوَارْثْ نّسْ إِ رَادْجْ نّسْ، إِ ونِّي إِ ذ أَسْ د-يُوذْسنْ زِي ڒَْادْجْ نّسْ، حِيمَا أَذْ ت إِوَارْثْ نتَّا.‘ مَانْ أَيَا أَذْ ثِيڒِي ذ إِشْثْ ن ثوْصيّثْ ن ؤُزرْفْ إِ ڒبْذَا إِ أَيْثْ ن إِسْرَائِيل، أَمْ مَامّشْ ث يُومُورْ سِيذِي إِ مُوسَا.“

12 خنِّي إِنَّا سِيذِي إِ مُوسَا: ”ڭعّذْ-د أَذْرَارْ-أَ أَبَارِيمْ ؤُشَا خْزَارْ ثَامُّورْثْ نِّي وْشِيغْ إِ أَيْثْ ن إِسْرَائِيل. ◘27:‏12 أَعَوذ. 32‏:‏48، 49 13 خْمِي ت غَا ثْژَارذْ، أَذْ ثمَّارْنِيذْ غَارْ ڒْْڭنْسْ نّشْ، ؤُڒَا ذ شكْ، أَمْ مَامّشْ ؤُڒَا ذ ؤُمَاشْ هَارُونْ إِمَّارْنِي غَارْ ڒْْڭنْسْ نّسْ، ◘27:‏13 ڒخْڒ. 20‏:‏24 14 مِينْزِي كنِّيوْ ثْغوّْغمْ زَّاثْ إِ ثِيطَّاوِينْ نْسنْ ضِيدّْ إِ ڒُْومُورْ إِنُو مَاحنْذْ أَذْ أَيِي ثسّْقدّْسمْ ذِي ڒخْڒَا ن صِينْ، ڒَْامِي ذِينْ ثُوغَا أَمْشُوبّشْ ذِي ثْمسْمُونْثْ. أَقَا ذ إِنَا ذ أَمَانْ ن مَارِيبَا، غَارْ قَاذَاشْ ذِي ڒخْڒَا ن صِينْ.“ ◘27:‏14 ڒخْڒ. 20‏:‏12 15 إِسِّيوڒْ مُوسَا أَكْ-ذ سِيذِي، إِنَّا:

16 ”أَذْ إِڭّْ سِيذِي، أَربِّي ن بُوحْبڒَاثْ ن مَارَّا دَّاثْ، أَحطُّو خْ ثْمسْمُونْثْ ذڭْ ؤُفُوسْ ن إِجّْ ن ورْيَازْ، ◘27:‏16 ڒخْڒ. 16‏:‏22؛ عبر. 12‏:‏9 17 حِيمَا نتَّا أَذْ إِفّغْ زَّاثْ إِ وُوذمْ نْسنْ ؤُشَا أَذْ يَاذفْ زَّاثْ إِ وُوذمْ نْسنْ ؤُشَا أَذْ ثنْ إِنْذهْ غَارْ بَارَّا، أَذْ ثنْ إِسِّيذفْ غَارْ ذَاخڒْ، مَاحنْذْ ثَامسْمُونْثْ ن سِيذِي وَارْ ثتِّيڒِي أَمْ وُودْجِي بْڒَا أَمكْسَاوْ.“ ◼27:‏17 ’أَمكْسَاوْ‘ - نِيغْ ’ذ‘.  ◘27:‏17 1 إِج. 22‏:‏17؛ مت. 9‏:‏36؛ مك. 6‏:‏34

18 خنِّي إِنَّا سِيذِي إِ مُوسَا: ”كْسِي يَاشُووَا، مِّيسْ ن نُونْ، إِجّْ ن ورْيَازْ إِ ذِي إِدْجَا أَرُّوحْ، ؤُشَا سَارْسْ خَاسْ أَفُوسْ نّشْ ◘27:‏18 أَعَوذ. 3‏:‏21؛ 34‏:‏9 19 ؤُشَا أَذْ ث ثڭّذْ زَّاثْ إِ وُوذمْ ن ؤُكهَّانْ أَلِيعَازَارْ ؤُ زَّاثْ إِ مَارَّا ثَامسْمُونْثْ، أَذْ أَسْ ثوْشذْ ڒُْومُورْ زَّاثْ إِ ثِيطَّاوِينْ نْسنْ. 20 أوْشْ أَسْ شَا زڭْ ؤُوقَّارْ نّشْ حِيمَا أَذْ أَسْ ثْسڒْ مَارَّا ثَامسْمُونْثْ ن أَيْثْ ن إِسْرَائِيل. 21 نتَّا أَذْ إِبدّْ زَّاثْ إِ ؤُكهَّانْ أَلِيعَازَارْ، ونِّي إِ غَا إِشَاوَارْ زَّاثْ إِ وُوذمْ ن سِيذِي عْلَاحْسَابْ ڒحْكَامْ ن ؤُرِيمْ. خْ ڒُْومُورْ نّسْ أَذْ د-فّْغنْ غَارْ بَارَّا ؤُ خْ ڒُْومُورْ نّسْ أَذْ أَذْفنْ غَارْ ذَاخڒْ، نتَّا ذ مَارَّا أَيْثْ ن إِسْرَائِيل ؤُڒَا ذ مَارَّا ثَامسْمُونْثْ.“ ◘27:‏21 ؤُف. 28‏:‏30؛ لَاوِي 8‏:‏8

22 ؤُشَا مُوسَا إِڭَّا أَمْ مَامّشْ ذ أَسْ يُومُورْ سِيذِي. يِيوِي يَاشُووَا ؤُشَا إِسّْبدّْ إِ-ث زَّاثْ إِ ؤُكهَّانْ أَلِيعَازَارْ ؤُ زَّاثْ إِ وُوذمْ ن مَارَّا ثَامسْمُونْثْ. 23 إِسَّارْسْ خَاسْ إِفَاسّنْ نّسْ ؤُشَا إِسّعْذُو أَسْ ڒُْومُورْ أَمْ مَامّشْ ذ أَسْ إِنَّا سِيذِي س ثْسخَّارْثْ ن مُوسَا.