1 أَيْثْ ن رُوبِينْ غَارْسنْ أَطَّاسْ ن ڒبْهَايمْ ؤُ أَيْثْ ن جَاذْ غَارْسنْ أَطَّاسْ س وَاطَّاسْ ن ڒبْهَايمْ ؤُشَا نِيثْنِي ژْرِينْ ثَامُّورْثْ ن يَاعْزِيرْ ذ ثمُّورْثْ ن جِيلْعَاذْ، ؤُشَا خْزَارْ، جِّيهثْ نِّي ثشْنَا إِ ڒبْهَايمْ. 2 ؤُسِينْ-د أَيْثْ ن جَاذْ ؤُ أَيْثْ ن رُوبِينْ، سِّيوْڒنْ أَكْ-ذ مُوسَا ذ ؤُكهَّانْ أَلِيعَازَارْ ؤُ أَكْ-ذ ڒْْحُوكَّامْ ن ثْمسْمُونْثْ، نَّانْ: 3 ”عَاطَارُوثْ، ذِيبُونْ، يَاعْزِيرْ، نِيمْرَا، حَاشْبُونْ، أَلِيعَالَا، شَابَامْ، نابُو ذ بَاعُونْ، 4 ثَامُّورْثْ نِّي خْ إِغْڒبْ سِيذِي زَّاثْ إِ وُوذمْ ن ثْمسْمُونْثْ ن إِسْرَائِيل، أَقَا-ت ذ إِشْثْ ن ثمُّورْثْ ثشْنَا إِ ڒبْهَايمْ ؤُ نشِّينْ، إِمْسخَّارنْ نّشْ غَارْسنْ ڒبْهَايمْ.“ 5 نَّانْ: ”مَاڒَا نُوفَا أَرْضَا ذِي ثِيطَّاوِينْ نّشْ، مَا زعْمَا أَذْ ثمّوْشْ ثمُّورْثْ-أَ ذ أَڭْڒَا إِ إِمْسخَّارنْ نّشْ ؤُ وَارْ ذ أَنغْ تّجِّي أَذْ نژْوَا لْ-ؤُرْذُونْ.“

6 يَارَّا-د مُوسَا خْ أَيْثْ ن جَاذْ ؤُ خْ أَيْثْ ن رُوبِينْ: ”مَاڒَا أَيْثْمَاثْومْ أَذْ د-فّْغنْ غَارْ ڭَارَّا، مَا خنِّي كنِّيوْ أَذْ ثقِّيممْ ذَا؟ 7 مَايمِّي غَا ثسّْعڭْزمْ ؤُڒْ ن أَيْثْ ن إِسْرَائِيل مَاحنْذْ وَارْ ژكّْوِينْ غَارْ ثمُّورْثْ إِ ذ أَسنْ إِوْشَا سِيذِي؟ 8 أَمُّو إِ ڭِّينْ ڒجْذُوذْ نْومْ ؤُمِي ثنْ سّكّغْ زِي قَاذَاشْ-بَارْنِيعْ حِيمَا خنِّي أَذْ ژَترنْ ثَامُّورْثْ. ◘32:‏8 ڒخْڒ. 13‏:‏3؛ أَعَوذ. 1‏:‏22 9 إِوْضنْ نِيثْنِي غَارْ ثغْزُورْثْ ن ثغْزَارْثْ ن إِشْكُولْ ؤُشَا ژْرِينْ ثَامُّورْثْ ؤُشَا قڒْبنْ ؤُڒَاونْ ن أَيْثْ ن إِسْرَائِيل، مَاحنْذْ وَارْ تِّيذْفنْ شَا ذِي ثمُّورْثْ إِ ذ أَسنْ إِوْشَا سِيذِي. 10 ذڭْ وَاسّْ نِّي يَارْغَا وغْضَابْ ن سِيذِي ؤُشَا إِجِّيدْجْ، إِنَّا: 11 ’إِرْيَازنْ نِّي د-إِفّْغنْ زِي مِيصْرَا، زِي عِيشْرِينْ إِسڭّْوُوسَا سنّجْ، وَارْ ژَترّنْ ثَامُّورْثْ نِّي خْ جُّودْجغْ أَذْ ت وْشغْ إِ إِبْرَاهِيمْ ذ إِسْحَاقْ ذ يَاعْقُوبْ، مِينْزِي نِيثْنِي وَارْ ذ أَيِي ضْفَارنْ نِيشَانْ، ◘32:‏11 ڒخْڒ. 14‏:‏28؛ أَعَوذ. 1‏:‏35 12 مْغِيرْ كَالِيبْ، مِّيسْ ن يَافُونِّي، أَقِينِيزِي، ذ يَاشُووَا، مِّيسْ ن نُونْ، مِينْزِي نِيثْنِي ضْفَارنْ نِيشَانْ إِ سِيذِي.‘ 13 ؤُشَا أَمُّو يَارْغَا وغْذَابْ ن سِيذِي خْ إِسْرَائِيل ؤُشَا إِڭَّا إِ-ثنْ أَذْ ثلّْعنْ ذِي ڒخْڒَا أَربْعِينْ ن إِسڭّْوُوسَا، أَڒَامِي إِفْنَا مَارَّا جِّيڒْ نِّي إِڭِّينْ ڒْْغَارْ ذِي ثِيطَّاوِينْ ن سِيذِي، 14 ؤُشَا خْزَارْ، كنِّيوْ ثْغوّْغمْ أَمْ ڒجْذُوذْ نْومْ، كنِّيوْ ذ إِجّْ ن ؤُبَارُّو ن يرْيَازنْ ذ إِمذْنَابْ، ؤُشَا أَمُّو إِ غَا ثَارْنِيمْ عَاذْ ڒْْحَاذُوقْ ن وغْضَابْ ن سِيذِي خْ إِسْرَائِيل. 15 مَاڒَا ثْذوْڒمْ-د كنِّيوْ زِي ضفَّارْ نّسْ، نتَّا أَذْ يجّْ ڒْْڭنْسْ ذِي ڒخْڒَا عَاوذْ ؤُشَا أَمُّو إِ غَا ثجّمْ مَارَّا ڒْْڭنْسْ أَيَا أَذْ إِهلّكْ.“

16 خنِّي قَارّْبنْ-د غَارسْ، نَّانْ: ”أَذْ نبْنَا ذَا ڒْْكُورِييَّاثْ إِ وُودْجِي نّغْ ؤُ ثِيندَّامْ إِ إِحنْجِيرنْ نّغْ، 17 مَاشَا نشِّينْ أَذْ د-نفّغْ نوْجذْ إِ ؤُمنْغِي زَّاثْ إِ وُوذمْ ن أَيْثْ ن إِسْرَائِيل س ڒسْنَاحْ نّغْ، أَڒَامِي ثنْ نسِّيوضْ غَارْ ومْشَانْ نْسنْ. إِحنْجِيرنْ نّغْ أَذْ قِّيمنْ ذِي ثْندَّامْ إِفَارْينْ زِي سِّيبّثْ ن إِمزْذَاغْ ن ثمُّورْثْ. 18 وَارْ ندّكّْوِيڒْ غَارْ ثُوذْرِينْ نّغْ أَڒْ إِ غَا ثمّوْشْ ثسْغَارْثْ ن ڒْْوَارْثْ إِ كُوڒْ إِجّْ زڭْ أَيْثْ ن إِسْرَائِيل. 19 مِينْزِي وَارْ نْثطّفْ ذِي ڒْْوَارْثْ أَكِيذْسنْ غَارْ ثْمَا نّغْنِي ن لْ-ؤُرْذُونْ ؤُڒَا غَارْ زَّاثْ، مِينْزِي ثَاسْغَارْثْ إِ ذ أَنغْ د-إِتَّاسنْ أَقَا-ت غَارْ ثْمَا-يَا ثَانِيثَا ن لْ-ؤُرْذُونْ، غَارْ شَّارْقْ.“

20 خنِّي إِنَّا أَسنْ مُوسَا: ”مَاڒَا ثڭِّيمْ أَمُّو، مَاڒَا ثسّْوجْذمْ إِخفْ نْومْ إِ ؤُمنْغِي زَّاثْ إِ وُوذمْ ن سِيذِي، 21 ؤُ كُوڒْ إِجّْ، ونِّي إِسّْوجْذنْ إِخفْ نّسْ إِ ؤُمنْغِي، أَذْ إِژْوَا لْ-ؤُرْذُونْ زَّاثْ إِ وُوذمْ ن سِيذِي، أَڒْ نتَّا أَذْ يَاژّڒْ خْ ڒْْعذْيَانْ نّسْ زَّاثْ إِ وُوذمْ نّسْ زِي ثسْغَارْثْ نْسنْ ن ڒْْوَارْثْ، 22 ؤُ أَذْ ثِيڒِي ثمُّورْثْ ثتّْوَاخْضعْ زَّاثْ إِ وُوذمْ ن سِيذِي، خنِّي إِعدّڒْ أَذْ د-ثْذوْڒمْ ؤُ أَذْ ثِيڒِيمْ ثْبدّمْ زَّاثْ إِ سِيذِي ؤُ زَّاثْ إِ إِسْرَائِيل بْڒَا أَمَارْوَاسْ ؤُ أَذْ ثِيڒِي ثمُّورْثْ-أَ ذ أَڭْڒَا نْومْ زَّاثْ إِ وُوذمْ ن سِيذِي.

23 مَاشَا مَاڒَا وَارْ ثڭِّيمْ أَمُّو، خنِّي أَقَا ثخْضَامْ ضِيدّْ إِ سِيذِي ؤُشَا أَذْ ثسّْنمْ أَقَا دّنْبْ نْومْ أَذْ كنِّيوْ يَافْ. 24 بْنَامْ ثِيندَّامْ إِ إِحنْجِيرنْ نْومْ ذ ڒْْكُورِييَّاثْ إِ وُودْجِي نْومْ ؤُشَا ڭّمْ مِينْ د-إِفّْغنْ زڭْ ؤُقمُّومْ نْومْ.“

25 خنِّي سِّيوْڒنْ أَيْثْ ن جَاذْ ذ أَيْثْ ن رُوبِينْ أَكْ-ذ مُوسَا، نَّانْ: ”إِمْسخَّارنْ نّشْ أَذْ ڭّنْ أَمْ مَامّشْ ثنْ يُومُورْ سِيذِي إِنُو. 26 ثَارْوَا نّغْ، ثِيمْغَارِينْ نّغْ، ڒكْسِيبثْ نّغْ ذ مَارَّا ڒبْهَايمْ نّغْ أَذْ قِّيمنْ ذِي ثْندَّامْ ن جِيلْعَاذْ، 27 مَاشَا إِمْسخَّارنْ نّشْ أَذْ ژْوَانْ إِ ؤُمنْغِي زَّاثْ إِ وُوذمْ ن سِيذِي، مَارَّا إِنِّي إِسّْوجْذنْ إِخفْ نْسنْ إِ ؤُمنْغِي، أَمْ مَامّشْ إِسِّيوڒْ سِيذِي إِنُو.“

28 ؤُشَا يُومُورْ خَاسنْ مُوسَا إِ ؤُكهَّانْ أَلِيعَازَارْ ؤُ إِ يَاشُووَا، مِّيسْ ن نُونْ، ؤُ إِ إِزدْجِيفنْ ن ثُوذْرِينْ ن إِبَابَاثنْ ن ثْقبَّاڒْ ن أَيْثْ ن إِسْرَائِيل، ◘32:‏28 ياش. 1‏:‏13؛ 4‏:‏12 29 إِنَّا أَسنْ مُوسَا: ”مَاڒَا أَيْثْ ن جَاذْ ذ أَيْثْ ن رُوبِينْ أَذْ كِيومْ ژْوَانْ لْ-ؤُرْذُونْ، كُوڒْ إِجّْ ونِّي إِسّْوجْذنْ إِخفْ نّسْ إِ ؤُمنْغِي زَّاثْ إِ وُوذمْ ن سِيذِي، ؤُ مَاڒَا خنِّي ثَامُّورْثْ أَذْ ثِيڒِي ثتّْوَاخْضعْ زَّاثْ إِ وُوذمْ نْومْ، أَذْ ثَافْ أَذْ أَسنْ ثوْشمْ ثَامُّورْثْ ن جِيلْعَاذْ ذ أَڭْڒَا. 30 مَاشَا مَاڒَا وَارْ كِيومْ ژكّْوِيمْ وجْذنْ إِ ؤُمنْغِي، خنِّي أَذْ طّْفنْ أَڭْڒَا ذِي ڒْْوسْطْ نْومْ ذِي ثمُّورْثْ ن كنْعَانْ.“ 31 أَيْثْ ن جَاذْ ذ أَيْثْ ن رُوبِينْ أَرِّينْ-د، نَّانْ: ”أَمْ مَامّشْ إِسِّيوڒْ سِيذِي أَكْ-ذ إِمْسخَّارنْ نّشْ، أَمُّو إِ غَا نڭّْ. 32 نشِّينْ أَذْ نژْوَا غَارْ ثمُّورْثْ ن كنْعَانْ أَذْ نِيڒِي نوْجذْ إِ ؤُمنْغِي زَّاثْ إِ وُوذمْ ن سِيذِي، مَاشَا ثَاسْغَارْثْ نّغْ ن ڒْْوَارْثْ أَذْ ثِيڒِي غَارْ ثْمَا-يَا وَانِيثَا ن لْ-ؤُرْذُونْ.“

33 ؤُ إِوْشَا أَسنْ مُوسَا، إِ أَيْثْ ن جَاذْ ؤُ إِ أَيْثْ ن رُوبِينْ ؤُ إِ وزْينْ ن ثقْبِيتْشْ ن مَانَاسَّا، مِّيسْ ن يُوسُوفْ، ثَاڭلْذِيثْ ن سِيحُونْ، أَجدْجِيذْ ن إِمُورِييّنْ، ذ ثْڭلْذِيثْ ن عُوجْ، أَجدْجِيذْ ن بَاشَانْ، ثَامُّورْثْ س ثْندَّامْ نّسْ نِّي إِدْجَانْ ذِي جّْوَايهْ نّسْ ؤُڒَا ذ ثِيندَّامْ ذِي ثمُّورْثْ إِ ذ أَسْ د-إِنّْضنْ. ◘32:‏33 أَعَوذ. 3‏:‏12؛ ياش. 13‏:‏8؛ 22‏:‏4 34 أَيْثْ ن جَاذْ بْنَانْ ذِيبُونْ، عَاطَارُوثْ، عَارُوعِيرْ، 35 عَاطْرُوثْ-شُوفَانْ، يَاعْزِيرْ، يُوجْبَاهَا، 36 بَايْثْ-نِيمْرَا ذ بَايْثْ-هَارَانْ، ثِيندَّامْ إِفَارْينْ ذ ڒْْكُورِييَّاثْ إِ وُودْجِي. 37 أَيْثْ ن رُوبِينْ بْنَانْ حَاشْبُونْ، أَلِيعَالَا، قَارْيَاثَايِيمْ، ◼32:‏37 ’قَارْيَاثَايِيمْ‘ - إِخْسْ أَذْ يِينِي ’ثْنَاينْ ن ثْندَّامْ‘. 38 نابُو، بَاعْلْ-مَاعُونْ، ثنِّي زِي إِتّْوَابدّڒْ إِسمْ نْسنْ، ذ سِيبْمَا، ؤُشَا ڒَْاغَانْ إِسْمَاونْ ن ثْندَّامْ إِ بْنَانْ عَاوذْ س يِيسمْ نّغْنِي.

39 أَيْثْ ن مَاكِيرْ، مِّيسْ ن مَانَاسَّا، رُوحنْ غَارْ جِيلْعَاذْ ؤُشَا طّْفنْ ت ؤُشَا ؤُژّْڒنْ خْ إِمُورِييّنْ نِّي ذِينْ إِدْجَانْ زِي ڒْوَارْثْ نْسنْ. ◘32:‏39 أَمز. 50‏:‏23 40 ؤُشَا مُوسَا إِوْشَا جِيلْعَاذْ إِ مَاكِيرْ، مِّيسْ ن مَانَاسَّا، ؤُشَا إِرُوحْ نتَّا أَذْ إِزْذغْ ذِينْ. 41 ؤُشَا يَا‘إِرْ، مِّيسْ ن مَانَاسَّا، إِرُوحْ ؤُشَا إِطّفْ ذْشُورَاثْ نّسْ ؤُشَا إِڒَاغَا أَسنْثْ ذْشُورَاثْ ن يَا‘إِرْ. 42 أَمنِّي إِرُوحْ نُوبَاحْ ؤُشَا إِطّفْ قِينَاثْ ذ ثْندَّامْ إِ غَارسْ د-إِقّْننْ ؤُشَا إِسمَّا أَسْ نُوبَاحْ س يِيسمْ نّسْ.