١ زِي ڒَْادْجَاثْ ن إِحنْجِيرنْ ن يُوسُوفْ قَارّْبنْ-د إِزدْجِيفنْ جَارْ إِبَابَاثنْ ن ڒَْادْجْ ن إِحنْجِيرنْ ن جِيلْعَاذْ، مِّيسْ ن مَاكِيرْ، مِّيسْ ن مَانَاسَّا ؤُشَا نِيثْنِي سِّيوْڒنْ زَّاثْ إِ وُوذمْ ن مُوسَا ؤُ زَّاثْ إِ وُوذمْ ن ڒْْحُوكَّامْ، إِزدْجِيفنْ نّغْنِي خْ إِبَابَاثنْ ن ڒَْادْجَاثْ ن أَيْثْ ن إِسْرَائِيل ٢ ؤُشَا نِيثْنِي نَّانْ: ”سِيذِي يُومُورْ سِيذِي إِنُو مَاحنْذْ أَذْ إِوْشْ ثَامُّورْثْ س ثْقدُّوحْثْ إِ أَيْثْ ن إِسْرَائِيل ذ ڒْْوَارْثْ. ؤُشَا يُومُورْ سِيذِي إِ سِيذِي إِنُو أَذْ إِوْشْ ثَاسْغَارْثْ ن ڒْْوَارْثْ ن ؤُمَاثْنغْ صَالُوفْحَاذْ إِ يسِّيسْ. ◘36:‏2 ڒخْڒ. 26‏:‏55، 56؛ 27‏:‏7؛ 33‏:‏54؛ ياش. 17‏:‏3، 4 ٣ مَاڒَا ذوْڒنْثْ نِيثنْثِي ذ ثِينمْڒَاتْشْ أَكْ-ذ إِجّنْ زڭْ إِحنْجِيرنْ ن ثْقبَّاڒْ نّغْنِي ن أَيْثْ ن إِسْرَائِيل، خنِّي أَذْ ثتّْوَاكّسْ ثسْغَارْثْ نْسنْثْ ذِي ڒْْوَارْثْ ن ڒجْذُوذْ نّغْ ؤُشَا أَذْ ثتّْوَارْنِي ثَاسْغَارْثْ نْسنْثْ إِ ثسْغَارْثْ ن ثقْبِيتْشْ إِ غَارْ غَا مُوننْثْ ؤُشَا أَمُّو أَذْ إِتّْوَاسّمْژِي مِينْ إِدْجَانْ ذ ثَاسْغَارْثْ نّغْ س ثْقدُّوحْثْ. ٤ خْمِي د غَا يَاسْ ؤُسڭّْوَاسْ ن ؤُسْڒِيوْڒوْ إِ أَيْثْ ن إِسْرَائِيل، خنِّي أَذْ ثتّْوَامَارْنِي ثسْغَارْثْ نْسنْثْ إِ ثسْغَارْثْ ن ثقْبِيتْشْ أَكْ-ذ وِي غَا مُوننْثْ. أَمُّو إِ غَا ثتّْوَاكّسْ خنِّي ثسْغَارْثْ نْسنْثْ ذِي ڒْْوَارْثْ ن ثقْبِيتْشْ ن ڒجْذُوذْ نّغْ.“

٥ خنِّي يُومُورْ مُوسَا إِ أَيْثْ ن إِسْرَائِيل عْلَاحْسَابْ ڒُْومُورْ ن سِيذِي، إِنَّا: ”أَقَا ذ ثِيذتّْ أَمْ مَامّشْ ثسِّيوڒْ ثقْبِيتْشْ ن أَيْثْ ن يُوسُوفْ. ٦ وَا ذ أَوَاڒْ إِ زِي يُومُورْ سِيذِي خْ يسِّيسْ ن صَالُوفْحَاذْ، إِقَّارْ: ’أجّْ إِ-ثنْثْ أَذْ مڒْشنْثْ أَكْ-ذ ونِّي ذ أَسنْثْ يَارشْقنْ. إِتّْخصَّا مْغِيرْ أَذْ مڒْشنْثْ ذِي ڒَْادْجْ ن ثقْبِيتْشْ ن بَابَاثْسنْثْ. ٧ وَارْ إِعدّڒْ أَذْ ثْرَاحْ ثسْغَارْثْ ن أَيْثْ ن إِسْرَائِيل زِي ثقْبِيتْشْ غَارْ ثقْبِيتْشْ نّغْنِي، مِينْزِي كُوڒْ أَرْيَازْ ن أَيْثْ ن إِسْرَائِيل أَذْ إِقِّيمْ إِطّفْ ذِي ثسْغَارْثْ ن ثقْبِيتْشْ ن ڒجْذُوذْ نّسْ. ٨ يدْجِيسْ ن كُوڒْ إِجّْ إِ غَا إِطّْفنْ إِشْثْ ن ثسْغَارْثْ زڭْ أَيْثْ ن إِسْرَائِيل، إِتّْخصَّا أَسْ أَذْ ثمْڒشْ أَكْ-ذ إِجّْ زڭْ إِجّْ ن ڒَْادْجْ زِي ثقْبِيتْشْ ن بَابَاسْ، حِيمَا كُوڒْ إِجّْ زڭْ أَيْثْ ن إِسْرَائِيل أَذْ إِوَارْثْ ثَاسْغَارْثْ ن ڒجْذُوذْ نّسْ. ◼36:‏8 ’يدْجِيسْ‘ - نِيغْ ’إِدْجِيسْ‘. ٩ وَارْ إِعدّڒْ أَذْ ثْرَاحْ ثسْغَارْثْ ن إِشْثْ ن ثقْبِيتْشْ غَارْ ثقْبِيتْشْ نّغْنِي، مِينْزِي إِتّْخصَّا إِ كُوڒْ إِشْثْ زِي ثْقبَّاڒْ ن أَيْثْ ن إِسْرَائِيل أَذْ إِقِّيمْ إِطّفْ ذِي ثسْغَارْثْ نّسْ.‘ “

١٠ يسِّيسْ ن صَالُوفْحَاذْ ڭِّينْثْ أَمْ مَامّشْ ث يُومُورْ سِيذِي إِ مُوسَا. ١١ مَاحْلَا، ثِيرْصَا، حُوجْلَا، مِيلْكَا ذ نُوعَا، يسِّيسْ ن صَالُوفْحَاذْ، ذوْڒنْثْ ذ ثِينمْڒَاتْشْ أَكْ-ذ إِحنْجِيرنْ نعمِّيثْسنْثْ. ◘36:‏11 ڒخْڒ. 27‏:‏1 ١٢ ذوْڒنْثْ ذ ثِينمْڒَاتْشْ ذِي ڒَْادْجَاثْ ن أَيْثْ ن مَانَاسَّا، مِّيسْ ن يُوسُوفْ. أَمُّو إِ ثقِّيمْ ثسْغَارْثْ نْسنْثْ ذِي ثقْبِيتْشْ ن بَابَاثْسنْثْ.

١٣ ثِينَا ذ ثِيوصَّا ذ لْفَارَايِيضْ نِّي يُومُورْ سِيذِي س ثْسخَّارْثْ ن مُوسَا إِ أَيْثْ ن إِسْرَائِيل ذِي ڒوْضَاثْ ن مُوآبَ، غَارْ لْ-ؤُرْذُونْ أَرنْذَاذْ ن أَرِيحَا.