عُوبَاذْيَا
1
1 ڒوْحِييْ ن عُوبَاذْيَا.
”أَمُّو إِ إِقَّارْ سِيذِي إِنُو، سِيذِي، خْ إِذُومْ:
‘نشِّينْ نسْڒَا إِجّْ ن ڒخْبَارْ زِي سِيذِي،
ؤُ إِجّْ ن ؤُمْسكِّي إِتّْوَاسّكّْ غَارْ ڒڭْنُوسْ:
كَّارْ، جّمْ أَنغْ أَذْ خَاسْ نْغوّغْ،
أَذْ نمّْنغْ أَكْ-ذ إِذُومْ!‘ ◘1:1 إِرْم. 49:14
2 خْزَارْ، نشّْ ڭِّيغْ شكْ ذ أَمژْيَانْ جَارْ ڒڭْنُوسْ،
شكْ ثتّْوَاسّحْقَارَاذْ أَطَّاسْ. ◘1:2 إِرْم. 49:15
3 نّْفَاخثْ ن وُوڒْ نّشْ ثشْمثْ إِ شكْ،
شكْ ذ ونِّي ذِينْ إِزدّْغنْ ذڭْ إِمُوشَانْ ن ؤُذُورِّي جَارْ ڒجْرُوفْ،
ذِي ثْزذِّيغْثْ نّشْ يُوعْڒَانْ،
شكْ ذ ونِّي إِقَّارنْ ذڭْ وُوڒْ نّشْ:
’مَانْ ونْ ذ أَيِي غَا إِغضْڒنْ غَارْ ثمُّورْثْ؟‘ ◘1:3 إِرْم. 49:16
4 مَاڒَا ثسّْڭعّْذذْ إِخفْ نّشْ أَمْ ؤُڭِيذرْ،
نِيغْ ثڭِّيذْ ڒْعُوشّْ نّشْ جَارْ إِثْرَانْ،
نشّْ أَذْ شكْ د سّنِّي سّهْوِيغْ،
أَمُّو إِ إِقَّارْ سِيذِي.“ ◘1:4 ڒخْڒ. 24:21، أَيُوبْ 39:27-29، إِرْم. 49:16
5 ”مَاڒَا ؤُذْفنْ-د غَاركْ إِشفَّارنْ،
نِيغْ إِخوَّاننْ س دْجِيڒثْ،
- أَ، مَامّشْ إِ غَا ثتّْوَاڒدّْدْجذْ أَڒْ طَّارْفْ -
مَا وَارْ تَّاشَارنْ أَڒْ غَارْسنْ إِ غَا يِيڒِي مِينْ إِكْفَانْ؟
مَاڒَا ؤُسِينْ-د غَاركْ إِنِّي إِ غَا إِڒقْضنْ أَضِيڒْ،
مَا أَذْ جّنْ شَا مِينْ إِتّْوَاڒقْضنْ أَوَارْنِي أَسنْ؟ ◘1:5 إِرْم. 49:9
6 أَ مَامّشْ إِ غَا أَرْزُونْ ذِي عِيسُو،
مَامّشْ إِ غَا بقّْشنْ ڒكْنُوزْ نّسْ نُّوفَارنْ!
7 مَارَّا إِرْيَازنْ نِّي إِڭِّينْ إِجّْ ن ڒْعَاهْذْ أَكِيذكْ،
عَارْننْ شكْ غَارْ ويْمِيرْ،
إِرْيَازنْ نِّي ثُوغَا أَكِيذكْ إِدَّارنْ ذِي ڒهْنَا، شمْثنْ شكْ،
نِيثْنِي زمَّارنْ خَاكْ.
أَغْرُومْ زَّايكْ ڭِّينْ ث ذ ثَارحْسِيثْ سْوَادَّايْ نّشْ.
’أَقَا نتَّا وَارْ ذَايسْ بُو ڒفْهَامثْ.‘ ◼1:7 ’أَقَا نتَّا وَارْ غَارسْ بُو ڒفْهَامثْ‘ - أَوَاڒْ-أَ إِسَّاوَاڒْ خْ إِذُومْ. وَاخَّا أَطَّاسْ هجْمنْ خْ إِذُومْ مَاحنْذْ أَذْ زَّايسْ كشّْضنْ أَمْ ث شمْثنْ، وَاخَّا أَمنِّي إِذُومْ وَارْ غَارسْ بُو ڒفْهَامثْ. ◘1:7 إِزهد. 41:10، يُوح. 13:18
8 مَا وَارْ إِتِّيڒِي ذڭْ وَاسّْ نِّي، إِقَّارْ سِيذِي،
أَقَا نشّْ أَذْ أَردّْدْجغْ إِمِيغِيسنْ زِي إِذُومْ،
ؤُ ڒفْهَامثْ زڭْ إِذُورَارْ ن عِيسُو؟ ◘1:8 إِشا. 29:11، 14؛ إِرْم. 49:7
9 أَيْثْ ن بُو-ثغْرُوضْثْ نّشْ أَذْ تّْوَاحْصَارنْ
زِي ثِيڭّْوُوذِي، أَ ثَايْمَانْ،
حِيمَا كُوڒْ إِجّنْ زڭْ إِذُورَارْ ن عِيسُو
أَذْ إِتّْوَاقْضعْ س ونْغَايْ.“ ◘1:9 عَام. 2:14، 16
10 ”زِي سِّيبّثْ ن لْعُونْفْ خْ ؤُمَاشْ يَاعْقُوبْ،
أَذْ شكْ ثْذڒْ ڒفْضِيحثْ،
ؤُ أَذْ ثتّْوَاكّْسذْ إِ ڒبْذَا. ◘1:10 أَمز. 27:41؛ حِز. 35:5؛ عَام. 1:11
11 ذڭْ وَاسّْ إِ ذِي ثُوغَا خَاسْ ثْبدّذْ،
ذڭْ وَاسّْ إِ ذِي إِبَارَّانِييّنْ إِوْينْ-د أَڭْڒَا نّسْ
ؤُ ؤُذْفنْ ڒْبَارَّانِي غَارْ ثوُّورَا نّسْ،
ؤُ نْضَارنْ ثَاقدُّوحْثْ خْ ؤُرْشَالِيمْ،
ثُوغَا شكْ أَمْ يِيجّنْ زَّايْسنْ. ◘1:11 إِزهد. 137:7
12 مَاشَا وَارْ ذ أَشْ إِعدّڒْ أَذْ ثقِّيمذْ ثْخزَّارذْ
ذڭْ وَاسّْ ن ؤُمَاشْ،
ذڭْ وَاسّْ ن وشْثَابْ نّسْ أَبَارْشَانْ،
وَارْ ذ أَشْ إِعدّڒْ أَذْ ثْفَارْحذْ خْ إِحنْجِيرنْ ن يَاهُوذَا،
ذڭْ وَاسّْ ن وَاردّدْجْ نْسنْ
ؤُ وَارْ ذ أَشْ إِعدّڒْ أَذْ ثَارزْمذْ أَقمُّومْ نّشْ أَطَّاسْ
ذڭْ وَاسّْ ن ڒحْصَارثْ نْسنْ.
13 وَارْ إِعدّڒْ أَذْ ثَاذْفذْ غَارْ ثوَّارْثْ نْ ڒْڭنْسْ إِنُو
ذڭْ وَاسّْ ن ؤُهلّكْ نْسنْ
وَارْ ذ أَشْ إِعدّڒْ أَذْ ثقِّيمذْ ثْخزَّارذْ عَاوذْ
ذڭْ وَاسّْ ن ؤُضيّعْ نْسنْ
ؤُ وَارْ ذ أَشْ إِعدّڒْ أَذْ ثقِّيمذْ ثسّْوِيژّْضذْ
إِفَاسّنْ نّشْ غَارْ وَاڭْڒَا نّسْ
ذڭْ وَاسّْ ن ؤُضيّعْ نّسْ،
14 وَارْ ذ أَشْ إِعدّڒْ أَذْ ثْبدّذْ
غَارْ مَانِي تّْمڒْقَانْ إِبْرِيذنْ،
مَاحنْذْ أَذْ ثتّحِّيذْ إِنِّي إِنجْمنْ
ؤُ وَارْ ذ أَشْ إِعدّڒْ
أَذْ ثْسلّْمذْ إِنِّي ثُوغَا يَاروْڒنْ
ذڭْ وَاسّْ ن ڒحْصَارثْ.“
15 ”مَاغَارْ يُوذسْ-د أَسّْ ن سِيذِي
خْ مَارَّا ڒڭْنُوسْ!
أَمْ ثڭِّيذْ شكْ، أَذْ زَّايكْ إِتّْوَاڭّْ،
أَخدْجصْ نّشْ أَذْ د-إِذْوڒْ خْ ؤُزدْجِيفْ نّشْ. ◘1:15 حِز. 35:15
16 مَاغَارْ أَمْ مَامّشْ ثسْوِيمْ كنِّيوْ
خْ وذْرَارْ إِنُو إِقدّْسنْ،
أَمُّو أَذْ سْونْ مَارَّا ڒڭْنُوسْ ڒبْذَا،
وَاهْ، أَذْ سْونْ أَذْ سكّْفنْ،
أَذْ ذوْڒنْ أَخْمِيعمَّارْصْ وَارْ ثُوغَا دْجَانْ.
17 مَاشَا خْ وذْرَارْ ن صِيهْيُونْ
أَذْ يِيڒِي مِينْ إِنّجْمنْ،
ؤُ وَانِيثَا أَذْ يِيڒِي ذ أَمْقدّسْ،
ؤُ إِنِّي ن ثَادَّارْثْ ن يَاعْقُوبْ
أَذْ طّْفنْ ثِيسقَّاڒْ نْ ڒْوَارْثْ نْسنْ. ◘1:17 يُووِ. 3:5
18 ثَادَّارْثْ ن يَاعْقُوبْ أَذْ ثِيڒِي ذ ثِيمسِّي،
ؤُ ثَادَّارْثْ ن يُوسُوفْ ذ أَشعَّاڒْ،
ؤُشَا ثَادَّارْثْ ن عِيسُو أَذْ ثِيڒِي أَمْ يِيغدْجْ
ؤُ نِيثْنِي أَذْ أَسنْ سّْشمْضنْ
ؤُ أَذْ ثنْ شّنْ،
أَڒَامِي وَارْ إِقِّيمْ
ؤُڒَا ذ إِجّْ إِدَّارْ ذِي ثَادَّارْثْ ن عِيسُو،
مَاغَارْ سِيذِي أَقَا إِسِّيوڒْ.“
19 ”إِنِّي ن ثمُّورْثْ ن لْجَانُوبْ
أَذْ طّْفنْ إِذُورَارْ نْ عِيسُو ذ ثَاسْغَارْثْ،
ؤُ يِينِّي ن ثمُّورْثْ إِوَاطَانْ
أَذْ طّْفنْ ثَامُّورْثْ ن إِفِيلِيسْطِينِييّنْ ذ ڒْوَارْثْ
وَاهْ، نِيثْنِي أَذْ طّْفنْ إِيَّارْ ن إِفْرَايِيمْ
ذ ييَّارْ ن سَامَارْيَا ذ ڒْوَارْثْ،
ؤُ بِينْيَامِينْ أَذْ إِطّفْ جِيلْعَاذْ ذ ڒْوَارْثْ،
20 ؤُ إِمنْفِييّنْ زِي ڒْعسْكَارْ-أَ
إِنِّي إِدْجَانْ غَارْ أَيْثْ ن إِسْرَائِيل
أَذْ طّْفنْ ثَامُّورْثْ ن أَيْثْ ن كنْعَانْ
ذ ڒْوَارْثْ أَڒْ صَارْفَاثْ،
ؤُ إِمنْفِييّنْ زِي ؤُرْشَالِيمْ
نِّي إِدْجَانْ ذِي صَافَارَاذْ،
أَذْ طّْفنْ ثِيندَّامْ
ن ثمُّورْثْ ن لْجَانُوبْ ذ ڒْوَارْثْ. ◼1:20 ’صَافَارَاذْ‘ - أَذْ ثَاغْ صَافَارَاذْ ذ إِجّْ ن يِيسمْ نّغْنِي إِ ثمُّورْثْ ن سّْبَانْيَا.
21 إِمْسلّْكنْ أَذْ ڭعّْذنْ أَذْرَارْ ن صِيهْيُونْ،
حِيمَا أَذْ حَاكْمنْ أَذْرَارْ ن عِيسُو،
ؤُشَا ثَاڭلْذَا أَذْ ثِيڒِي ن سِيذِي.“
◘1:1 1:1 إِرْم. 49:14
◘1:2 1:2 إِرْم. 49:15
◘1:3 1:3 إِرْم. 49:16
◘1:4 1:4 ڒخْڒ. 24:21، أَيُوبْ 39:27-29، إِرْم. 49:16
◘1:5 1:5 إِرْم. 49:9
◼1:7 1:7 ’أَقَا نتَّا وَارْ غَارسْ بُو ڒفْهَامثْ‘ - أَوَاڒْ-أَ إِسَّاوَاڒْ خْ إِذُومْ. وَاخَّا أَطَّاسْ هجْمنْ خْ إِذُومْ مَاحنْذْ أَذْ زَّايسْ كشّْضنْ أَمْ ث شمْثنْ، وَاخَّا أَمنِّي إِذُومْ وَارْ غَارسْ بُو ڒفْهَامثْ.
◘1:7 1:7 إِزهد. 41:10، يُوح. 13:18
◘1:8 1:8 إِشا. 29:11، 14؛ إِرْم. 49:7
◘1:9 1:9 عَام. 2:14، 16
◘1:10 1:10 أَمز. 27:41؛ حِز. 35:5؛ عَام. 1:11
◘1:11 1:11 إِزهد. 137:7
◘1:15 1:15 حِز. 35:15
◘1:17 1:17 يُووِ. 3:5
◼1:20 1:20 ’صَافَارَاذْ‘ - أَذْ ثَاغْ صَافَارَاذْ ذ إِجّْ ن يِيسمْ نّغْنِي إِ ثمُّورْثْ ن سّْبَانْيَا.