31
أَوَاڒنْ إِوزْننْ ن يمَّاسْ ن لَامُويِيلْ
1 أَوَاڒنْ ن لَامُويِيلْ، أَجدْجِيذْ ن ثقْبِيتْشْ ن مَاسَّا،
إِ زِي ث ثْعڒْمذْ يمَّاسْ.
2 مِينْ ذِينْ، أَ مِّي،
مِينْ ذِينْ، أَ مِّي ن وحْسِينْ إِنُو،
مِينْ إِ غَا ثڭّذْ، أَ مِّي ن لْوُوعُوذْ إِنُو؟
3 وَارْ تِّيشْ ثِيزمَّارْ نّشْ إِ ثمْغَارِينْ،
ؤُڒَا إِبْرِيذنْ نّشْ
إِ ثِينِّي إِتّْهلَّاكنْ إِجدْجِيذنْ. ◘31:3 أَعَوذ. 17:17
4 وَارْ د-ثُوسِي إِ إِجدْجِيذنْ، أَ لَامُويِيلْ،
وَارْ د-ثُوسِي إِ إِجدْجِيذنْ
مَاحنْذْ أَذْ سْونْ بِينُو،
ؤُڒَا إِ أَيْثْ ن جّهْذْ
مَاحنْذْ أَذْ مژْرنْ ذِي شّْرَابْ.
5 نِيغْ أَذْ إِسُووْ ؤُ أَذْ إِتُّو لْفَارِيضَا،
ؤُ أَذْ إِسّْفَارْغْ ثَانْفُوتْشْ ن مَارَّا إِمْخيّْبنْ.
6 أوْشْ شّْرَابْ إِ يِينِّي إِ غَا إِتّْوَاهلّْكنْ،
ؤُڒَا ذ بِينُو إِ يِينِّي ذ إِمرْزَاڭنْ
ذِي ڒعْمَارْ نْسنْ.
7 أجّْ إِ-ث أَذْ إِسُووْ ؤُ أَذْ إِتُّو زّڒْضْ نّسْ،
أجّْ إِ-ث وَارْ تّْخَارَّاصْ ذِي ثَامَارَا نّسْ عَاذْ.
8 أَرْزمْ أَقمُّومْ نّشْ إِ إِزِييْنَانْ،
إِ دّعْوثْ ن مَارَّا إِنِّي إِتّْوَاجّنْ.
9 أَرْزمْ أَقمُّومْ نّشْ،
حْكمْ س ڒْحُوكْمْ نِيشَانْ،
ؤُشَا أَغْ ثَاسْغَارْثْ إِ ؤُمزْڒُوضْ. ◘31:9 لَاوِي 19:15؛ أَعَوذ. 1:16
أَسمْغَارْ ن ثمْغَارْثْ إِمحْضنْ
10 أَلِيفْ. مَانْ ونْ إِ غَا يَافنْ
إِشْثْ ن ثمْغَارْثْ إِمحْضنْ؟
تَّامَانْ نّسْ إِعْذُو مَارَّا ڒْمَارْجَانْ. ◘31:10 أَوڒن. 12:4
11 بِيثْ. خَاسْ إِ إِتّْشَاڒَا وُوڒْ ن ورْيَازْ نّسْ،
وَارْ ذ أَسْ إِتّْخصِّي ڒفْضڒْ.
12 ڭِيملْ. نتَّاثْ ثتّڭّْ أَسْ مِينْ إِصبْحنْ،
وَارْ إِدْجِي ڒْغَارْ،
مَارَّا ؤُسَّانْ ن ثُوذَارْثْ نّسْ.
13 ذَالِيثْ. نتَّاثْ ثَارزُّو ثَاضُوفْثْ ذ ثِيفّسْثْ،
ؤُ ثْخدّمْ س إِفَاسّنْ نّسْ إِمحْضنْ.
14 هِي. نتَّاثْ ثڭَّا أَمْ ثْغَارُّوبَا ن ؤُسبَّابْ،
زِي ڒَاڭّْوَاجْ ثتَّاوِي-د مَاشَّا نّسْ.
15 وَاوْ. نتَّاثْ ثتّْنَاكَّارْ
ؤُمِي عَاذْ ثدْجَا دْجِيڒثْ،
ثتِّيشْ مَاشَّا إِ ثَادَّارْثْ نّسْ،
ؤُ ثَاسْغَارْثْ نْسنْثْ
إِ ثمْسخَّارِينْ نّشْ ثِيمژْيَانِينْ.
16 زَايِينْ. نتَّاثْ ثتّْخَارَّاصْ ذڭْ إِيَّارْ
ؤُ ثتّطّفْ إِ-ث،
زِي ڒْغِيدْجثْ ن إِفَاسّنْ نّسْ
ثژُّو ثِيزَايَارِينْ ذڭْ ؤُمَارْجعْ.
17 خِيثْ. نتَّاثْ ثْبكّسْ
ثِيجْعِينَّاثِينْ نّسْ س جّهْذْ،
ؤُ ثسّمْحَاضْ إِغَادْجنْ نّسْ.
18 ثِيث. نتَّاثْ ثْحكَّارْ
إِ ڒفْضڒْ ن ثْسبَّابْثْ نّسْ،
ڒفْنَارْ نّسْ وَارْ إِخسِّي ذِي دْجِيڒثْ.
19 يُوذْ. نتَّاثْ ثسّْوِيژّضْ إِفَاسّنْ نّسْ
غَارْ ثْرُوكَّا،
ؤُ إِفَاسّنْ نّسْ طّْفنْ أَمكُّوكْ ن ؤُخيَّاضْ.
20 كَافْ. نتَّاثْ ثَارزّمْ
أَفُوسْ نّسْ إِ ؤُمحْذَاجْ،
ثسّْوَاژَّاضْ إِفَاسّنْ نّسْ إِ ؤُمزْڒُوضْ.
21 لَامِيذْ. نتَّاثْ وَارْ ثتّڭّْوذْ
زِي ثَادَّارْثْ نّسْ
ذِي سِّيبّثْ ن وذْفڒْ،
مَاغَارْ مَارَّا ثَادَّارْثْ نّسْ
غَارسْ أَرُّوضْ أَرْجُووَانِي.
22 مِيمْ. نتَّاثْ ثڭَّا إِ يِيخفْ نّسْ
ثِيسُونْثَاوِينْ ن زْوَاقْ،
أَرُّوضْ نّسْ س ڒقْطنْ أَزْذَاذْ
ذ ؤُفِيڒُو أَرْجُووَانِي.
23 نُونْ. أَرْيَازْ نّسْ إِتّْوَاسّنْ ذِي ثوُّورَا،
خْمِي إِتّْغِيمَا أَكْ-ذ إِمْغَارنْ ن ثمُّورْثْ.
24 سَامِيخْ. نتَّاثْ ثتّڭّْ أَرُّوضْ ن ڒقْطنْ
ؤُشَا ثزّْنُوزَا إِ-ث،
نتَّاثْ ثزّْنُوزَا إِبُويَاسْ
إِ ؤُسبَّابْ زِي كنْعَانْ.
25 عَايِينْ. جّهْذْ ذ ڒْعزّْ ذ أَرُّوضْ نّسْ،
نتَّاثْ ثْضحّشْ ثسْفَارْنِينْ
خْ وَاسّْ إِ د غَا يَاسنْ.
26 بِي. نتَّاثْ ثَارزّمْ
أَقمُّومْ نّسْ س ثِيغِيثْ،
أَقَا ذِينْ ثَاغُورِي س ثْمخْسِيوْثْ إِشوَّارنْ
خْ يِيڒسْ نّسْ.
27 ثْسَاذِي. نتَّاثْ ثْحطَّا
خْ مِينْ إِتّمّْسَارَانْ ذِي ثَادَّارْثْ،
أَغْرُومْ ن ڒعْڭزْ وَارْ ثتّتّْ.
28 قُوفْ. إِحنْجِيرنْ نّسْ تّكَّارنْ،
سّمْغَارَانْ ت س ڒفْرَاحثْ،
ؤُڒَا ذ أَرْيَازْ نّسْ إِتّْمدّحْ إِ-ت.
29 رِيخْ. أَطَّاسْ ن ثْيسِّيثْ
ڭِّينْثْ ثِيمڭَّا جهْذنْثْ،
مَاشَا شمْ ثعْذُوذْ-د ثنْ مَارَّا.
30 شِينْ. ڒبْهُوثْ ثْشمّثْ ؤُ أَژْرِي إِتّْغشَّا
مَاشَا ثَامْغَارْثْ نِّي إِتّڭّْوْذنْ سِيذِي،
إِتّْخصَّا أَذْ ت سّمْغَارنْ.
31 ثَافْ. وْشمْ أَسْ زِي ڒْغِيدْجثْ ن إِفَاسّنْ نّسْ،
جّمْ ثِيمڭَّا نّسْ
أَذْ أَسْ صبّْحنْثْ غَارْ ثوُّورَا.