أَذْلِيسْ إِقدّْسنْ إِزهِّيذنْ ١٠

١٠

١ مِينْ إِقِّيمنْ ن ؤُزهّذْ 9

لَامِيذْ. أَ سِيذِي،

مَايمِّي ثقِّيمذْ ثِيڭّْوجذْ أَمُّو؟

مَايمِّي ثسّْنُوفَّارذْ إِخفْ نّشْ

ذِي ڒْْوقْثْ ن ڒحْصَارثْ؟

٢ س نّْفَاخثْ إِضفَّارْ ؤُعفَّانْ ڒْْمسْكِينْ.

أَذْ تّْوَاطّْفنْ س ثْمعْمَاتْشْ إِ ذِي تّْخَارّْصنْ. ◘

٣ مَاغَارْ أَعفَّانْ إِسّْعُودْجْ إِخفْ نّسْ

غَارْ مژْرِي ن ڒعْمَارْ نّسْ،

إِتّْبَاركْ أَضمَّاعْ، إِتّْشقَّافْ ذِي سِيذِي.

٤ أَعفَّانْ أَمْ ونِّي إِسّْڭعَّاذنْ

ثِينْزَارْثْ نّسْ غَارْ ؤُجنَّا،

وَارْ إِتّْبقّشْ، إِقَّارْ.

”وَارْ ذِينْ أَربِّي“،

مَانْ أَيَا ذ مَارَّا مِينْ ذِي إِزمَّارْ أَذْ إِتّْخَارّصْ. ◘

٥ مَارَّا إِبْرِيذنْ نّسْ

تّفّْغنْ أَسْ مْلِيحْ كُوڒْ ثْوَاڒَا.

ڒهْكَامَاثْ نّشْ تُّوعْڒَانْثْ خَاسْ.

إِتّْزَاوَارْ مَارَّا إِنِّي ث إِحصَّارنْ.

٦ نتَّا إِقَّارْ ذڭْ وُوڒْ نّسْ: ”وَارْ تّنْهزِّيغْ،

زِي جِّيڒْ أَڒْ جِّيڒْ وَارْ ذ أَيِي إِڒقّفْ

ؤُڒَا ذ إِجّْ ن ڒْْغَارْ.“

٧ أَقمُّومْ نّسْ إِشُّورْ س نّعْڒثْ

ذ إِخَارِّيقنْ ذ دّدْجْ.

سَاذُو يِيڒسْ نّسْ

أَقَا ذِينْ ثَامَارَا ذ ڒْْمُوعْصِييّثْ. ◘

٨ نتَّا إِتّْغِيمَا غَارْ وشْبَارْ ذِي ذْشُورَاثْ،

ذڭْ إِمُوشَانْ إِنُّوفَّارنْ

إِنقّْ إِنِّي وَارْ إِڭِّينْ س شَا.

ثِيطَّاوِينْ نّسْ مّنْضَارنْثْ خْ ڒْْمسْكِينْ.

٩ إِڒْبثْ ذڭْ ومْشَانْ إِنُّوفَارنْ

أَمْ ويْرَاذْ ذڭْ ؤُذُورِّي ن ؤُعِيشُّو نّسْ.

نتَّا إِتّْحكَّارْ حِيمَا أَذْ يَاشَارْ ڒْْمسْكِينْ.

إِتَّاشَارْ ڒْْمسْكِينْ ؤُمِي ث إِجبّذْ

ذِي ثْرَاشَّا نّسْ.

١٠ نتَّا إِهكّْوَا-د غَارْ وَادَّايْ،

إِتَّاضَارْ، أَقَا ڒْْمسْكِينْ إِوطَّا

جَارْ وَاشَّارنْ نّسْ إِجهْذنْ.

١١ إِقَّارْ ذڭْ وُوڒْ نّسْ: ”أَربِّي إِتُّو،

نتَّا إِسّْنُوفَّارْ ؤُذمْ نّسْ،

عمَّارْصْ أَذْ ث إِژَارْ.“ ◘

١٢ قُوفْ. كَّارْ، أَ سِيذِي،

أَربِّي، سْڭعّذْ أَفُوسْ نّشْ،

وَارْ تّتُّو ڒْْمُوسَاكِينْ.

١٣ مَايمِّي إِتّْشقَّافْ ؤُعفَّانْ ذِي أَربِّي،

مَايمِّي إِقَّارْ ذڭْ وُوڒْ نّسْ:

”شكْ وَارْ ثتّْبقَّاشذْ!“؟

١٤ رِيخْ. أَقَا شكْ ثژْرِيذْ،

مِينْزِي شكْ ثتّْوَاڒِيذْ ثَامَارَا ذ وشْضَانْ،

مَاحنْذْ أَذْ ثنْ ثسَّارْسذْ ذڭْ ؤُفُوسْ نّشْ.

ڒْْمسْكِينْ إِتَّارّْ-د غَاركْ س ؤُزدْجِيفْ.

شكْ ذ أَمْعَاونْ ن ؤُيُوجِيڒْ. ◼

١٥ شِينْ. أَرْژْ أَغِيڒْ ن ؤُعفَّانْ،

خْڒفْ ڒْْغَارْ زڭْ ونِّي إِتّڭّنْ ثُوعفّْنَا،

أَڒْ وَارْ ثتِّيفذْ وَالُو عَاذْ.

١٦ سِيذِي ذ أَجدْجِيذْ إِ ڒبْذَا قَاعْ.

تّْوَاثحَّانْ ڒڭْنُوسْ زِي ثمُّورْثْ نّسْ. ◘

١٧ ثَافْ. أَ سِيذِي، شكْ ثسْڒِيذْ إِ مژْرِي ن إِمْوَاضْعنْ،

أَذْ ثسّْجهْذذْ ؤُڒَاونْ نْسنْ،

أَذْ غَارْسنْ ثْميّْڒذْ أَمزُّوغْ نّشْ،

١٨ حِيمَا أَذْ ثَاغذْ ثَاسْغَارْثْ إِ ؤُيُوجِيڒْ

ؤُ إِ ونِّي إِتّْوَاحصَّارنْ،

مَاحنْذْ ؤُڒَا ذ إِجّْ ن بْنَاذمْ خْ ثمُّورْثْ

وَارْ إِتّْغِيمِي إِسَّاڭّْوَاذْ عَاذْ ؤُڒَا ذ إِجّْ.

◘١٠:٢ 10:‏2 إِزهد. 7‏:‏16؛ 9‏:‏16؛ أَوڒن. 5‏:‏22

◘١٠:٤ 10:‏4 إِزهد. 14‏:‏1؛ 53‏:‏2

◘١٠:٧ 10:‏7 رُوم. 3‏:‏14

◘١٠:١١ 10:‏11 إِزهد. 94‏:‏7

◼١٠:١٤ 10:‏14 ’أَيُوجِيڒْ‘ - نِيغْ ’أَڭُوڭِيلْ‘.

◘١٠:١٦ 10:‏16 إِزهد. 29‏:‏10؛ 145‏:‏13، 146‏:‏10؛ إِرْم. 10‏:‏10؛ إِڭجذ. 5‏:‏19؛ دَان. 3‏:‏33؛ 6‏:‏27؛ 1 تِيم. 1‏:‏17