٢٥
١ أَزهّذْ ن ذَاوُوذْ.
أَلِيفْ. أَ سِيذِي،
غَاركْ إِ د-سّْڭعَّاذغْ ڒعْمَارْ إِنُو.
٢ بِيثْ. أَ أَربِّي إِنُو، نشّْ تّشْڒغْ خَاكْ.
أجّْ أَيِي وَارْ تّْسضْحِيغْ،
أجّْ ڒْْعذْيَانْ إِنُو
وَارْ خَافِي تّسْڒِيوْڒِيونْ س ڒفْرَاحثْ. ◘25:2 إِزهد. 22:6؛ 31:2؛ 34:6
٣ ڭِيملْ. وَاهْ، مَارَّا إِنِّي شكْ إِتّْرَاجَانْ
وَارْ تّْسضْحِينْ.
إِنِّي إِڭِّينْ س ڒغْذَارْ بْڒَا سِّيبّثْ،
أَذْ سضْحنْ. ◘25:3 إِشا. 28:16؛ رُوم. 10:11
٤ ذَالِيثْ. أَ سِيذِي، سْشنْ أَيِي إِبْرِيذنْ نّشْ،
سْغَارْ أَيِي إِمسْرَاقْ نّشْ. ◘25:4 إِزهد. 27:11؛ 86:11
٥ هِي. نْذهْ أَيِي ذِي ثِيذتّْ نّشْ ؤُ سْغَارْ أَيِي،
مِينْزِي شكْ ذ أَربِّي ن ؤُسنْجمْ إِنُو،
نشّْ سِّيثِيمغْ ذَايكْ أَسّْ مَارَّا.
٦ زَايِينْ. عْقڒْ، أَ سِيذِي، خْ أَرّحْمثْ نّشْ،
خْ ثْمڭَّا ن ثْمخْسِيوْثْ نّشْ إِشوَّارنْ،
مَاغَارْ أَقَا أَثنْثْ دْجَانْثْ زِي ڒبْذَا. ◘25:6 إِزهد. 103:17؛ 106:1؛ 107:1؛ 117:2، 136؛ إِرْم. 33:11
٧ خِيثْ. وَارْ تِّيذَارْ شَا دّْنُوبْ ن ثمْژِي إِنُو
ؤُڒَا ذ إِخطَّانْ إِنُو.
خمّْ مَاشَا غَارِي
ذِي ثْمخْسِيوْثْ نّشْ إِشوَّارنْ،
ذِي طّْوعْ ن ثْشُونِي نّشْ، أَ سِيذِي.
٨ ثِيث. سِيذِي إِصْبحْ، إِشْنَا،
خْ ؤُيَا أَذْ إِسّْغَارْ أَبْرِيذْ إِ إِمذْنَابْ.
٩ يُوذْ. نتَّا أَذْ إِڭوّذْ إِمْهِيننْ س ڒْْحقّْ،
نتَّا أَذْ إِسّڒْمذْ أَبْرِيذْ نّسْ إِ إِمْهِيننْ.
١٠ كَافْ. مَارَّا إِمسْرَاقْ ن سِيذِي
أَقَا أَثنْ ذ ثَامخْسِيوْثْ إِشوَّارنْ ذ ڒَْامَانْ،
إِ يِينِّي إِحطَّانْ ڒْْعَاهْذْ نّسْ
ذ شَّاهَاذَاثْ نّسْ.
١١ لَامِيذْ. ذِي طّْوعْ ن يِيسمْ نّشْ، أَ سِيذِي،
غْفَارْ ڒْْمُوعْصِييّثْ إِنُو،
مَاغَارْ أَقَا-ت ذ أَطَّاسْ.
١٢ مِيمْ. مَانْ ونْ ذ أَرْيَازْ
إِ إِتّڭّْوذنْ سِيذِي؟
نتَّا أَذْ أَسْ إِسّڒْمذْ أَبْرِيذْ
إِ إِتّْخصَّا أَذْ إِخْضَارْ.
١٣ نُونْ. ڒعْمَارْ نّسْ أَذْ إِسّنْسْ ذِي ڒْْخِيرْ،
ثَارْوَا نّسْ أَذْ ثْوَارْثْ ثَامُّورْثْ.
١٤ سَامِيخْ. ڒَْامَانْ إِ ذِينْ ن سِيذِي
إِ يِينِّي زَّايسْ إِتّڭّْوذنْ،
ڒْْعَاهْذْ نّسْ أَقَا-ث ذِينْ
مَاحنْذْ أَذْ أَسنْ ث إِسَّارْڭبْ.
١٥ عَايِينْ. ثِيطَّاوِينْ إِنُو ڒبْذَا ذِي سِيذِي،
مِينْزِي نتَّا أَذْ إِفكّْ إِضَارنْ إِنُو زِي ثْرَاشَّا.
١٦ بِي. أَرّْ-د غَارِي س وُوذمْ نّشْ، حِينّْ خَافِي،
مَاغَارْ نشّْ أَقَا أَيِي وحّْذِي ؤُ ذِي ڒغْبنْ.
١٧ ثْسَاذِي. ڒحْصَارَاثْ ن وُوڒْ إِنُو
أَقَا مَّارْنِينْثْ.
سُوفّغْ أَيِي زِي دِّيقَاثْ إِ ذ أَيِي.
١٨ رِيخْ. خْزَارْ-د غَارْ ڒغْبنْ إِنُو ذ وَارْبرْ إِنُو،
كْسِي خَافِي مَارَّا دّْنُوبْ إِنُو.
١٩ رِيخْ. خْزَارْ غَارْ ڒْْعذْيَانْ إِنُو،
مِينْزِي تّْوَاكتَّارنْ،
نِيثْنِي شَارّْهنْ أَيِي س يِيجّْ ن وشْرَاهْ إِقسْحنْ.
٢٠ شِينْ. حْضَا خْ ڒعْمَارْ إِنُو ؤُ فكّْ أَيِي!
وَارْ ذ أَيِي تّجِّي شَا أَذْ سضْحِيغْ،
مِينْزِي غَاركْ إِ غَا أَركّْوَاڒغْ.
٢١ ثَافْ. أَذْ ثحْضَا أَيِي ڒكْمَارثْ ذ ڒصْفَايثْ،
مَاغَارْ سِّيثِيمغْ ذَايكْ.
٢٢ أَ أَربِّي، فْذِي إِسْرَائِيل زِي مَارَّا ڒحْصَارَاثْ نّسْ.