١ إِ ؤُمقّْرَانْ ن إِمغْنَاجنْ. أَزهّذْ ن ذَاوُوذْ. إِزْڒِي.

٢ أَصبّحْ إِتّْرَاجَا إِ شكْ ذِي ڒْْهُوذْنثْ،

أَ، أَربِّي، ذِي صِيهْيُونْ،

إِتّْخصَّا أَذْ إِتّْوَاكمّڒْ لْوَاعْذْ إِ شكْ.

٣ شكْ ثسْڒِيذْ إِ ثْژَادْجِيثْ،

مَارَّا دَّاثْ أَذْ غَاركْ د-يَاسْ.

٤ ڒْْمُوعْصِييّثْ ثُوغَا ثجْهذْ خَافِي،

مَاشَا شكْ ثتّڭّذْ أَصْڒَاحْ خْ إِخطَّانْ نّغْ.

٥ سّعْذْ ن ونِّي إِ ثْفَارّْزذْ شكْ

ؤُ ثسّْقَارّْبذْ ث-إِ-د غَاركْ،

حِيمَا أَذْ إِزْذغْ ذِي ڒمْرَاحَاثْ نّشْ.

نشِّينْ أَذْ نجِّيونْ

س ڒْْخَارْ ن ثَادَّارْثْ نّشْ،

س ثْقدَّاسْثْ ن زَّاوشْثْ نّشْ ثَامقّْرَانْثْ.

٦ شكْ أَذْ خَانغْ د-ثَارّذْ ذِي ثْسڭْذَا

س ثْمڭَّا إِسَّاڭّْوَاذنْ،

أَ أَربِّي ن ؤُسنْجمْ نّغْ.

أَقَا شكْ ذ ڒَْامَانْ

ن مَارَّا ثِينڭُّورَا ن ثمُّورْثْ،

ن ڒبْحُورْ إِڭّْوجنْ قَاعْ.

٧ شكْ ذ ونِّي إِسّْرُوسَانْ إِذُورَارْ

س جّْهذْ نّسْ،

شكْ ثْبكّْسذْ س جّهْذْ.

٨ شكْ ذ ونِّي إِتَّارَّانْ

ڒهْوڒْ ن ڒبْحُورْ يَارسَّا،

ڒهْوڒْ نْ ڒمْوَاجْ

زّْهِيرْ نْ شُّوعُوبْ.

٩ إِنِّي إِزدّْغنْ غَارْ ثْنڭُّورَا ن ثمُّورْثْ

تّڭّْوذنْ زِي ڒعْڒَامَاثْ نّشْ،

أَقَا شكْ ثتَّارِّيذْ ڒفْجَارْ ن ثُوفُّوثْ

ذ وطُّو ن ثْمذِّيثْ أَذْ سْڒِيوڒْونْ.

١٠ شكْ ثَارزّْفذْ ثَامُّورْثْ،

ثتَّارِّيذْ ثِيغزْرَاثِينْ أَذْ ت شُوقنْثْ،

أَقَا شكْ ثتَّارِّيذْ ت-إِ-د

س ڒْْخِيرْ أَطَّاسْ.

إِغْزَارْ ن أَربِّي نِّي ت إِتّْشُوقَا

أَقَا إِتّْشُورْ س وَامَانْ.

شكْ ثسّوْجَاذذْ إِمنْذِي نْسنْ،

مَاغَارْ إِ ؤُيَا إِ ثڭِّيذْ ثَامُّورْثْ.

١١ شكْ ثتّْسَاوذْ مْسقّمْ

ڒَْاثَارَاثْ ن وشْرَازْ،

ثسّْهكّْوِيذْ إِبُوذَا نّسْ.

ثسَّارْضَابذْ ثَامُّورْثْ س إِنشْنَاشنْ،

ثتّْبَارْكذْ أَغمُّويْ نّسْ.

١٢ شكْ ثتّڭّذْ تَّاجْ

إِ ؤُسڭّْوَاسْ ن ڒْْخَارْ نّشْ،

ڒَْاثَارَاثْ نّشْ تُّوذُومنْثْ س ثَاذُونْثْ.

١٣ أَقَا تُّوذُومنْثْ خْ دّْمَانِي ن ڒخْڒَا،

ثِيوْرِيرِينْ بكّْسنْثْ س ڒفْرَاحثْ.

١٤ دّْمَانِي ن ثَاروْسَا سُّونْثْ س وُودْجِي،

ثِيغْزُورِينْ ذْڒِينْثْ س إِمنْذِي.

نِيثْنِي دُّوقُّوزنْ س ؤُسْڒِيوْڒوْ،

وَاهْ، تّْغنَّاجنْ.