أَذْلِيسْ إِقدّْسنْ إِزهِّيذنْ ٦٩

٦٩

١ إِ ؤُمقّْرَانْ ن إِمغْنَاجنْ. س ثغْنِينْثْ ن ’ثْلِيلِّيشِينْ‘. ن ذَاوُوذْ.◼

٢ سنْجمْ أَيِي، أَ أَربِّي،

مَاغَارْ أَمَانْ إِوْضنْ أَيِي

غَارْ ڒعْمَارْ إِنُو.

٣ نشّْغبِّيغْ ذڭْ ؤُبَارْيُوضْ يُودْجغْ،

وَارْ ذِينْ مَانِي غَا بدّغْ.

أَقَا-يِي ذڭْ وَامَانْ يُودْجْغنْ

ؤُ ڒْْحمْڒثْ ثتَّازّڒْ خَافِي.

٤ نشّْ ؤُحْڒغْ س إِغُويَّانْ،

ثْمِيجَّا إِنُو ثبُّويْبحْ،

ثِيطَّاوِينْ إِنُو قْضَانْثْ

زڭْ ؤُرَاجِي خْ أَربِّي إِنُو.

٥ إِنِّي ذ أَيِي إِشَارّْهنْ خْ وَالُو

تّْوسّْعنْ خْ ؤُشُوَّافْ إِ إِدْجَانْ خْ ؤُزدْجِيفْ إِنُو.

إِنِّي يَارزُّونْ أَذْ أَيِي أَردّْدْجنْ،

ڒْْعذْيَانْ إِنُو إِ خَافِي إِسّْخَارِّيقنْ،

ذوْڒنْ جهّْذنْ.

مِينْ وَارْ ؤُشَارغْ،

إِتّْخصَّا أَيِي أَذْ ت-إِ-د-أَرّغْ عَاذْ. ◘

٦ أَ أَربِّي، شكْ ثسّْنذْ ثُوبُّوهڒْيَا إِنُو،

إِمرْوُوسَا ن دّْنُوبْ إِنُو وَارْ خَاكْ فَّارنْ.

٧ أجّْ إِنِّي خَاكْ إِسِّيثِيمنْ، وَارْ تّْسضْحِينْ،

أَ سِيذِي إِنُو، سِيذِي ن ڒْْعسْكَارَاثْ،

أجّْ إِنِّي خَاكْ يَارزُّونْ،

وَارْ زَّايِي تّْوَافطّْحنْ،

أَ أَربِّي ن إِسْرَائِيل.

٨ مَاغَارْ ذِي طّْوعْ نّشْ إِ كسِّيغْ أَسحْقَارْ،

أَسضْحِي إِڒحّفْ إِ ؤُغمْبُوبْ إِنُو.

٩ ذوْڒغْ ذ أَغْرِيبْ غَارْ أَيْثْمَا،

إِ إِحنْجِيرنْ ن يمَّا ذوْڒغْ ذ أَبَارَّانِي.

١٠ مَاغَارْ ثُوسْمِي إِقدّْسنْ إِ ثَادَّارْثْ نّشْ

ثشَّا أَيِي،

أَسحْقَارْ ن يِينِّي شكْ إِسّحْقَارَانْ

إِوْضَا-د خَافِي. ◘

١١ نشّْ رُوغْ غَارْ ؤُژُومِّي ن ڒعْمَارْ إِنُو،

مَاشَا أَيَا يِيوِي أَيِي-د عْڒَامْ كُوڒْ أَسحْقَارْ.

١٢ نشّْ يَارْضغْ إِشْثْ ن ثْخَانْشثْ ن وشْضَانْ،

مَاشَا ذوْڒغْ أَسنْ ذ إِجّْ ن لْمَاثَالْ.

١٣ إِنِّي إِقِّيمنْ غَارْ ثوَّارْثْ ن ثنْذِينْثْ

سَّاوَاڒنْ خَافِي،

ؤُڒَا ذ إِزْڒَانْ ن يِينِّي إِسسّنْ شّْرَابْ.

١٤ نشّْ مَاشَا تّتَّارغْ غَاركْ، أَ سِيذِي!

أَقَا ذِينْ إِجّْ ن ڒْْحَاڒْ ن أَرْضَا، أَ أَربِّي،

س ڒمْغَارثْ ن ثْمخْسِيوْثْ نّشْ إِشوَّارنْ.

أَرّْ-د خَافِي س ؤُسنْجمْ نّشْ

إِ د-إِفّْغنْ زِي ڒْْمَانثْ نّشْ.

١٥ جْبذْ أَيِي-د زڭْ ؤُبَارْيُوضْ،

أجّْ أَيِي وَارْ تّْغبِّيغْ،

حِيمَا أَذْ تّْوَافكّغْ

زڭْ إِنِّي ذ أَيِي إِشَارّْهنْ

ؤُ زڭْ وَامَانْ يُودْجْغنْ.

١٦ وَارْ تّجِّي أَذْ أَيِي ثَاوِي ڒْْحمْڒثْ،

وَارْ تّجِّي ڒَْادْجَاغْ أَذْ أَيِي إِسَارْضْ،

أَذْ خَافِي إِبلّعْ وَانُو أَقمُّومْ نّسْ.

١٧ أَرّْ خَافِي، أَ سِيذِي،

مَاغَارْ ثَامخْسِيوْثْ نّشْ إِشوَّارنْ

ثصْبحْ.

قْڒبْ غَارِي

عْلَاحْصَابْ أَرّحْمثْ نّشْ إِفيّْضنْ.

١٨ وَارْ تّفَّارْ شَا ؤُذمْ نّشْ

خْ ؤُمْسخَّارْ نّشْ،

مَاغَارْ تّْوَاحْصَارغْ.

أَرّْ-د خَافِي ذَاوحْذَا.

١٩ أَذسْ أَيِي-د غَارْ ڒعْمَارْ إِنُو، فكّْ إِ-ث.

سصْڒحْ أَيِي ذِي سِّيبّثْ ن ڒْْعذْيَانْ إِنُو.

٢٠ شكْ ثسّْنذْ ڒْْعَارْ إِنُو

ذ ؤُسضْحِي إِنُو ذ ڒفْضِيحثْ إِنُو،

أَقَا مَارَّا إِنِّي ذ أَيِي إِحصَّارنْ

بدّنْ زَّاثكْ.

٢١ أَسحْقَارْ يَارْژْ أَيِي ؤُڒْ

ؤُ نشّْ قنْضغْ أَطَّاسْ.

رَاجِيغْ أَزِيدْجزْ، مَاشَا وَالُو،

نشّْ رَاجِيغْ إِنِّي ذ أَيِي غَا إِعزَّانْ،

مَاشَا وَارْ ؤُفِيغْ ؤُڒَا ذ إِجّنْ.

٢٢ نِيثْنِي ڭِّينْ سّمْ ذِي مَاشَّا إِنُو،

إِ ؤُفَاذِي إِنُو ڭِّينْ أَيِي أَذْ سْوغْ ڒْْخدْجْ. ◘

٢٣ أجّْ طَّابْڒَا نْسنْ أَذْ ثذْوڒْ ذ ڒْْفخْ،

ؤُڒَا ذ ثَاخْشفْثْ إِ يِينِّي أَكِيذْسنْ إِبدّنْ. ◘

٢٤ سْذَارْغڒْ ثِيطَّاوِينْ نْسنْ،

حِيمَا وَارْ تّْوِيڒِينْ عَاذْ،

أَرّْ ثِيجْعِينَّاثِينْ نْسنْ

أَذْ تّنْهزَّانْثْ ڒبْذَا.◘

٢٥ زدْجعْ خَاسنْ أَسْخضْ نّشْ،

أجّْ ڒْْحَاذُوقْ ن وغْضَابْ نّشْ

أَذْ ثنْ إِڒْقفْ.

٢٦ أجّْ ڒْمَارْڭحْ ن ثْزذِّيغْثْ نْسنْ

أَذْ إِذْوڒْ ذ ڒْْخَارْبثْ،

مَاحنْذْ وَارْ ذَايسْ إِزدّغْ عَاذْ

ؤُڒَا ذ إِجّنْ. ◘

٢٧ مَاغَارْ نِيثْنِي ذَارَّاشنْ خْ ورْيَازْ

نِّي ثُوغَا ثوْثِيذْ شكْ،

س ڒْْهَارْذْ نْسنْ أَرْنِينْ إِ ڒحْرِيقْ

ن يِينِّي زَّايكْ إِتّْوَاڒقّْفنْ.

٢٨ أَرّْ دّنْبْ خْ دّنْبْ نْسنْ،

وَارْ ثنْ تّجِّي أَذْ د-أَذْفنْ

غَارْ ثْسڭْذَا نّشْ.

٢٩ أجّْ إِ-ثنْ أَذْ تّْوَامْحَانْ

زڭْ وذْلِيسْ إِتّْوَانْضنْ ن ثُوذَارْثْ،

أَڒَامِي وَارْ تّْوَازمَّامنْ شَا

غَارْ إِمْسڭَّاذنْ. ◘

٣٠ مَاشَا نشّْ أَقَا أَيِي

ذِي ڒغْبنْ ؤُ تّْنزْبَارغْ.

إِڒِي أَذْ أَيِي إِسّْڭعّذْ سنّجْ

ؤُسنْجمْ نّشْ، أَ أَربِّي.

٣١ نشّْ أَذْ صبّْحغْ إِسمْ ن أَربِّي

س يِيجّْ ن يزْڒِي،

س ؤُقَاذِي أَذْ أَسْ سّمْغَارغْ.

٣٢ أَيَا أَذْ يَارْضَا سِيذِي كْثَارْ

زڭْ إِجّْ ن ؤُفُونَاسْ،

زڭْ إِجّْ ن ؤُفُونَاسْ أَمژْيَانْ

س وَاشَّاونْ ذ ثشْضشْثْ إِمّْسبْضَانْ.

٣٣ إِمْهِيننْ نِّي ت إِژْرِينْ، أَذْ فَارْحنْ،

ؤُ إِنِّي يَارزُّونْ خْ أَربِّي،

أَقَا ؤُڒْ نْومْ أَذْ إِدَّارْ.

٣٤ مَاغَارْ سِيذِي إِتّسْڒَا غَارْ إِمزْڒَاضْ،

وَارْ إِسّحْقِيرِي شَا إِمحْبَاسْ نّسْ.

٣٥ أجّْ إِجنْوَانْ ذ ثمُّورْثْ أَذْ ث سّمْغَارنْ،

ڒبْحُورْ ذ مَارَّا مِينْ ذَايْسنْ إِتّنْهزَّانْ.

٣٦ مَاغَارْ أَربِّي أَذْ إِسّنْجمْ صِيهْيُونْ،

أَذْ إِبْنَا عَاوذْ ثِيندَّامْ ن يَاهُوذَا،

ؤُشَا نِيثْنِي أَذْ ذِينْ زذْغنْ،

أَذْ ت طّْفنْ ذ ڒْْوَارْثْ.

٣٧ زَّارِيعثْ ن إِمْسخَّارنْ نّسْ

أَذْ ت ثطّفْ ذ ثَاسْغَارْثْ،

إِنِّي إِتّخْسنْ إِسمْ نّسْ

أَذْ ذَايسْ زذْغنْ.

◼٦٩:١ 69:‏1 ’ثِيلِيلِّيشِينْ‘ - إِشْثْ ن مَارْكَا ن إِنُّووَّارنْ ذَايْسنْ أَژْرِي أَطَّاسْ.

◘٦٩:٥ 69:‏5 يُوح. 15‏:‏25

◘٦٩:١٠ 69:‏10 يُوح. 2‏:‏17؛ رُوم. 15‏:‏3

◘٦٩:٢٢ 69:‏22 مت. 27‏:‏34،48؛ مك. 15‏:‏23؛ يُوح. 19‏:‏28، 29

◘٦٩:٢٣ 69:‏23 رُوم. 11‏:‏9

◘٦٩:٢٤ 69:‏24 إِشا. 6‏:‏9، 10؛ 29‏:‏10؛ 44‏:‏18؛ رُوم. 11‏:‏10

◘٦٩:٢٦ 69:‏26 ڒخ. 1‏:‏20

◘٦٩:٢٩ 69:‏29 فِيل. 4‏:‏3؛ أَسَا. 13‏:‏8؛ 17‏:‏8؛ 20‏:‏15