٧٧
١ إِ ؤُمقّْرَانْ ن إِمغْنَاجنْ. سَاذُو ؤُفُوسْ ن يَاذُوثُونْ. أَزهّذْ ن أَسَافْ.
٢ نشّْ سّْڭعّْذغْ ثْمِيجَّا إِنُو
غَارْ أَربِّي ؤُشَا ڒَْاغِيغْ،
سّْڭعّْذغْ ثْمِيجَّا إِنُو غَارْ أَربِّي،
نتَّا أَذْ أَيِي إِسڒْ.
٣ ذڭْ وَاسّْ ن ڒحْصَارثْ إِنُو
أَرْزُوغْ سِيذِي إِنُو.
س دْجِيڒثْ سّْوِيژّْضغْ أَفُوسْ إِنُو
بْڒَا مَا أَذْ أَسْ أَرْخُوغْ،
ڒعْمَارْ إِنُو يُوڭِي أَذْ إِتّْوَاعزَّا.
٤ ؤُمِي ثُوغَا تِّيذَارغْ أَربِّي،
خنِّي تّْزهَّارغْ، تّْخمَّامغْ،
ؤُشَا يَارْخُو بُوحْبڒْ إِنُو. سِيلَاهْ.
٥ شكْ ثَارّذْ ثِيطَّاوِينْ إِنُو
أَذْ قِّيمنْثْ فَاقنْثْ،
نّْهوْڒغْ، وَارْ سِّيوْڒغْ.
٦ نشّْ تّْخمَّامغْ
ذڭْ وُوسَّانْ ن وشْحَاڒْ ؤُيَا،
ذڭْ إِسڭّْوُوسَا ن زّْمَانَاثْ إِعْذُونْ.
٧ نشّْ تِّيذَارغْ ذڭْ ؤُزنْزُونْ
خْ إِفِيڒَانْ إِنُو س دْجِيڒثْ،
خْمِي تّْخمَّامغْ ذڭْ وُوڒْ إِنُو
ؤُ بُوحْبڒْ إِنُو يَارزُّو:
٨ مَا أَذْ أَنغْ إِنْضَارْ سِيذِي إِنُو إِ ڒبْذَا،
وَارْ خَافِي إِتّْحِينِّي عَاذْ؟
٩ مَا ثْبدّْ ثْمخْسِيوْثْ نّسْ
إِشوَّارنْ إِ ڒبْذَا؟
مَا إِتّْوَابْضڒْ وَاوَاڒْ
إِ إِدْجَانْ زِي جِّيڒْ إِ جِّيڒْ نّغْنِي
أَوَارْنِي أَسْ؟
١٠ مَا إِتُّو أَربِّي أَحِينِّي نّسْ؟
مَا ذڭْ وغْضَابْ نّسْ
إِبلّعْ أَرّحْمثْ نّسْ؟“ سِيلَاهْ.
١١ نِّيغْ: ”وَا ذ ڒعْذَابْ إِنُو،
أَقَا ذ إِسڭّْوُوسَا
زڭْ ؤُفُوسْ ن ؤُمْعُودْجِي خْ كُوڒْشِي.“
١٢ نشّْ أَذْ إِذَارغْ ثِيمڭَّا ن سِيذِي،
أَذْعقْڒغْ خْ لْمُوعْجِيزَاثْ نّشْ ن زِيشْ.
١٣ نشّْ أَذْ خمَّامغْ
ذِي مَارَّا ڒخْذَايمْ نّشْ،
أَذْ تّْخَارَّاصغْ ذِي مَارَّا مِينْ ثڭِّيذْ.
١٤ أَ أَربِّي، أَبْرِيذْ نّشْ
أَقَا ذڭْ ؤُقدَّاسْ إِ يدْجَا!
مَانْ ونْ إِ يدْجَانْ
ذ أَربِّي أَمقّْرَانْ
أَمْ أَربِّي؟
١٥ شكْ ذ أَربِّي
نِّي إِتّڭّنْ لْمُوعْجِيزَاثْ،
شكْ ثسّشْنذْ ثِيزمَّارْ نّشْ
جَارْ ڒڭْنُوسْ. ◘77:15 ؤُف. 15:11
١٦ شكْ ثفْذِيذْ ڒْْڭنْسْ نّشْ س ؤُغِيڒْ نّشْ،
ثَارْوَا ن يَاعْقُوبْ ذ يُوسُوفْ. سِيلَاهْ.
١٧ أَمَانْ ژْرِينْ شكْ، أَ أَربِّي،
أَمَانْ ژْرِينْ شكْ ؤُشَا أَرْجِيجنْ،
١٨ إِسيْنُوثنْ إِذقّْڒنْ
فَارّْغنْ-د أَمَانْ نْسنْ،
إِبَارُّوثنْ ن إِسيْنُوثنْ
سّْڭعّْذنْ ثْمِيجَّا نْسنْ،
ؤُ فْڒِيثْشَاثْ ن ڒْْقوْسْ نّشْ ضْوِينْثْ ذَا ذ ذِيهَا. ◼77:18 ’سّْڭَاعّْذنْ‘ - س ثْعِيبْرَانِيثْ ’وْشِينْ‘. ◘77:18 ؤُف. 14:24
١٩ ثْمِيجَّا نّشْ ثڭَّا
أَمْ وَاجَّاجْ ذِي ثْحَارْيَاضْثْ،
أَسَّامنْ ڭِّينْ ثَافَاوْثْ خْ دُّونشْثْ،
ثَامُّورْثْ ثنْهزّْ ثَارْجِيجْ. `
٢٠ أَبْرِيذْ نّشْ إِشُوقْ ذِي ڒبْحَارْ،
أَمسْرَاقْ نّشْ ذڭْ وَامَانْ إِمقّْرَاننْ،
مَاشَا إِصُورَافْ ن إِضَارنْ نّشْ
وَارْ بِيننْ عَاذْ.
٢١ شكْ ثْنذْهذْ ڒْْڭنْسْ نّشْ
أَمْ إِشْثْ ن ثْحِيمَارْثْ ن وُودْجِي،
س ؤُفُوسْ ن مُوسَا ذ هَارُونْ. ◘77:21 إِزهد. 78:52؛ 80:2