١ إِ ؤُمقّْرَانْ ن إِمغْنَاجنْ.

س ثغْنِينْثْ ن ؤُجِيتِّي، أَرْيَازْ زِي جَاثْ.

زڭْ أَيْثْ ن قُورَاحْ. أَزهّذْ.

٢ مَامّشْ تّْعِيزّنْثْ ثْزذِّيغِينْ نّشْ،

أَ سِيذِي ن ڒْْعسْكَارَاثْ!

٣ ڒعْمَارْ إِنُو ذَايسْ مژْرِي،

وَاهْ، إِفنَّا س ؤُوحّشْ

خْ ڒمْرَاحَاثْ ن سِيذِي،

ؤُڒْ إِنُو ذ دَّاثْ إِنُو

سْڒِيوْڒِيونْ إِ أَربِّي إِدَّارنْ. ◘84:‏3 إِزهد. 42‏:‏2؛ 63‏:‏2

٤ ؤُڒَا ذ ژَّاوشْ إِتَّافْ عَاذْ إِشْثْ ن ثَادَّارْثْ،

ؤُ ثَافَارْدْجسْثْ ثُوفَا إِجّْ ن ڒْْعُوشّْ إِ يِيخفْ نّسْ

إِ ذِي ثسّْرُوسَّا إِسّْضَاونْ نّسْ،

غَارْ إِعَالْطَارنْ نّشْ، أَ سِيذِي ن ڒْْعسْكَارَاثْ،

أَجدْجِيذْ إِنُو ذ أَربِّي إِنُو!

٥ سّعْذْ نْسنْ ن يِينِّي إِزدّْغنْ

ذِي ثَادَّارْثْ نّشْ،

أَقَا أَثنْ تّْصبَّاحنْ إِ شكْ

بْڒَا قطُّو. سِيلَاهْ.

٦ سّعْذْ ن إِوْذَانْ

إِنِّي إِتَّافنْ جّهْذْ نْسنْ ذَايكْ،

إِنِّي إِحطَّانْ إِبْرِيذنْ إِڭعّْذنْ

غَارْ زَّاوشْثْ نّشْ ثَامقّْرَانْثْ

ذڭْ وُوڒْ نْسنْ.

٧ خْمِي تّْشُوقَانْ ذڭْ إِجّْ ن ڒوْضَا ن ثغْزُورْثْ

ن ثْشجِّيرَا ن ؤُمتِّينْ،

أَرِّينْ ث ذ ڒْْعُونْصَارْ.

ؤُڒَا ذ أَنْژَارْ أَمزْوَارُو

أَذْ ثنْ إِسّْذُورِييْ س لْبَارَاكَاثْ.

٨ نِيثْنِي ڭُّورنْ زِي جّهْذْ أَڒْ جّهْذْ،

أَذْ د-بَاننْ غَارْ أَربِّي ذِي صِيهْيُونْ.

٩ أَ سِيذِي، أَربِّي ن ڒْْعسْكَارَاثْ،

سڒْ إِ ثْژَادْجِيثْ إِنُو،

سْحسّْ، أَ أَربِّي ن يَاعْقُوبْ! سِيلَاهْ.

١٠ أَ أَربِّي،

شكْ ذ ثَاسدَّارْثْ نّغْ ن ؤُسڒْقِي،

أَقَا خْزَارْ غَارْ وُوذمْ ن ؤُمذْهُونْ نّشْ!

١١ مَاغَارْ إِجّْ ن وَاسّْ ذِي ڒمْرَاحَاثْ نّشْ

إِحْڒَا خْ وَاڒفْ ن وُوسَّانْ نّغْنِي.

معْلِيكْ ؤُفِيغْ أَذْ بدّغْ

خْ ثْنبْذَاثْ ن ثَادَّارْثْ ن أَربِّي إِنُو،

ؤُڒَا ذ أَثْلَاعْ ذڭْ إِقِيضَانْ ن ثُوعفّْنَا.

١٢ مَاغَارْ سِيذِي أَربِّي ذ ثَافُوشْثْ

ذ ثْسدَّارْثْ إِ ؤُسڒْقِي،

سِيذِي أَذْ إِوْشْ أَحِينِّي ذ ؤُعُودْجِي.

نتَّا وَارْ إِسّْعِيزِّي ڒْْخَارْ

ذڭْ إِنِّي إِڭُّورنْ س ڒكْمَارثْ.

١٣ أَ سِيذِي ن ڒْْعسْكَارَاثْ،

سّعْذْ ن بْنَاذمْ نِّي ذَايكْ إِتِّيقَّانْ. ◘84:‏13 إِزهد. 2‏:‏12؛ 34‏:‏9