94
1 أَ أَربِّي ن ؤُنْثَاقمْ، أَ سِيذِي،
أَربِّي ن ؤُنْثَاقمْ،
بَانْ-د ذِي ثِيسِّيقْثْ!
2 أَ، ڒْقَاضِي ن ثمُّورْثْ، سْڭعّذْ إِخفْ نّشْ،
أَرّْ ثَاسْغَارْثْ إِ إِمْعفَّارنْ
أَمْ مِينْ سّْذَاحدْجنْ نِيثْنِي.
3 مشْحَاڒْ إِ غَا كّنْ عَاذْ إِعفَّاننْ، أَ سِيذِي،
مشْحَاڒْ إِ غَا كّنْ نڭّْزنْ
إِعفَّاننْ س ڒفْرَاحثْ،
4 أَذْ قِّيمنْ سَّاوَاڒنْ أَوَاڒنْ إِقسْحنْ،
مشْحَاڒْ إِ غَا قِّيمنْ مَارَّا
إِنِّي إِتّڭّنْ ڒْمُوعْصِييّثْ
أَذْ سّمْغَارنْ إِخفْ نْسنْ؟
5 أَ سِيذِي، نِيثْنِي ڒبّْزنْ ڒْڭنْسْ نّشْ،
حصَّارنْ ثَاسْغَارْثْ ن ڒْوَارْثْ نّشْ.
6 نِيثْنِي نقّنْ ثَاجَّاتْشْ ذ ؤُبَارَّانِي،
غَارّْصنْ إِ إِيُوجِيڒنْ.
7 نِيثْنِي قَّارنْ: ”سِيذِي وَارْ ت إِتّْوِيڒِي،
أَربِّي ن يَاعْقُوبْ وَارْ ذ أَسْ إِتّْحكَّارْ.“ ◘94:7 إِزهد. 10:11، 13؛ 59:8
8 فثْنمْ كنِّيوْ إِقفُّوحنْ ذِي ڒْڭنْسْ،
جْمِيعْ أَكْ-ذ إِبُوهَاڒِييّنْ،
مڒْمِي إِ غَا ثْذوْڒمْ ثْفهّْممْ؟ ◘94:8 إِزهد. 92:7
9 مَا وَارْ إِتّسْڒِي ونِّي إِژُّونْ أَمزُّوغْ؟
مَا وَارْ إِژَارّْ ونِّي إِڭِّينْ ثِيطّْ؟ ◘94:9 ؤُف. 4:11
10 مَا وَارْ إِتّْعَاقبْ
ونِّي إِتّْوبّْخنْ ڒڭْنُوسْ،
ونِّي إِسّڒْمَاذنْ ثُوسّْنَا إِ بْنَاذمْ؟
11 سِيذِي يَارڭّبْ خْ إِخَارِّيصنْ ن إِوْذَانْ،
أَقَا أَثنْ أَمْ يِيجّْ ن ؤُسُوضِي وَاهَا. ◘94:11 1 كُور. 3:20
12 سّعْذْ ن ورْيَازْ نِّي ثتّْوبّْخذْ، أَ سِيذِي،
ونِّي ثسّڒْمَاذذْ زِي شَّارِيعَا نّشْ،
13 حِيمَا أَذْ ث ثسَّاريّحذْ
زڭْ وُوسَّانْ إِعفّْننْ،
أَڒْ غَا حْفَارنْ أَحْفُورْ ن ثُورْصُوضِي إِ ؤُعفَّانْ.
14 مَاغَارْ سِيذِي وَارْ إِنطَّارْ ڒْڭنْسْ نّسْ،
وَارْ إِسمّحْ ذِي ثسْغَارْثْ نّسْ. ◘94:14 1 صم. 12:22؛ رُوم. 11:1، 2
15 مَاغَارْ ڒْحُوكْمْ أَذْ د-إِذْوڒْ غَارْ ثْسڭْذَا،
مَارَّا إِنِّي غَارْسنْ ؤُڒْ إِسڭّْمنْ
أَذْ ت-إِ-د-ضفَّارنْ.
16 مَانْ ونْ كِيذِي إِ غَا إِبدّنْ
ضِيدّْ إِ إِعفَّاننْ؟
مَانْ ونْ خَافِي إِ غَا إِوْثنْ
ضِيدّْ إِ يِينِّي إِتّڭّنْ ڒْغشّْ؟
17 مْڒِي وَارْ إِدْجِي سِيذِي ذ ثْوِيزَا إِنُو،
إِڒِي إِزْذغْ ڒعْمَارْ إِنُو عْڒَاحَاڒْ
18 مَاڒَا نِّيغْ: ’أَضَارْ إِنُو إِتّفْرِيغْ!‘،
خنِّي ثطّفْ أَيِي
ثْمخْسِيوْثْ نّشْ إِشوَّارنْ، أَ سِيذِي!
19 مَاڒَا مَّارْنِينْ ذَايِي إِخَارِّيصنْ
أَڒْ طَّارْفْ،
ثُوغَا ڒعْمَارْ إِنُو إِتَّارّْ مژْرِي
ذڭْ ؤُسْفوّجْ نّشْ.
20 مَا ثخْسذْ أَذْ كِيذكْ إِسّْمُونْ
ڒْْكُورْسِي ن ؤُهلّكْ،
ونِّي إِسِّيوْضنْ ڒغْبنْ
خْ ذْسَاسْ ن ثوْصيّثْ؟
21 نِيثْنِي حصَّارنْ ڒعْمَارْ ن ؤُمْسڭَّاذْ،
شهّْذنْ خْ إِذَامّنْ إِمزْذَاڭنْ س ڒْغَارْ.
22 سِيذِي ثُوغَا أَيِي ذ إِجّْ ن لْبُورْجْ يُوعْڒَانْ،
أَربِّي إِنُو ذ ثَاصْضَارْثْ ن ثَاروْڒَا إِنُو.
23 نتَّا أَذْ خَاسنْ إِسّعْقبْ
ڒْمُوعْصِييّثْ نْسنْ،
أَمْ تّڭّنْ ڒْغَارْ نْسنْ أَذْ ثنْ إِثحَّا.
سِيذِي، أَربِّي نّغْ، أَذْ ثنْ إِثحَّا.